ორ თვეზე მეტია, რაც ექსპრემიერი გიორგი გახარია საქართველოში არ იმყოფება. 30 აგვისტოს კი გავრცელდა ინფორმაცია, რომ მან გერმანიაში ბინადრობის უფლება მიიღო. მის პარტიაში აცხადებენ, რომ გახარია ამჟამად ევროკავშირში ხანგრძლივი საქმიანობისთვის საჭირო პროცედურებს გადის და „უახლოეს დღეებში“ თავად გააკეთებს განცხადებას თავისი გეგმების შესახებ. ანალიტიკოსთა ნაწილი არ გამორიცხავს, რომ ექსპრემიერი უშუალოდ 4 ოქტომბრის ადგილობრივი არჩევნების წინ დაბრუნდეს სამშობლოში.

გიორგი გახარიას მიერ საქართველოს დატოვების შესახებ მას შემდეგ გახდა ცნობილი, რაც იგი ხელმეორედ დაიბარეს პარლამენტის დროებით საგამოძიებო კომისიაზე. კომისიის ხელმძღვანელის, თეა წულუკიანის თქმით, როდესაც 21 ივნისს გახარიას მათი წარმომადგენელი დაუკავშირდა, ის საქართველოში უკვე აღარ იმყოფებოდა და კომისიას ონლაინ რეჟიმში ჩართვა შესთავაზა. გიორგი გახარია მეორედ 23 ივნისს უნდა გამოკითხულიყო, თუმცა, საბოლოოდ, კომისიის სხდომას 2 ივლისს ონლაინ ჩაერთო.

მანამდე, 14 აპრილს, გახარია უკვე იმყოფებოდა კომისიის სხდომაზე ჩორჩანას მოვლენებთან დაკავშირებით. მისი ხელმეორედ დაბარება კი უკვე 20 ივნისის საპროტესტო აქციის ცნობილ დარბევას უკავშირდებოდა.

30 აგვისტოს „რუსთავი 2“-მა თავის წყაროებზე დაყრდნობით გაავრცელა ინფორმაცია, რომ გიორგი გახარიამ გერმანიაში ბინადრობის უფლება მიიღო და ახლა თავისი თანაპარტიელის, ანა ბუჩუკურის დახმარებით, ერთ-ერთ უცხოურ ბანკში ანგარიშის გახსნაც სურს.

პარტიაში „გახარია საქართველოსთვის“ არ აკონკრეტებენ, მიიღო თუ არა პარტიის ლიდერმა გერმანიაში ბინადრობის უფლება. ამ თემაზე ჟურნალისტის კითხვის საპასუხოდ პარტიის წევრმა თამარ კეკენაძემ აღნიშნა:

„მე ერთადერთი, რაც შემიძლია, დაგიდასტუროთ, არის ის, რომ გიორგი გახარია ამ ეტაპზე სამუშაო ვიზიტით იმყოფება ევროკავშირში“.

ამასთან, კეკენაძის თქმით, ასევე უახლოეს მომავალში გაირკვევა, სად გააგრძელებს პოლიტიკურ საქმიანობას და ჩამოვა თუ არა გახარია საქართველოში.

„როდის ჩამოვა საქართველოში, როგორ და სად გააგრძელებს იმ პოლიტიკურ საქმიანობას, რომელიც ემსახურება ამ ქვეყნის ევროპული მომავლის გადარჩენას, იქნება ეს აქტიური ჩართულობა საარჩევნო კამპანიაში ფიზიკურად თუ ევროკავშირის ფარგლებში სამუშაო შეხვედრების გაგრძელება, ამას უახლოეს დღეებში მოქალაქეები თავად გიორგი გახარიასგან გაიგებენ“, - განაცხადა კეკენაძემ.

ანა ბუჩუკურის ინფორმაციით კი, გახარია ჩვეულებრივად გადის იმ პროცედურებს, რაც აუცილებელია „ევროკავშირში ხანგრძლივი საქმიანობისთვის“.

„გახარია დაბრუნდება მაშინ საქართველოში, როცა იქნება საჭირო. ივანიშვილის და „ნაცების“ სურვილი, გახარიამ შეწყვიტოს პოლიტიკური საქმიანობა, რა თქმა უნდა, დარჩება აუხდენელი. გახარია არის იქ, სადაც ყველაზე ეფექტური არის სახელმწიფოსთვის და საერთო საქმისთვის.

„რაც შეეხება ბინადრობის მოწმობას, ევროკავშირში ხანგრძლივი საქმიანობისთვის პროცედურები, რაც საჭიროა, გახარია ამ პროცედურებს გააკეთებს და გაივლის. მე ვერ ვხდები რა არის საერთოდ კითხვის ნიშანი აქ, ან რა არის გასაკვირი, ან კითხვა რაში მდგომარეობს საერთოდ“, - განუცხადა ბუჩუკურმა „ტვ პირველს“.

ანალიტიკოსი რამაზ საყვარელიძე არ გამორიცხავს, რომ გიორგი გახარია არჩევნების წინ ჩამოვიდეს საქართველოში.

„ვერ გეტყვით, რატომ არ ჩამოდის გახარია და რა ელის ჩამოსვლის შემთხვევაში, რადგან ყველაზე მომგებიან სიტუაციაში, ვინც სხოდამზე დაბარებული იყო, გახარია იყო. ალბათ, თვითონ იცის მიზეზი, თუ რატომ უნდა აარიდოს ამ სასამართლოს თავი. თუმცა მე ასე მგონია, რომ უშუალოდ არჩევნების წინ მაინც ჩამოვა.

„ხელისუფლების წევრი იყო, ფაქტია, რომ ანტისახელმწიფოებრივი ნაბიჯები აქვს გადადგმული და ახლა იმალება. სხვა ახსნა ამ დამალვასთან დაკავშირებით, ძალიან ძნელია. აბა, რატომ უნდა იმალებოდეს ადამიანი, თუ არაფერი დაუშავებია?! შეიძლება თქვას - მაინც დამაბრალებდნენ და დამიჭერდნენო, მაგრამ აქ კიდევ ერთი მომენტია - პოლიტიკოსობა ისეთი საქმიანობაა, რომ შეიძლება ნებისმიერ დროს დაიჭირონ, მაგრამ მთავარია მართალი ხარ, თუ მტყუანი. თუ მართალი ხარ, დაჭერა არ გაშინებს. თუმცა, თუ მტყუანი ხარ არა მარტო იმით, რომ სასამართლოზე არ გამოცხადდი, არამედ იმის გამო, რატომაც გიბარებდნენ სასამართლოზე, გეგულება შეცდომები, რამაც შეიძლება ზიანი მოგაყენოს, მაშინ ეს გამოდის ერთადერთი ახსნა, რატომ არ ჩამოდის. ესე იგი იმიტომ არ ჩამოდის, რომ იმდენად დიდი დანაშაულებები აქვს, რომ ეშინია. ციხის არ ეშინია მართალ ადამიანს და ხშირ შემთხვევაში ეს მათზე მოქმედებს ცუდად, ვინც ციხეში ჩასვა. ვინაიდან გახარია ამ სტილს მოერიდა, ჩნდება ეჭვი, რომ რაღაცები შეიძლება გაუხსენონ“, - განაცხადა რამაზ საყვარელიძემ „რეზონანსთან“.

შავი ზღვის საერთაშორისო უნივერსიტეტის პროფესორი და ანალიტიკოსი, ნიკა ჩიტაძე კი გამორიცხავს, რომ ამ ეტაპზე გახარია საქართვრლოში დაბრუნდეს.

„შეიძლება მის მიმართ რაღაც მუქარები და ზეწოლა მიდიოდა. არც ის იყო გამორიცხული, რომ დაეპატიმრებინათ. ამიტომ შეიძლება ამის გამო არ ჩამოდის. ამის მიუხედავად, გახარია დათმობაზე წავიდა და სხდომაზეც გამოცხადდა.

„არ მგონია გახარია ჩამოვიდეს, მათ შორის არც არჩევნების პერიოდში. იმ შემთხვევაში წავა ამაზე, თუ საქართველოში ხელისუფლება შეიცვლება. თუმცაღა მას უხერხულობის შეგრძნება მაინც ექნება, რადგან ჩაითვლება, რომ მისი პარტია გარიგებული იყო „ოცნებასთან“ და ამიტომ მონაწილეობდა არჩევნებში“, - განაცხადა ნიკა ჩიტაძემ „რეზონანსთან“.