"არ გავასწრებ მოვლენებს და არ ვაპირებ, წინასწარ ვაცნობო ხელისუფლებას იმ ნაბიჯების შესახებ, რომელსაც გადავდგამთ. ბუნებრივია, ვისაუბრეთ ამ საკითხზე, ასევე გვაქვს ჩვენი შესაძლო ტაქტიკა, თუ როგორ ვიმოქმედებთ. თუმცა, ჩვენი გადაწყვეტილება იმაზეა დამოკიდებული, თუ რა სახის დოკუმენტს მივიღებთ ხელისუფლებისგან.

იმ შემთხვევაში, თუ აქტი უკანონოდ იქნა მიღებული, ეს იწვევს ადმინისტრაციული აქტის ბათილად ცნობას. მეორე მხრივ კანონში მითითებულია სპეციალური ნორმა, რომელიც მოქალაქეობის მიღებას არეგულირებს და რომლის ყველა პირობასაც აკმაყოფილებს ბიძინა ივანიშვილი", - აცხადებს "რეზონანსთან" საუბრისას ბიძინა ივანიშვილის ადვოკატი ეკა ბესელია.

ბესელია ამბობს, რომ ივანიშვილი მოქალაქეობის ჩამორთმევის საკითხს ძალიან მშვიდად უყურებს და ამ ფაქტის გამო გეგმების შეცვლას არ აპირებს. თუ რა აპირებს ბიზნესმენი და მისი იურისტი მოქალაქეობის აღსადგენად და რა რეპრესიულ ქმედებებს ელოდებიან ისინი ხელისუფლებისგან, ამის შესახებ "რეზონანსი" ეკა ბესელიას ესაუბრა.

"რეზონანსი": დღეს გქონდათ მორიგი შეხვედრა ბიძინა ივანიშვილთან და, როგორც ვიცი, განიხილებოდა მედიასთან შეხვედრის საკითხიც. თუ იქნა გადაწყვეტილება მიღებული, რა ფორმით შედგება ივანიშვილის დებიუტი ქართველ ჟურნალისტებთან?

ეკა ბესელია: ამაზე მე ვერ ვისაუბრებ, ეს პრესსამსახურის კომპეტენციაა და ამაზე საუბარი ჩემი მხრიდანაც არასწორია. მე მხოლოდ სამართლებრივ საკითხებზე ვაკეთებ კომენტარს. 

"რ": რაც შეეხება ბიძინა ივანიშვილისთვის მოქალაქეობის ჩამორთმევის თემას, ამაზე თუ ისაუბრეთ დღევანდელ შეხვედრაზე? თუ არის რაიმე ახალი ამბავი ამ საკითხთან დაკავშირებით?

ე. ბ: არც დღეს არ მიგვიღია არანაირი შეტყობინება იუსტიციის სამინისტროდან. სამართლებრივ-ადმინისტრაციული აქტი, ორგანული კანონის თანახმად, რომელიც ამ საკითხს არეგულირებს, უნდა მოგვსვლოდა. ამასთან, პირს, ვისაც ეს საკითხი ეხება, ვიდრე ხელმოწერილი იქნება საბუთი, მანამდე უნდა მიეცეს პროცესში ჩართვის უფლება, რომ გამოხატოს თავისი პოზიცია, ხოლო ამის შემდეგ აქტს ხელს აწერს მიხეილ სააკაშვილი. თუ მან ამ აქტს ხელი მოაწერა, გვითხრან, დაუსვით პრეზიდენტის პრესსამსახურს ეს კითხვა და გაგვცენ პასუხი.

"რ": ჩვენ დღესაც ვკითხეთ პრეზიდენტის პრესსამსახურს ამის შესახებ, მაგრამ ისინი კომენტარს არ აკეთებენ..

ე. ბ.: აი, ამაშია საქმე. ეს არის ძალიან მნიშვნელოვანი საკითხი. რატომ არ აკეთებენ კომენტარს? ვიდრე ჩვენ არ ჩაგვბარდება მოქალაქეობის დაკარგვასთან დაკავშირებული ადმინისტრაციული აქტი, ვერაფერს ვერ გავასაჩივრებთ და ვერც სხვა პროცედურას ვერ დავიწყებთ. კიდევ ერთხელ მივმართავ პრეზიდენტის ადმინისტრაციას, რომ ჩაგვბარდეს დოკუმენტი, თუ რის საფუძველზე აცხადებენ, რომ ივანიშვილმა მოქალაქეობა დაკარგა. მხოლოდ ამის შემდეგ შეიძლება, ვისაუბროთ შემდეგ ნაბიჯებზე.

"რ": 7 ოქტომბრის განცხადების შემდეგ, საჯარო რეესტრის წარმომადგენელმა განაცხადა, რომ ივანიშვილს მოქალაქეობა ჩამართვეს, როგორ ფიქრობთ ეს პრეზიდენტის თანხმობის გარეშე მოხდა? ან რას ელოდებით პრეზიდენტისაგან?

ე. ბ.: არა, რასაკვირველია, მისი თანხმობის გარეშე ვერ მოხდებოდა.

"რ": მაშ, რატომ გაქვთ მოლოდინი, რომ სააკაშვილმა შესაძლოა ხელი არ მოაწეროს ამ დოკუმენტს?

ე. ბ.: არ მაქვს ეს მოლოდინი, პირიქით. უბრალოდ მე ვამბობ, რომ როგორც კანონი ითხოვს, ისინიც ასე მოიქცნენ. თუ ბუნებაში არსებობს ადმინისტრაციული აქტი, ჩაგვაბარონ. ეს არის კანონის ელემენტარული მოთხოვნა. რაც შეეხება ვაშაძის განცხადებას, ასეთი განცხადებებით არ ხდება ასეთი მნიშვნელოვანი გადაწყვეტილებების მიღება. ეს არ არის ერთჯერადი გადაწყვეტიელბა და არც ვინმეს კაპრიზი და სურვილი. ეს არის პოლიტიკური გადაწყვეტილება და ეს აღიარა უკვე ხელსუფლებამ, როდესაც თქვა, რომ 7 ოქტომბერს გაკეთებული განცხადების შემდეგ დავიწყეთ ეს პროცედურებიო. ახლაც ვითხოვ, რომ მოგვცენ ეს გადაწყვეტილება, რომ ამაზე მსჯელობის შესაძლებლობა მოგვეცეს.

"რ": ვესაუბრე რამდენიმე კვალიფიციურ იურისტს, ამბობენ, რომ გასაჩივრების შემდეგაც პრეზიდენტს აქვს უფლება, არ დააკმაყოფილოს კონკრეტული ადამიანის მოთხოვნა მოქალაქეობის მინიჭების თაობაზე და უარი უთხრას მოქალაქეობის მსურველს. თქვენი მსჯელობიდან გამომდინარე, რომ ეს იყო პოლიტიკური გადაწყვეტილება, შესაძლოა მას ისევ არ მისცენ მოქალაქეობა. ამ შემთხვევაში რას აპირებთ და რას ამბობს ამაზე ბიძინა ივანიშვილი?

ე. ბ.: მე არ გავასწრებ მოვლენებს და არ ვაპირებ წინასწარ ვაცნობო ხელისუფლებას იმ ნაბიჯების შესახებ, რომელსაც გადავდგამთ. ბუნებრივია, ვისაუბრეთ ამ საკითხზე, ასევე, გვაქვს ჩვენი შესაძლო ტაქტიკა, თუ როგორ ვიმოქმედებთ. თუმცა, ჩვენი გადაწყვეტილება იმაზეა დამოკიდებული, თუ რა სახის დოკუმენტს მივიღებთ.

იმ შემთხვევაში, თუ აქტი უკანონოდ იქნა მიღებული, ეს იწვევს ადმინისტრაციული აქტის ბათილად ცნობას. მეორეს მხრივ კანონში მითითებულია სპეციალური ნორმა, რომელიც მოქალაქეობის მიღებას არეგულირებს და რომლის ყველა პირობასაც აკმაყოფილებს ბიძინა ივანიშვილი.

შესაბამისად, თუ მას ჩამოართვეს უკანონოდ მოქალაქეობა, ისევ დადგება საკითხი მისთვის მოქალქეობის მინიჭების თაობაზე და უარის თქმის საფუძველი არ არსებობს. მაგრამ ჩვენ რა სტარტეგიას ავირჩევთ, ამაზე ჯერ არ ვისაუბრებთ, იმიტომ, რომ თანმიმდევრულად იქნება გადადგმული ყველა ნაბიჯი.

"რ": ბატონი ბიძინასთვის მოულოდნელი იყო საჯარო რეესტრის მიერ გახმოვანებული გადაწყვეტილება? ყველასათვის ცნობილია, რომ როდესაც ადამიანს აქვს 2 ქვეყნის მოქალაქეობა და იღებს მესამე ქვეყნის მოქალაქეობას, ის ავტომატურად კარგავს ერთ-ერთს. ეს მან არ იცოდა?

ე. ბ: იმ პროცესში, რა პროცესშიც დაიწყო, ეს უაღრესად საპაუხისმგებლო და უმნიშვნელოვანესი პროცესი, მოულოდნელობები ნაკლებად შეიძლება განვიხილოთ. მას მოულოდნელობის განცდა არ აქვს. ამ შემთხვევაში ხელისუფლების მხრიდან ბევრი სხვა უმსგავსობების მოლოდინიც არსებობს, შესაბამისად, ჩვენ ამას შევხვდით ძალიან მშვიდად და თავად ბატონი ბიძინას რეაქციაც იყო ძალიან მშვიდი. მან თქვა, რომ ამის მიუხედავდ დღის წესრიგი არ იცვლება და გრძელდება ყველაფერი ისე, როგორც მას მიაჩნია საჭიროდ. შესაბამისად, ეს არაფერს არ ცვლის, გარდა იმისა, რომ ხელისუფლება გადადის უკონტროლო ქმედებებზე. მათ ეშინიათ ბიძინა ივანიშვილის და იმიტომ იქცევიან ასე.

"რ": რაც შეეხება ბიძინა ივანიშვილს მიერ გაკეთებულ განცხადებებს, თქვენი კომენტარი ამ თემაზე არ მოგვისმენია. კონკრეტულად მედიის მიმართ გაკეთებულმა შეთავაზებებმა დიდი უკმაყოფილება გამოიწვია, პირადად თქვენ როგორ აფასებთ მედიის მისამართით გამოთქმულ განცხადებებს? აქ პირდაპირ იყო საუბარი "მაესტროსა" და "კავკასიის" არაობიექტურობაზე, რომელზეც იგივე თქვენ წლების განმავლობაში ამბობდით, რომ ხალხი სწორედ ამ არხებიდან იგებდა სიმართლეს. თუ კითხეთ მას, რატომ ისაუბრა ამ ტონალობაში ამ არხებზე?

ე. ბ: მე არ ვაპირებ იმ განცხადებებზე კომენტარის გაკეთებას, რომელიც ბატონ ბიძინას ეკუთვნის. ეს იყო მისი აზრი და არ არის კორექტული ამაზე კომენტარის კეთება.

მე მისი პირადი ადვოკატი ვარ და ეს სტატუსი მავალდებულებს, რომ განსაკუთრებულ და შესაბამის სამართლებრივ რეჟიმში გამოვხატო პოზიციები და ამას ყურადღება უნდა მივაქციოთ. მე ამ საკითხებზეც მქონდა მასთან საუბარი, მას აქვს უამრავი და ძალიან სერიოზული არგუმენტები, როდესაც ამ საკითხზე საუბრობს. მას არ მიუყენებია შეურაცხყოფა ჟურნალისტებისათვის, ის საუბრობს სწორედ ჟურნალისტების დამოუკიდებლობის მაღალ ხარისხზე, რომელიც უნდა იქნას მიღწეული. ის საუბრობს ისეთი ტიპის მედიის შექმნაზე, სადაც ვერავინ, მათ შორის ვერც დამქირავებელი და ვერც მეპატრონე ვერ მოახდენს ვერანაირ გავლენას ჟურნალისტზე. ამ დღეებში ბევრჯერ მოვისმინე მისი არგუმენტები ამ საკითხზე და მინდა, გითხრათ, რომ პირველად დავინახე ასე ღია და გახსნილი საუბარი ძალიან მნიშვნელოვან საკითხებზე, მათ შორის - მედიის თავისუფლებაზე.

როდესაც ის საუბრობს მედიის შეძენაზე განსაკუთრებული პირობებით და როდესაც უკან დაბრუნებაზეა საუბარი, როდესაც ჟურნალისტების მიწევევაზე აკეთებს განაცხადს, იქვე ხაზს უსვამს იმას, რომ არასოდეს არ ერევა ჟურნალისტების საქმიანობაში და ნებისმიერ ჟურნალისტს ექნება დამოუკიდებლობის ძალიან მაღალი ხარისხი.

ასე რომ, ეს საკითხი კონტექსტიდან ამოგლეჯილად არ უნდა განვიხილოთ. უნდა ვიცოდეთ, რომ არც ჟურნალისტები არ არიან კრიტიკისგან თავისუფალი და კრიტიკა შეიძლება შეეხოს ყველას. დამეთანხმებით, რომ ბევრი ჟურნალისტი თვითცენზორის როლში გამოდის. ვინც ობიექტური და მიუკერძოებელია, მას, ბუნებრივია, ეს კრიტიკა არ ეკუთვნოდა. იმაზე, რომ მედიაში სერიოზული პრობლემებია, თვალის დახუჭვა არ შეიძლება. ის ფაქტი, რომ მედიას აკრიტიკებ, სულაც არ ნიშნავს ცუდს, რადგან ჟურნალისტს, რომელიც არღვევს სტანდარტებს, უნდა უთხრა, რომ არასწორად იქცევა.

"რ": როგორც ცნობილია, კახეთის სამხარეო პოლიციის ყოფილი უფროსი თამაზ თამაზაშვილი დააკავეს. მისი სიძე, ირაკლი ღარიბაშვილი, ბიძინა ივანიშვილის ფონდის ხელმძღვანელია. უკავშირებს თუ არა ამ ორ ფაქტს ერთმანეთს ივანიშვილი?

ე. ბ.: ჩვენ ვისაუბრეთ ამ საკითხზე. ბატონი ბიძინა ამბობს, რომ ეს ადამიანი სრულიად უდანაშაულოდ არის დაკავებული. მას ჩაუდეს ცეცხლსასროლი იარაღი, მიუსაჯეს 2-თვიანი წინასწარი პატიმრობა. ჩვენ ახლა ჩავრთავთ დამატებით ადვოკატს საქმეში, რომ მისი დაცვის უფლება იყოს გარანტირებული. ბუნებრივია, ამ ტიპის რეპრესიების მოლოდინები არსებობს, შესაბამისად, ჩვენ ვფიქრობთ პრევენციაზე და დაცვის მექნიზმებზე, რომ არც ერთი ადამიანი არ დარჩეს დაცვის გარეშე. რაც მეტ შეცდომას დაუშვებს ხელისუფლება, ეს მათთვისვე იქნება უარესი.

"რ": რაც შეეხება რუსეთისა და საფრანგეთის მოქალაქეობაზე უარის თქმას, ეს საკითხი განიხილება მას შემდეგ, რაც საჯარო რეესტრმა გაავრცელა ინფორმაცია მისთვის მოქალაქეობის ჩამორთმევაზე?

ე. ბ.: დიახ, ეს საკითხიც განიხილება. ის, მის მიერ გაკეთებულ განცხადებაში ამაზეც საუბრობს და ძველ პოზიციაზე დგას. თუმცა, ჩვენ ჯერ ველოდებით ადმინისტრაციული აქტის ჩაბარებას და საქართველოში მოქალქეობის საკითხის გარკვევას. ამის შემდეგ იქნება გადაწყვეტილება მიღებული სხვა ქვეყნის მოქალაქეობაზე.