2012 წელს ევროპის ეკონომიკური ზრდის ტემპი მნიშვნელოვნად შენელდება. ამ დროისათვის, კი ევროპა უკვე მსუბუქ რეცესიაში შედის, - ამის შესახებ ევროპის ცენტრალური ბანკის ახალმა პრეზიდენტმა მარიო დრაგიმ თავის პირველ პრესკონფერენციაზე განაცხადა.

Reuters-ის ინფორმაციით, ევროპის ცენტრალური ბანკის პროგნოზით, უახლოეს თვეებში ევროზონაში ინფლაციის მაჩვენებელი 2%-ს გადაჭარბებს, თუმცა 2012 წელს სამომხმარებლო საქონელზე ფასები მნიშვნელოვნად შემცირდება.

ხუთშაბათს ცნობილი გახდა, რომ ამ ფაქტორების გათვალისწინებით, ევრობანკმა საბაზისო განაკვეთები შეამცირა. მონეტარული პოლიტიკის განაკვეთი, ყველასთვის მოულოდნელად, წლიური 1,5%-იდან 1,25%-მდე შეამცირა. 

დრაგი მიიჩნევს, რომ ევრობანკის ფულად-საკრედიტო პოლიტიკამ უნდა უზრუნველყოს ფასების სტაბილურობა საშუალოვადიან პერსპექტივაში, ხოლო მოკლევადიანი განაკვეთები ეკონომიკის სტიმულირებას მოახდენს.

მარიო დრაგიმ ბანკებს აღუთქვა, რომ გააგრძელებს ბანკების ლიკვიდურობის მხარდაჭერას და მათ 1-წლიან კრედიტებს გამოუყოფს, ასევე შეისყიდის 400 მლრდ ევროს ობლიგაციებს.

თუმცა იქვე აღნიშნა, რომ ყველა არასტანდარტული ღონისძიება, რასაც ცენტრალური ბანკი ამ დროისათვის ახორციელებს, მათ შორის ობლიგაციების შესყიდვა, დროებითი მოვლენაა.