პრეზიდენტმა პრემიერობის კანდიდატის ვინაობა საიდუმლოდ დატოვა და როგორც აღმოჩნდა, ქარტიის ხელმომწერი პარტიების უმეტესობა არ არის თანახმა არჩევნებამდე პრემიერის კანდიდატურის დასახელებაზე. სალომე ზურაბიშვილს და ოპოზიციას კონსენსუსის მისაღწევად დრო ეწურებათ. არჩევნებამდე 17 დღეა დარჩენილი და ისევ უცნობია, გაგრძელდება თუ არა პოლიტიკური კონსულტაციები ორბელიანების სასახლეში.

ზურაბიშვილმა 5 ოქტომბერს მედიასთან ინტერვიუში ახსენა, რომ მან უკვე შეარჩია პრემიე- მინისტრობის კანდიდატი, თუმცა ვინაობის დასახელებისგან თავი შეიკავა. მხოლოდ ის განმარტა, რომ მისი რჩეული „არ არის პოლიტიკური წარსულის კანდიდატი“ და არის „პროფესიონალი, სანდოობით აღჭურვილი, მე მგონი, ყველასათვის მისაღები“.

არაოფიციალურად გავრცელდა ინფორმაცია, რომ სალომე ზურაბიშვილი მსოფლიოში ცნობილ რამდენიმე ქართველ მეცნიერს განიხილავდა. ერთ-ერთ მათგანად კი ლუნდის უნივერსიტეტის პროფესორს, ბიოლოგ ზაალ კოკაიას განიხილავდა, რომელიც 30 წელიწადზე მეტია შვედეთში მუშაობს. კოკაიამ საკუთარი კანდიდატურის შესაძლო განხილვის თემაზე კომენტარის გაკეთება მედიასთან არ ისურვა.

ქარტიაში არსებულ დათქმებს განსხვავებულად განმარტავს გახარიას გუნდი. ექსპრემიერის პარტიას პრეზიდენტმა ორბელიანების სასახლეში უმასპინძლა, სადაც გიორგი გახარიამ ზურაბიშვილს კიდევ ერთხელ გაუმეორა, რომ მისთვის წითელი ხაზი რიგგარეშე არჩევნებია.

ქარტიის პუნქტების შესაძლო დარღვევაზე პრეზიდენტს, კოალიცია „ძლიერმა საქართველომ“ მიანიშნა. „ერთიანობა ნაციონალური მოძრაობაც“ მიიჩნევს, რომ არჩევნებამდე ტექნიკური მთავრობის ფორმირებასა და მით უფრო, პრემიერობის კანდიდატზე მსჯელობა მიზანშეწონილი არ არის.

მმართველი გუნდი დარწმუნებულია, რომ ათონელის რეზიდენციაში მიმდინარე შეხვედრები, ზურაბიშვილის იმპიჩმენტისგან განსხვავებით, უშედეგოდ დასრულდება. უმრავლესობამ პრეზიდენტი კონსტიტუციის დარღვევაში კიდევ ერთხელ დაადანაშაულა და თქვა, რომ პოლიტიკური პროცესების რადიკალიზაციაზე პასუხს 26 ოქტომბრის არჩევნებზე მიიღებს.

„ჩვენ არაერთხელ გვითქვამს საზოგადოებისათვის, რომ დღევანდელი ოპოზიცია სრულად არის დამოკიდებული გარე დირექტივებზე და მხოლოდ დავალებებით, ქვეყნის გარედან მიღებული ინსტრუქციებით მოქმედებს“, - განაცხადა „ქართული ოცნების“ აღმასრულებელმა მდივანმა, მამუკა მდინარაძემ.

მისი თქმით, დღევანდელ ოპოზიცის შეგვიძლია კოლექტიური აგენტურა ვუწოდოთ, რადგან ერთმანეთისგან მათ მხოლოდ საარჩევნო ნომერი და ლოგოები განასხვავებთ.

„ქართული ქარტიის“ ხელმომწერი პარტიების უმეტესობა არ ეთანხმება ტექნიკური პრემიერის, კანდიდატურის წინასწარ შეთანხმებას.

„მხოლოდ ხელისუფლების ცვლილების შემდეგ, ქარტიის ტექსტის ზუსტი შესაბამისობით, სალომე ზურაბიშვილის და სხვების მონაწილეობით, ხალხის შესაბამისი მანდატით აღჭურვილი საპარლამენტო ახალი კოალიციური უმრავლესობა ჩამოაყალიბებს ახალ (გარდამავალ) მთავრობას, სადაც იქნებიან პატრიოტი პროფესიონალები, მათ შორის უპარტიოებიც“, - დაწერა „ნაციონალური მოძრაობის“ პოლიტიკურმა მდივანმა, გია ბარამიძემ, 6 ოქტომბერს, ჯერ კიდევ კონსულტაციების დაწყებამდე.

„ძალაუფლება ამ ქვეყანაში ეკუთვნის ქართველ ხალხს, ამიტომ ჩვენ მიგვაჩნია, რომ ნებისმიერი კანდიდატურა განხილული უნდა იყოს არჩევნების შემდეგ“, - თქვა 8 ოქტომბერს სალომე ზურაბიშვილთან შეხვედრის დასრულების შემდეგ მამუკა ხაზარაძემ, „ძლიერი საქართველოს“ ლიდერმა.

რაც შეეხება პრემიერ-მინისტრობის კანდიდატს, მამუკა ხაზარაძე ამბობს, რომ პრეზიდენტთან „კანდიდატების განხილვა არ ყოფილა“.

იგივე თქვეს სალომე ზურაბიშვილთან მოლაპარაკებების შემდეგ თინა ბოკუჩავამ და ნიკა გვარამიამაც.

ანალიტიკოსი ვახტანგ ძაბირაძე აცხადებს, რომ პრეზიდენტის ასეთი ინციატივები, რომელიც ჩაშლისთვისაა განწირული, ოპოზიციის რეიტინგზე უარყოფითად მუშაობს და სჯობდა ზურაბიშვილს ჯერ ამაზე კონსულტაციები თავად ოპოზიციასთან გაევლო.

„არ ვიცი, მე არ მესმის ზურაბიშვილის ტაქტიკა და ეს არა ერთხელ ვთქვი. მრჩება შთაბეჭდილება, რომ ის ჯერ გადაწყვეტილებას დამოუკიდებლად იღებს და შემდეგ ამის შესახებ ოპოზიციას აცნობს. ამაზე ხმამაღლა ჯერ არ უნდა ისაუბროს, როცა ოპოზიციისგან დასტური არა აქვს და ისინიც ამ იდეის შესახებ ინფორმაციას მხოლოდ საჯაროდ გაკეთებული განცხადებების წყალობით იღებენ.

ოპოზიცია ერთიან კანდიდატზე რომ შეთანხმებულიყო და ამ ადამიანის გვარი გაჟღერებულიყო, ეს იქნებოდა დამატებითი ფაქტორი იმისთვის, რომ ოპოზიციას გაცილებით მეტი ხმები მიეღო, ვიდრე იმ შემთხვევაში, თუ ასეთი შეთანხმება ვერ მოხდებოდა.

გვახსოვს, თავის დროზე ხაზარაძესა და გახარიას შესთავაზა გაერთიანება. მაშინაც ვფიქრობდი, რომ ნიადაგი მოსინჯული ექნებოდა და ეს გაერთიანებით დამთავრდებოდა, მაგრამ, როგორც ჩანს, ეს ასე არ იყო და ახლაც იგივეა. ყველაფერი ეს კი ოპოზიციის გარდა არავის აზიანებს. ეს შემთხვევები ოპოზიციის რეიტინგზე ცუდად მოქმედებს. თუ წინასწარი პოზიციები მაინც არ იცის პრეზიდენტმა, მაშინ ოპოზიციას ასეთ რამეს რატომ სთავაზობს, ვერ გავიგე, რადგან ეს კონტრპროდუქტიულია“, - ამბობს ძაბირაძე.

მისივე თქმით, თუ პრემიერობის კანდიდატზე პრეზიდენტი ოპოზიციას არ ელაპარაკება, ამ შეხვედრებს რა აზრი აქვს?

„კანდიდატების შეთავაზება უნდა ყოფილიყო და თუ ასეთი რამ არ არის და თუ წინასწარ არანაირი ნიადაგი მოსინჯული არაა, მაშინ პრეზიდენტმა ასეთ ინიციატივებს თავი უნდა დაანებოს და ფრთხილად მოიქცეს, რადგან არჩევნებამდე არც ისე ბევრი დრო დარჩა. ახლა გარისკვა და ისეთი ნაბიჯის გადადგმა, რომელმაც შეიძლება უკუეფექტი გამოიწვიოს, ჩემი აზრით, სწორი არაა. ისეთი შთაბეჭდილება მრჩება, რომ ქარტიის შესრულებას არავინ აპირებს“, - განაცხადა ძაბირაძემ.

მისივე თქმით, ისეთი შთაბეჭდილება იქმნება, თითქოს ამ პარტიებმა „ქარტიაზე“ ხელი იმიტომ მოაწერეს, რომ რიტუალი ჩაატარეს და, როგორც ჩანს, არც არავინ აპირებს ამ „ქარტიის“ შესრულებას თუ აღსრულებას.

„თავიდანვე „ქარტიის“ შეთავაზებაც გაუგებარი იყო. პარტიებს ეს ულტიმატუმივით წარუდგინეს და მის შექმნაში მონაწილეობა პარტიებს არ მიუღიათ. ფაქტია, არჩევნების წინ არავინ არ იტყვის პირდაპირ იმას, რომ არ შევასრულებთო, ეს ხომ წარმოუდგენელია. თუმცა ეს ყველაფერი მაინც კითხვის ქვეშ დადგება და არჩევნების შედეგებზე იქნება დამოკიდებული, რა და როგორ მოხდება. რომ გითხრათ, ველოდები, რომ არჩევნების შემდეგ რაღაც ტექნიკური მთავრობა შეიქმნება, მით უმეტეს ისეთი, როგორზედაც ზურაბიშვილი ლაპარაკობს, არ ვფიქრობ, რომ ეს მოსალოდნელია. თუ ამის შესაძლებლობა არსებობს, სჯობს ახლა შეიქმნას და თუ დღეს ეს ვერ მოხერხდა, არჩევნების შემდეგ მით უმეტეს ვერ მოხერხდება“, - ამბობს ძაბირაძე.