From.ge.-ს საიტზე დაიდო სტატია სათაურით „გადაგდებულები“ (06.08.2012), სადაც საუბარი იყო, რომ „ახალი მემარჯვენეებს“ და „ეროვნულ-დემოკრატებს“ „ნაციონალებმა“  გაკეთებული საქმეები არ დაუფასეს და „გადააგდეს“, მაშინ როდესაც ორივე პარტიას ეგონა, რომ საარჩევნოდ ბლოკს ქრისტიან–დემოკრატებთან ერთად შექმნიდნენ და არჩევნებში 5%–იან ბარიერს ასე გადალახავდნენ. ეს მოლოდინი ორივე პარტიას გაუცრუვდა, რადგან ქრისტიან-დემოკრატებმა ბლოკის შექმნა პაატა დავითაიას „ევროპელ დემოკრატებთან“ ერთად გადაწყვიტა.

„ახალი მემარჯვენეების“ წევრმა მანანა ნაჭყებიამ სტატიის შესახებ გაკეთებულ კომენტარში from.ge-ს  ივანიშვილის მიერ მოსყიდული ინტერნეგამოცემა უწოდა და აღნიშნა, რომ  „ეს ჟურნალისტიკა კი არა ქარვასლაა“.

 „ჩვენი უბედურება ის არის, რომ ამ ქვეყანაში ყველაფრის პროფანაცია მოხდა, მათ შორის ჟურნალისტიკის. თავმოყვარე, პატიოსანი და მოუსყიდავი ჟურნალისტი ასეთ სტატიას არ დაწერდა. ჩემთვის არანაირი მნიშვნელობა არ აქვს ასეთ რამეს რომელიმე სახელისუფლებო არხი თუ გამოცემა გააკეთებს, თუ ბიძინა ივანიშვილის მიერ მოსყიდული თქვენი ინტერნეტგამოცემა. სირცხვილია! ეს ჟურნალისტიკა არ არის, ეს ქარვასლაა!“,-წერს ნაჭყებია თავის კომენტარში.

From.ge  მანანა ნაჭყებიას დაუკავშირდა. მან დაგვიდასტურა, რომ ის იყო ამ კომენტარის ავტორი, ჩვენს შეკითხვაზე კი, აქვს თუ არა რაიმე დამადასტურებელი საბუთი იმის, თუ საიტის ხელმძღვანელობა მისთვის სასამართლოში ჩივილს გადაწყვეტს, რომ ინტერნეტგამოცემა ბიძინა ივანიშვილის დახმარებით ფინანსდება, ნაჭყებიამ აღნიშნა, რომ ამის დამადასტურებელი საბუთი მას არ გააჩნია.

„კონკრეტული დამადასტურებელი ფაქტი, რომ ინტერნეტგამოცემა ბიძინა ივანიშვილის მიერ ფინანსდება, მე არ გამაჩნია“,-აცხადებს „ახალი მემარჯვენეების“ ერთ-ერთი ლიდერი.

From.ge  გთავაზობთ ინტერვიუს მანანა ნაჭყებიასთან.   

-ხართ თუ არა თქვენ იმ კომენტარის ავტორი, რომელიც საიტზე დადებულ მასალაზე გაკეთდა?

- დიახ, ამ კომენტარის ავტორი მე გახლავართ. კიდევ ერთხელ მინდა ავღნიშნო, რომ ჟურნალისტი, რომელიც  არცერთ გაზეთს არ გადაშლის, არცერთ სატელევიზიო გადაცემას არ გაიხსენებს და ასრულებს დაკვეთას, ამ შემთხვევაში ვიღაცის, ეს არის ძალიან დიდი სირცხვილი. რადგან პატიოსანი, თავმოყვარე  და მოუსყიდავი ჟურნალისტი პირველ რიგში „ახალი მემარჯვენეების“ ყველა კომენტარს ნახავს,გაიხსენებს ჯერ კიდევ გასული წლის ოქტომბრიდან დაწყებული, როდესაც ჩვენი სტრატეგია გავახმოვანეთ, რომ ჩვენ არ ვაპირებთ არავისთან დაბლოკებას, ვაპირებთ დამოუკიდებლად არჩევნებში მონაწილეობის მიღებას და ეს არის ის, რასაც მმართველი პარტიის მიერ მოსყიდული მედია აკეთებს, ეს არის უკვე ბიძინა ივანიშვილის მიერ მოსყიდული მედია, სირცხვილი ასეთ ჟურნალისტიკას, მოხდა ჟურნალისტიკის სრული პროფანაცია.

-თუ გაქვთ რაიმე დამადასტურებელი საბუთი იმის, რომ  ჩვენს ინტერნეტგამოცემას ბიძინა ივანიშვილი აფინანსებს? 

-ავიღოთ, თუნდაც ეს კონკრეტული სტატია. მე არ მგონია, რომ თქვენთან ისეთი არაპროფესიონალიზმი იყოს, რომ ჟურნალისტი ასეთ დასკვნებს, ფაქტებზე დაყრდნობის გარეშე აკეთებდეს.  ძალაუნებურად იფიქრებ, რომ აქ სხვა ფაქტორია ჩარეული. ფაქტი, ახლა სულში ვერ ჩაგიძვრებით, მაგრამ ყოველშემთხვევაში ფაქტი სახეზეა, რომ ტენდენციური ხართ. სად, როდის, ვინმემ მოიტანა, რომ „ახალი მემარჯვენეები“ სადმე იქნებოდნენ ბლოკში გაერთიანებული? კონკრეტული დამადასტურებელი ფაქტი, რომ ინტერნეტგამოცემა ბიძინა ივანიშვილის მიერ ფინანსდება, მე არ გამაჩნია.

 ხშირად საუბრობენ იმაზეც, რომ დავით გამყრელიძემ საკმაოდ დიდი თანხა აიღო ხელისუფლებისგან. თუმცა, არც ამის  კონკრეტული ფაქტები არსებობს...

კიდევ ვიმეორებ, ჟურნალისტი, როგორ უნდა იყო ან არაპროფესიონალი ან მოტივირებული, რომ არ გადახედო „ახალი მემარჯვენეების“ მიერ გაკეთებულ განცხადებებს.

იმ შემთხვევაში, თუ სასამართლოზე ვერ წარადგინეთ სააგენტოს მიმართ ბრალდების დამადასტურებელი დოკუმენტი, ბოდიშის მოხდა მოგიწევთ...

რაც შეეხება ბოდიშის მოხდას, სიამოვნებით.

- ჩვენ ყოველთვის აქტიურად ვაშუქებთ „ახალი მემარჯვენეების“ საარჩევნო კამპანიას, „ახალი მემარჯვენეების“ წევრებთანაც აქტიურად  ვთანამშრომლობთ, თქვენი ლიდერი დავით გამყრელიძეც რამდენჯერმე მოვიწვიეთ პრესკლუბში, თუმცა არცერთხელ არ მობრძანდა...

 - აქ არ არის იმაზე საუბარი, მაშუქებ თუ არ მაშუქებ. აქ საუბარია იმაზე, რომ ჟურნალისტია არაპროფესიონალი, საუკეთესო შემთხვევაში, რომელმაც „ახალი მემარჯვენეების“ არცერთი კომენტარით არ დაინტერესდა, ჩვენ როდესმე გამოვაცხადეთ, რომ ვინმესთან ერთად ბლოკში შესვლას ვაპირებდით? როცა ჟურნალისტი ხარ, ყველაფერს თვალყური უნდა ადევნო და უნდა იცოდე, რომ ჩვენ ყოველთვის ვამბობდით, რომ არავისთან არ ვაპირებთ ბლოკში შესვლას და ვაპირებთ დამოუკიდებლად ვიყაროთ საპარლამენტო არჩევნებში კენჭი. ასეთი კომენტარები რას ემსახურება?

-ანუ 2012 წლის საპარლამენტო არჩევნებში „ახალი მემარჯვენეები“ დამოუკიდებლად აპირებთ კენჭისყრას?

-დიახ, ერთი წელია ჩვენ ყველა მედიასაშუალებაში ამაზე ვლაპარაკობთ.

-ძალიან ხშირად საუბრობენ იმაზე , რომ „ახალ მემარჯვნეებს“ საპარლამენტო არჩევნების ბარიერის გადალახვა ძალიან გაუჭირდებათ, რადგან არსებული რეიტინგების მიხედვით, თქვენს პარტიას  დაბალი მაჩვენებელი აქვს.  

-ზუსტად ასე არ გვქონდა 2004 წლის საპარლამენტო არჩევნების წინ გამოკითხვით რეიტინგი. ყველა გამოკითხვა აჩვენებდა, რომ „ახალ მემარჯვენეებს“ შანსი არ ჰქონდათ ბარიერი გადაელახათ, მაგრამ შევედით. 2010 წლის არჩევნების დროს ყველა გამოკითხვა აჩვენებდა, რომ რომ „ეროვნულ საბჭოს“- ზვიად ძიძიგურს და კობა დავითაშვილს არ ჰქონდათ იმის საშუალება, რომ 7%-იანი ბარიერი გადაელახათ, მაგრამ გადალახეს. თქვენ ნახავთ თქვენს და სხვა გვერდებზე გამოკითხვებს, სადაც ეროვნულ-დემოკრატიული პარტია უსწრებს „ქართულ ოცნებას“, ან „თავისუფალი საქართველო“ უსწრებს „ქართულ ოცნებას“ ან „ნაციონალურ მოძრაობას“. ასეთი პარადოქსები საქართველოსთვის დამახასიათებელია.  ჩვენ ამით არასდროს არ ვხელმძღვანელობთ, ჩვენ ვხელმძღვანელობთ იმით, რომ  ჩვენთვის წარმატება ძლიერ და წელში გამართულ სტრუქტურას მოუტანია. ჩვენ გვყავს პასუხისმგებლობით აღსავსე ლიდერი და  არ გვყავს პოპულისტი ლიდერი, რომელიც ამბობს, რომ ყველა ქართველი სიმდიდრეში იცხოვრებს. ჩვენ ვერც ივანიშვილის მილიარდებს და ვერც ხელისუფლების უპასუხისმგებლო დაპირებებს შევეჯიბრებით. ამიტომ არ გვაქვს იმის იმედი, რომ ეს გამოკითხვებში გამოჩნდება.

-2003 წლამდე და მის შემდეგაც,  თქვენ ყოველთვის აქტიურად ებრძოდით ხელისუფლებას და კონკრეტულად  სააკაშვილს,  რატომ გაჩერდით, რატომ  ხართ ასეთი კომპრომისული ბოლო პერიოდში „ახალი მემარჯვენეები“? 

-ჩვენ „საყმაწვილო სენი“ -ხელისუფლებასთან კინკლაობა უკვე გავიარეთ. იმ ჟურნალისტებმა, ვინც კარგად აკვირდება ჩვენს ქმედებებს, კარგად იცის, რომ გასული წლის თებერვლიდან ჩვენ დავდივართ სოფლებში და იქიდან ვაკეთებთ უმწვავეს განცხადებებს, რომ ქართული სოფელი არის გაპარტახებული. ამაზე მეტი კრიტიკა არ არსებობს. ჩვენ ვსაუბრობთ იმაზე, რომ ჩვენი სოფლის მოსახლოება უკიდურესად გაპარტახებულია და ეს  ხელისუფლების ეკონომიკური პოლიტიკის კრახია. გააჩნია, ვის რა მიაჩნია პოლიტიკად. ჩვენ  მიგვაჩნია, რომ პოლიტიკაა ის, როდესაც ჩვენ ვაკრიტიკებთ  ხელისუფლებას უთავბოლო პოლიტიკის გამო, ვიღაცას მიაჩნია, რომ პოლიტიკაა ის, რასაც მე ვხედავ „ქართულ ოცნებასა“ და ხელისუფლებას შორის კინკლაობას, გამიშვი-გამატარე. ჩვენ არ გვინდა ასეთი პოლიტიკა. ჟურნალისტებს გააჩნია, ვინ როგორ დაინახავს როგორი მწვავე ვართ ამ ხელისუფლების მიმართ. მე არ მჯერა იმ ადამიანების, რომლებიც ხელისუფლების აქტიური მხარდამჭერები  იყვნენ, მერე რაღაც არ მოეწონათ და ახლა ყველაზე ყელგამოღადრული ოპოზიციონერები ხდებიან.  ასეთი ადამიანები როგორც წესი, მედროვეები არიან. ჩვენ ვართ თანმიმდევრულები ხელისუფლების კრიტიკაში. ვინც ისევ ახალი მესიით მოიხიბლა, მას თავისი გზა აქვს ცხოვრებაშიც და ჟურნალისტიკაშიც.

-თქვენი ხელისუფლებისადმი კრიტიკის მიუხედავად,  რატომ წამოვიდა საზოგადოებაში ის აზრი, რომ თქვენ ქდმ-სთან და ედპ-სთან ერთად ხელისუფლებასთან თანამშრომლობთ?   

-გაგახსენებთ „ვარდების რევოლუციის“ წინა პერიოდს, როდესაც ყველა იყო მიხეილ სააკაშვილის გვერდით, ჩვენ არ ვიყავით და არ იყვნენ „ლეიბორისტები“, იმ განსხვავებით რომ ჩვენ ღიად ვაფრთხილებდით საზოგადოებას,  ნუ მოიყვანთ სააკაშვილს ხელისუფლებაში. და მაშინ ყველა ოპოზიციურმა პარტიამ, ერთად, ქართველ ხალხს  ლიდერად სააკაშვილი მოუყვანა. მაშინ ყველა ერთ აზრზე იყო-ოღონდ ედუარდ შევარდნაძე არა და ვინც გინდა ის იყოს. დღესაც იგივე შეცდომას სჩადის ქართველი ხალხი. მე არ ვიცი ვინ არის ბიძინა ივანიშვილი, შეიძლება ძალიან კარგი ადამიანი და ძალიან კარგი მმართველია, მაგრამ ჩვენ პირადი მოსაზრებების იმედად ვერ ვიქნებით. ჩვენ უნდა შევქმნათ იმის სტაბილური გარანტია, რომ იგივე შეცდომა არ მოგვივა , რაც 2003 წელს მოგვივიდა, როდესაც ერთ ადამიანზე ავაგეთ ქვეყანა. ახლაც ბიძინა ივანიშვილი ამბობს, რომ სწორება ჩემს გვარზე უნდა იყოს. ეს ჩვენ არასწორად მიგვაჩნია. პირადად მე ბიძინა ივანიშვილის საწინააღმდეგო არაფერი მაქვს, უბრალოდ არ მინდა რომ იგივე შეცდომა დავუშვათ დ ერთპიროვნულად მოვიყვანოთ ბიძინა ივანიშვილი.

-კიდევ ერთი ბრალდება, რომელსაც „ახალ მემარჯვენეებს“ გიყენებენ, „რვიანის“ და შემდეგ „ექვსიანის“ დაშლაა...

-ამასაც სწორი ანალიზი სჭირდება. „რვიანი“ იყო საარჩევნო გარემოს გაუმჯობესებისთვის შექმნილი და არავის არ უთქვამს, რომ ის საარჩევნო ბლოკი იქნებოდა. „რვიანმა“ თავისი თავი ამოწურა და აღარ იყო საჭირო მისი ფუნქციონირება. რატომ დაიშლაა „ექვსიანი“ , ეს უკვე მასში შემავალ პარტიებს ჰკითხეთ.