ადამიანის უფლებათა ცენტრის აღმასრულებელი დირექტორის, უჩა ნანუაშვილის განცხადებით, ფოტორეპორტიორების შემდეგ ჯაშუშობისა და სამშობლოს ღალატის ბრალდებებით უფლებადამცველთა დაპატიმრებებია მოსალოდნელი.

დღეს, 14 საათზე, ადამიანის უფლებათა ცენტრის საგანგებო პრესკონფერენციაზე გამოქვეყნდება სკანდალური ფოტომასალა, რომელზეც ასახულია, როგორ უთვალთვალებენ ქართული ძალოვანი სტრუქტურები არასამთავრობო ორგანიზაციის წარმომადგენლებს.

სხვათა შორის, როგორც ვანო მერაბიშვილთან შეხვედრის შემდეგ ჟურნალისტების დელეგაციის წევრებმა თქვეს, შს მინისტრს უთქვამს, რომ მათთვის მთავარი იყო არა ფოტორეპორტიორების დაკავება, არამედ ფართო ჯაშუშურ ქსელზე გასვლა. მერაბიშვილმა, თურმე, არაორაზროვნად მიანიშნა, რომ კიდევ ბევრი ცნობილი ადამიანის დაპატიმრებაა მოსალოდნელი.

"შს სამინისტრო აძლიერებს რეპრესიულ პოლიტიკას და არასამთავრობო ორგანიზაციების დისკრედიტაციას ცდილობს. მარტის თვიდან მოყოლებული შს ოპერმუშაკები ტოტალურად უთვალთვალებენ ჩვენი ორგანიზაციის წარმომადგენლებს და ჩვენ შსს-სთან გვაქვს შეკითხვა, მოგვცეს განმარება, რის საფუძველზე და რა მიზნით ხორციელდება ეს დევნა", - "რეზონანსთან" საუბრისას აცხადებს ნანუაშვლი.

უჩა ნანუაშვილი: "რამდენიმე თვეა ეჭვები გვქონდა, მარტის თვიდან კი ჩვენთვის ნათელი გახდა, რომ თვალთვალი სისტემატურად ხდება. ნებისმიერ შეხვედრაზე როცა მივდივართ, ან უკან დაგვდევს, ან წინ მიგვიძღვება გარკვეული მანქანა. მანქანა დღის განმავლობაში რამოდენიმეჯერ იცვლება კიდეც და ეს არ არის ერთი-ორი შემთხვევა. ეს მუდმივად ხორციელდება. ჩვენ მაქსიმალურად ვცდილობდით, მსგავსი საეჭვო მანქანები დაგვეფიქსირებინა და მერე ხდებოდა მათი შედარებებიც. სპეციალური ფოტო კოლაჟი გვაქვს, სადაც ეს მანქანებია აღრიცხული. პრესკონფერენციაზე ამ ფოტოების ნაწილს გამოვაქვეყნებთ, რის შემდეგაც შესაძლებელია დასკვნების გამოტანაც.

ამ ფოტომასალით ვაჩვენებთ საზოგადოებას, რომ ასეთი თვალთვალი სისტემატურად ხდება დამოუკიდებელ უფლებადამცველებზე და ეს ფოტომასალა ამის მტკიცებულებაა. ისეთი ფაქტებია, რომ შს სამინისტრომ აუცილებლად უნდა გააკეთოს კომენტარი. შს უწყებას ხვალ ან ზეგ აუცილებლად მივმართავთ ოფიციალურად. მაქვს მოლოდინი, რომ იტყვიან, ჩვენ არაფერ შუაში ვართო, მაგრამ საკუთარი პოზიცია უნდა დააფიქსირონ.

"რ": დარწმუნებით შეგიძლიათ თქვათ, რომ თქვენ მიერ მოპოვებულ ფოტოებზე ასახული მანქანები შს სამინისტროს ოპერატიულ თანამშრომლებს ეკუთვნით?

უ.ნ: დიახ.

"რ": ამ ფოტოკოლაჟში ადამიანების სახეებსაც ვნახავთ?

უ.ნ: სახეები უფრო არ ჩანს, მაგრამ მნიშვნელოვანია, რომ ჩანს მანქანები, რომლებიც ამ თვეების განმავლობაში კორტეჟად დაგვყვება. საუბარი გვექნება იმ მეთოდებზე, რომელსაც შს სამინისტრო სათვალთვალოდ იყენებს - ანუ როგორ ხდება ერთი მანქანის მეორეთი შეცვლა, როგორ ხდება ყალბი ნომრების დაყენება მათზე და ა.შ. ფოტოებზე ეს ყველაფერი დამაჯერებლად აღვწერეთ.

"რ": ძირითადად რა მანქანებით და ვის მიმართ ხდებოდა თვალთვალი?

უ. ნ: სხვადასხვა მანქანებია და, შესაბამისად, გამიჭირდება ყველა მარკის და ნომრის ჩამოთვლა. ძირათადად, სამიზნე ვიყავი მე, მაგრამ სხვებსაც უთვალთვალებდნენ.

"რ": ფოტორეპორტიორების დაკავებასა და "მედიაპალიტრის" შემოწმების თემებს ძირითადად 26 მაისის მოვლენების გაშუქებას უკავშირებენ. თქვენზე თვალთვალი კი უფრო ადრე დაგეგმილი ოპერაცია გამოდის და როგორ ფიქრობთ, ეს რას უკავშირდება?

უ.ნ: ვთვლი, რომ ეს მხოლოდ ერთ რომელიმე ღონისძიებასთან დაკავშირებული რეაქცია არ არის. ეს მიმართულია იქითკენ, რომ მაქსიმალურად გაკონტროლდეს თავისუფალი სამოქალაქო სექტორი. ხელისუფლებას არასამთავრობოთა დიდი ნაწილი კონტროლს ქვეშ ჰყავს მოქცეული, მაგრამ როგორც მედიაში, აქაც არის თავისუფალი ნაწილი.

"რ": თქვენი ორგანიზაცია რამდენად საშიშია ხელისუფლებისთვის?

უ.ნ: ძალიან ბევრ დასავლეთის ორგანიზაციასთან გვაქვს ურთიერთობა: ევროსტრუქტურებთან, ევროპარლამენტთან, ჰააგის საერთაშორისო სასამართლოსთან და ა.შ. ნებისმიერ სერიოზულ დარღვევაზე ჩვენ ინფორმაციას დასავლეთში ვავრცელებთ. მათ მუდმივად ვაწვდით მასალებს.

"რ": რამდენიმე ოპოზიციური პარტია აცხადებდა თვალთვალსა და ოფისში დამონტაჟებულ მოსასმენ აპარატურაზეც კი და სხვა არასამთავრობო ორგანიზაციებს თუ აქვთ მსგავსი ეჭვები?

უ. ნ: ეჭვები აქვთ, მაგრამ მე მათ ნაცვლად ვერაფერს ვიტყვი. ჩვენთვის ცნობილი და დაფიქსირებულია მხოლოდ ჩვენი ორგანიზაციის მიმართ განხორციელებული თვალთვალი და ისიც, რამდენიმეთვიანი დაკვირვების შემდეგ. მოსასმენი აპარატურების შესაძლო დამონტაჟებაზეც არის ეჭვები, მაგრამ როცა არ გვაქვს მტკიცებულება, რთულია საუბარი. ჩვენ საჯაროდ ვლაპარაკობთ იმ თვალთვალზე, რისი მტკიცებულებაც გვაქვს.

"რ": თქვენი აზრით, რას უკავშირდება ეს თვალთვალი? თვლით, რომ მოსალოდნელია უფლებადამცველების დაპატიმრებები ჯაშუშობის ბრალდებით?

უ.ნ: რა თქმა უნდა, ეს ყველაფერი არის წინასწარ დადგმული, გაანალიზებული მოქმედებები დამოუკიდებელი უფლებადამცველების, ზოგადად სამოქალაქო სექტორის წარმომადგენლების დისკრედიტაციის მიზნით და ამის შესახებ ინფორმირებულია დიპლომატების ნაწილი. მიდის მუშაობა, რათა დასავლეთს "დაუმტკიცონ", რომ სამოქალაქო სექტორი ჯაშუშობასთან არის დაკავშირებული და აგენტებად რომ არ გამოგვაცხადონ, თვალთვალის შესახებ წინასწარ საქმის კურსში ვაყენებთ ყველას.

"რ": რაში სჭირდება ხელისუფლებას არასამთავრობო სექტორის დისკრედიტაცია?

უ.ნ: ხომ ხედავთ, ქვეყანაში რა ხდება?! ალბათ, ხელისუფლება სექტემბრიდან წინასაარჩევნო პერიოდს დაიწყებს. შესაბამისად ის, რომ სააკაშვილი პრემიერ-მინისტრად გახდომას და ქვეყნის დიდი ხნის განმავლობაში მართვას აპირებს, არავისთვის საიდუმლო აღარ არის. ამ ყველაფრის განხორციელებაში ხელისშემშლელად ევლინება არაკონტროლირებადი მედია და არასამთავრობო სექტორი, ამიტომაც იგეგმება მათზე ან სხვადასხვა მეთოდებით კონტროლის დამყარება ან მათი დისკრედიტაცია. 26 მაისის ამბები, იგივე "მედიაპალიტრისა" და ფოტორეპორტიორების საქმე - ეს ყველაფერი არის ერთი პროცესის სხვადასხვა რგოლი, რომელიც, როგორც ჩემთვის ცნობილია, შემდეგ ნაბიჯებსაც გულისხმობს. შსს-ს გუშინდელი განცხადებაც არ არის შემთხვევითი - ყველა, ვინც უცხოეთის უშიშროების სამსახურებთან თანამშრომლობს, კონტრდაზვერვის დეპარტამენტში გამოცხადნენო. ეს რეალურად ნიშნავს იმას, რომ ხელისუფლებას ამ ჯაშუშომანიასთან დაკავშირებით კიდევ აქვს გეგმები.

"რ": ამბობთ, რომ ხელისუფლებას არჩევნებისთვის სჭირდება მეტი კონტროლი საზოგადოების ყველა ფენაზეო, მაგრამ ფოტორეპორტიორების დაკავებამ დიდი პროტესტი გამოიწვია და ამ ჯაშუშომანიამ ხომ შეიძლება უკუშედეგი გამოიღოს?

უ.ნ: პროტესტი არის და ეს გაგრძელდება, მაგრამ არ დაგვავიწყდეს, როდის ხდება ეს და რატომ დაამთხვია ეს პროცესი ხელისუფლებამ აგვისტოს პერიოდს. ხელისუფლება ძალიან კარგად იყენებს ზაფხულის არააქტიურ პერიოდს და სექტემბრისთვის საერთაშორისო ორგანიზაციებისათვის ისეთი სტატუს-კვოს დახვედრება უნდა, როცა ის მაქსიმალურად გააკონტროლებს ყველაფერს. ცდილობს, ყველაფერი, რაც არჩევნებისათვის შეიძლება ხელისშემშლელი გახდეს, ახლა აღკვეთოს და ნებისმიერ რისკზე მიდის, რომ ყველა მეთოდი გამოიყენოს.

"რ": ფოტორეპორტიორების საქმეზე არსებული პროტესტის გამო შეიძლება ხელისუფლებამ გადაიფიქროს ან გადადოს არასამთავრობო სექტორის, ასე ვთქვათ, "დასჯა". ელით თუ არა ამას?

უ.ნ: არ ვიცი, მომავალში რა იქნება, მაგრამ ხელისუფლებაში რომ არასამთავრობო სექტორის დასჯის გეგმა არსებობდა, ეს ნათელია. ისე, იმედი არ მაქვს, რომ ხელისუფლება ამჯერად მაინც გადადგამს გონივრულ ნაბიჯს.

კიდევ ერთხელ ვიტყვი - ჩვენ გვინდა წინასწარ იცოდეს საზოგადოებამ ამ თვალთვალის შესახებ, რადგან ფოტოგრაფების სკანდალის შემდეგ შეიძლება იგივე არასამთავრობო სექტორზე დაიწყოს, ყველამ უნდა იცოდეს, რომ შს სამინისტროს მხრიდან ეს უკვე დიდი ხანია, იგეგმება.