„მე კარების გაჯახუნებას არ ვაპირებ“, - ამ განცხადების მიუხედავად, თინა ხიდაშელმა თავდაცვის სამინისტროს კარები საკმაოდ ხმაურიანად გაიჯახუნა. ხიდაშელი მის შემცვლელად ლევან იზორიას დანიშვნას შეცდომას უწოდებს და აცხადებს, რომ თავდაცვა სამოქალაქო უწყებაა და მის ხელმძღვანელად სუს-ის უფროსის მოადგილის დანიშვნა, ძალიან ცუდი გზავნილია როგორც ჩვენი პარტნიორებისთვის, ასევე ქვეყნის შიგნით. გარდა ამისა, თავდაცვის ყოფილი მინისტრი გიორგი კვირიკაშვილს ლექსიკას უწუნებს და აცხადებს, რომ პრემიერ-მინისტრის გამოსვლებში ძალიან ბოლშევიკური ტექსტები არის ამ ბოლოს მოჭარბებული.

თავდაცვის ყოფილი მინისტრის პოზიციებს იზიარებს ქვეყნის პარლამენტის თავმჯდომარე.

დავით უსუფაშვილი მიიჩნევს, რომ ლევან იზორიას თავდაცვის მინისტრად დანიშვნით სისტემურად არასწორი ნაბიჯია გადადგმული. მისივე თქმით, თავდაცვის უწყების და ჯარის სპეციფიკიდან გამომდინარე, ეს სისტემურად არასწორად დანახული მომავალია და არასწორი ნაბიჯია.

„ვისურვებ, რომ ამ ჩემი აზრით, არასწორმა ნაბიჯმა არასწორი პოლიტიკა არ გამოიწვიოს ამ სფეროში და ამისთვის ყველამ უნდა იზრუნოს - პრემიერმაც, მინისტრმაც, მეც ჩემი მხრიდან რაც შემეძლება, იმიტომ, რომ ჯარი და თავდაცვის უწყება ეს არის ის სფერო, სადაც ყველას ინტერესშია ნაბიჯების სწორად გადადგმა. ამიტომ, მე ოპონენტი ვარ ამ შემთხვევაში „ქართული ოცნების“, ოპონენეტი ვარ პრემიერის ამ არჩევნებზე, მაგრამ არ მიხარია ის, რასაც ვამბობ. მე გამიხარდებოდა სხვა რამ რომ შემეძლოს მეთქვა“, - აცხადებს დავით უსუფაშვილი.

ხიდაშელი-უსუფაშვილის კრიტიკა მიუღებელია გიორგი კვირიკაშვილისთვის, რომლის განცხადებით, მისთვის ძალიან მნიშვნელოვანია, რომ ჯარი და სამხედრო უწყება მაქსიმალურად იყოს მოშორებული პოლიტიკურ დაპირისპირებებს.

„ზოგიერთებმა ჩემი მოწოდებები, რომ ერთმანეთს აღარ დავუპირისპირდეთ, ბოლშევიკურად ჩათვალეს. სამწუხაროდ, ძალიან არაადეკვატური კომენტარები იყო. დარწმუნებული ვარ, რომ მას შემდეგ, რაც ქალბატონი თინა და ბატონი დავითი დაძლევენ ამ ემოციებს, ისინი სხვაგვარ კომენტარებს გააკეთებენ. ამ უწყებიდან ყველაზე მეტად უნდა გამოდიოდეს ქვეყნის ერთიანობის სულისკვეთება.

ჩვენ გვაქვს სამოქმედო გეგმები, ევროატლანტიკურ სფეროში ინტეგრაციის მიმართულებით. უნდა აღინიშნოს ბოლო პერიოდში შეერთებულ შტატებთან გაფორმებული მემორანდუმის მნიშვნელობა, რომელიც ძალიან ბევრ შესაძლებლობას იძლევა. ძალიან მნიშვნელოვანია ასევე, რომ ჯარი და სამხედრო უწყება, მაქსიმალურად იყოს მოშორებული პოლიტიკურ დაპირისპირებებს და ის უნდა იყოს მაქსიმალურად დეპოლიტიზირებული უწყება. ჩვენ ამას შევძლებთ“, - აღნიშნა გიორგი კვირიკაშვილმა.

წინამორბედის არ ეთანხმება თავდაცვის მინისტრი. ლევან იზორიას თქმით, მსოფლიოში ბევრი შემთხვევა არსებობს, როდესაც უშიშროების სამსახურიდან თანამდებობის პირები თავდაცვის სფეროში მოსულან.

„ვიქნები შეფასებებში პოზიტიური და არავითარ შემთხვევაში ნეგატიური. რაც შეეხება ამ კონკრეტულ პოზიციას, ეს საზოგადოებამ განსაჯოს, რამდენად ობიქტური და სამართლიანია ეს კრიტიკა. უფრო მეტსაც დავამატებ - აშშ-ში გახლდით რამდენიმე თვის წინ, სახელმწიფო უსაფრთხოების სამსახურის ხელმძღვანელთან ერთად და შევხვდით იქაური უსაფრთხოების სამსახურის ხელმძღვანელობას. იქ ბევრად განსხვავებული დამოკიდებულება აქვთ ამ სამსახურის მიმართ. უფრო პატივს სცემენ. უნდა დავუფასოთ ასეთ ადამიანებს შრომა. ის ნეგატივი, რომ ამ სამსახურიდან მოსული არის ცუდი, სტერეოტიპი ბოლშევიკურია და უნდა დავანგრიოთ“, - აცხადებს ლევან იზორია.

თინა ხიდაშელისა და დავით უსუფაშვილის შეფასებებს არ იზიარებენ მინისტრთა კაბინეტში. ხიდაშელის შეფასებები მიუღებელია ჯანდაცვის მინისტრისთვის. დავით სერგეენკოს განცხადებით, ხიდაშელის ადგილზე ასეთი კატეგორიული არ იქნებოდა.

„რამდენიმე საათი მაინც დავუცდიდი ტემპერატურის დაწევას და არ დავიწყებდი პირდაპირ სანქციების დადებას, რომ ეს არის ბოლშევიზმი. ვერ დავეთანხმები ვერანირად თინა ხიდაშელს, მიუხადავად მისი პიროვნული პატივისცემისა“, - ამბობს დავით სერგეენკო.

ხიდაშელის შეფასება გაუგებარია დევნილთა მინისტრისთვის. როგორც სოზარ სუბარი ამბობს, თავდაცვის ასევე ყოფილი მინისტრი ირაკლი ალასანიაც თავის დროზე უშიშროების მინისტრის მოადგილე იყო.

„ცოტა ვერ გავიგე მაგალითი, როდესაც ქალბატონმა თინამ გააკეთა შედარება ალასანია-იზორიას შორის, იმიტომ, რომ ალასანია, კარგად გვახსოვს, იყო უშიშროების მინისტრის მოადგილე თავის დროზე, თუ არ ვცდები საკმაოდ მაღალი ჩინი ჰქონდა - პოლკოვნიკი თუ გენერალია... თუმცა, მიმაჩნია, რომ ეს არის პლუსი და არა მინუსი. ნამდვილად არ მინდა ვიფიქრო, რომ დავით უსუფაშვილისა და თინა ხიდაშელის გაღიზიანება ხიდაშელის მხრიდან თანამდებობის დაკარგვამ გამოიწვია. სხვა ახსნას ვერ ვპოულობ, თუმცა ძნელად წარმომიდგენია ასე იყოს“, - განაცხადა სოზარ სუბარმა.

ხიდაშელის განცხადებას, რომ იზორიას სახით თავდაცვაში „სუსი დაინიშნა“, სოციალური ქსელით გამოეხმაურა „რადიო თავისუფლების“ სამხედრო მიმომხილველი კობა ლიკლიკაძე. ჟურნალისტი წერს, რომ ვერავითარ კრიტიკას ვერ უძლებს ხიდაშელის განცხადება.

„თინა ხიდაშელს დიდ პატივს ვცემ და ეს ამასწინანდელ ბლოგში, „ხიდაშელის ანტიდოტში“, სრულად გამოვხატე. მაგრამ თინას კრიტიკა და შეშფოთება, რომ იზორიას სახით თავდაცვაში „სუსი დაინიშნა“ - ვერავითარ კრიტიკას ვერ უძლებს რამდენიმე მომენტის გამო. პირველი - სპეცსამსახურში და შსს-ში მაღალი პოსტები ეკავათ საქართველოს ბოლო რამდენიმე მინისტრს (მათ შორის ირაკლი ალასანიას) მეორე - რაკი გვიყვარს დასავლეთის მაგალითების მოხმობა, სპეცსამსახურებსა და შსს-ში ხელმძღვანელებად მუშაობდნენ ნატოს წევრი ქვეყნების რამდენიმე თავდაცვის მინისტრი.

მათ შორის აშშ-ის თავდაცვის მინისტრი 2011-13 წლებში ლეონ პანეტა. გუგლით კიდევ უფრო მეტი მაგალითის მიძებნა შეიძლება. მესამე - სუს-ი არ არის უცხოეთის, იგი საქართველოს უსაფრთხოების სამსახურია. და ბოლო, მეოთხე - თინა ხიდაშელი იყო ერთ-ერთი ყველაზე კარგი და კრეატიული თავდაცვის მინისტრი. მან, პირველმა ქალმა თავდაცვის მინისტრმა, ამ საჯარო თანამდებობის თამასა საკმაოდ მაღლა ასწია. ასეთი მემკვიდრეობა სერიოზული გამოწვევაა ლევან იზორიასთვის, რომელიც ყოველთვის მეორე ვიოლინო იყო“, - წერს კობა ლიკლიკაძე.

ექსპერტები თვლიან, რომ თავდაცვის მინისტრის უპირველესი მოვალეობა, ქვეყნის თავდაცვისუნარიანობის განმტკიცებაა და მისი მოღვაწეობა ყველა ქვეყანაში სწორედ ამ პარამეტრით იზომება და ფასდება. სხვა ქვეყნებთან პოლიტიკური დიალოგისათვის კი შესაბამისი უწყებები არსებობს. ექსპერტი რამაზ საყვარელიძე ამბობს, რომ რესპუბლიკელები ხვდებიან კარის გაჯახუნების სტილი არ ვარგა, წამგებიანი სტილია, მით უმეტს, როდესაც იმ კარის დამცავი იყავი ოთხი წლის განმავლობაში. თუმცა ხიდაშელი-უსუფაშვილის კრიტიკას, კონკურენციით ხსნის.

„მათი აგრუმენტია, რომ იზორია უშიშროების კადრია, ხიდაშელი საერთოდ რისი კადრი იყო? რაღაცის კადრი ხომ უნდა იყო?! ამ ლოგიკით ხიდაშელზე შეიძლებოდა იმის თქმა, რომ განსხვავებული პოლიტიკური გუნდის კადრია. რაც შეეხება დასავლურ ორიენტაციას, რაც თავის კოზირად მიაჩნიათ რესპუბლიკელებს, ეს დასავლური ორიენტაცია ძალიან მკაფიოდ არის მოცემული იზორიას შემთხვევაში. თუმცა, თუ ადამიანს დანახვა არ უნდა, მაინც ვერ დაინახვას“, - აცხადებს რამაზ საყვარელიძე.

რაც შეეხება ბოლშევიკურ ტონს და სამიზნედ მთავრობის მეთაურის შერჩევას, საყვარელიძე ამბობს, რომ ეს ქართული პოლიტიკის ძველი პრობლემაა.

„დავაკვირდეთ ყველა არჩევნებს. კომუნისტებთან დაპირისპირებამ ხელისუფლებაში მოიყვანა მრგვალი მაგიდა, ეს დაპირისპირება მაშინ ლოგიკური აუცილებლობა იყო. მაგრამ ქართულ პოლიტიკაში გაჩნდა ტენდენცია, რომ პოლიტიკა ძირითადად არის ხელისუფლებასთან დაპირისპირება. როდესაც კოალიცია დაიშალა, ასეთი კითხვაც კი გაჩნდა კოალიციის შიგნით, ახლა საარჩევნო კამპანია როგორ უნდა ვაწარმოოთ, როცა ჩვენ თვითონ ვიყავით ამ კოალიციიის წევრებიო, ანუ მათთვის კამპანიის წარმოება მხოლოდ ოპოზიციურ განცხადებებად არის მიჩნეული.

ხომ შეიძლება ხელისუფლებისთვის იმიტომ იბრძოდე, რომ უკეთესი გინდოდეს და არა ის, რომ ყველაფერი მიუღებელია იმ ხელისუფლებაში, რომლის წვერი იყავი. უკეთესზე ფიქრი, თუ რა შეიძლება იმაზე უკეთესი იყოს, ვიდრე დღეს არის - სამწუხაროდ, საქართველოში ვერც ერთი პოლიტიკოსი ვერ ახერხებს. ირჩევენ უფრო ადვილ გზას - ხელისუფლება ყველაფერს არასწორად აკეთებს და ამიტომ, ხმა მე მომეცი, პოლიტიკური ბრძოლისთვის ეს მოძველებული ვარიანტია. უკეთესი იქნება უფრო საინტერესო პოლიტიკურ სვლებზე იფიქროს თითოეულმა პარტიამ“, - აცხადებს რამაზ საყვარელიძე.