...მას შემდეგ, რაც მომავალმა პრემიერმა, ბიძინა ივანიშვილმა «ოცნების» მინისტრთა კაბინეტის შემადგენლობა დაასახელა, რამდენიმე საათია გასული. იმედი არ მაქვს, რომ მინისტრობის რომელიმე კანდიდატი ტელეფონზე მიპასუხებს და ჩემთან შესახვედრად მოიცლის, მაგრამ ნათქვამია, ცდა ბედის მონახევრეაო. ჰოდა, მეც ვცდი და ქვეყნის მთავარი პროკურორობის კანდიდატს ვურეკავ. არჩილ კბილაშვილი აუდიენციას საკუთარი საადვოკატო ფირმის ოფისში მინიშნავს... ვიცი, ხალხს ახალი მთავარი პროკურორისგან იმის გაგება აინტერესებს, დანაშაულში მხილებული «ნაციონალები» როდის დაისჯებიან და დაიწყება თუ არა ისეთი გახმაურებული საქმეების ხელახალი გამოძიება, როგორიცაა, მაგალითად, გირგვლიანის, რობაქიძის, ვაზაგაშვილის ან, სულაც ზურაბ ჟვანიას მკვლელობა, თუმცა ამ მაღალი საზოგადოებრივი ინტერესის მიუხედავად, არჩილ კბილაშვილთან, რომელიც მთავარი პროკურორის ფუნქციის შესრულებას, მაქსიმუმ, ორ კვირაში შეუდგება, ასე ვთქვათ, განყენებული თემით ვიწყებ:    

_ ბატონო არჩილ, ახალ მთავრობაში, გნებავთ, ახალ პოლიტიკურ რეალობაში ერთ-ერთ ყველაზე მნიშვნელოვან თანამდებობას იღებთ, ანუ ადამიანებმა პირველ ოქტომბერს ხმა ცვლილებებს იმიტომ მისცეს, რომ სამართლიანობა აღდგეს და დამნაშავეები დაისაჯონ. მას შემდეგ, რაც ქვეყნის მთავარი პროკურორი ოფიციალურად გახდებით, პირველი ნაბიჯი, რასაც გადადგამთ, რა იქნება?
_ პირველი ნაბიჯი ის იქნება, რომ მოადგილეებს წარვადგენ და გარკვეული სამსახურების ხელმძღვანელები შეიცვლებიან. ამის შემდეგ კი, საქმეს შევუდგები.

_ რას ნიშნავს, «საქმეს შევუდგები»?
_ რას და, იმ ფუნქციას განვახორციელებ, რაც პროკურატურას კანონით აქვს განსაზღვრული. ეს ფუნქციებია: დანაშაულის გამოვლენა, გამოძიებასა და ოპერატიულ სამძებრო საქმიანობაზე ზედამხედველობა, სისხლის სამართლებრივი დევნის განხორციელება. პროკურატურას პოლიტიკური რეპრესიის მანქანის, სასამართლოზე დიქტატის განმახორციელებელისა და სასამართლოში უსამართლო ორთაბრძოლის დამამკვიდრებელის ფუნქციები მოეხსნება. შეიძლება, იმ საქმეების ბედიც გაინტერესებთ, რომლებიც გაუხსნელი, ან დაუსრულებელია...

_ ბატონო არჩილ, ამ საქმეებზე, ცხადია, აუცილებლად შეგეკითხებით, მაგრამ მოდით, ჯერ პროკურატურის დეპოლიტიზაციის საკითხი ამოვწუროთ. პროკურატურა პოლიტიკისგან თქვენი სიტყვიერი ბრძანებით გათავისუფლდება?
_ პროკურატურის პოლიტიზირება რამე იურიდიული დოკუმენტის საფუძველზე არ მომხდარა. ამიტომაც, ყველა პროკურორს და მთელ სისტემას საჯაროდ განემარტება, რომ დამთავრდა დაკვეთების მიცემის, მათი შესრულების დრო და ნებისმიერი ბრალდება, რომელიც ადამიანს წარედგინება, მტკიცებულებათა ერთობლიობაზე უნდა იყოს აგებული.

_ ესე იგი, ამიერიდან ბრალდება მხოლოდ ფარული სატელეფონო საუბრის ჩანაწერით არ იქნება, ასე ვთქვათ, გამაგრებული, არა?
_ თუ სატელეფონო საუბარზე იქნება ლაპარაკი, მაშინ ეს სატელეფონო საუბარი კანონით დამაგრებული უნდა იყოს და ისე აღარ მოხდება, რომ ვიღაცამ ვიღაცას უკანონოდ მოუსმინოს და მერე, ამ მოსმენის გაფორმება ძველი რიცხვებით მოხდეს. ერთი სიტყვით, ყველაფერი ძალიან მარტივია, ანუ ყველამ ვიცით, თუ რა არის უკანონობა და რა _ კანონიერება, მაგრამ აქამდე ადამიანები თვალს ხუჭავდნენ, რომ უკანონო პრაქტიკა შეწყვეტილიყო. ახლა კი, დადგა დრო, როცა ეს აღმოიფხვრება და ადამიანის წინააღმდეგ, ვის მიმართაც სისხლის სამართლის საქმე აღიძვრება, მტკიცებულებათა ერთობლიობა იარსებებს, რომელიც მიუკერძოებელ პიროვნებას დაარწმუნებს, რომ დანაშაულის ნიშნები, მართლაც, არსებობს. მაგალითად, მსოფლიო პრაქტიკით, ქრთამის მიცემა, თუ ფაქტზე წასწრება არ ხდება, დადასტურებას არ ექვემდებარება. ჩვენთან კი, ასე ხდებოდა: შეიძლება, ვინმეს ვინმეზე ეთქვა, სამი წლის წინ ქრთამი მივეციო და ადამიანს ამის საფუძველზე იჭერდნენ. ეს მართლმსაჯულების აბუჩად აგდება იყო.

_ ბატონო არჩილ, რაკიღა მტკიცებულებებზე ვსაუბრობთ, მითხარით, თქვენი მთავარი პროკურორობის დროს მედიაში გამოქვეყნებული მასალები გახდება თუ არა სისხლის სამართლის დევნის დაწყების საფუძველი?
_ ეს მუხლი კანონში დღესაც არსებობს...

_ ვიცი, მაგრამ «ნაციონალები» მედიის მიერ მოპოვებულ სამხილებს, როგორც წესი, არაფრად აგდებდნენ...
_ მედიაში გამოქვეყნებული მასალა სისხლის სამართლის საქმის აღძვრის ერთ-ერთი წყაროა, თუმცა ისიც მესმის, რომ მედია, თავისი ბუნებით, ჭრელია და პრესაში გამოქვეყნებული მასალა პროკურატურამ შეიძლება, უტყუარ სამხილად არ მიიჩნიოს, მაგრამ თუკი მედიაში გამოქვეყნებული ინფორმაცია კონკრეტული იქნება, ბუნებრივია, პროკურატურა დაინტერესდება...

_ ერთ-ერთი ბოლო დოკუმენტით, რომელიც სოციალურ მედიაში გავრცელდა, ნათელი ხდება, რომ დავით ბაქრაძის ოჯახის წევრებმა, რომლებიც, თუ არ ვცდები, ეგვიპტეში ისვენებდნენ, ერთ თვეში, სატელეფონო საუბრებზე ათი ათასი ლარი დახარჯეს. მსგავსი თემებით დაინტერესდებით?
_ ციფრის სიდიდე დანაშაულს არ ნიშნავს. უბრალოდ, გასარკვევია, სახელმწიფო ხარჯების გამოყენება შესაბამისად ხდებოდა თუ არა...
პროკურატურა საზოგადოების ნაწილია და თუკი საზოგადოება ამა თუ იმ ინფორმაციას მტკივნეულად აღიქვამს, არ შეიძლება, პროკურატურამ ამ ინფორმაციის იგნორირება მოახდინოს.

_ მთავარი პროკურორის, ალბათ, ყველა მოადგილეს გაათავისუფლებთ...
_ დიახ...

_ ამასთან, ცნობილია, რომ «ქართული ოცნება» სახელმწიფო უწყებებში ე.წ. ქვედა რგოლებს არ შეეხება, თუმცა არსებობს მოსაზრება, რომ ყველაზე საშიში სწორედ ეს ე.წ. ქვედა რგოლებია, რამეთუ იქ «ნაციონალები» თავიანთ აგენტებს დატოვებენ, რომელთა საშუალებითაც სიტუაციის არევას შეეცდებიან. თქვენ, როგორც მთავარი პროკურორი, მსგავსი ინციდენტებისგან თავს როგორ დაიცავთ?
_ პროკურატურაში იმ ადამიანებმა უნდა იმუშაონ, რომლებიც, მინიმუმ, ორ კრიტერიუმს აკმაყოფილებენ.

_ ეს რა კრიტერიუმებია?
_ პატიოსნება და პროფესიონალიზმი.

_ და როგორ გაარკვევთ, ადამიანი პატიოსანია თუ არა?
_ ეს, რა თქმა უნდა, შუბლზე არავის აწერია, მაგრამ არსებობს გარკვეული მონაცემთა ბაზა, თუმცა არც ესაა საკმარისი. ამიტომ, შესაძლებელია, პროკურატურაში, გარკვეული დროის განმავლობაში, ისეთები დარჩნენ, რომლებიც ამას არ იმსახურებენ, თუმცა ამაში ტრაგედიას ვერ ვხედავ, ანუ რევანშისტული დამოკიდებულება არ იქნება და დაღი არავის დაესმევა, თუმცა სხვა საკითხია, თუ ვინმეს დანაშაული აქვს ჩადენილი.

_ ბატონო არჩილ, თქვენი საადვოკატო ბეგრაუნდიდან გამომდინარე, პროკურორთა უმეტესობას იცნობთ, ანუ იცით, რომელი მათგანი იყო კორუმპირებული, ან დაკვეთას ასრულებდა, მაგრამ ამის დამადასტურებელი ფაქტები, შეიძლება, არ გაქვთ. აქედან გამომდინარე, მათთან მუშაობა არ გაგიჭირდებათ?
_ მესმის, რასაც მეკითხებით, მაგრამ არ ვთვლი, რომ ბოლო დროს საქართველოში ჰორიზონტალური კორუფციის ფაქტები არსებობდა. კორუფცია ჰორიზონტალური მაშინაა, როცა სამართალწარმოების მონაწილე ფულს იღებს. ვერტიკალური კორუფცია კი ისაა, როცა ზემოდან მიღებული დავალების შესრულება ხდება. მთელ პროკურატურაში, თავიდან ბოლომდე, სწორედ ვერტიკალური კორუფცია არსებობდა და თუ ამ კუთხით მივუდგებით, მაშინ მთელი პროკურატურა უნდა გავუშვათ და პროკურატურის გარეშე დავრჩეთ. ამიტომაც, პასუხისმგებლობა ზედა ეშელონებმა უნდა აიღონ... ერთი სიტყვით, «მოტორი» რომ არ გაჩერდეს, სახელმწიფო ინსტიტუტმა განახლება უნდა განიცადოს.

_ ბატონო არჩილ, შეგიძლიათ, დადოთ პირობა, რომ პროკურატურა იმ სახელმწიფო უწყებად გადაიქცევა, რომლის მიმართაც ადამიანებს შიში აღარ ექნებათ?
_ აუცილებლად! ვანო, აქამდე დასმული შეკითხვები წარსულს ეხებოდა. წარსულის პირუთვნელად შეფასება კი, ძნელია.
რაც შეეხება მომავალს, მომავალს ის პოლიტიკა შექმნის, რომელსაც ჩვენ განვახორციელებთ. ამ პოლიტიკის დევიზი კი, საჯაროა: არავითარი დაშინება, არავითარი დათრგუნვა და ბიზნესის დაშანტაჟება. ამ გზავნილების სიკეთეს საზოგადოება მალე დაინახავს, ანუ პროკურატურა «ბუა» აღარ იქნება!

_ ისე, მოარული ინფორმაციით, სახელმწიფოსთვის ქონების გადაფორმების სურვილი ადამიანებს შუაღამისას უჩნდებოდათ და ამ საქმეებს კონკრეტული ნოტარიუსები «ჩარხავდნენ». ამ ნოტარიუსთა საქმიანობით დაინტერესდებით?
_ წარსულში განხორციელებული საეჭვო ფაქტებით, რა თქმა უნდა, დავინტერესდებით. ვანო, მოდი, ასე ვთქვათ: დღემდე იმ ბანაკის წევრი ვიყავი, რომელსაც ადვოკატთა კორპუსი ჰქვია და რომელიც ქვეყანაში არსებულ უსამართლობას აპროტესტებდა, ანუ უკიდურესად ნეგატიურად განწყობილი წრიდან მოვდივარ და ყველა ის საქმე იქნება შესწავლილი, რომელიც ამ ნეგატიურ განწყობას ქმნიდა.

_ ბატონო არჩილ, «ვარდების რევოლუციის» შემდეგ, საზოგადოებამ მთავარი პროკურორების შესახებ არაფერი იცოდა. მეტიც, მათ ლამის სახითაც არ სცნობდა, ანუ ამ პრაქტიკას გააგრძელებთ და ზურაბ ადეიშვილს დაემსგავსებით თუ გახსნილი და საჯარო პერსონა იქნებით, ვთქვათ, ჟურნალისტთა სატელეფონო ზარებს უპასუხებთ?
_ ვანო, მარტივად გეტყვით: ჩემი მსოფლმხედველობა ასეთია _ ამ თანამდებობაზე გარკვეული დროით მოვედი, ანუ დროის ოთხწლიანი, ან ორწლიან ციკლის შემდეგ, ამ პოზიციაზე აღარ ვიქნები და საადვოკატო საქმიანობას დავუბრუნდები. ამ პრინციპიდან გამომდინარე, მედიას, ან სხვა ვინმეს რატომ უნდა დავემალო? ერთადერთი, რის გამოც შეიძლება, ტელეფონს ვერ ვუპასუხო, ჩემი საქმიანობის სპეციფიკა იყოს. ამასთან, დამკვიდრდება წესი, რომ ყველა მნიშვნელოვანი მოვლენა განსაჯაროვდება, მედიასა და საზოგადოებასთანაც რეგულარული ურთიერთობა მექნება.

_ კულუარული ვერსიით, ზურაბ ადეიშვილმა და ექსჩინოვნიკებმა საქართველო უკვე დატოვეს. ასევე, არსებობს ცნობები, რომ ძალოვან უწყებებში დოკუმენტებს წვავენ. წეღან გაუხსნელი და რეზონანსული საქმეები ახსენეთ, მაგრამ შეიძლება, რომ მთავარ პროკურატურაში მისულს ამ საქმეების მასალები დამწვარ-განადგურებული დაგხვდეთ...
_ შეიძლება...

_ ბოლო წლების ერთ-ერთი ყველაზე რეზონანსული პრემიერ ზურაბ ჟვანიას საეჭვო ვითარებაში გარდაცვალება იყო. ბატონო არჩილ, ჟვანიას საქმის ხელახალ გამოძიებას დაიწყებთ?
_ რა თქმა უნდა...

_ სხვათა შორის, რამდენიმე დღის წინ, ჟვანიას ძმამ განაცხადა, რომ გარდაცვლილ პრემიერს მიხეილ სააკაშვილის ბიძა, თემურ ალასანია ემუქრებოდა. ამ დეტალითაც დაინტერესდებით?
_ რა თქმა უნდა. საერთოდ, ქვეყნის სირცხვილია, რომ პრემიერ-მინისტრის გარდაცვალება ამდენი წლის განმავლობაში ბურუსითაა მოცული. ამიტომ, ნებისმიერი მწარე სიმართლე უნდა გაცხადდეს. შესაბამისად, ჟვანიას საქმე ერთ-ერთი იმ საქმეთაგანი იქნება, რომელსაც თაროდან დაუყოვნებლივ ჩამოვიღებთ და შესწავლას შევუდგებით. თუკი მასალების განადგურება მართლაც ხდება, ამ ქმედებას დღეს ვერ აღვუდგებით, მაგრამ გამოძიებას იმ მასალებით დავიწყებთ, რაც დაგვხვდება. სხვა თუ არაფერი, ჟვანია 2005 წლის 3 თებერვალს გარდაიცვალა, მას შემდეგ, შვიდი წელია გასული, ადამიანები ცოცხლები არიან და მოხდება გამოკითხვა...

_ ბატონო არჩილ, თქვენი, როგორც მთავარი პროკურორის ღირსების საქმე იქნება თუ არა ჟვანიას გარდაცვალების გამოძიება? ისე, რატომღაც არ გაამახვილეთ ყურადღება თემურ ალასანიაზე...
_ ყველა, ვინც კი საქმესთან იქნება დაკავშირებული, დაიკითხება, მათ შორის, თემურ ალასანიაც. საერთოდ, კანონი არანაირ გამონაკლისს არ უშვებს და ყველა დაიკითხება, ვისაც გამოძიებისთვის რაიმე ინფორმაციის მიცემა შეუძლია, თუმცა, საქმის მასალებს არ გავცნობივარ და არაპროფესიული იქნება, რომ გითხრათ, თემურ ალასანიას დაკითხვაზე დავიბარებთ თუ არა.

_ დადგება თუ არა დღის წესრიგში ბადრი პატარკაციშვილის გარდაცვალების, ან გიორგი სანაიას მკვლელობის ხელახალი გამოძიება?
_ თუკი ოჯახები თვლიან, რომ ჩატარებული გამოძიება სინამდვილეს არ შეესაბამება, ეს საკმარისი საფუძველია, რომ ამ საქმეების ხელმეორე გამოძიება მოხდეს.

_ სხვათა შორის, 2002 წელს ბიზნესმენი ჯონი გიგანი საკუთარ მანქანაში ააფეთქეს. მართალია, ამ აფეთქებას მსხვერპლი არ მოჰყოლია და თითქოს დამნაშავეებიც დაისაჯნენ, მაგრამ, როგორც ვიცი, გამოძიება აფეთქების რეალური მიზეზით არ დაინტერესებულა. ამ და მსგავსი საქმეების, ასე ვთქვათ, განახლებაც შეიძლება?
 _ თუკი საქმე ხანდაზმულია, ალბათ, არა, მაგრამ მთავარი პროკურატურის პირველადი მოვალეობაა, რომ რობაქიძის, ვაზაგაშვილის, გირგვლიანის, ციხის ბუნტისა და სხვა მსგავსი საქმეების შესწავლა დაიწყოს.

_ ამ გამხაურებულ საქმეებზე საზოგადოებას მნიშვნელოვან ინფორმაციას რა პერიოდში მიაწვდით?
_ საზოგადოებასთან რეგულარული ურთიერთობის წესს დავამკვიდრებ და აქედან გამომდინარე, ყველას ეცოდინება, ამა თუ იმ საქმის გამოძიება რა სტადიაზეა...

_ ბატონო არჩილ, ციხის ყოფილი თანამშრომელი, ვლადიმერ ბედუკაძე, რომელმაც ციხის წამების ვიდეოკადრები გაავრცელა, ბაჩო ახალაიას,  მეგის ქარდავას და სხვა მაღალჩინოსნებს ხელს ღიად ადებს, რომ პატიმრების წამება მათი დაკვეთით ხდებოდა. აქედან გამომდინარე, არსებობს თუ არა საფუძველი, რომ ბაჩო ახალაია და სხვები დაიჭიროთ?
_ დაჭერას წინ ამ ადამიანების დაკითხვა უნდა უსწრებდეს. ამასთან, უნდა დაიკითხოს ამ ინფორმაციის გამცემი, ანუ ბედუკაძე.
რაც შეეხება დაჭერას, ეს უკვე ის სტადიაა, როცა არსებობს, მინიმუმ, ორი მტკიცებულება, რომელიც მაღალი ალბათობით მიუთითებს, რომ ადამიანმა დანაშაული ჩაიდინა. ახლა განცხადება რომ გავაკეთო, ბაჩო ახალაია დასაჭერია-მეთქი, ეს არაპროფესიონალიზმის დემონსტრირება იქნება, რადგან საქმე არ მინახავს. ერთი სიტყვით, ბედუკაძის განცხადებას სკურპულოზულად შევისწავლით...

_ ბატონო არჩილ, ობივატელისთვის გასაგები ენით რომ ვთქვათ, დაიბარებთ თუ არა დაკითხვაზე ახალაიებს, ვანო მერაბიშვილს და თუნდაც მიხეილ სააკაშვილს, რომელიც, როგორც ბედუკაძე ამბობს, ციხის წამების შესახებ საქმის კურსში იყო?
_ ვანო, წეღანაც გითხარით: საქართველოს კანონმდებლობა არ ცნობს გამონაკლისს, რომ ადამიანმა დაკითხვაზე უარი განაცხადოს. ამიტომ, თუკი საჭირო გახდება, პრეზიდენტიც დაიკითხება.

_ სხვათა შორის, ზოგიერთი ადვოკატის თქმით, მიხეილ სააკაშვილმა ღია ეთერში აღიარა, რომ აფრასიძეების ვერტმფრენებიდან ჩახოცვის ბრძანება გასცა...
_ აფრასიძეების საქმის გამოძიებასაც, რა თქმა უნდა, ხელახლა დავიწყებთ...

_ ერთი სიტყვით, ბატონო არჩილ, როგორც ახალი საქართველოს ახალი მთავარი პროკურორი, დებთ პირობას, რომ ყველა დამნაშავე დაისჯება?
_ პირობას ვდებ, რომ ყველა დამნაშავე, ვინც დანაშაულს ჩაიდენს და ვისაც ჩადენილი აქვს, დაისჯება!

_ ასევე, შეგიძლიათ, დადოთ პირობა, რომ ამიერიდან საქართველოში აგენტომანია დამთავრდება?
_ ეს სამარცხვინოა! სირცხვილი იყო, რომ 21-ე საუკუნეში ადამიანებისთვის შოვინისტური იარლიყების მიკერება და ამით საზოგადოებრივი აზრის მანიპულირება ხდებოდა. მოსმენებიც ხელისუფლების განმტკიცებას ემსახურებოდა. მაგალითად, წინასაარჩევნოდ სატელეფონო ჩანაწერები იმიტომ დაიდო, რომ საზოგადოებისთვის ეთქვათ, აი, ნახე, რა ცუდები მოდიანო. ყველაფერი ეს აღკვეთილი იქნება!

_ ბატონო არჩილ, არ დაინტერესდებით, თუ რა ტიპის ჩანაწერებს აკეთებდა თქვენზე თქვენი წინამორბედი?
_ მეც, როგორც საზოგადოების წევრს, მქონდა განცდა, რომ ჩემს სატელეფონო საუბრებს ისმენდნენ.

_ ჰოდა, ამ ჩანაწერებს მოუსმენთ?
_ კი, დავინტერესდები, თუკი ეს ჩანაწერები განადგურებული არაა.

_ მერე, მომსმენს, უფრო სწორედ, მას, ვინც თქვენი მოსმენა გადაწყვიტა, არ დასჯით?
_ მოსმენა უკანონობაა, მით უმეტეს, რომ ვეჭვობ, ძალიან ბევრი მოსმენა სასამართლოს გარეშე ხორციელდებოდა. ამასთან, ყველაფერი ეს ხელისუფლების შენარჩუნებას ემსახურებოდა...

_ მართალია, საუბარი გაგვიგრძელდა, მაგრამ ოპოზიციაში გადასული «ნაცმოძრაობა», ცხადია, ერთობ მობილიზებული იქნება და ახალი მთვარობის წევრებს არაფერს შეარჩენს. ამ კონტექსტში, «ნაციონალები» ვეჭვობ, სექსთან დაკავშირებულ თქვენს განცხადებასაც ხშირად გაიხსენებენ და გაგაქილიკებენ... დღევანდელი გადასახედიდან, არ ნანობთ, რომ პოლიტიკაში შემოსვლისთანავე საუბარი «ნაადრევ სექსუალურ მომწიფებაზე დაიწყეთ»?
_ მაშინ მინიშნება იმაზე გავაკეთე, რომ არ შეიძლება, ხელისუფლება სექსუალური ვნებების დასაკმაყოფილებლად იყოს გამოყენებული.

_ ესე იგი, «ნაციონალები» ხელისუფლებაში ყოფნით სექსუალურ ვნებებს იკმაყოფილებდნენ?
_ ამის მტკიცებულება არ მაქვს, მაგრამ საზოგადოებაში ასეთი აზრი არსებობს...

_ რამდენი შვილი გყავთ?
_ სამი...

_ როგორ შეხვდა თქვენი ოჯახი იმ ამბავს, რომ მთავარი პროკურორი ხდებით?
_ (იღიმება) არჩევნების შემდეგ, ჩემი ოთხი წლის ქალიშვილმა თქვა, მამიკო «პარლამენტი გახდაო»... როცა პოლიტიკაში პირველი ნაბიჯი გადავდგი, ამას ოჯახი სიფრთხილით მოეკიდა, თუმცა, როცა ხედავ, შენს გარშემო რა ხდება, შენი კარგად ყოფნა პანაცეა არაა. სხვათა შორის, ის, რომ ბიძინა ივანიშვილმა მთავარ პროკურორად წარმადგინა, ოჯახის წევრებმა ტელევიზიით გაიგეს და მათთან ჯერ არ მილაპარაკია.

_ ბიძინა ივანიშვილი როგორ გაიცანით?
_ 2011 წლის ოქტომბერი იყო, ირაკლი ტრიპოლსკიმ დამირეკა, შეხვედრა მთხოვა და მითხრა, ბატონმა ბიძინამ გამომაგზავნა და გვინდა, რომ საადვოკატო საქმიანობაში ჩაერთოო. მერე, როცა ბატონ ბიძინას შევხვდი, მითხრა, რომ ებრაელი ბიზნესმენების საქმეს თვალს ადევნებდა და შემომთავაზა, მისი ადვოკატი გავმხდარიყავი. პარტიის პრეზენტაციამდე ორი დღით ადრე კი, მითხრა, მინდა, პოლიტიკაში ჩაერთოო. ვუპასუხე, პოლიტიკური გამოცდილება არ მაქვს-მეთქი. პოლიტიკური გამოცდილება არც მე მაქვს და ერთმანეთი შევავსოთო, _ მომიგო ბატონმა ბიძინამ.

_ დიდი ხანია, დაოჯახებული ხართ?
_ 2000 წლის სექტემბერში დავოჯახდი.

_ კარგი ადამიანი ხართ?
_ ვცდილობ, რომ სხვებს გული არ ვატკინო...

_ თქვენი გვარის ისტორია იცით?
_ გვარის ისტორია არა, მაგრამ ბაბუის ბაბუის ბაბუის სახელი ვიცი...

_ ბოლოს რას მეტყვით, ბატონო არჩილ?
_ პასუხისმგებლობას ვგრძნობ და მინდა, როცა ამ თანამდებობაზე ყოფნის ბოლო დღე დადგება, გული არ დამწყდეს, რომ ჩემი ხალხის წინაშე აღებული ვალდებულება ვერ შევასრულე!
_ წარმატებას გისურვებთ!