ფრაქცია „ეროვნული ფორუმის“ თავმჯდომარე სოსო ვახტანგიშვილი ფიქრობს, რომ ქართველი ამომრჩეველი ჭკვიანია და 8 ოქტომბერს, ერთი პარტიის აბსოლუტურ ძალაუფლებაში მოყვანას არ დაუშვებს. კანონმდებელი საკუთარი პარტიის შანსებსაც აფასებს და პროგნოზირებს, რომ მისი გუნდი სარჩევნო ბარიერს გადალახავს და „ფორუმი“ ქართულ პოლიტიკაში იქნება.

კოალიცია „ქართული ოცნების“ ყოფილ წევრებს შორის არსებულ დაპირისპირებაზე, for.ge სოსო ვახტანგიშვილს ესაუბრა:

ყოფილმა პრემიერ-მინისტრმა, ბიძინა ივანიშვილმა კოალიციის ყოფილ ლიდერებთან - ალასანია-უსუფაშვილ-შარტავასთან შეხვედრაზე უარი განაცხადა და ამით ირიბად გუბაზ სანიკიძის შეთავაზებაზეც უარი თქვა. როგორ ფიქრობთ, რა შედეგს მოიტანდა შეხვედრა?

- შექმნილ ვითარებაში კოალიციის ყოფილი ლიდერების შეხვედრა ერთ-ერთი გამოსავალი იყო, რადგან 2012 წელს, კოალიციას ერთი ამომრჩეველი ჰყავდა, ხოლო დღეს, როცა კოალიციის ყოფილი ლიდერები ერთმანეთთან დაპირისპირებულები არიან, ცხადია, ეს ამომრჩეველზეც მოქმედებს. ცხოვრებაში ძალდატანებით არაფერი ხდება და გადაწყვეტილება ყოფილ პრემიერს უნდა მიეღო. ვთვლიდით, რომ ივანიშვილთან ასეთი შეხვედრა ლოგიკური იყო, მაგრამ თუკი თავად საჭიროდ არ მიიჩნევს, რა თქმა უნდა, ამას განვითარება არ მოჰყვება. სამწუხაროა, რომ ივანიშვილი ასე ფიქრობს, მაგრამ საბოლოო ჯამში, ეს შეხვედრა საქმეს წაადგებოდა.

ამ შეხვედრაზე, პოლიტიკურად რისი განხილვა უნდა მომხდარიყო?

- გარკვეულწილად, იმ გაუგებრობების ნეიტრალიზება უნდა მომხდარიყო, რაც საჯარო სივრცეში ივანიშვილ-უსუფაშვილის მიერ ისმის. ვფიქრობ, რომ ივანიშვილის მხრიდან სანიკიძის მიმართ ასეთი დიალოგის გამართვა სწორი არ იყო. სამწუხაროა, რომ ივანიშვილი ყოფილ თანაგუნდელებს ასე მიმართავს.

ანუ, თქვენ ფიქრობთ, რომ კოალიციის ყოფილ წევრებს შორის დაპირისპირება გზას სხვა მოთამაშეებს უხსნის?

- ეს ყველაფერი არასოლიდურობაზე მეტყველებს. ოთხი-ხუთი წლის მანძილზე, კოალიციამ სიკვდილ-სიცოცხლის ზღვარზე იარა და ამ ფონზე, ასეთი რადიკალური დაპირისპირება, ბრალდებები სოლიდური პოლიტიკოსებისთვის დამახასიათებელი არ არის. იმის გამო, რომ ბრალდებებს პასუხები მოჰყვება, ჩვენ გვინდოდა, რომ პასუხის პერიპეტიები შიდა შეხვედრაზე გადაგვეტანა. კოალიციის ყოფილ წევრებს შორის არსებული დაპირისპირება და არეულობა მხოლოდ იმ პოლიტიკურ ძალას აწყობს, რომელსაც ოთხი წლის წინ ყველანი ერთად ვებრძოდით. არსებული ვითარებით მხოლოდ „ნაციონალური მოძრაობა“ ისარგებლებს. მგონია, რომ მსგავსი ტიპის შეხვედრით ურთიერთბრალებების გაჟღერება შენელებული იქნებოდა და დაძაბული პოლიტიკური ვითარებაც განიმუხტებოდა.

კოალიციის სიმტკიცისთვის „ეროვნულმა ფორუმმა“ რა როლი ითამაშა?

- კოალიციის დაშლის იდეა „ეროვნული ფორუმისგან“ არ მოდიოდა. თუმცა, კოალიციაში პირველი სამიზნე „თავისუფალი დემოკრატები“ გახდნენ და პოლიტსაბჭოზე ვთქვი კიდეც, რომ კოალიციის სიმტკისითვის „თავისუფალ დემოკრატებთან“ გარკვეული საკითხები თავიდან უნდა გაგვევლო. ვინაიდან, ქვეყნისთვის კოალიციის დაშლა მომგებიანი არ იქნებოდა, მხარეებს კონსულტაციები შევთავაზე, მაგრამ ეს მოსაზრება მაშინვე უარყოფილი იქნა. ალბათ, კოალიციის დაშლის ნიშნებიც გახსოვთ, რაც გამოხატული იყო თამაზ მეჭიაურისა და გოგი თოფაძის მიერ „რესპუბლიკური პარტიის“ ბომბარდირებით, რასაც რესპუბლიკელების მხრიდან საჯარო სივრცეში გაურკვეველი პოლემიკა მოჰყვა. არსებულმა გარემოებამ დაგვანახა, რომ კოალიციას დიდი დღე აღარ ეწერა და მზადება იმისთვის დავიწყეთ, რომ კოალიციიდან სრული წესების დაცვით გავსულიყავით. პირდაპირ გეტყვით, რომ „ოცნებას“ კოალიციის დაშლა რომ არ ნდომოდა, არ დაიშლებოდა.

რატომ, თქვენ ზედმეტი ტვირთი იყავით?

- „ოცნება“ დარწმუნებულია, რომ უმრავლესობის მობილიზებას კოალიციის სხვა სუბიექტების გარეშე მოახერხებს, მაგრამ მგონი, მათ საკონსტიტუციო უმრავლესობაც უნდათ, რაც ძალიან დიდ შეცდომად მიმაჩნია. როგორც ჩანს, ჩათვალეს, რომ არც „ფორუმი“, არც რესპუბლიკელები და არც „მრეწველები“ საჭირო აღარ არიან და პრობლემებს თავად მოერევიან. მეეჭვება, რომ ქვეყნის წინაშე არსებული პრობლემები მხოლოდ „ოცნებამ“ გადალახოს. მით უმეტეს, ვხედავთ, რომ „ნაციონალური მოძრაობის“ გაცოცხლება მიმდინარეობს.

სანამ კოალიციიდან გასვლის თაობაზე გადაწყვეტილებას მივიღებდით, მანამდე პრემიერ-მინისტრმა გიორგი კვირიკაშვილმა განცხადება გააკეთა, რომ „ოცნება“ არჩევნებზე მარტო მიდიოდა. როდესაც, დომინანტი პარტია ასეთ განცხადებას აკეთებს, მესამე კლასელი ბავშვიც მიხვდება, თუ რასთან აქვს საქმე.

თქვენ „ოცნების“ პოლიტიკურ სურვილებზე საუბრობთ, თუმცა, მათ გარეშე თქვენ რისი შანსი გაქვთ? საარჩევნო ბარიერს გადალახავთ?

- „ეროვნულ ფორუმს“ საკმაოდ მაღალი შანსები აქვს და ჩვენ ქართულ პოლიტიკაში ვიქნებით. არჩევნებში გამარჯვებისთვის ვიბრძვით და მომავალ პარლამენტში საკმაოდ სოლიდურად ვიქნებით წარმოდგენილნი. 8 ოქტომბერი მალე მოვა და ხმებს შემოდგომაზე დავითვლით.

„ეროვნული ფორუმის“ გარდა, ყოფილი პრემიერის კრიტიკის ობიექტი რესპუბლიკელებიც იყვნენ. კოალიციაში „ოცნების“ შემდეგ, თავს დომინანტად „რესპუბლიკური პარტია“ თვლიდა. შეგიძლიათ, გვითხრათ, კოალიციის წარმატება-წარუმატებლობაში მათი წვლილი როგორი იყო?

- რამდენიმე რესპუბლიკელს პატივს ვცემ. მათ შორის, ვახტანგ ხმალაძეს, რომელმაც ამ მოწვევის პარლამენტში ძალიან ბევრი საქმე აკეთა. რამდენიმე რესპუბლიკელი იყო, რომელიც პარლამენტში კეთილსინდისიერად იქცეოდა და მათი საქმიანობა შრომატევადი იყო. რომ გითხრათ, „რესპუბლიკური პარტია“ კოალიციაში დომინანტი და ყველაზე გამორჩეული იყო, ეს მათი თვითშეფასება უფრო იყო, ვიდრე რეალობა. პარლამენტში ერთ-ერთი წამყვანი ძალა იყო, რადგან მათ მიერ ბევრი საკითხი იქნა ინიცირებული, თუმცა, დომინანტობასთან დაკავშირებით მათი შეფასებები გადაჭარბებული იყო.

რესპუბლიკელებმა რამდენჯერმე ხმაურიანი განცხადება საჯაროდ გააკეთეს და როგორ ფიქრობთ, ეს მათი პლიუსი იყო თუ მინუსი?

- გააჩნია, რომელ თემას გულისხმობთ?!

თუნდაც იმას, რომ „პატრიოტთა ალიანსი“ „ოცნების“ ქურქში იყო გახვეული...

- ის პერიოდი მახსოვს, როცა საგარეჯოში რიგგარეშე არჩევნები ჩატარდა. კოალიციაში საკმაოდ დიდი კამათი იყო იმის თაობაზე, კანდიდატი ვინ უნდა ყოფილიყო. რბილად რომ ვთქვა, კოალიციაში აზრთა სხვადასხვაობა იყო, მაგრამ რესპუბლიკელებმა ის მაინც მოახერხეს, რომ მათ კვოტად მიჩნეული კანდიდატი დაასახელეს. არგუმენტები ის იყო, რომ თინა ხიდაშელის მანდატი მათ ეკუთვნოდათ, რადგან მათ ფრაქციას ერთი კვოტა აკლდებოდა. რესპუბლიკელები ამბობდნენ, რომ მათი ფრაქცია სუსტდებოდა, რადგან თინა ხიდაშელი მთავრობაში გადადიოდა.

აზრთა სხვადასხვაობა იყო იმაზე, კანდიდატი რომელ პარტიას უნდა წარედგინა?

- დიახ. „ოცნებას“ სხვა კანდიდატურა ჰყავდა წარდგენილი და ამ საკითხზე სერიოზული აზრთა სხვადასხვაობა იყო, თუმცა, საბოლოო ჯამში, ისე შევთანხმდით, როგორც შევთანხმდით. ცოტა არ იყოს უსამართლობაა იმის თქმა, რომ „ოცნების“ ქურქში „პატრიოტთა ალიანსი“ იყო გახვეული, რადგან საგარეჯოში, თამარ ხიდაშელის მხარდასაჭერად მთელი მინისტრთა კაბინეტი იყო ჩასული.

პარლამენტის თავმჯდომარემ, დავით უსუფაშვილმა განაცხადა, რომ პოლიტიკა, რომელიც მიხეილ სააკაშვილს 2004 წელს ჰქონდა და „ოცნებას“ ახლა აქვს, „გაჭრილი ვაშლივით“ ერთმანეთს ჰგავს. სპიკერის პოზიციას იზიარებთ?

- „ოცნების“ ბევრი რაიმე არ მომწონს. თუკი 2004 წელს გავიხსენებთ, პირველი რაც ნაციონალებმა გააკეთეს, საკუთარ თავზე კონსტიტუცია მოირგეს და ძალაუფლების უზურპაცია მოახდინეს. როცა „ოცნება“ ასი დეპუტატის გაყვანაზე საუბრობს, შეიძლება მმართველობის ფორმით ნაციონალებს წააგავდეს, მაგრამ მათი მხრიდან ირეკლება სურვილები და ნაციონალების შემთხვევაში ადგილი ფაქტებს ჰქონდა. შეიძლება, „ოცნებას“ ძალაუფლების უზურპაციის სურვილი ჰქონდეს, მაგრამ მათ ამის საშუალება არ უნდა მივცეთ. აბსოლუტური ძალაუფლება ყველა ხელისუფლებას ყვრნის. მეცხრე მოწვევის პარლამენტი პოლიტიკურად დაბალანსებული უნდა იყოს, წინააღმდეგ შემთხვევაში, რასაც უსუფაშვილი საუბრობს, შეიძლება იმ ფაქტობრივ რეალობად იქცეს, რაც ნაციონალებმა 2004 წელს გააკეთეს. მათ ამის საშუალება არ უნდა მივცეთ.

ქართველი ამომრჩეველი ჭკვიანია და ერთი პარტიის აბსოლუტურ ძალაუფლებაში მოყვანას არ დაუშვებს, რადგან 90 პროცენტიანმა პარტიებმა ქვეყანას სარგებელი ვერ მოუტანეს.