ჰყავს თუ არა რეალურად პრეზიდენტ სალომე ზურაბიშვილს ე.წ. ტექნიკური მთავრობის პრემიერობის კანდიდატი და როდის დაასახელებს მას? პრეზიდენტი ამის გაკეთებას, როგორც თავად თქვა, საპარლამენტო არჩევნებამდე დარჩენილ რამდენიმე დღეში გეგმავს, თუმცა მის ამ გადაწყვეტილებას „ქართული ქარტიის“ ხელმომწერთა ნაწილი სკეპტიკურად აფასებს. გასულ კვირას პრეზიდენტსა და „ქართული ქარტიის“ ხელმომწერ პოლიტიკურ ძალებს შორის უშედეგო კონსულტაციების შემდეგ გაჩნდა მოსაზრება, რომ ოპოზიციამ დაიწუნა ზურაბიშვილის მიერ შერჩეული ე.წ. ტექნიკური მთავრობის მეთაური და ამიტომაც პრეზიდენტი ახლა იძულებულია პრემიერობის ახალი კანდიდატი მოძებნოს.

რამდენიმედღიანი პაუზის შემდეგ, პრეზიდენტმა ოპოზიციასთან კონსულტაციები განაახლა და პირველ სტუმრად თავისი ინიციატივების უპირობო მხარდამჭერი - ნიკა გვარამია მიიღო. ისაუბრეს თუ არა წინასაარჩევნოდ „ტექნიკური მთავრობის“ დაკომპლექტებაზე, უცნობია. ათონელის სასახლიდან გამოსულმა ნიკა გვარამიამ დახურულ კარს მიღმა გამართული შეხვედრის დეტალებზე არ ისაუბრა.

ორბელიანების სასახლე 22 ოქტომბერს უკომენტაროდ დატოვეს მამუკა ხაზარაძემ და თინა ბოკუჩავამ. ასევე დაადასტურა პრეზიდენტთან შეხვედრა ექს-პრემიერმა გიორგი გახარიამ. „ნაციონალური მოძრაობის“ თავმჯდომარის მაგივრად კომენტარი პარტიის წარმომადგენელმა გააკეთა და თქვა, რომ არჩევნებამდე დარჩენილ მცირე დროში ტექნიკური მთავრობის დაკომპლექტებაზე საუბარი დღის წესრიგში არ დგას. პოზიციას არ ცვლიან გახარიას პარტიაში და ამბობენ, რომ მათთვის „ნაციონალურ მოძრაობასთან“ თანამშრომლობა ნებისმიერ ფორმატში წითელი ხაზია

კოლეგა ოპოზიციონრების გაერთიანების არ სჯერა „გირჩს“, რომელმაც ზურაბიშვილის ქარტიას თავიდანვე უარი უთხრა. იაგო ხვიჩია ფიქრობს, რომ პრეზიდენტი ოპოზიციას ქარტიის გამოყენებით, მიზანმიმართულად აზიანებს.

„ტექნიკური მთავრობის“ ნაცვლად ტექნიკური მომავლის დაგეგმვას ურჩევს პრეზიდენტს პრემიერი. პარალელურად, მმართველი გუნდი დარწმუნებულია, რომ ზურაბიშვილის ინიციატივისგან განსხვავებით, მისი იმპიჩმენტის პროცედურები წარმატებით განხორციელდება.

ოპოზიციასთან შეხვედრის შემდეგ, დღის ბოლოს, 22 ოქტომბერს პრეზიდენტი საქართველოში ამერიკის შეერთებული შტატების ელჩს შეხვდა. რობინ დანიგანის და სალომე ზურაბიშვილის შეხვედრის ამსახველი ფოტო სოციალურ ქსელში თავად ზურაბიშვილმა გაავრცელა.

ანალიტიკოსი ნიკა ჩიტაძე მიიჩნევს, რომ სალომე ზურაბიშვილს საკუთარი თამაში აქვს წამოწყებული და ამის კონკრეტული მიზანიც აქვს. ჩიტაძე for.ge-სთან ამბობს, რომ ზურაბიშვილის სურვილია ისევ პრეზიდენტად დარჩეს. ამიტომ ცდილობს შექმნას განცდა ქვეყნის შიგნითაც და მის გარეთაც, რომ ის ოპოზიციის ლიდერი და მნიშვნელოვანი პოლიტიკური ფიგურაა.

„მე მაინც მგონია, რომ ზურაბიშვილს საკუთარი თამაში აქვს წამოწყებული. ის ძალაუფლების მოყვარული ქალბატონია. მე მასთან პირადი ურთიერთობა მქონდა, როცა საგარეო საქმეთა მინისტრი იყო და მისი გულწრფელობის არ მჯერა. დიდი ალბათობით, ოპოზიციაშიც არ არის „ქარტიასთან“ დაკავშირებით ერთიანობა. ამის მიზეზი კი ისაა, რომ საბოლოო ჯამში ამ ე.წ. ტექნიკურ მთავრობასაც და მის მეთაურსაც პარლამენტი ამტკიცებს. ზურაბიშვილი კი წარადგენს, მაგრამ ამ კაბინეტს პარლამენტის უმრავლესობის მხარდაჭერა სჭირდება. ამიტომაც ამბობენ ოპოზიციის ლიდერები, რომ მოდი, ჯერ არჩევნებში გავიმარჯვოთ და შემდეგ გადავწყვიტოთ რა ვქნათ. სადღაც სამი კვირაა მერე ამისთვის საჭირო, რომ პრემიერობის კანდიდატი დასახელდეს.

„ამიტომ მე მაინც მგონია, რომ ზურაბიშვილის ეს მცდელობა მხოლოდ პირადი მიზნებით და ინტერესებით არის განპირობებული. მას სურს ქვეყნის შიგნით და მის გარეთაც საკუთარი პოლიტიკური მომავალი დააზღვიოს. ამიტომაც ცდილობს წარმოაჩინოს თავი, თითქოს ის არის პირი, რომელსაც შეუძლია ოპოზიციურ პარტიებთან კორდინაცია და რაღაცას თაობს.

„მე მის გუწრფელობაში ეჭვი მეპარება. რა თქმა უნდა, ეს მოქმედებს ამომრჩეველზე და ფუჭ მოლოდინებს ქმნის. ამიტომ მეც ვეთანხმები ოპოზიციას, რომ სჯობს არჩევნების შემდეგ იყოს ამაზე საუბარი“, - ამბობს ჩიტაძე.

ანალიტიკოსი ედიშერ გვენეტაძე კი მიიჩნევს, რომ ზურაბიშვილს ე.წ. „ქართული ქარტია“ ჩაუვარდა, მაგრამ მისით თამაშს მაინც განაგრძობს. გვენეტაძის აზრით, ყველამ იცის, რომ ზურაბიშვილი მალე პრეზიდენტი აღარ იქნება და მის ნათქვამ არც ერთ სიტყვას ძალა არა აქვს. ამიტომ მხოლოდ პრეზიდენტის ინსტიტუტის პატივისცემის გამო ცდილობენ მასთან ზრდილობის გამო იკონტაქტონ.

„ამ ქალბატონმა იცის, რომ შესაძლოა ისევ იმპიჩმენტმა მოუსწროს, მაინც არ ისვენებს. მერამდენად უნდა ელაპარაკოს ამ ოპოზიციას, გაუგებარია. ხომ ფაქტია, რომ ეს ხალხიც მაგასთან ზრდილობის გამო დადის. ყველამ იცის, რომ სადაცაა პრეზიდენტიც აღარ იქნება. ვინ იცის იმპიჩმენტითაც მოხდეს მისი გადაყენება. ამის მიუხედავად მაინც სისულელეებს აკეთებს. მე მგონია ის ადეკვატური აღარ არის. უნდა საკუთარი პერსონის მნიშვნელობაში დაარწმუნოს ოპოზიცია. ეტყობა მათგან ბოლომდე ერთი პირი არაა, რომ ისევ, საპრეზიდენტო ან საპრემიერო კანდიდატი იქნება. ამიტომ ვერ ისვენებს. ევროპაშიც და ამერიკაშიც იციან, რომ ის არ არის იმ ტიპის პოლიტიკური ფიგურა, რომ მას ქვეყანაში რამე სერიოზული პოლიტიკური მოთამაშის სტატუსი ჰქონდეს. არა აქვს საზოგადოებაში არანაირი რეიტინგი და მისი ეს ყველაფერი ბოლო გაფართხალებაა. მას ვინ ჰკითხავს ან პრემიერის დანიშვნას ან მთავრობის?“, - ამბობს გვენეტაძე.