„რესპუბლიკური პარტიის“ ლიდერს თინა ხიდაშელს სხვა შემთხვევა არ ახსენდება, რომ დროის ასეთ მცირე მონაკვეთში ხელისუფლებას ამდენი შეცდომა დაეშვას, როგორც ეს მოხდა ბიძინა ივანიშვილის პოლიტიკურად გააქტიურების საპასუხოდ.  presage.tv თინა ხიდაშელს ესაუბრა.

რა გაგრძელება ექნება ბიძინა ივანიშვილის ბოლოდროინდელ გააქტიურებასა და ხელისუფლების მიერ მის მიმართ სადამსჯელო მანქანის ამუშავებას? ხელისუფლების რეპრესიული პოლიტიკა საზოგადოებაში ან თვით ივანიშვილში მძაფრ საპასუხო რეაქციას გამოიწვევს?

- ხელისუფლება ყველაფერს მისთვის ჩვეულ სტილში აკეთებს, რომ საზოგადოება გამოიწვიოს, გააღიზიანოს, მაქსიმალური წნეხის ქვეშ ამყოფოს. ეს არ არის ახალი. სამწუხაროდ, ჩვენ ამ ამბებს შევეჩვიეთ. უბრალოდ, დღეს რაც განსხვავებულია, ჩემი აზრით, ეს არის დაბნეულობის ძალიან მაღალი ხარისხი და, შესაბამისად, შეცდომების დიდი რაოდენობა, რაც პირველსავე დღეებში უკვე დაუშვა ხელისუფლებამ. არცერთი პროცესის დროს, 2005 წლიდან მოყოლებული, არ მახსენდება, რომ ერთმანეთის მიყოლებით, დროის ასეთ მოკლე შუალედში, ამდენი შეცდომა დაეშვას ხელისუფლებას. სტილი არ იცვლება. ამ უთანასწორო ბრძოლაში, რომელიც ხელისუფლებამ წამოიწყო, მზად ვართ სრულად გავიზიაროთ რისკები. სრულიად გაუგებარი და წარმოუდგენელია, ქვეყანაში გყავდეს ხელისუფლება, რომელიც ყოველი ჯანსაღი პოლიტიკური პროცესის გაჩენისთანავე პოლიტიკურ ტერორს იწყებს, იწყებს პოლიციის პოლიტიკურ ჟანდარმერიად გამოყენებას და ცდილობს, ქუჩური მეთოდებით, „ხელი გადაგიწიეს“ პრინციპით, გაუსწორდეს პოლიტიკურ ოპონენტებს. იმ მდგომარებით, რაც ბოლო სამი დღეა, საქართველოში შეიქმნა, მიხეილ სააკაშვილი ცდილობს, მოკლას პოლიტიკური პროცესი. „რესპუბლიკელები“ ყველაფერს გაკეთებთ იმისთვის, რომ ბიძინა ივანიშვილთან და ჩვენს პარტნიორებთან ერთად ეს პროცესი პოლიტიკური კონკურენციის ჩარჩოებიდან არ გავიყვანოთ. თუმცა ყველა სხვა ტიპის გადაწყვეტილება, ხელისუფლების მხრიდან დამოკიდებულების, მათი მოქმედებების შედეგი იქნება. დაპატიმრებები, რუსეთი მოდის, რუსის სახელით მოდიხარ, - ასეთი ტიპის ბრალდებები, შვილის მეგობრის დაპატიმრება, რომ არაფერი ვთქვათ, იმ საოცრებაზე, რაც „ქართუ ბანკის“ თანამშრომლებთან მიმართებით განხორციელდა, მოქალაქეობის ჩამორთმევა და მთელი ისტერია, ძალიან კარგი დასტურია, რომ ახალს ვერაფერს იგონებს ხელისუფლება. მეთოდები ზუსტად იგივეა, რაც - მთელი ამ წლების განმავლობაში. უბრალოდ, დღეს ერთი განსხვავება შეინიშნება - პანიკის უფრო მაღალი ხარისხი, ვიდრე ეს მანამდე იყო. ხელისუფლება უფრო მეტ შეცდომას უშვებს, ვიდრე აქამდე უშვებდა. ჩვენ ვიზიარებთ პასუხისმგებლობას, მზად ვართ, სრულად გავიზიაროთ ის რისკებიც, რომელსაც ეს პოლიტიკური პროცესი შეიცავს. ძალიან კარგად ვაცნობიერებთ, რომ მიხეილ სააკაშვილი არ აპირებს დემოკრატიული ფორმებითა და თამაშის წესებით მიყვეს პოლიტიკურ კონკურენციის პროცესს. ეს სიახლე არ არის „რესპუბლიკელებისთვის“. სამწუხაროდ, ასეთი პოლიტიკური რისკების წინაშე ძალიან ბევრჯერ ვმდგარვართ, მაგრამ ჩვენ გვინდა, ყველამ იცოდეს, ამ ბრძოლაში არავინ არ არის მარტო.

„თავისუფალი დემოკრატების“ ლიდერმა ირაკლი ალასანიამ თქვენი მისამართით გაკეთებულ განცხადებაში აღნიშნა, რომ იგი თავად ირჩევს პარტნიორებს და ეს მისი გადასაწყვეტია. როგორ წარმოგიდგენიათ მასთან თანამშრომლობა?

- არ ვაპირებ ალასანიასთან მედიის საშუალებით გაკენწლავებას. მგონია, რომ გაცილებით უფრო სერიოზული დრო დგას დღეს ქვეყანაში და უფრო სერიოზული რისკებია.

თქვენ ხელისუფლების შეცდომები ახსენეთ, მაგრამ გულწრფელად რომ ვისაუბროთ, ივანიშვილის წერილებიდან გამომდინარე, დაინახეთ მისი შეცდომები? ივანიშვილის პარტნიორებს უჭირთ ხოლმე მის შეცდომებზე საუბარი.

- დიახ, ვისაუბროთ გულწრფელად. მე ვერანაირ შეცდომებზე ვერ ვილაპარაკებ, ეს ამ ადამიანის არჩევანია. შეცდომა და დანაშაულებრივი შეცდომა, რასაც ხელისუფლება უშვებს, სრულიად სხვა სიბრტყეა, რადგან ის ძალაუფლების მქონეა. ამიტომაც ხელისუფლების „შეცდომა“ ვიღაცის უბედურებას მოასწავებს. სინამდვილეში, ხელისუფლების დანაშულებრივი მოქმედებები (და არა შეცდომა) ნიშნავს, რომ ვიღაცა ციხეში მიდის, ვიღაცას სამსახურიდან ათავისუფლებენ... ივანიშვილის პოლიტიკური არჩევანი კი ასეთია. ჩვენ შეიძლება მოგვწონს ან არ მოგვწონს, ეს სხვა თემაა, მაგრამ ვერ გეტყვით, რომ მან შეცდომა დაუშვა, რადგან ეს ამ ადამიანის პოზიციაა, მოვლენების მიმართ მისი დამოკიდებულებაა. მან გადაწყვიტა, დადოს წყალგამყოფები, რაშიც აბსოლუტურად ვეთანხმები.

„რესპუბლიკელებს“ ძალიან ბევრჯერ გვითქვამს, მათ შორის, საკონსტიტუციო ცვლილებების დროსაც, რომ ეს არის წყალგამყოფი. ამ კონსტიტუციაზე, ამ საკონსტიტუციო ცვლილებებზე ხმის მიცემა წყალგამყოფია დემოკრატიულ და არადემოკრატიულ არჩევანს შორის. სანდრო გირგვლიანი - ეს იყო წყალგამყოფი და ეს წყალგამყოფი დაიდო, სხვათაშორის, არა მხოლოდ ჩვენი მხრიდან, იმ პარტიების მხრიდანაც, რომლებიც დღეს ამბობენ, რომ ასეთი საუბარი მათთვის მიუღებელია. „ახალმა მემარჯვენეებმა“, პირადად დავით გამყრელიძემ, ძალიან ბევრჯერ, სწორედ სანდრო გირგვლიანის საქმის დროს, შემდეგ კი კერძო საკუთრების დაწიოკებისას, გააკეთა განცხადება, რომ ეს იყო წყალგამყოფი  სხვადასხვა პოლიტიკურ ძალებს შორის. ამიტომ ეს პოლიტიკაში ჩვეულებრივი ტერმინოლოგიაა და დღეს ნურავინ დაიწყებს თამაშს, რომ, ვაიმე, ივანიშვილმა ეს როგორ თქვა. თუ პოლიტიკაში მოდიხარ, თავიდანვე უნდა დააზუსტო, ვინ არიან შენი პარტნიორები, რათა საზოგადოებამ იცოდეს, როგორი პოლიტიკური გემოვნების მქონე ხარ.

ივანიშვილის მომავალ პარტნიორთა სიაში „რესპუბლიკელები“ რომ არ მოხვედრილიყავით და ფსევდოოპოზიციის რიგებში რომ ჩაეყენებინეთ, მაშინაც ასე შეაფასებდით მის განცხადებებს? თუნდაც შალვა ნათელაშვილის ამჟამინდელი ცნობიერებიდან რომ გამოვიდეთ, როგორი რეაქცია გექნებოდათ ივანიშვილის საპასუხოდ?

- მე არავის ცნობიერების გაგებას არ ვაპირებ, არც ფსიქოლოგი ვარ, მაგრამ ჩვენი პოზიცია ზუსტად ის იყო, რასაც გეუბნებით.

თავიდან „რესპუბლიკელების“ პოზიცია, თუნდაც ბატონი ლევან ბერძენიშვილის მხრიდან, ივანიშვილის შეფასება უფრო მკვეთრი იყო, მერე კი შერბილდა ტონალობა.

- მომწონს თუ არ მომწონს, ამას არ ვლაპარაკობ, მე ვამბობ, რომ ეს არის ივანიშვილის არჩევანი, რასაც ჩვენ შეცდომას ვერ დავარქმევთ და „რესპუბლიკელებს“ თავიდანვე ასეთი პოზიცია გვქონდა.

თუმცა, რამდენადაც ვიცი, ივანიშვილთან საუბრისას თქვენ მიუთითეთ, რომ ვანო მერაბიშვილთან მიმართებით სხვაგვარი დამოკიდებულება გქონდათ.

- ჩვენ ვთქვით, რომ პირველმა ეშელონმა - მიშა სააკაშვილმა, ვანო მერაბიშვილმა და გიგა ბოკერიამ - „რესპუბლიკელებმა“ ეს სამი გვარი დავასახელეთ, ყოველგვარი დემოკრატიული მისწრაფებების რესურსი ამოწურეს. მათთან შეუძლებელია რაიმე ტიპის პოზიტიური თანამშრომლობა. თუმცა იქვე საუბარი იყო, რომ ის, რაც თქვა ბიძინა ივანიშვილმა, სწორი გახლდათ. ეს არ ნიშნავს, რომ მერაბიშვილი შენი პარტნიორი გახდება, მაგრამ მას აქვს შანსი ამ ქვეყანაში ცხოვრების. ყველას შეიძლება შეუმსუბუქდეს პასუხისმგებლობა, თუკი ქვეყანას ამ მძიმე მომენტში დაეხმარება, ამისთვის არსებობს სასამართლო. კიდევ ერთხელ ხაზგასმით ვამბობ, არავინ არ ჩათვალოს ეს ჩემს მიერ რამის დარბილებად მერაბიშვილის მიმართ. ის არის ადამიანების სწორედ იმ მცირე ნაწილში, რომლის გამოც ქვეყანა დღეს ასეთ მდგომარებაშია, მაგრამ მას აქვს არჩევანი გასაკეთებელი.

თქვენც თუ ფლობთ ინფორმაციას, რომ ხელისუფლების მეორე და მესამე ეშელონებიდან ოპოზიციისკენ გადაბარგებას აპირებენ, რის შესახებაც ალასანიამ განაცხადა?

- ეს ყოველთვის ასე ხდება. ამაში სიახლე და საოცარი არაფერი არ არის.

რა გაძლევთ ამის თქმის საფუძველს, მაშინ, როცა საპარლამენტო უმრავლესობის ერთ-ერთი ლიდერი გოკა გაბაშვილი აცხადებს, რომ ივანიშვილის ადგილი პოლიტიკაში არ არის და ის გულუბრყვილო ადამიანია, როცა პუტინის გადემოკრატიულებას ელის.

- გოკა გაბაშვილი, მე მგონი, არ არის მეორე და მესამე ეშელონი და გოკა გაბაშვილს არც არავინ არსად ეპატიჟება. აქ საუბარია ადამიანებზე, რომლებიც საკუთარ ქვეყანას ემსახურებიან. კი ბატონო, ისინი ამ რეჟიმის სამსახურში არიან, მაგრამ მათ არჩევანი არ აქვთ. პირველი დღიდან მოყოლებული, ამას ჩვენ ყოველთვის ვამბობდით, რომ არავინ აპირებს არც ბიუროკრატიაზე და არც სხვადასხვა სამინისტროებში თანამდებობის პირებზე ანგარიშსწორებას. თუკი ადამიანებს სისხლის სამართლის დანაშაული არ აქვთ ჩადენილი, ისინი არიან ჩინოვნიკები, რომლებიც ასრულებდნენ კანონით გათვალისწინებულ ვალდებულებას. მათთან არავის არაფერი საბრძოლო არ აქვს. ამ ადამიანებმა უნდა გააცნობიერონ არჩევანი, რომელიც ქვეყნის წინაშე დგას.

საპარლამენტო უმრავლესობის წევრი შოთა მალაშხია მიიჩნევს, რომ ივანიშვილის რუსეთთან კავშირის ეჭვებს ბიზნესმენის მიერ სიტყვა „ოკუპაციის” გამოყენება ვერ გააქარწყლებს.   

- ამ ხელისუფლებისგან არ მიკვირს ასეთი განაცხადი. ამ ადამიანებს იმ ენაზე უნდა ესაუბრო, რაც მათ ესმით. ამიტომაც ბატონმა ბიძინამ მათთვის გასაგებ ენაზე განმარტა, რომ რუსეთმა საშინელი აგრესია გამოამჟღავნა აგვისტოს მოვლენების დროს და, პრაქტიკულად, საქართველოს ტერიტორიის 20% დღეს ოკუპირებულია. ამის მიუხედავად, ბიზნესმენი მიიჩნევს, რომ რუსეთთან ურთიერთობა დასალაგებელია, განსხვავებით ბენდუქიძისგან, რომელმაც თავის დროზე აღნიშნა, წარმოიდგინეთ, ზემოთ ოკეანეა და მეტი არაფერი იქ არ არისო. სინამდვილეში, ჩრდილოეთით ოკეანე კი არა, უზარმაზარი რუსეთია და ამას ვერ გავექცევით. თანაც რუსეთი მუდამ ასეთი იქნება, ამიტომ მეზობლის მიმართ უაზრო ჩქმეტა და უაზრო სიტყვების გამოყენება გაუმართლებელია.

ივანიშვილს იმედი აქვს, რომ ევროპა და ამერიკა დაეხმარება ჩვენს ქვეყანას. მისი სურვილია პრინციპული და კორექტული პოზიცია დამყარდეს რუსეთთან.

რით დასრულდება ივანიშვილსა და ხელისუფლებას შორის დაწყებული „ორთაბრძოლა“?

- დარწმუნებული ვარ, რომ ეს საქართველოს გამარჯვებით დამთავრდება.

ახლახანს საქართველოში ჩამოსულ აშშ-ის სახელმწიფო მდივნის მოადგილეს ოპოზიციის ლიდერები შეხვდნენ, მათ შორის „რესპუბლიკელებიც“. რა თემაზე ისაუბრეთ?

- დღეს აშშ-ის სახელმწიფო მდივნის მოადგილეს, უილიამ ბერნსს, ლევან ბერძენიშვილიც შეხვდა. საუბარი შეეხო პროცესებს, რომელიც ქვეყანაში ვითარდება. ბატონ ლევანს რამდენიმე მთავარი თეზა ჰქონდა: პირველი, რომ, მართალია, საქართველოს მოსახლეობის არჩევანი ნატოსა და ევროკავშირთან ინტეგრაციაა, მაგრამ, სამწუხაროდ ეს გზა მიხეილ სააკაშვილთან ერთად არ მიდის. ეს გზა სინგაპურისკენ მიდის. სინამდვილეში, სინგაპურშიც კი არ მიდის ეს გზა. ეს ასეთი ყაიდის, მარადიული ლიდერობის პრეტენზიის მქონე ხელისუფალის გზა არის, ვიდრე დემოკრატიაზე, არჩევითობასა და ცვლილებაზე ორიენტირებული სახელმწიფოს გზა. მეორეც, 2012 წლის მნიშვნელოვნების შესახებაც ისაუბრეს, რადგან ეს არ არის უბრალოდ საპარლამენტო არჩევნები, რომელიც შეიძლება ქვეყანაში ხშირად ტარდებოდეს, არამედ ეს გადამწყვეტი არჩევნები იქნება მომავალი  10-15 წლის განმავლობაში ქვეყნის სტრატეგიული არჩევანისთვის. რა გზას დაადგება საქართველო, სწორედ 2012 წლის არჩევნების შედეგებით გახდება ნათელი.

მესამე, ეს იყო მედიის მდგომარება და ის არაკონკურენტული გარემო, რომელიც ქვეყანაში ამ თვალსაზრისითაა შექმნილი. რამდენადაც ჩვენთვის ცნობილია, ბატონი ბერნსი ყველაფერზე ინფორმირებული გახლდათ. ეს არ არის სახელმწიფო დეპარტამენტი, ან ისეთი სტრუქტურა, სადაც გადაწყვეტილებები სპონტანურად მიიღება. ბერნსმა  სრულად გაიზიარა ჩვენი პოზიცია, განსაკუთრებით, მედიის ნაწილსა და 2012 წლის მნიშვნელოვნების საკითხში.

რამდენადაც ვიცი, ამ ვიზიტის დროს ივანიშვილის შესახებაც იყო საუბარი. ეს ვიზიტი შემთხვევით დაემთხვა ივანიშვილის პოლიტიკურ გააქტიურებას?

- ვერ გეტყვით, მაინცდამაინც ახლა რატომ ჩამოვიდა აშშ-ის სახელმწიფო მდივნის მოადგილე. საერთოდ, აშშ სახელმწიფო დეპარტამენტის ასეთი მაღალი თანამდებობის პირის ვიზიტები ორ და სამ დღეში არ იგეგმება. თუმცა, რა თქმა უნდა, ბიძინა ივანიშვილსაც შეეხო საუბარი. ლევან ბერძენიშვილმა გვითხრა, რომ მისი, ირაკლი ალასანიასა და დავით გამყრელიძის მხრიდანაც შედგა საუბარი ივანიშვილის, მისი ფაქტორის შესახებ, ქართულ პოლიტიკაში მისი ადგილის თაობაზე. მაგრამ აშშ-ის სახელმწიფო მდივნის მოადგილის რეაქციასთან დაკავშირებით რომ გესაუბროთ, უფლებამოსილი არ ვარ.

აშშ-ის წარმომადგენელი მხოლოდ განცხადებებით შემოიფარგლა, თუ ქმედითად რაიმე შეიცვლება საქართველოსთვის?

- ეს საუბრის ერთ-ერთი თემა გახლდათ. ბატონმა ლევანმა უთხრა ბატონ ბერნს, გასაგებია, ეს დარღვევები, რაც ახლა ხდება, თებერვალში სახელმწიფო დეპარტამეტის ანგარიშში ალბათ აისახება, მაგრამ ეს არ არის საკმარისი და, რომ მათგან უფრო ქმედითი ღონისძიებებისა და აქტიური მოქმედების მოლოდინი არსებობს. დანარჩენს ვნახავთ.