რამდენიმე დღეში კოალიცია «ქართული ოცნების» ლიდერი ბიძინა ივანიშვილი ზუგდიდის მაჟორიტარობის კანდიდატს დაასახელებს. მართალია, ცალკეული ძალები ამ თემაზე არაერთგვაროვანად საუბრობენ, მაგრამ ეჭვი თითქმის არავის ეპარება, რომ ზუგდიდის მოსაგებად, კოალიციის სახელით, «თავისუფალი დემოკრატების» ლიდერი ირაკლი ალასანია იბრძოლებს... ბოლო წლებში დამკვიდრებული ქართული პოლიტიკური ტრადიციით, ზუგდიდში პროპორციული თუ მაჟორიტარული არჩევნების მოგება ჩვენებური პოლიტიკური ინსტემბლიშმენტისთვის ერთგვარი «ღირსების საქმეა». მეტიც, იმასაც კი ამბობენ, რომ თუკი ალასანია ზუგდიდის მაჟორიტარი გახდება, 2013 წელს პრეზიდენტობა გარანტირებული ექნება... მოკლედ, «ქართული სიტყვა» ივანიშვილის კოალიციის ერთ-ერთ ყველაზე გავლენიან ფიგურეს, გაერო-ში საქართველოს ყოფილ ელჩს, «თავისუფალი დემოკრატების» ლიდერ ირაკლი ალასანიას ესაუბრა.  

_ ბატონო ირაკლი, რაღა დაგიმალოთ და, შეშფოთებული ვარ...
_ რატომ?

_ რატომ და, _ მმართველი გუნდი და მასთან დაახლოებული ადამიანები ქირქილებენ, «ოცნება» არეულობისთვის ემზადებაო...
_ «ქართული ოცნება» ხალხს სამოქალაქო სოლიდარობას სთავაზობს და ეს კოალიციის ლიდერების მიერ რეგიონებში გამართული შეხვედრებიდანაც ჩანს. «ქვის ხანაში» დაბრუნების მცდელობა კი, სწორედ სააკაშვილის «ნაცმოძრაობის» მხრიდანაა. ეს კიდევ ერთი გამოწვევაა, რომელსაც თვალს ვუსწორებთ და ვხვდებით, თუ რატომ უნდა ჩვენი წონასწორობიდან გამოყვანა და იმ თანმიმდევრული კამპანიიდან ამოგდება, რომელიც შედეგს 1 ოქტომბერს მოიტანს. ამიტომ, ვანო, შეგიძლიათ, მშვიდად იყოთ, რადგან «ქართული ოცნება» ხელისუფლებას მხოლოდ მშვიდობიანი და ქართული საზოგადოების კონსოლიდაციის გზით შეცვლის!

_ კეთილი, მაგრამ ბიძინა ივანიშვილის წერილში, რომელიც ამასწინათ ერთ-ერთ დასავლურ გაზეთში გამოქვეყნდა, ნათქვამია, იქ, სადაც დემოკრატია არაა, აჯანყება ხდებაო. ბატონო ირაკლი, დამერწმუნეთ, «ნაციონალები» ამ ფრაზას ხელზე დაიხვევენ...
_ თუკი ვინმე უკანონო შეიარაღებულ ჯგუფებს აყალიბებეს, ეს ხელისუფლებაა და ამის შესახებ არაერთხელ მილაპარაკია, თუმცა ჩემი პრევენციული განცხადების შემდეგ, ამ ბანდფორმირებების საკანონმდებლო სივრცეში მოქცევა დაიწყეს. სხვათა შორის, კუდ-მა უამარავი პატრიოტი ადამიანი შეცდომაში შეიყვანა და ამ შეიარაღებულ ჯგუფებში ასე გააწევრიანა.

_ მას შემდეგ, რაც უკანონო ბანდფორმიერბებზე პირველი განცხადება გააკეთეთ, კუდ-ისგან შეცდომაში შეყვანილმა ადამიანებმა ეს დაჯგუფებები დატოვეს?
_ არა, მათ წამოაყენეს მოთხოვნა, რომ მონაწილეობას მხოლოდ საგარეო აგრესიაში მიიღებენ და არა _ სამოქალაქო დაპირისპირებაში. სხვათა შორის, ახალი დაჯგუფებებიც იქმნება, რომლებსაც კრიმინალური წარსულის მქონე ადმაიანი, ვინმე უდესიანი ხელმძღვანელობს და თბილისში ვარჯიშებიც მიმდინარეობს. ისე, უდესიანის პიროვნება არ მაინტერსებს, ის, როგორც ინსტრუმენტი, ამ რეჟიმმა შექმნა... ამასთან, უდესიანის ხელმძღვანელობით არარეგალური, არარეგისტრირებული იარაღის დასაწყობება ხდება.

_ და ეს არარეგალური იარაღი საიდან შემოდის?
_ ამას სამართალდამცავი სტრუქტურები ხელისუფლების შეცვლის შემდეგ გაარკვევენ. მოკლედ, ყველაფერი ეს იმაზე მეტყველებს, რომ სააკაშვილსა და მის ხელისუფელბას წაგების პანიკურად ეშინია. ერთდაერთი ძალა, რასაც «ქართული ოცნება» ეყრდნობა, სოლიდარობა და ხალხის სიმრავლეა _ რაც უფრო მეტი ვიქნებით, სააკაშვილი ძალადობას ვერ გაბედავს! 

_ ბატონო ირაკლი, კონკრეტულად მიპასუხეთ: თუკი არჩევნები გაყალბდება, «ქართული ოცნება» ქუჩაში გამოვა?
_ არც კი მინდა, რომ ამ საუბარში შევიდე, რადგან მწამს, რომ თუკი საზოგადოება ერთსულოვანი იქნება, სააკაშვილი გაყალბებას ვერ გაბედავს და არჩევნები სამართლიანად ჩატარდება. ამიტომ, ვანო, იმაზე, თუ რა შეიძლება მოხდეს, ნუ ვილაპარაკებთ...

_ რა ამის პასუხია და, «ობიექტივთან» ინტერვიუში ბიძინა ივანიშვილმა განაცხადა, «ოცნება» არჩევნებში, მინიმუმ, 40 პროცენტს აიღებს, მაქსიმუმ, სამოცს და ამის შემდეგ, ერთი წლის განმავლობაში, ხელისუფლებას შიგნიდან შევცვლითო. ეს განცხადება რას ნიშნავს, მით უმეტეს, მაშინ, როცა თავის დროზე კოალიცია აცხადებდა, პარლამენტში უმრავლესობით მოვალო?
_ ჩვენი ამოცანაა, რომ უმრავლესობით მოვიდეთ! უმცირესობაში, ბუნებრივია, «ნაცმოძრაობა» იქნება. ვანო, ადრეც მითქვამს და ახლაც გავიმეორებ, რომ ახალ პარლამენტში აბსოლუტური უმრავლესობა არავის უნდა ჰქონდეს, რადგან ეს ერთპარტიული მმართველობის კიდევ ერთი წინაპირობა იქნება, რაც საქართველოს აღარ სჭირდება! ჩვენ უმცირესობაში მყოფ «ნაცმოძრაობას» დავანახებთ, თუ როგორ შეიძლება ოპონენტთან ურთიერთობა და თანამშრომლობა.

_ ოპოზიციისა და ხელისუფლების თანამშრომლობა კონკრეტულად რა თემაზე შეიძლება?
_ ასეთი საკითხი ბევრია, მაგალითად, ეროვნული უსაფრთხოება...

_ ბატონო ირაკლი, საუბრის თემას შევცვლი და ირინა საირიშვილის ერთ განცხადებას «გაგაცნობთ». მართალია, სარიშვილი აქტიურ პოლიტიკაში აღარაა, მაგრამ თავის დროზე ქართული პოლიტიკის ვანგას ეძახდნენ... მოკლედ, სადღაც წავიკითხე, სარიშვილი ამბობდა, თუკი ივანიშვილი «რესპუბლიკელებს» არ მოიცილებს, კოალიციის საქმეები ცუდად წავაო...
_ საქართველო მხოლოდ ივანიშვილის, სააკაშვილის, ალასანიასი და «რესპუბლიკელების» კი არა, ყველასია. ამიტომ, ამა თუ იმ ჯგუფისა და პოლიტიკური ძალის გამორჩევა არ უნდა დავიწყოთ. ყველას უნდა მოგვეცეს შანსი, რომ ქვეყანას ვემსახუროთ. სააკაშვილმა ცუდი სწორედ ის გააკეთა, რომ ნახევარი საქართველო «ჩამოწერა» და ქვეყნის განვითარებაში მონაწილეობა აუკრძალა. სააკაშვილმა თქვა _ ან ჩემთან ხართ, ან ჩემი მტრები ხართო, მაგრამ ეს საპრეზიდენტო განცხადება არაა. ამით ქვეყანა ვერ გაერთიანდება. «ქართულ ოცნებას» კი სხვა ამოცანა აქვს _ ჩვენ გვინდა, რომ უკეთესი საქართველოს შექმნის მონაწილე ყველა გახდეს!

_ ორიოდ დღის წინ, მიხეილ სააკაშვილმა განაცხადა, «პუწინისტები» ფეხებში ნუ მებლანდებიან და ქვეყნის განვითარება მაცალონო. ირაკლი ბატონო, ბოლოს და ბოლოს, გამაგებინეთ, ხართ თუ არა «პუწინისტი»?
_ მგონი, თვალნათლივ ჩანს, თუ რა გაკეთდა რვა წლის განმავლობაში _ რამდენიმე პროექტის გარდა, ყველაფერი ფასადურია! მაგალითად, სოფლის მეურნეობაზე ბიუჯეტიდან ერთი პროეცენტი იხარჯებოდა, ჩვენ კი, ვაპირებთ, სოფლის გაძლიერებას ერთი მილიარდი მოვახმაროთ. ბოლო დროს საქართველოში ავადობების რიცხვი კატასტროფულად გაიზარდა, 47 ქვეყანას შორის კი, ბავშვთა სიკვდილიანობით, პირველ ადგილზე ვართ. ამასთან, სააკაშვილმა ათი მილიარდი საგარეო ვალი დააგროვა. აი, ესაა მემკვიდრეობა, რომელსაც «ქართული ოცნება» ხელისუფლების შეცვლის შემდეგ მიიღებს და ამ ფონზე ოპოზიციის თავისმართლების პოზიციაში ჩაყენება არასწორია. ისიც სასაცილოა, როცა სააკაშვილი ამბობს, ქვეყნის აშენება მაცადონო.

რაც შეეხება რუსეთსა და პუტინს, ერთადერთი, რაზეც სააკაშვილისა და, საერთოდ, «ნაცმოძრაობის» კამპანიაა აგებული, ისაა, რომ ჩვენ რუსეთის მიმართ შემრიგებლური პოზიცია გვაქვს. სააკაშვილის სტილი ასეთია _ ან ჩემთან დგახართ, ან საქართველოს წინააღმდეგ ხართ, მაგრამ ეს არ გამოსდის. ყველა კვლევა მეტყველებს, რომ ქართველ ხალხს ქვეყნის იმ პოლიტიკური ჩიხიდან გამოყვანა უნდა, რომელშიც სააკაშვილმა შეიყვანა და ხალხი ამ ჩიხიდან გამოყვანის ერთ-ერთ გზად, საქართველოს ევროპულ ოჯახში გაერთიანებასთან ერთად, რუსეთთან სავაჭრო ურთიერთობის აღდგენას მიიჩნევს. ეს აბსოლუტურად ზომიერი ხედვაა...

 რაც შეეხება იმას, თუ ვინაა «პუტინისტი» და ვინ _ არა, ამ პოლემიკაში შესვლა არ მიყვარს, მაგრამ ფაქტებით ვისაუბროთ: საქართველოს ყველა დიდი ინფრასტრუქტურა სააკაშვილმა და ბენდუქიძემ, რომელიც, მართლაც, რუსი ოლიგარქია, რუსულ კომპანიებს მიჰყიდეს. აქედან გამომდინარე, არსებობს ეჭვი, რომ ყველაფერი ეს დიდ ელიტურ კორუფციასთანაა დაკავშირებული და ამის გამოძიება მოხდება!

_ «ნაციონალები» ამბობენ, რომ ეს «ელიტური კორუფცია» კი არა, ქართულ ეკონომიკაში ინვესტიციების ჩადებაა...
_ ეს ეკონომიკური ოკუპაციაა, რადგან კრიტიკული ინფრასტრუქტურა მხოლოდ სახელმწიფოს კონტროლის ქვეშ უნდა იყოს! სხვათა შორის, ხელისუფლება «საქართველოს რკინიგზის» გაყიდვასაც აპირებდა, მაგრამ პრევენციული განცხადებების შემდეგ, აღარ გაყიდა. ბენდუქიძემ თავის დროზე თქვა, ყველაფრის გაყიდვა შეიძლებაო და ხელისუფლება სწორედ ამ გზას მიჰყვება. ამიტომ, «ნაციონალების» მხრიდან ჩვენს მიმართ «რუსული ბრალდებები» უხერხული კი არა, უსამართლოა, მით უმეტეს, რომ ბიძინა ივანიშვილმა პოლიტიკაში შემოსვლისთანავე განაცხადა, რომ რუსეთის მოქალაქეობას ტოვებს და რუსეთის ფედერაციაში ყველა ძირითად ქონებას ყიდის. ეს განცხადება აბსოლუტურად სწორი იყო. ადამიანმა, რომელმაც საქართველოს ეროვნული უსაფრთხოების, პოლიციისა და თავდაცვის აღმშენებლობაზე 600 მილიონ დოლარზე მეტი დახარჯა, როგორ შეიძლება, ვინმეს ენა მოუტრიალდეს და თქვას, რომ პრორუსიაო?

_ ამ მსჯელობაში ლოგიკა, ცხადია, არის, თუმცა «ნაციონალები» აქცენტს იმაზე აკეთებენ, რომ ივანიშვილი «ინტერ რაო ესში» ერთპროცენტიანი წილის მფლობელია. სხვათა შორის, ისიც ნიშანდობლივია, რომ ქართული «თელასის» ერთ-ერთ მმართველ პოსტზე ახლახან «ნაციონალი», შიდა ქართლის გუბერნატორყოფილი ზურა არსოშვილი დაინიშნა. «თელასი» კი, სწორედ «რაოს» საკუთრებაა...
_ ვანო, კარგი მაგალითი მოიყვანეთ...

_ ბატონო ირაკლი, ზოგი თვლის, რომ «ნაციონალები» «ოცნებას» პიარში უგებს. ასე, მაგალითად, როცა «ოცნების» პრორუსულობაზეა ლაპარაკი, ხელისუფლებას კონკრეტული ფაქტები მოჰყავს...
_ რა ფაქტები?

_ მაგალითად, «ოცნების» რუსთავის მაჟორიტარობის კანდიდატ ზვიად ძიძიგურის ინტერვიუ, რა დროს ნატო-აო... საერთოდ, ძიძიგური თავის დროზე ცნობილი «ანტინატოელი» იყო...
_ ეს რა შუაშია? საერთოდ, პოლიტიკა აბსოლუტური იმპროვიზაციების ხელოვნებაა _ თანამედროვე პოლიტიკურ რეალობას შენი ქვეყნის ინეტერსებს არგებ. შეიძლება, ზვიად ძიძიგური ოდესღაც ფიქრობდა, რომ ნატო-ში გაწევრიანება ქვეყნისთვის პრიორიტეტული არ იყო. ჩვენს კოლაციაში გამოკვეთილად პროდასავლური და ნატო-ს ორიენტაციის პარტიებიც არიან და ისეთებიც, რომლებსაც ნატო-ს მიმართა სხვა მოსაზრებები ჰქონდათ, მაგრამ როგორც კი კოალიციის შექმნას ხელი მოეწერა, ღირებულებებსა და ხედვებში აღრევა აღარ არსებობს!

_ ერთი სიტყვით, ბატონო ირაკლი, მათთვის, ვინც ფიქრობს, რომ «ქართული ოცნების» უკან რუსული ფული დგას, შეგიძლიათ, კიდევ ერთხელ განმარტოთ, რომ ეს აბსურდია?
_ ამ შეკითხვაზე პასუხის გაცემაც კი, მგონი, არ ღირს, რადგან ნათელია: არ შეიძლება, მე, ან ჩემი პარტია რუსეთის ფედერაციასთან რაღაც ფორმით ვიყო დაკავშირებული _ მთელი ჩემი შეგნებული კარიერა საქართველოს წინააღმდეგ რუსეთის მოქმედებების აღკვეთას მოვახმარე!

_ ბატონო ირაკლი, რა ამის პასუხია და, მედიაში დიდი ხანია, არ გამოჩენლიხართ, რაც ალბათ, იმით აიხსნება, რომ უმეტეს დროს ზუგდიდში ატარებთ, მაგრამ ხმა დადის, კოალიციაში ვიღაცები ალასანიასა და მისი გუნდის წინააღმდეგ ინტრიგებს აწყობენო...
_ ბოლო თვეებია, დასავლეთ საქართველოში, კერძოდ, სამეგრელოში ვმუშაობ, ოფიციალურ საარჩევნო კამპანიას კი, რამდენიმე დღეში დავიწყებ და საზოგადოება ნახავს, თუ როგორი აქტიური ვიქნები.

_ ეს გასაგებია, მაგრამ ივანიშვილის გვერდით მუდამ ის ადამიანები ჩანან, რომლებმაც «ვარდების რევოლუციის» შემდეგ თითქმის ყველა ორიენტაციის ოპოზიციური პარტია მოიარეს. ასე, მაგალითად, სოზარ სუბარი, გია ხუხაშვილი... სხვათა შორის, სუბარი ივანიშვილს სვანეთშიც ახლდა, რაც როგორც ამბობენ, სვანებს მაინცდანმაინც არ ესიამოვნათ... მართალია, რომ ამბობენ, ზუგდიდში კოალიციის მაჟორიტარობის კანდიდატი შესაძლოა, «სახალხოკრებელი» ნონა გაფრინდაშვილი იყოსო?
_ ვანო, ჯერ ერთი, აბსოლუტურად არ ვიზიარებ მოსაზრებას, რომ თქვენს მიერ ჩამოთვლილი პოლიტიკური ლიდერების ბიძინა ივანიშვილის გვერდით ყოფნა ჩვენს საარჩევნო შანსს ართულებს. საერთოდ, ბიძინა ივანიშვილი ქართულ პოლიტიკაში ყველა იმ ჯანსაღი პოლიტიკური ძალის გამაერთიანებელია, ვისაც უკეთესი ქვეყნის შექმნა უნდა! სწორედ ესაა ივანიშვილის პოლიტიკაში მოსვლის ხიბლი, ანუ მან ქართულ პოლიტიკაში დინამიკა შემოიტანა, საზოგადოებას გაერთიანების იმედი გაუჩინა და ამის დაკარგვა იმის გამო, რომ ვიღაცას ორი-სამი წლის არასწორი განცხადება აქვს გაკეთებული, არ შეიძლება. გამაერთიანებელი რომ იყო, რაღაცებზე თვალი უნდა დახუჭო, რადგან ამოცანა და მიზანი იმ პოლიტიკურ შეცდომებზე, რომლებიც ყველას აქვს ჩადენილი, დიდია!

_ შეცდომები თქვენც გაქვთ ჩადენილი?
_ რა თქმა უნდა... სხვათა შორის, «თავისუფალი დემოკრატები» ახლახან სამი წლის გახდა. შეიძლებოდა, სხვანაირი ნაბიჯები გადაგვედგა და ჩვენი პრინციპები უფრო ღრმად დაგვეცვა, მაგრამ პოლიტიკა ჯაზი და მუდმივი იმპროვიზაციაა, მთავარია, ფუნდამენტური ღირებულებები არ შეიცვალო!..

_ ბატონო ირაკლი, ამ თემაზე საუბარს არ ვაპირებდი, რადგან ვინმემ შესაძლოა, ტენდენციურობა დამწამოს, მაგრამ ვფიქრობ, რომ ირაკლი ალასანია ქართული პოლიტიკის ერთგვარი ბრენდია _ მათაც კი, ვისაც არ მოსწონხართ, თქვენი ნაბიჯები მუდმივად აინტერსებთ. როგორ შეძელით, ბრენდი გამხდარიყავით?
_ ჩემი მხრიდან ამის შეფასება რთულია, თუმცა ვგრძნობ, რომ ბოლო სამი წლის განმავლობაში დიდი გამოცდილება შევიძინე. ვხუმრობ ხოლმე, მე და ჩემმა გუნდმა 2009-2010 წლებში პოლიტიკის სწრაფი კურსი გავიარეთ-მეთქი.
 რაც შეეხება მომავალს, ჩვენი მხოლოდ არჩევნების მოგებაზე კი არა, ახალი პოლიტიკური კულტურის დამკვიდრებაზეც ვართ ორიენტირებულნი და ეს, შესაძლოა, უფრო მნიშვნელოვანია.

_ «ახალი პოლიტიკური კულტურა» რას ნიშნავს?
_ თუნდაც იმას, რომ ოპონენტი მოსისხლე მტერი არაა. საქართველო ისეთი პატარა ქვეყანაა, რომ არ შეიძლება, ერთმანეთის მტრები ვიყოთ. შეიძლება, ვიღაცას დანაშაული აქვს ჩადენილი, მაგრამ ამის გამო მტრად კი არ უნდა გამოვაცხადოთ, არამედ, სასჯელი უნდა მოიხადოს.

_ რაც შეეხება მოარულ ხმას, რომ ზუგდიდის მაჟორიტარად კოალიციამ შესაძლოა, ნონა გაფრინდაშვილი დაასახელოს...
_ ქალბატონ ნონას უდიდეს პატივს ვცემ, მაგრამ ეს თემა არც განიხლეობდა და არც განიხილება...

_ იმასაც ამბობენ, რომ ზუგდიდში «ნაცმოძრაობის» მაჟორიტარობის კანდიდატი შესაძლოა, როლანდ ახალაია იყოს...
_ არ ვიცი...

_ როლანდ ახალიასთან ბრძოლა არ გაგიჭირდებათ?
_ დარწმუნებული ვარ, რომ ჩვენ მხოლოდ ზუგდიდში კი არა, მთელ საქართველოში გავიმარჯვებთ და ამის თქმის საფუძველს ის რეალობა მაძლევს, რომელსაც ბოლო თვეებია, ვხედავ.

_ მას შემდეგ, რაც ზუგდიდში, ასე ვთქვათ, გადასახლდით, მოსახლეობაში შიში დაიძლია?
_ შიში, როგორც ფაქტორი, ფაქტორი, პრაქტიკულად, აღარაა, რადგან სამეგრელოში ამაყი ხალხია და ვერ იტანს, როცა ეუბნებიან, ვის შეხვდეს და ვის _ არა. ხალხი მზადაა, არჩევნების დღეს გადაწყვეტილება ახალაიების კი არა, საკუთარი გულის კარნახით მიიღოს!

_ ზოგიერთი პოლიტილოგის შეფასებით, თუკი ალასანია ზუგდიდში მაჟორიტარულ არჩევნებს მოიგებს, ეს, პრაქტიკულად, საპრეზიდენტო არჩევნების მოგების ტოლფასი იქნება. ალბათ, ხვდებით, საუბარი საითკენაც მიმყავს, ანუ ადრეც გკითხეთ და ახლაც გეკითხებით: იქნებით «ქართული ოცნების» პრეზიდენტობის კანდიდატი?
_ ვანო, დარწმუნებით გეუბნებით, რომ კოალიციას ღირსეული საპრეზიდენტო კანდიდატი ეყოლება!

_ ერთ-ერთ ინტერვიუში ბიძინა ივანიშვილმა განაცხადა, რომ თქვენ კოალიციის საპარლამენტო სიის პირველი ნომერი არ იქნებით, რადგან ახალი სახეა საჭირო. არადა, არსებობდა მოლოდინი, რომ სიას სწორედ თქვენ ჩაუდგებოდით სათავეში...
_ იმას, თუ ვინ იქნება სიის პირველი, ან ასორმოცდამეათე ნომერი, კოალიციის ლიდერი ჩვენთან კონსულტაციით გადაწყვეტს. საერთოდ, ჩემთვის, ან ბიძინასთვის მნიშვნელობა არ აქვს, პირველი ნომერი ვინ იქნება... ხომ ხედავთ, კოალიციის რამდენი ლიდერი წავიდა მაჟორიტარულ ბრძოლაში. არადა, როგროც წესი, ლიდერები მაჟორიტარულ ბრძოლაში არ მიდიან, თუმცა ჩვენ სხვა ტაქტიკა ავირჩიეთ!..

_ ...ბატონო ირაკლი, სად გადის ზღვარი წინასაარჩევნო კამპანიასა და წინასაარჩევნო მოსყიდვას შორის?
_ მას შემდეგ, რაც სააკაშვილმა და «ნაცმოძრაობამ» ისეთი კანონები მიიღეს, რომ მთელი მსოფლიო დაიბნა, ეს ზღვარი «აიდღაბნა». ქვეყანაში, სადაც სასამართლო და პარლამენტი არ არსებობს, ბუნებრივია, გაურკვეველია, თუ რა არის სამართლიანი და რა _ უსამართლო, ანუ უსამართლო კანონის პირობებში, ყველაფერი, რაც კანონიერია, სამართლიანი არაა. ჩემთვის კი, მოსყიდვასა და კამპანიას შორის ზღვარი მორალია _ ის, რასაც სააკაშვილი თუ კუდ-ი აკეთებს, მხოლოდ მოსყიდვა კი არა, ადამიანის ფუნდამენტური უფლების შეზღუდვაა! ჩემთვის მიუღებელი სწორედ ესაა!

სხვათა შორის, ეროვნული ბანკის ხელმძღვანელი, პრაქტიკულად, პროკურატურის თანაშემწედ იქცა _ საქართველოში ყველა ბანკის ხელმძღვანელი დაიბარეს და მითითება მისცეს, რომ შეექმნათ «შავი სია» და ყველას, ვინც «ქართულ ოცნებასთან» რამენაირადაა ასოცირებული, ანგარიშები კი არ დაუყადაღონ, არამედ, ფინანსური გადარიცხვების მოძრაობა აურიონ და ეს კომპიუტერული პროგრამას დააბრალონ. ამასთან, სპეციალურად ვრცელდება ინფორმაცია, რომ არჩევნების დღეს თითქოს ფიქსირდება, თუ რა გადაწყვეტილებას მიიღებს ამომრჩეველი, მაგრამ ეს აბსურდია!

_ ...ბატონო ირაკლი, ვთქვათ, ზუგდიდელი ვარ, დამისაბუთეთ, პირველ ოქტომბერს ხმა რატომ უნდა მოგცეთ?
_ ამას, როცა გადაწყვეტილება გამოცხადდება, კოალიციის ლიდერი თვითონ აუხნსის ზუგდიდელებს!