"ნაციონალური მოძრაობის" წარმომადგენლებმა საქართველოს პრეზიდენტს რუსეთის მიერ აფხაზეთის ანექსიის საკითხზე მათ მიერ მომზადებული რეზოლუციის პროექტი გააცნეს.
ამის შესახებ ჟურნალისტებს ქვეყნის მეთაურთან შეხვედრის დასრულების შემდეგ "ნაციონალური მოძრაობის" წარმომადგენელმა ზურაბ ჯაფარიძემ განუცხადა. მისივე განმარტებით, ქვეყნის პირველ პირთან საუბარი გაიმართა იმ ნაბიჯებზეც, რაც სახელმწიფომ უნდა გადადგას, რათა საქართველოს ტერიტორიის ანექსიის პროცესი მაქსიმალურად შეფერხდეს.
"საუბარი ეხებოდა საქართველოს ოკუპირებულ ტერიტორიებს, რუსეთის მხრიდან მიმდინარე ანექსიას და იმას, თუ რა ხედვები უნდა არსებობდეს ქვეყანაში და რა ნაბიჯები უნდა გადადგას სახელმწიფომ იმისთვის, რომ ეს პროცესი მაქსიმალურად შეფერხდეს, საქართველომ შეძლოს რუსეთისთვის დიდი წინააღმდეგობის გაწევა და მოსკოვმა ამაში გადაიხადოს მაქსიმალური პოლიტიკური ფასი. ჩვენ მომზადებული გვაქვს კონკრეტული რეზოლუცია, რომელიც ამ საკითხს ეხება. პრეზიდენტს გავაცანით ამ რეზოლუციის ტექსტი – იქ გაწერილია კონკრეტული ნაბიჯები, რომელიც უნდა გადადგას ქვეყანამ, რათა მაქსიმალურად შეეწინააღდეგოს რუსეთს", - განაცხადა ზურაბ ჯაფარიძემ.
დეპუტატის განმარტებით, ამ პროცესში ერთ-ერთი მთავარია საერთაშორისო თანამეგობრობის გააქტიურება და მაქსიმალური ჩართვა.
"ეს აუცილებელია იმისთვის, რომ საქართველო ამ პროცესში არ იყოს რუსეთთან მარტო – ერთი ერთში", - აღნიშნა დეპუტატმა.
