თუკი დაუშვებთ, რომ ადამიანი აკეთებს იმას, რასაც შეჩვეულია, რამდენად შეიცვლებოდნენ ამ წლების განმავლობაში ნაცები და, ხელისუფლებაში მობრუნების თეორიული შანსის შემთხვევაში, რა სიურპრიზებს მოუმზადებენ საქართველოს მოსახლეობას?! იქნებიან თუ არა ისეთივე აგრესიულები, რაც ჩვენ ვიხილეთ ადრინდელი ცხრა წლის განმავლობაში?!

რადიო „თავისუფლებასთან“ ინტერვიუში სააკაშვილი ვერ გრძნობს საკუთარ შეცდომებს და ამბობს, რომ ხალხი იღლება ყველანაირი, მათ შორის, წარმატებული ხელისუფლებით და ისტორია აუცილებლად იტყვის, რომ „ნაცმოძრაობა“ იყო საქართველოს ერთ-ერთი ყველაზე წარმატებული ხელისუფლება საუკუნეების განმავლობაში. მათი წარმატების ისტორია კი ყველაზე კარგად შეაფასა, სააკაშვილის თქმით, „დიდმა კახა ბენდუქიძემ“, როცა თქვა, რომ სახელმწიფოს შექმნა ჰგავს ნარკოზის გარეშე ოპერაციის ჩატარებას, რომელიც მტკივნეულია და პაციენტი ძალიან იშვიათადაა ქირურგის მადლობელი.

რაც შეეხება შეცდომებს, სააკაშვილი ამტკიცებს, რომ იმ შეცდომებს აღარ გაიმეორებდა, მაგრამ მისი თქმით, შეცდომები არაფერია ნაცების ისტორიულ მიღწევებთან შედარებით.

„ჩვენ გვქონდა შეცდომები, მაგრამ 2012 წლის საქართველოს შედარება 2003 წელთან, პრაქტიკულად წარმოუდგენელია“.

ყოფილი სახელმწიფო მინისტრი პაატა ზაქარეიშვილი დარწმუნებულია, რომ ნაცებმა ბევრი რამ გადააფასეს, უბრალოდ, ამის აღიარება არ სურთ, რადგან ჰგონიათ, რომ აღიარება მათთვის წამგებიანი იქნება.

„აშკარად ჩანს, რომ ნაცები შეიცვლებიან, რადგან უკვე დაიშალა „ნაციონალური მოძრაობა“, ის აღარ არის, რაც იყო. დარჩა მხოლოდ სახელი „ნაცმოძრაობა“, ხალხი წავიდა იქიდან. პრაქტიკულად, „ნაცმოძრაობა“ სულ სხვაა დღეს, ვიდრე იყო წინათ და არანაირად არ მჯერა იმ მითების და ლეგენდების, რასაც ავრცელებს „ქართული ოცნება“. „ნაცმოძრაობამ“ აჩვენა თავისი სიცოცხლისუნარიანობა, განსხვავებით „მოქალაქეთა კავშირისგან“, განსხვავებით, „აღორძინებისგან“, რომლებიც როგორც კი წავიდნენ ხელისუფლებიდან, მაშინვე დაიშალნენ. აშკარად ჩანს, რომ „ნაცმოძრაობამ“ მოახერხა სიცოცხლისუნარიანობის შენარჩუნება, რაც თავისთავად მეტყველებს იმაზე, რომ „ნაცმოძრაობა“, როგორც პარტია, არსებობს და არ ყოფილა მარტო ერთი ლიდერის გავლენის ქვეშ, როგორც „მოქალაქეთა კავშირი“ იყო ან თუნდაც „აღორძინება“. ვფიქრობ, „ნაცმოძრაობას“ აქვს უნარი, თავის თავში ჩაიხედოს, გადააფასოს წარსული. შესაძლოა, გადაფასებულიც აქვთ წარსულის ქმედებები. ბევრს არ სჯერა ეს, მაგრამ მე მჯერა, რომ მათ ბევრი რამ გადააფასეს, უბრალოდ, ჯობია, ამაზე ხმამაღლა ილაპარაკონ ნაცებმა, მაგრამ მათ ჰგონიათ, რომ ეს წამგებიანი იქნება“, - აცხადებს პაატა ზაქარეიშვილი for.ge-სთან საუბრისას.

მისივე თქმით, „ნაცმოძრაობაში“ ძველი გვარდიიდან თითქმის არავინ დარჩა, ყველა გადანაწილდა სხვადასხვა პარტიაში, სხვადასხვა სახელითა და ფორმით გამოდიან. თუმცა მთავარია, რომ დღეს საქართველოს პრობლემა არ არის „ნაციონალური მოძრაობა“, 2012 წელს ნამდვილად პრობლემა იყო კორონავირუსი, დღეს კი პრობლემა სულაც არაა კორონავირუსი. დაახლოებით ასეთივეა დღევანდელი „ნაცმოძრაობა“. ახლანდელი „ნაცმოძრაობა“ არის დღევანდელი კორონავირუსის ძალის მქონე. ის ვერ აღდგება.

„ნაცმოძრაობა“ იმ სახით, რა სახითაც იყო, გამორიცხულია, რომ აღდგეს. ამ პარტიას არავითარი ძალა, ენერგია არ გააჩნია, ეს ჩანს პირდაპირ. მას არ შესწევს უნარი, მოახდინოს გარკვეული გავლენები იმ ფორმით, რაც მას ჰქონდა წლების წინ, იმის ნახევრის გაკეთებაც კი არ შეუძლია, მაგრამ ჩემთვის პირადად „ქართული ოცნებაა“ პრობლემა, რადგან „ქართულმა ოცნებამ“ დაგვაკარგინა და გვაკარგინებს ევროპულ პერსპექტივას“,-აცხადებს პაატა ზაქარეიშვილი.

ექსპერტ რამაზ საყვარელიძის მოსაზრებით, სააკაშვილს ადრეც უთქვამს, შეცდომებს აღარ გავიმეორებო და ამაში გულისხმობდა „ქართული ოცნებისთვის“ ხელისუფლების გადაბარებას და არა მონანიებას.

ნაცები არსად არ ამბობენ, რომ ცხრა წლის განმავლობაში შეცდომები დაუშვეს. ეს რომ თქმულიყო, მონანიება რომ მომხდარიყო, კიდევ შეიძლებოდა იმის ვარაუდი, რომ მომავალში აღარ გაიმეორებდნენ დანაშაულს, მაგრამ არც კი მოინანიეს. ამ დროს ნამდვილად აწყობდათ მონანიება ხალხის გულის მოსალბობად, თუმცა არ მოინანიეს. ეს უკვე ძალიან დიდი პროცენტია იმისა, რომ დანაშაულებს ნაცები გაიმეორებენ კი არა, კვადრატში აყვანილს გაიმეორებენ. მათ ადრე ნათქვამი აქვთ, არ ვიყავით საკმაოდ მკაცრები და ეს იყო ჩვენი შეცდომაო, ცხადია, ამ შეცდომასაც „გამოასწორებენ“, -აცხადებს რამაზ საყვარელიძე ჩვენთან საუბრისას.

რაც შეეხება სააკაშვილის ნათქვამს, რომ ნაცების ნამოქმედარით ყველა კმაყოფილი ვერ იქნება, რადგან დიდი საქმეები ვერ კეთდება უმტკივნეულოდ, რამაზ საყვარელიძეს ახსენდება, რომ ასე ამბობდნენ ბოლშევიკებიც, ეს ზუსტად ბოლშევიკების კონცეფციაა, რომლებმაც პროლეტარიატის დიქტატურა დაარქვეს ამ სტილს. მიშამ კი „ნაციონალების დიქტატურა“ შექმნა. სინამდვილეში, არანაირი განსხვავება არ არის პროლეტარიატის დიქტატურასა და ნაცების დიქტატურას შორის.