„თავისუფალი დემოკრატების“ შემდეგ, პოლიტიკური კრიზისი „რესპუბლიკურ პარტიაში“ შეიქმნა. ირაკლი ალასანია პოლიტიკიდან წავიდა, დავით უსუფაშვილი ოპოზიციაში გაძლიერებას გეგმავს, თუმცა, აღნიშნულ პარტიებში შექმნილ პრობლებლემებზე ყოფილი წევრები მკვეთრად და მკაფიოდ არ საუბრობენ.

„თავისუფალი დემოკრატებიდან“ წამოსვლის მიზეზებსა და ყოფილი თანაგუნდელების შეფასებების თაობაზე, for.ge დეპუტატ გიორგი ცაგარეიშვილს ესაუბრა:

თქვენს მიერ „ქართული ოცნების“ მხარდაჭერას აზრთა სხვადასხვაობა მოჰყვა. თქვენმა ყოფილმა თანაგუნდელმა, შალვა შავგულიძემ თქვენი მოწოდება for.ge-სთან შეაფასა და დაინტერესდა, ოპოზიციაში მყოფმა ადამიანმა პოლიტიკური ხედვები რამდენიმე დღეში როგორ შეცვალეთ?

- არაფერი არ დამივიწყებია და ვინმესგან რაიმეს შეხსენება არ მჭირდება. სადაც არ უნდა ვიყოთ, ე.წ. კაბელების საქმეზე დაკავებული ადამიანების ციხიდან დასახსნელად ყველაფერს გავაკეთებთ, რომლებიც უსამართლოდ არიან დაკავებულები. როგორც ჩანს, ტოტალური სენია ის, რომ ადამიანებს განვლილი ამბები ავიწყდებათ. დაპირისპირებაში ვერც შალვასთან და ვერც ნინოსთან ვერ შევალ, თუმცა, მათ ძალიან მწარე მარცხის მიზეზების გაანალიზებას ვურჩევ. ქალაქი პატარაა და ისე ნუ ვიზამთ, რომ ერთმანეთის შეხედვა გვრცხვენოდეს. ენა ნურავის გაექცევა.

თქვენი მოწოდების საპასუხოდ მოსაზრებები თქვენს ოპონენტებშიც გაჩნდა. ითქვა, რომ თქვენ „თავისუფალი დემოკრატები“ თანამდებობების და კეთილდღეობის სანაცვლოდ დატოვეთ...

- ზოგიერთი ადამიანის ენას ძვალი არ აქვს და რაც უნდა ის თქვას. იმ სისულელეებს არ ჩავუღრმავდები, რომელსაც ტირაჟირებას განსაკუთრებით „რუსთავი 2“ უკეთებს, მაგრამ ერთგვარი დეჟავუ მაქვს, რადგან 2009 წლის ჩემი მდგომარეობა მახსენდება, როდესაც გაერთიანებული ოპოზიციის მიერ ორგანიზებულ დიდ მიტინგს შევუერთდი. ასევე სხვა პერიოდები მახსენდება, როცა ჩემი მოწინააღმდეგე „რუსთავი 2“ იყო, რომელიც „ნაციონალური მოძრაობის“ ჯიბის ტელევიზიაა. ამ ტელევიზიაში დირექტორები, პროდიუსერები და ჟურნალისტები იცვლებიან, მაგრამ განწყობები იგივეა. მათი სამიზნე მე, ზურაბ აბაშიძე, ვიქტორ დოლიძე და დავით ონოფრიშვილი ვართ, რომლებიც პარტიიდან წამოვედით და ამაზე ყველაზე უფრო მეტად ნიკა გვარამია გაწიწმატდა. ასევე „ნაციონალურ მოძრაობაში“ მყოფი ყიამყრალი ადამიანები და ის მჩხიბავი ექსპერტები გაღიზიანდნენ, რომლებიც დილიდან საღამომდე ყავაზე მარჩიელობენ და „გენიალური“ პროგნოზები აქვთ. ისევ იქეთ ვართ, სადაც ვიყავი და მეორე მხარეს კი ის ხალხია, ვისაც გულზე არასოდეს არ ვეხატებოდი.

იმ ადამიანებს მივმართავ, რომლებსაც ძილში სააკაშვილი ელანდებათ, რაც შეიძლება მლანძღონ და მთათხონ, მაზოხისტი არ ვარ, მაგრამ მიყვარს, როცა თეთრს თეთრი ჰქვია, შავს - შავი. ყოველთვის სახელმწიფო ინტერესების მხარეს ვიდექი და ვინ სად იყო, თავის გულში ჩაიხედოს. ამ ადამიანებს საქმე გამოლეული აქვთ და ხელი 8 ოქტომბერმაც მოუთავა, რის გამოც დაგესლილი და დაბოღმილები არიან. განსაკუთრებულ აქცენტს იმ ადამიანებზე ვაკეთებ, რომლებიც ექსპერტობას ლამობენ და იჩემებენ, თორემ, ავაზაკ ნაციონალებთან ჩემი დაპირისპირება ძველი ამბავია. ზოგიერთი ყიამყრალი, მაწყევარი ადამიანის საქციელი მიკვირს, რომელიც ტელვიზიიდან ტელევიზიამდე დაეხეტება და ეპითეტებს არ იშურებს, რომ მე და ჩემი მეგობრები გაგვლანძღონ და შეურაცხყოფა მოგვაყენონ. ჩვენმა განცხადებამ ბევრი ააფორიაქა, ზოგი უმიზეზოდ, ზოგი - მიზეზიანად.

ყიამყრალ ექსპერტებში გია ხუხაშვილს გულისხმობთ, რომელმაც განსაკუთრებით გაგაკრიტიკათ?

- დიახ, მასაც ვგულისხმობ და სხვებსაც. ვერ გავიგე, ეს ადამიანები ასეთი გამწარებულები რატომ არიან და თავს იმის უფლებას რატომ აძლევენ, რომ ადამიანებს შეურაცხყოფა მიაყენონ? - ემოციური ადამიანი ვარ, მაგრამ პოლიტკორექტურას ყურადღებას ყოველთვის ვაქცევ. თუ ექსპერტი ხარ, მეხსიერება რატომ გღალატობს და არ უნდა იცოდე, გასულ წლებში ცაგარეიშვილი სად იყო? თუ არ იცის, მაშინ რაღა ექსპერტი და პოლიტოლოგია? თუ არ იცი, რომ ზურაბ აბაშიძეს სასიკვდილოდ სცემეს და ვიქტორ დოლიძემ ევროპაში ყველა პრივილეგია და თანამდებობა დატოვა და ქვეყანაში სააკაშვილის რეჟიმის წინააღმდეგ ჩამოვიდა, მაშინ, როგორი ექსპერტი ხარ და შენი როგორ უნდა დავიჯერო? მესმის, რომ ხუხაშვილს პროგნოზებში აცდენები აქვს, რადგან ამბობდა, რომ ამ ქვეყნის მომავალი ბურჭულაძე იყო და მასთან ვაშაძის, ჯაფარიძისა და სხვა ავაზაკების მისვლა, საქართველოს გაბრწყინება იქნებოდა. ისინი ლამის მეორე პოლიტიკურ ძალად შერაცხა და მისი არც სხვა პროგნოზი გამართლდა. მას იმის საშუალება არ აქვს, რომ სხვებზე ქედმაღლურად ისაუბროს. ბატონ გიას ის აინტერესებს, მე სად ვიყავი? - ვიყავი ყველგან, სადაც ქვეყანას უჭირდა და ალისტრახოები და სხვა დონის ნაძირლები დაგვსდევდნენ, გვცემდნენ და გვარბევდნენ. ასევე მონაწილე ვიყავი როგორც 7 ნოემბრის, ასევე 2 ნოემბრის. ყველგან ვიყავი, სადაც სამშობლოს უჭირდა და მისთვის ზურგი არასოდეს არ შემიქცევია. ხალხთან ჩემი ყოფნა გაგრძელდება და ეს ხუხაშვილს მოსწონს თუ არა, საერთოდ არ მადარდებს. ჩემი შვილები საპროტესტო აქციებზე გავზარდე და ფათერაკიან გზაზე მარტო არ დავდიოდი. ეს ადამიანები კი სად იყვნენ, ეს ხალხმა ძალიან კარგად იცის.

„რუსთავი 2“-ის მეშვეობით ვინ მლანძღავს? - ის ხალხი, ვინც ყოველთვის მლანძღავდა. საერთოდ, არჩევნები „ნაციონალურმა მოძრაობამ“ კი არ წააგო, არამედ „რუსთავი 2“-მა, რადგან მათი მცდელობა 27 მანდატზე დახურდავდა. გვარამიამ მეტი ვერ გაქაჩა.

ხუხაშვილს აკრიტიკებთ, თუმცა, თქვენი პოზიციები გაურკვეველი აღმოჩნდა ნინო გოგუაძესთვისაც. შეგიძლიათ, დააკონკრეტოთ, პარტიიდან წასვლის მიზეზები?

- მათ საბჭოეთის გადმონაშთები გვიწოდეს და ყოფილი თანაგუნდელებისგან ამგვარი შეურაცხყოფა გაუგებარი და მიუღებელია. პარტიის შიდა სამზარეულოზე არცერთ შემთხვევაში არ ვისაუბრებ, მაგრამ ამ ადამიანებს ერთი რამე ეშლებათ - სადაც არ უნდა ვიყო, როცა არჩევანი ქვეყნის განვითარებსა და მომავალზე მიდგება, „ნაციონალურ მოძრაობას“ არა-ს ყოველთვის ვეტყვი. ამ ადამიანებს ისიც დაავიწყდათ, რომ ამას მაშინაც ვამბობდი, როცა „თავისუფალი დემოკრატი“ ვიყავი. მგონი, ამ პარტიაში ამას ყველაზე ხმამაღლა ვამბობდი. მათი პოლიტიკური რეინკარნაცია და ხელისუფლებაში დაბრუნება ქვეყნის დაღუპვა იქნება, რაც უმძიმეს სამოქალაქო დაპირისპირებას გამოიწვევს. როცა ეს დავინახე, „ქართულ ოცნებას“ მხარი მაშინ დავუჭირე. სანამ პარტიის წევრი ვიყავი, მსგავსი მხარდაჭერა არ გამომიხატავს. ეს ყველაფერი მას შემდეგ მოხდა, რაც მძიმე მარცხი ვიწვნიეთ. არ უნდა დაგავიწყდეთ, რომ ირაკლი ალასანიამ „რუსთავი 2“-ის ეთერში თქვა, რომ ჩვენ ერთმანეთი ყველა პოლიტიკური ვალდებულებებისგან გავათავისუფლეთ და ამ ადამიანების გადასაწყვეტია, ისინი რა გზით ივლიანო. ალასანიასთან ჩვენი თანაცხოვრება ამით დასრულდა, მაგრამ პარტიიდან პირველი ალექსი პეტრიაშვილი წავიდა, რომელმაც ამის შესახებ სოციალური ქსელებიდან გვამცნო, მეორე დღეს კი პარტიიდან ირაკლი ალასანია წავიდა. ჩვენ პარტია მეოთხე დღეს, ალასანიასთან მრავლსაათიანი მოთათბირების, პარტიის მომავალზე საუბრის შემდეგ დავტოვეთ.

მინდა, ყიამყრალ ადამიანებს ვკითხო, ვის ვუღალატეთ, საიდან წავედით და ვის გავერიდეთ? - ოპონენტებს გონება ისე აერით, მოვლენების ქრონომეტრაჟი აერიათ?

რას ამბობთ, თქვენ ალასანიამ გიღალატათ?

- ამას არც ერთ შემთხვევაში არ ვამბობ.

ანუ, თქვენი გადაწყვეტილების წინაპირობა ალასანიას ნაბიჯი გახდა?

- რა თქმა უნდა.

ალასანია პოლიტიკიდან რომ არ წასულიყო, თქვენ პარტიას არ დატოვებდით?

- იმაზე საუბარი არასერიოზულია, პოლიტიკიდან რომ არ წასულიყო, რა ნაბიჯს გადავდგამდით. ვერ კი-ს გეტყვით და ვერც - არას, მაგრამ ჩვენი გადაწყვეტილების ერთ-ერთი ბიძგი პეტრიაშილისა და ალასანიას გადაწყვეტილება იყო. წინა ხაზზე ჩვენ ვჩანვართ, თორემ, პარტიის გამგეობა ფაქტიურად დაშლილია. იქნებ, ვინმემ ამიხსნას, ცაგარეიშვილმა რას უღალატა, პარტის, რომელიც დაიშალა და ლიდერებისგან დაიცალა?

8 ოქტომბრის არჩევნებში, ბევრმა ადამიანმა მხარი თქვენ დაგიჭირათ, პარტიის თავმჯდომარემ პოლიტიკა დატოვა, ხოლო თქვენ - პარტია. თქვენი ნაბიჯი არის თუ არა უპასუხისმგებლო ნაბიჯი იმ ადამიანების წინაშე, რომელთაც თქვენ ნდობა გამოგიცხადათ?

- ამაში ვერ დაგეთანხმებით, რადგან ჩვენ უთანასწორო ბრძოლაში დავმარცხდით. ორპოლუსიანმა სისტემამ ამოსუნთქვის და ფინანსების მოზიდვის საშუალება არ მოგვცა. ასევე პარტია მძიმე არჩევანის წინაშე იყო, მას როგორ ემოქმედა და ამ საკითხში აზრთა სხვადასხვაობა გამოიწვია. იშვიათი პოლიტიკური ლიდერი თუ მოიქცეოდა ისე, როგორც ირაკლი ალასანია მოიქცა. ის პასუხისმგებლიანი ლიდერი იყო და მან მარცხზე პასუხისმგებლობა აიღო, თუმცა, ჩვენი წილი პასუხისმგებლობა ყველამ უნდა ავიღოთ. მან ყველაზე კარგად იცის, პარტიას სად უჭირდა, რა გამოწვევების წინაშე იდგა და საარჩევნო ბარიერი რატომ ვერ გადალახა. ჩვენ ლოგიკური გადაწყვეტილება მივიღეთ, რომ საშუალება იმ ადამიანებისთვის მიგვეცა, ვინც პარტიასა და გამგეობაში უფრო აქტიური პოზიციის დაკავებას ლამობდა. ერთმანეთი ყველა პოლიტიკური ვალდებულებისგან გავათავისუფლეთ.

თქვენ ამბობთ, რომ ლოგიკური გადაწყვეტილება მიიღეთ, რომ საშუალება იმ ადამიანებისთვის მიგეცათ, ვინც პარტიასა და გამგეობაში უფრო აქტიური პოზიციის დაკავებას ლამობდა. მსგავსი სურვილი ვის ჰქონდა - გოგუაძეს და შავგულიძეს?

- ვინაიდან ამ კითხვამს მისვამთ, ერთ ნიუანსს გეტყვით. სანამ ირაკლი ალასანია „რუსთავი 2“-ის ეთერში წავიდოდა, მას დახურული შეხვედრა ვიქტორ დოლიძესთან და ზურაბ აბაშიძესთან ჰქონდა, სადაც საბოლოოდ ჩამოვყალიბდით, რომ ის ამგვარ განცხადებებს გააკეთებდა და ჩვენც პარტიას გავერიდებოდით, მეგობრებად დავრჩებოდით. ფაქტიურად, ყველაფერზე შევთანხმდით და შეთანხმების გარეშე, არცერთი საკითხი არ დაგვიტოვებია, რაც მოექსპერტო ადამიანებმა უნდა იცოდნენ, რადგან ისინი ალასანიას ბედზე განსაკუთრებით ნერვიულობენ.

ხუხაშვილს ასალანიასა და „თავისუფალი დემოკრატების“ სასარგებლოდ ერთი სიტყვა არასოდეს არ უთქვამს. პარტია დავტოვეთ, რადგან „თავისუფალ დემოკრატებში“ ახალი სულის შთაბერვა ვერ მოხდებოდა. პერსპექტივა რომ დაგვენახა, თანამშრომლობას გავაგრძელებდით. ამ ადამიანებმა ბრეჟნევი და ანდროპოვი რომ მეძახონ, ისინი მაინც მიყვარს, რადგან მათთან ბრძოლის შვიდწლიანი წარსული მაქვს.

თქვენსა და ყოფილ თანაპარტიელებს შორის დაპირისპირების მიზეზი - „რუსთავი 2“ და „ნაციონალური მოძრაობა“ იყო?

- ჩვენი მაგიდის გარშემო რა საუბარიც იყო, იმავე მაგიდასთან დარჩება. პარტია ცოცხალი ორგანიზმია, სადაც მრავალი მოსაზრება იყო. რაღაცას ვემხრობოდი, რაღაცას - არა. პარტიის წარუმატებლობის მიზეზი ტოტალური უფულობა და განსხვავებულობა იყო, რაც წესით, მაგიდასთან უნდა დარჩენილიყო. გარკვეული შეხედულებები იყო და უფრო მკაცრი მესიჯ-დისციპლინა უნდა გვქონოდა. როგორც ჩანს, ესეც ვერ მოხერხდა. საბოლოოდ ის შედეგი მივიღეთ, რისი ღირსიც ვიყავით. დიახ, წარმატებას „ქართულ ოცნებას“ ვუსურვებ, წარუმატებლობას - „ნაციონალურ მოძრაობას“.