აშშ-ის სახელმწიფო დეპარტამენტის სპიკერი მეთიუ მილერი მეტად უცნაურ განცხადებას აკეთებს, რომ ამერიკა თავის ევროპელ კოლეგებთან ერთად მსჯელობს იმაზე, თუ რომელ ორგანოს შეუძლია საქართველოში ჩატარებული საარჩევნო დარღვევების გამოძიება.
ცხადია, ასეთი გამოძიების დაწყება საქართველოს, როგორც სუვერენული ქვეყნის საქმეებში ჩარევა იქნება, რაც, რაოდენ გასაკვირიც არ უნდა იყოს, სააკაშვილთან დაახლოებულ ყოფილ მაღალჩინოსან მეთიუ ბრაიზასაც კი უკვირს და ვერ იხსენებს, არსებობს თუ არა მსგავსი პრეცედენტი და მომხდარა თუ არა საერთაშორისო პრაქტიკაში არჩევნების შედეგების გამოძიება.
„ეს საკმაოდ უჩვეულოა. უცებ დაფიქრებისას არ მახსენდება შემთხვევა, როდესაც ეუთო ან ევროკავშირი ვინმეს აიძულებდეს რამის გამოძიებას“, - აცხადებს მეთიუ ბრაიზა, რომელიც ერთ დროს სააკაშვილმა „ოქროს საწმისის“ მედლით დააჯილდოვა.
ამის მიუხედავად, ქართველი რადიკალები არჩევნებთან დაკავშირებით საერთაშორისო გამოძიების დაწყებას ერთ ხმაში ითხოვენ ისე, რომ არ უკვირდებიან, ყოფილა თუ არა ამის პრეცედენტი მსოფლიოში და, თუ ყოფილა, ეს სამოქალაქო ომს ხომ არ უკავშირდებოდა, რომელშიც ჩვენი ქვეყნის გახვევას რადიკალური ჯგუფები თავგამოდებით ცდილობენ?!
გიორგი ვაშაძე ულტიმატუმის წაყენების რეჟიმშია. ის მუქარის ტონით უთვლის მმართველ გუნდს, „პასუხს ველოდები „ქართული ოცნებისგან“, მზად არის თუ არა საერთაშორისო, მიუკერძოებელი გამოძიებისთვის, ვინაიდან პროტესტი იქნება მწვავე, ისეთი, რომელიც გამარჯვებამდე მიგვიყვანს“.
მამუკა ხაზარაძეც საერთაშორისო გამოძიებაში ხედავს გამოსავალს და ამბობს, რომ საერთაშორისო საზოგადოებასთან არჩევნების გამოძიების კუთხით ინტენსიური მუშაობა მიმდინარეობს.
ანა დოლიძეც მოითხოვს, სასწრაფოდ ჩამოვიდეს ევროკავშირის საგამოძიებო კომისია, ვინაიდან არსებობს მსხვერპლებსა და მოწმეებზე ზემოქმედების საფრთხე, ასევე, მტკიცებულებების განადგურების საშიშროება.
ანალიტიკოსი რამაზ საყვარელიძე დარწმუნებულია, რომ საერთაშორისო საარჩევნო ან საგამოძიებო კომისია ობიექტური არ იქნება. მისი თქმით, გამოძიების ჩატარება პრობლემა არ არის, უბრალოდ, ამოცანა ის არის, საერთაშორისო საარჩევნო ან საგამოძიებო კომისია ობიექტური იქნება თუ არა.
„ვფიქრობ, ობიექტური არ იქნება, მაგრამ მოახერხებს თუ არა, რომ არაობიექტური იყოს, ეს სხვა საკითხია, რადგან მკაფიოდ გამოჩნდა, რომ საქართველოს მოსახლეობა მხარს უჭერს იმ კურსს, რაც ხელისუფლების მიერაა აღებული, რომ საქართველო არ დამორჩილდეს დასავლეთის ინტერესებს. თუ დასავლეთი გეტყვის, რომ ომი მინდა, უნდა დამორჩილდეს საქართველო და გააკეთოს აქ ფრონტი თუ არა? ეს იყო ცენტრალური ფორმულა ამ არჩევნებში ხელისუფლების მხრიდან და სწორედ ამ საკითხის გამო დაიკავა ხელისუფლების მხარე მოსახლეობამ“, - განაცხადა რამაზ საყვარელიძემ, რომლისთვისაც გაუგებარია, რატომ ელოდება ოპოზიცია ხელახალი არჩევნების შემთხვევაში განსხვავებულ შედეგს?!
ყოფილა თუ არა პრაქტიკაში, რომ საერთაშორისო მიუკერძოებელი გამოძიება ჩართულიყო არჩევნების შედეგების გამოძიებაში? ამის მაგალითად ხშირად 1999 წლის კოსოვო, 2017 წლის კენია მოჰყავთ, ანუ ქვეყნები, სადაც სხვადასხვა ეთნიკურ ჯგუფებს შორის დაპირისპირებაა.
ანალიტიკოსი გია აბაშიძე for.ge-სთან საუბრისას ინტერესდება, რომელ საერთაშორისო გამოძიებაზე ლაპარაკობენ გიორგი ვაშაძე და მისი ამფსონები, როცა ჭიჭე ვაშაძეს დასცინიან საკუთარი ახლობლები და ნათესავებიც კი, იმდენად არაადეკვატური, ოდიოზური ფიგურაა, ის პოლიტიკოსად არც მოიაზრება.
„სირცხვილია, რომ ნაცრეჟიმის დროს ვაშაძე გარკვეულ თანამდებობებზე იყო. რასაც გიორგი ვაშაძე და მისი ამფსონები იტყვიან რადიკალური ფლანგიდან, არანაირი მნიშვნელობა არ აქვს. საქართველო სუვერენული, დამოუკიდებელი ქვეყანაა. არ შეიძლება აქ გარე ჩარევა, რაღაც კომისიების შექმნა. ყველას გვახსოვს, რა იყო ე.წ. უცხოური ვეტინგი, რომ ჩვენი მოსამართლეები შეემოწმობინა ვიღაც ბულგარელს, ვიღაც ბელგიელს, არავის ვაკნინებ, მაგრამ დამაკნინებელია ის ფაქტი, როდესაც ჩემს სუვერენულ ქვეყანაში პრეტენზია აქვთ, შეგვამოწმონ და გამოძიებები ჩაატარონ. ეს ყოვლად მიუღებელია. საქართველო არ არის პროტექტორატი, საქართველო სუვერენული ქვეყანაა და არ დაუშვებს გარე უხეშ ჩარევას, არ აქვს მნიშვნელობა, ევროკავშირის ელჩი, ან სახელმწიფო დეპარტამენტი რას იტყვის“, - აცხადებს გია აბაშიძე.
„მართვის სტრატეგიული ინსტიტუტის“ ხელმძღვანელი პეტრე მამრაძე მიიჩნევს, რომ არც ერთ ქვეყანას ეს არ დაუშვია, რომ მისი არჩევნების რევიზირება მომხდარიყო.
„კიდევ სამარცხვინოდ რომ ითხოვენ, ჩატარდეს რიგგარეშე არჩევნები და ჩაატარონ უცხოელებმა, უკაცრავად, მაგრამ უცხოელებს გაეროს ეგიდით ჩატარებული აქვთ არჩენები მარტო იქ, სადაც იყო სამოქალაქო ომი. ასეთი არჩევნები ჩატარდა ყოფილი იუგოსლავიის ზოგიერთ ქვეყანაში და, ასევე, ასეთი არჩევნები იყო აფრიკაშიც, სადაც სამოქალაქო ომის შედეგად ტერიტორია არ არის საერთოდ. ასეთ ტერიტორიებზე შედიან გაეროს სამშვიდობოები, სიტუაცია მშვიდდება და გენერალური ასამბლეის დადგენილებით, ხმებს აძლევენ სახელმწიფოები, რომ ვუშველოთ ნაომარ სახელმწიფოს და ჩატარდეს არჩევნები. არჩევნების დროს კი სამშვიდოებოები უზრუნველყოფენ წესრიგს და მერე ამ სახელმწიფომ უნდა იცხოვროს თავისივე კანონებით. მართალია, ჩვენს ნაცისტებს უნდათ საქართველოში არეულობის მოწყობა, მაგრამ ვერ მოაწყობენ. მთავარია, ხელისუფლება არ წამოეგოს პროვოკაციას“, - გვითხრა პეტრე მამრაძემ.
