ლიტვური "NewsBalt"-ი "ნაციონალური მოძრაობის" ერთ-ერთი ლიდერის გივი თარგამაძის ინტერვიუს აქვეყნებს.

"რუსეთში არეულობის ორგანიზებაში ბრალდებული გავლენიანი ქართველი პარლამენტარი გივი თარგამაძე აღიარებს, რომ ცოტა ხნის წინ ლიტვაში იმყოფებოდა და აპირებს, შექმნას პრეცედენტი, როდესაც შესაძლებელი იქნება დასავლეთმა პოლიტიკური მოტივებით ადამიანების დევნის შესახებ რუსეთის თხოვნა არ შეასრულოს.

ლიტვურ სააგენტო "BNS"-სთან ინტერვიუში პრეზიდენტ მიხეილ სააკაშვილის თანაგუნდელმა უარი თქვა მისი ამჟამინდელი ადგილსამყოფელის დასახელებაზე, თუმცა დაადასტურა, რომ ცოტა ხნის წინ ვილნიუსში ერთ-ერთმა ქართულმა ტელეარხმა ნახა, რომელიც მისი თქმით, რუსულ სპეცსამსახურებთან ერთად მუშაობს.

თარგამაძის თქმით, იგი არ აპირებს ლიტვას პოლიტიკური თავშესაფარი სთხოვოს, რადგან საქართველოს კონსტიტუცია იცავს, რომელიც სხვა სახელმწიფოსთვის საკუთარი მოქალაქის გადაცემას კრძალავს.

საქართველოს პარლამენტის უშიშროებისა და თავდაცვის კომიტეტის ყოფილი ხელმძღვანელი ამტკიცებს, რომ რუსეთი მას დევნის, როგორც კრემლის მიმართ მკაცრ კრიტიკოსს და ადამიანს, რომლის დახმარებითაც სურთ, რუსული ოპოზიციის ლიდერებს გაუსწორდნენ", - წერს "NewsBalt"-ი.

- რუსულმა მედიამ ქართულ ტელეარხზე დაყრდნობით გაავრცელა ინფორმაცია, რომ თქვენ ლიტვაში იმყოფებით. შეესაბამება თუ არა ეს სინამდვილეს და შეგიძლიათ, თუ არა თქვენი ლიტვაში ვიზიტის დეტალები გაგვიმხილოთ?

- ამჟამად ჩემი ზუსტი ადგილსამყოფელის გამხელა არ შემიძლია, თუმცა შემიძლია, გითხრათ, რომ ვიყავი ვილნიუსში და პირდაპირ იმ სახლთან, სადაც ვცხოვროვდი, სამწუხაროდ, რუსული სპეცსამსახურების წარმომადგენლები "შემხვდნენ". ისინი თავისუფლად გადაადგილდებოდნენ მთელ ქალაქში და აქტიურად მოქმედებდნენ ჩვენი პრემიერ-მინისტრის ბიძინა ივანიშვილის პირადი ტელევიზიის ჟურნალისტებთან ერთად, რომლებმაც ფაქტიურად რუსული მედიისთვის მასალები გადაიღეს.

მე მაქვს ასევე მოწვევა ლიტვის სეიმისგან, ანუ ჩემი ვიზიტის მიზანი ლიტვის სეიმის დეპუტატებთან შეხვედრაა "აღმოსავლეთ პარტნიორობის" საკითხებზე, საკითხებზე, რომელიც ჩვენ ქვეყანას აინტერესებს. ვიმედოვნებ, ამ ვიზიტის გაგრძელებას და ვიმედოვნებ, რომ ლიტვა საქართველოს ყველაზე ახლო პარტნიორი და მეგობარია. მე ლიტვაში პირველად არ ვიმყოფები, მე ვარ ჯვრის ორდენის კავალერი "დამსახურებისთვის", ეს ჯილდო ლიტვის სახელის პოპულარიზაციისა და მსოფლიოში მხარდაჭერისთვის მივიღე. ვიმედოვნებ, მომავალში ლიტვაში თავს თავისუფლად ვიგრძნობ.

- როგორ გიპოვეს ლიტვაში ქართული "მე-9 არხის" ჟურნალისტებმა?

- დარწმუნებული ვარ, ისინი რუსულ სპეცსამსახურებთან თანამშრომლობენ და სწორედ მათ მიუთითეს მისამართი. მათ პრაქტიკულად მასალა გადაიღეს არა საკუთარი ტელევიზიისთვის, მათ დღის ეთერში მხოლოდ რამდენიმე წუთით აჩვენეს, არამედ "РТР"-სთვის. შემდეგ ეს კადრები არ გაუშვიათ, "РТР" კი ორი დღის განმავლობაში ატრიალებდა.

- როდის გნახეს ლიტვაში?

- ეს იყო გასულ კვირას - 4-5 დღის წინ. (ინტერვიუ ლიტვურ მედიაში 15 მარტს გამოქვეყნდა).

- საკუთარი უსაფრთხოებიდან გამომდინარე, არ გსურთ, თქვენი ამჟამინდელი ადგილსამყოფელი დაასახელოთ?

- ვამუშავებ სამომავლო მოქმედების სტრატეგიას, ვამყარებ იურიდიულ ბაზას და შემდეგ განვაცხადებ, სად ვიმყოფები, ეს გარკვეულ დროს მოითხოვს.

- აპირებთ თუ არა ლიტვას პოლიტიკური თავშესაფრის მინიჭების თხოვნით მიმართოთ?

- მე ჩემი ქვეყნის კონსტიტუცია მიცავს - საქართველოს კონსტიტუციაში ნათლად წერია, რომ საქართველო საკუთარ მოქალაქეს სხვა სახელმწიფოს არ გადასცემს. ამიტომ ეს კარგი დაცვაა და ჯერჯერობით ჩემ ქვეყანაში დევნას არ განვიცდი. ანუ, არ არსებობს არანაირი სისხლის სამართლის საქმე. არაბუნებრივი იქნებოდა პოლიტიკური თავშესაფარი მეთხოვა, როდესაც საკუთარ ქვეყანაში დევნას არ განვიცდი, ამიტომ საკითხი უფრო პრინციპულად დგას - მე არა მხოლოდ საკუთარი თავის დაცვა მსურს, არამედ ყველასი, ვინც შეიძლება, ასეთ სიტუაციაში აღმოჩნდეს. ჩემთვის პრინციპულია, შევქმნა ისეთი პრეცედენტი იურიდიულ საფუძველზე, რომ კრემლის რეჟიმმა ევროპის ტერიტორიაზე ან დანარჩენ ცივილურ მსოფლიოში წმინდა პოლიტიკურად მოტივირებული დევნა ვერ შეძლოს. ის უკანონობა, რომლითაც კრემლის რეჟიმი საკუთარ სამშობლოშია დაკავებული, მის საზღვრებს არ უნდა გასცდეს და ცივილიზებულ სივრცეში არ უნდა გავრცელდეს. მე შევქმნი იურიდიულ პრეცედენტს, რათა კრემლს ასეთი შესაძლებლობა არ ჰქონდეს.

- თქვენ ახსენეთ, რომ სამომავლო მოქმედებების სტრატეგიას განიხილავთ. რა ზომების მიღებას აპირებთ საკუთარი თავის დასაცავად - იურიდიულს თუ რაიმე სხვას?

- მე მაინც ვფიქრობ, რომ ევროპის ტერიტორიაზე რუსული სპეცსამსახურები ისეთი უაზრობის მოწყობას ვერ შეძლებენ, როგორც საკუთარ ტერიტორიაზე. ამიტომ არ ვფიქრობ, რომ ფიზიკური დაცვა მჭირდება. ის ადამიანები, რომლებსაც ჩემ დაცვას უწოდებენ, სინამდვილეში ჩემი უახლოესი მეგობრები არიან და არა პირადი მცველები.

ამ კუთხით, მე ვფიქრობ, ევროპის ტერიტორია დაცულია, აქ ცივილური ადამიანები და სამართალი მუშაობს. ამიტომ, ვფიქრობ, საჭიროა იმ უპირატესობების გამოყენება, რომელიც სუფთა იურიდიული თვალსაზრისით ამ ტერიტორიაზე არსებობს.

ძალიან მნიშვნელოვანი რუსეთის მხრიდან ჩემი დევნის მოტივის გაგება, მე 8 წლის განმავლობაში საქართველოს პარლამენტის უშიშროებისა და თავდაცვის კომიტეტის ხელმძღვანელი ვიყავი. საქართველოში იყო ომი, შემდეგ ომის შემდგომი სიტუაცია. მთელი ამ დროის განმავლობაში ყველა ჩემი გამონათქვამი, პოზიცია რუსეთთან, კრემლის რეჟიმთან მიმართებაში ყოველთვის მკვეთრი, მე ვიტყოდი, რადიკალური იყო. ამიტომ ის, რომ კრემლს აქვს ჩემი პოლიტიკური დევნის მოტივი, იმდენად ნათელია, რომ ვფიქრობ, იურიდიული თვალსაზრისით ამის დამტკიცება რთული არ იქნება.

- როგორ აფასებთ რუსეთის მიერ თქვენისთვის წაყენებულ ბრალდებას? რისი მიღწევა სურს რუსეთს ამით?

- ის, რაც "НТВ"-მ აჩვენა, წმინდა წყლის ფაბრიკაციაა. საერთოდ, ეს ტელევიზია ცნობილია იმით, რომ "ფესებეს" ფაბრიკაციებს უჩვენებს. იმას, რასაც "ფეესბე" ქმნის, ჯერ "НТВ" აჩვენებს, შემდეგ საქმეში საგამოძიებო კომიტეტი ერთვება და ახორციელებს საგამოძიებო ქმედებებს, ეს უკვე ყველაფერზე მეტყველებს, რადგან საგამოძიებო ორგანოს ასეთი მყისიერი რეაქცია ბუნებაში არ არსებობს. დარწმუნებული ვარ, რომ ყველაფერი წინასწარ იყო დაგეგმილი, დასახული იყო მკაფიო მიზანი დაეპატიმრებინათ ოპოზიციის ლიდერები, აქტიური ოპოზიციონერები.

აი, თუნდაც ავიღოთ ის ფაქტი, რომ ომის შემდეგ უკვე 4 წელია, მთავარ მტრად საქართველოს ასახელებენ. ამიტომ ახლა თქმა, რომ რომელიმე ოპოზიციონერი ქართველებთან მეგობრობს, ნიშნავს მისი რეპუტაციის შელახვას, რათა შემდგომ რუსეთის მტერთან მეგობრობაში დაადანაშაულონ. რეალურად, მიზანი ნათელია - რუსული ოპოზიციის ერთ-ერთი აქტიური ლიდერი სერგეი უდალცოვი იზოლაციაში მოაქციონ. ის შიდაპატიმრობაში იმყოფება. საბოლოოდ, მას ალბათ, სამწუხაროდ, დააპატიმრებენ. ასე, რომ მე აქ ვფიქრობ, გვერდითი ეფექტი ვარ.

რეალურად, მიზანი სულ სხვაა - კრემლისთვის მთელი ოპოზიციის დაძლევაა, მე კი ის ვარ, ვინც მათ ამ ბრძოლაში დაეხმარებათ. ამავე დროს, ის პირადი ინტერესი, რომელიც უკვე მთელი ეს წლები დაგროვდა ჩემს მიმართ.

- ერთი თვის წინ რუსეთმა თქვენი დაპატიმრების ორდერი გასცა, თქვენ ახსენეთ, რომ ქართული კონსტიტუცია გიცავთ, თუმცა შეგიძლიათ თუ არა მაინც საქართველოში ამ დროისთვის არსებულ პოლიტიკურ ვითარებაში, წარმოიდგინოთ, რომ სამართლებრივი დახმარების საფუძველზე თქვენ მაინც გადაგცენ რუსეთს?

- ვფიქრობ, საქართველოს დღევანდელი ხელისუფლებისთვისაც კი, რომელიც რა თქმა უნდა, ძალიან შორსაა იმ პოზიციიდან, რომელსაც ჩვენ ვატარებდით, რომელიც სულ უფრო და უფრო მიდის რუსეთთან დაახლოებაზე, მათთვისაც კი, მსგავსი გადაწყვეტილების მიღება ძალიან საზიანო იქნება საარჩევნო თვალსაზრისით. მეორე მხრივ, მათ არ ჰყავთ საპარლამენტო უმრავლესობა, რომ მსგავსი გადაწყვეტილება მიიღო. ასეთი გადაწყვეტილება რომ მიიღონ, საჭიროა კონსტიტუციის შეცვლა, ვფიქრობ, ამის გაკეთება არარეალურია.

- თქვენ ასევე პარლამენტის წევრის იმუნიტეტი გაქვთ.

- საქართველოში დიახ, მე მაქვს საპარლამენტო იმუნიტეტი, მისი შეცვლა მხოლოდ პარლამენტში კენჭისყრითაა შესაძლებელი, ეს კი ახლა პრობლემატურია.

- როდესაც თქვენ დაცვის სტრატეგიაზე საუბრობთ, თქვენ ევროპის ტერიტორიაზე ყოფნას გულისხმობთ?

- უპირველესად, მსურს შევქმნა პრეცედენტი იმისთვის, რომ მსგავს სიტუაციაში სხვა ადამიანები არ აღმოჩნდნენ, რათა ევროპაში თავისუფლად გადაადგილებაში პრობლემები არ შეექმნათ. ეს ჩემთვის ძალიან აქტუალურია, ამიტომ, პირველ რიგში, ამ მიმართულებით, გარკვეული გამარჯვების მიღწევას შევეცდები.

- კონკრეტულად რის გაკეთებას აპირებთ ამ მიმართულებით?

- მივაღწევ იმას, რომ ევროპულმა ქვეყნებმა აღიარონ, რომ ეს დევნა პოლიტიკურად მოტივირებულია და ამ ბრალდებით საკუთარ ქვეყნებში ძებნა არ გამოიყენონ.

- როგორ აფასებთ საქართველოში საპარლამენტო არჩევნების შემდეგ შექმნილ სიტუაციას? თქვენი აზრით, როგორ შეიცვალა სიტუაცია?

- შეიძლება ითქვას, რომ ქვეყანა მთლიანად გაჩერდა. ქვეყანა, რომელშიც იყო როგორც სახელმწიფო ინფრასტრუქტურის, ისე სხვა სახის მშენებლობების დიდი ტალღა, რომელიც წინ დიდი ტემპით მიიწევდა, უეცრად სრულად შეჩერდა. ზოგიერთი მოვლენა კი უკან აბრუნებს. ეს არა მხოლოდ რუსეთთან დაახლოების მცდელობაა, თუმცა რა თქმა უნდა, სიტუაცია ოკუპირებულ ტერიტორიებთან დაკავშირებით, თავისუფალი მედიის მდგომარეობა, თავისუფალი სასამართლო. კრიმინალთანაც იგივე - სრულიად ჩამონგრეულია ის პოლიცია, რომელიც მთელმა ევროპამ აღიარა როგორც ჩვენი სიამაყის საგანი, ის ხომ სრულიად თავისუფალი იყო კორუფციისგან და მოსახლეობის დიდი ნდობით სარგებლობდა. ეს ყველაფერი დანგრეულია.

ეს საერთო მძიმე ფონს განსაზღვრავს. თუმცა ყველას ესმის, რომ ასე უსასრულოდ გაგრძელება არ შეიძლება, ვფიქრობ, არსებობს იმის გაგება, რომ ამ საპირისპირო პროცესს შესაძლოა, საფუძველი ეყრება. რა თქმა უნდა, ეს ხდება ნელა, ვფიქრობ, ჩნდება გარკვეული ნიშნები იმისა, რომ ელექტორატი სულ უფრო და უფრო მეტად ხვდება, რომ ეს ის სიტუაცია არ არის, რომელსაც ხმა მისცეს. ახლა ყველაზე მნიშვნელოვანია ნგრევის პროცესი შეჩერდეს, რათა გარკვეული ბალანსი წარმოიქმნას, რომ ყველაფერი სამუდამოდ არ დაიკარგოს და ახლა სწორედ ამით ვართ ძირითადად დაკავებული.

- ქართული სამართალდამცველი ორგანოები არ ცდილობდნენ თქვენ დაკავშირებულ რუსეთის ორდერზე რეაგირებას?

- ერთადერთი, რაც იყო, ეს იყო საქართველოს გენერალური პროკურატურის პასუხი, სადაც მათ მოახდინეს საქართველოს კონსტიტუციის იმ მუხლის ციტირება, რომლითაც საქართველო საკუთარ მოქალაქეს სხვა სახელმწიფოს არ გადასცემს. ასევე დაადასტურეს ჩემი იმუნიტეტი საქართველოს ტერიტორიაზე. ასევე განაცხადეს, რომ რუსულ მხარეს მათთვის ის მასალები არ გაუგზავნია, რომლის საფუძველზეც ორდერი გაიცა.

ასევე უნდა ითქვას, რომ რუსეთი დროდადრო რაღაც ცირკს აწყობს, ახლახანს იყო სასამართლო სხდომა, სადაც იყო თითქოს ჩემი ადვოკატი, რომელმაც წინა სარჩელი გაასაჩივრა. ეს არ არის ჩემი ადვოკატი. ეს არის ხელისუფლების მიერ დაქირავებული ადვოკატი, რომელსაც არ ვიცნობ და არასოდეს მინახავს. ეს არის რაღაც მოჩვენებითი დემოკრატიის თამაში.

- უახლოეს პერიოდში აპირებთ საქართველოში დაბრუნებას?

- რა თქმა უნდა, დროის დიდი ნაწილი მე ჩემ ქვეყანაში ვიქნები, რამდენადაც როგორც უკვე ვთქვი, იქ საკმაოდ დრამატული მოვლენები ხდება - ჩემი ძირითადი სამუშაო იქ არის, ადგილზე, თუმცა რა თქმა უნდა, არ დავივიწყებ იმას, რომ ევროპაში ჩემს მიერ ნახსენები პრეცედენტი შევქმნა.

- თქვენ ახსენეთ, რომ ლიტვაში ლიტვის პარლამენტის რიგ წევრებს შეხვდით. კონკრეტულად ვისთან გამართეთ შეხვედრები?

- მე მაქვს მოწვევა, რომელიც არის მოქმედი და ვიმედოვნებ, რომ შეხვედრები, რომელიც უნდა გამართულიყო, იქნება.

- გრძნობთ თუ არა თავს უსაფრთხოდ? ფიქრობთ თუ არა, რომ თქვენ სიცოცხლეს საფრთხე ემუქრება?

- ჩემ სამსახურში მსგავს სიტუაციებს მეტნაკლებად შევეჩვიე. ამიტომ ეს რომ ჩემთვის გადამწყვეტი ფაქტორი ყოფილიყო, არ ვიმუშავებდი იქ, სადაც ვმუშაობ. რა თქმა უნდა, მეორე მხრივ, ადამიანები, რომლებმაც ლონდონში ადამიანი ატომური ბომბით გამოკვებეს, რა თქმა უნდა, სახიფათო არიან.

- გასულ წელს რუსეთში გაჩნდა ინფორმაცია იმის შესახებ, რომ ლიტვაში თითქოს, ჩატარდა სემინარი, რომელზეც რუსულ ოპოზიციონერებს პროტესტისთვის ამზადებდნენ. ამტკიცებდნენ, რომ ერთ-ერთი ასეთი სემინარი თქვენ დააფინანსეთ. იცით თუ არა მსგავსი სემინარების შესახებ და შეუწყვეთ თუ არა მას გარკვეული ფორმით ხელი?

- სამწუხაროდ, რუს ოპოზიციონერებს საერთოდ არ ვიცნობ. ასე, რომ მათ დაფინანსებას ვერ შევძლებდი. როდესაც ასეთი განცხადებები კეთდება, ძალიან მარტივია დამტკიცება - თუ ეს რაიმე კონკრეტულს ეფუძნება, საჭიროა მისი წარმოდგენა. რა თქმა უნდა, არ არსებობს არანაირი მტკიცებულები იმისა, რომ მე რაიმეს ვაფინასებდი. მე სხვათაშორის, არც ისეთი მდიდარი ადამიანი ვარ, რომ მსგავსი ღონისძიებები დავაფინანსო.

ლიტვა ასევე რუსეთის მეგობართა სიაში ძალიან იშვიათად ჩანს. გარკვეული აგრესია კი ლიტვის, როგორც თავისუფალი ქვეყნის მიმართ, რუსეთში ასევე არსებობს. ამიტომ არ შეიძლება, ეს აღვიქვათ, როგორც დიდი სიახლე, რომ ისინი იტყვიან ცუდის როგორც ლიტვაზე, ასევე საქართველოზე.

- რა სახის დახმარებას ელით ლიტვისგან, როდესაც საუბრობთ ევროპაში იურიდიული პრეცედენტის შექმნაზე იმ პირებთან მიმართებაში, რომლებსაც პოლიტიკური მოტივებით დევნიან?

- თუ გამოვა, კარგი იქნება, რომ ეს არ იყოს მხოლოდ ჩემ საკითხზე გადაწყვეტილება, არამედ იყოს პრეცედენტული გადაწყვეტილება - ანუ, მაშინ, როდესაც სახეზეა აშკარა პოლიტიკური დევნა, ავტომატურად ასეთ საქმეებზე დევნა არ განხორციელდეს. ჩემთვის ლიტვა ყველაზე ახლო ქვეყანა და ყველაზე მეგობრულია და ჩვენ ძალიან ბევრი რამ გვაერთიანებს ჯერ კიდევ ისტორიული დროიდან, ბოლო ომიდან, იმიტომ, რომ ლიტვამ დაამტკიცა, რომ ის არა მხოლოდ მეგობარი, არამედ ყველაზე ახლო მეგობარია. ამიტომ, რა თქმა უნდა, ჩემი კეთილი იმედები ყოველთვის დაკავშირებული იყო ლიტვასთან.

- რას ფიქრობთ, რუსეთში არსებულ სიტუაციასთან დაკავშირებით? ხედავთ თუ არა ამ ქვეყანაში ცვლილებების პერსპექტივას?

- ვფიქრობ, რომ სამწუხაროდ, ახლა ოპოზიციურ ბანაკში გარკვეული სტაგნაციის მომენტია. თუ შეიძლება, ასე ითქვას, კრემლი ახლა ბოლომდე ახშობს იმ ოპოზიციას, რომელიც ამდენი წელი არსებობდა. ამიტომ, ვფიქრობ, პროცესი გარკვეულწილად გაჭიანურდება. თუმცა შემდეგ აუცილებად გაჩნდება ახალი ტალღა, რომელიც მოვა შესაძლოა, არა იმავე განწყობით, რაც ამჟამინდელ ოპოზიციას აქვს, არამედ ახლით. რუსეთის პოზიცია გაზის ბაზარზე მცირდება, თითქმის იგივე სიტუაციაა ნავთობპროდუქტების ბაზარზე. ამიტომ ის დიდი თანხები, რომელიც კრემლში პრაქტიკულად ჰაერიდან ხვდება, გაქრება და რა თქმა უნდა, ეს განწყობა გაიზრდება. ამიტომ პრობლემები იქნება, ცვლილებები აუცილებლად მოხდება, უბრალოდ უნდა ვნახოთ, ეს რამდენ დროს დაიკავებს. დარწმუნებული ვარ, ეს არ იქნება კიდევ ორი ან ათი ვადა იმ პრეზიდენტის, რომელიც დღეს არის.