23 ოქტომბერს 16:00 საათზე, „ქართული ოცნების“ საარჩევნო კამპანიის დასკვნითი ღონისძიება თბილისში გაიმართება. აღნიშნულს ანალიტიკოსთა და პოლიტიკოსთა ნაწილი 20 ოქტომბერს, თავისუფლების მოედანზე გამართულ მარშს, „საქართველო ირჩევს ევროკავშირს“ უკავშირებს და „ოცნების“ მიერ დაგეგმილ ღონისძიებას კონტრ-აქციას უწოდებს, რასაც მეორე ნაწილი კატეგორიულად უარყოფს და საპასუხოდ ამბობს, რომ „ქართულ ოცნებას“ მისი საარჩევნო კამპანიის დასკვნითი ღონისძიება დიდი ხნით ადრე ჰქონდა დაგეგმილი.

ანალიტიკოს ზაალ ანჯაფარიძის განცხადებით, 20 ოქტომბრის აქცია იყო დასავლეთისთვის იმის ჩვენება, რომ საქართველოში არსებობს პროდასავლური ფრთა, რომელიც ევროპისკენ ილტვის. როგორც ანჯაფარიძემ For.ge-სთან საუბარში აღნიშნა, ამ მარშით ოპოზიციამ მოსინჯა ძალა საპარლამენტო არჩევნების მეორე დღისთვის, თუ რამდენი ადამიანის შეკრებას შეძლებს ის 27 ოქტომბრისთვის.

„კატეგორიულად არ ვეთანხმები იმ შეფასებას, თითქოს 23 ოქტომბრის აქცია 20 ოქტომბრის აქციის საპასუხოდ დაიგეგმა, რადგან თბილისის აქცია არის „ქართული ოცნების“ დასკვნითი წინასაარჩევნო ღონისძიება, რაც მანამდე დაგეგმილი იყო და არავითარი კავშირი მას 20 ოქტომბრის აქციასთან არ აქვს. ვერ ვიზიარებ იმ მოსაზრებას, რომ აქციაზე ბევრი ხალხი იყო - დაახლოებით იმდენი იყო, რამდენიც ოპოზიციის აპრილ-ივნისის აქციებზე. თვითონ ოპოზიციის წარმომადგენლებიც თავიანთ ფეისბუქ-პოსტებში, მართალია მძიმედ, მაგრამ აღიარებენ, რომ ეს აქცია არ გამოვიდა ისეთი, როგორსაც გეგმავდნენ.

ეს აქცია დასავლური აუდიტორიისთვის იყო გათვლილი, ეჩვენებინათ მათთვის, რომ საქართველოში არიან პროევროპული ძალები და არის მხარდაჭერის ობიექტი. დასავლეთს ახლაც სჭირდებოდა დაენახა, რომ საქართველოში არის საზოგადოების ნაწილი, რომელიც პროევროპულ კურსს უჭერს მხარს და დასავლეთს დაანახეს ამ ხალხის შეკრებით. მეორე მხრივ, ერთი გასროლით ორი კურდღლის მოკვლის მცდელობა იყო, გარდა იმის დემონსტრირება დასავლეთის წინაშე, თუ რამდენი არის პროევროპულად განწყობილი ქართველი, მათ ასევე საკუთარი ძალებიც მოსინჯეს - 27 ოქტომბერს, მარცხის შემთხვევაში, რამდენი ადამიანის გამოყვანას შეძლებენ.

მაინცდამაინც დიდი მნიშვნელობას ამ აქციას არ მივანიჭებდი, უბრალოდ, დასავლეთმა მიიღო ხელში კიდევ ერთი საბუთი, თუ ის გადაწყვეტს, რომ არჩევნების ლეგიტიმურობა არ აღიაროს, ყოველთვის იტყვის, საქართველოში არის პროევროპული საზოგადოება, რომლის სურვილებიც არ იქნა გათვალისწინებული“, - განაცხადა ანჯაფარიძემ.

მისივე შეფასებით, კარგი იქნება თუკი „ქართული ოცნება“ დაგეგმილი ღონისძიებისთვის, თბილელი მოქალაქეებისთვის განსხვავებულ მესიჯებს მოამზადებს. ანჯაფარიძის თქმით, ქართველ ამომრჩეველი საკმაოდ ემოციურია და მას არჩევნების დღეს, საარჩევნო კაბინაშივე შეუძლია საკუთარი გადაწყვეტილება შეცვალოს.

„ჩვენი ქართველი ამომრჩევლის განწყობის განსაზღვრა ძალაინ რთულია - ის ამით ნამდვილად არ ჰგავს დასავლელ ამომრჩეველს, ხანდახან პირდაპირ საარჩევნო კაბინაში შეუძლია შეცვალოს თავისი პირვანდელი გადაწყვეტილება - ძირითადად, ემოციების ზემოქმედებით იღებს ხოლმე გადაწყვეტილებას, მაგრამ მე მაინც მგონია, რომ „ქართულ ოცნებას“ აქვს ისეთი ელექტორალური რესურსი, რომელიც მას უმრავლესობის აღებაში დაეხმარება.

კარგი იქნებოდა, თუ „ქართული ოცნება“ თბილისური აუდიტორიისთვის ცოტა განსხვავებულ მესიჯებს მოამზადებდა, ვიდრე ეს იყო რეგიონებში. თბილისი ყოველთვის იყო თავისებური ელექტორალური კლასტერი, მისი განწყობები იცვლება სხვადასხვა ფაქტორების ზემოქმედებით. წინა პლანზე წამოვიდა ახალგაზრდობა, რომელიც მონაწილეობდა აქციებში. გამომდინარე იქიდან, რომ „ქართულ ოცნებას“ ახალგაზრდულ ელექტორალურ სეგმენტში მაინცდამაინც კარგად ვერ აქვს საქმე, შესაძლოა, ახალგაზრდობის ნაწილმა ოპოზიციას დაუჭიროს მხარი, თუმცა, მხოლოდ ახალგაზრობა არ არის ელექტორატი, გაცილებით მეტია საშუალო და უფროსი თაობა“, - დასძინა ზაალ ანჯაფარიძემ.

21 ოქტომბერს, პარტია „ქართული ოცნების“ საპატიო თავმჯდომარემ, ბიძინა ივანიშვილმა განაცხადა, რომ საქართველოში, სამწუხარო რეალობის შექმნას ცდილობენ გარკვეული თანამდებობის პირები და ბიუროკრატები, რომლებიც კოორდინაციაში არიან ოპოზიციასთან, თუმცა მანვე ხაზი გაუსვა იმასაც, რომ მმართველ გუნდსა და საზოგადოებას უკვე დიდი გამოცდილება აქვს.

„სამწუხარო რეალობის შექმნას ცდილობენ, მათ რიცხვში, ჩვენი სამეგობროდან გარკვეული თანამდებობის პირები, გარკვეული ბიუროკრატები კოორდინაციაში და კორელაციაში არიან ოპოზიციურ სპექტრთან, მაგრამ რასაც მინდა ხაზი გავუსვა, თავშივე, ჩვენ დიდი გამოცდილება გვაქვს უკვე „ქართულ ოცნებას“ და ქართულ საზოგადოებას. აი, დეჟავიუ - ძალიან ბევრი რამაა ისეთი, რაც უკვე გვინახავს. დავასწრებ მოვლენებს და გეტყვით, რომ არაფერიც არ მოხდება, [არჩევნების] მეორე დღე იქნება ძალიან წყნარი, ოღონდ ერთ რამეს აქვე გავუსვამ ხაზს, ალბათ, კითხვები შემდგომში გექნებათ და მექნება საშუალება, გავაკეთო ამაზე აქცენტები, რომ ყველა დღეს - ერთი კვირა, ორი კვირა, ერთი თვე, ორი თვე - სანამ ომი არ დასრულდება, შეიძლება პირობითად „მეორე დღე“ უწოდო, იმიტომ რომ იქნება ძალიან დაძაბული ველი, იქნება ძალიან დაძაბული ვითარება გეოპოლიტიკურად და შესაბამისად, გვმართებს ძალიან დიდი სიფრთხილე“, - განაცხადა ბიძინა ივანიშვილმა ტელეინტერვიუში.