გადაწყვეტილება ჯერ არ გამომიცხადებია და არც თანხმობა მიმიცია, - ამის შესახებ "ინტერპრესნიუსს" "რუსთავი 2"-ის გენერალური დირექტორის მოადგილე ზაალ უდუმაშვილმა განუცხადა, რითაც გამოეხმაურა გავრცელებულ ინფორმაციას, რომ ის "ნაციონალური მოძრაობის" წინადადებას მერობის კანდიდატურასთან დაკავშირებით დათანხმდა.

რაც შეეხება, ზაალ უდუმაშვილისა და "ნაციონალური მოძრაობის" ლიდერის მიხეილ სააკაშვილის კიევში შეხვედრას, უდუმაშვილი ადასტურებს, რომ მიხეილ სააკაშვილისგან მიიღო წინადადება მერობის კანდიდატობასთან დაკავშირებით, თუმცა მისთვის თანხმობა არ მიუცია.

"გიდასტურებთ, რომ შეხვედრის დროს იყო შემოთავაზება, დამეყენებინა ჩემი კანდიდატურა მერის არჩევნებზე. მივიღე ეს წინადადება და გადაწყვეტილება არ მითქვამს არც მაშინ და ჯერჯერობითაც არ გამომიცხადებია. ეს რთული გადაწყვეტილებაა და მივიღებ თუ არა წინადადებას, ჯერ ვერ გეტყვით. მხოლოდ მოვისმინე წინადადება და წამოვედი. ჯერ გადაწყვეტილება არავისთვის არ მიცნობებია და სიმართლე გითხრათ - არც მიმიღია", - განაცხადა ზაალ უდუმაშვილმა.

მისივე განცხადებით, "სხვა საქმეების გამო 21:00 საათიან "კურიერს" რამდენიმე დღე არ წაიყვანს", თუმცა ის დღეს სამსახურში მისვლას ჩვეულ რეჟიმში გეგმავს.

რაც შეეხება არხის გენერალური დირექტორის ნიკა გვარამიას თანამდებობიდან გადადგომასთან დაკავშირებით გავრცელებულ ინფორმაციას, ზაალ უდუმაშვილი აცხადებს, რომ გვარამია ჯერჯერობით თავის თანამდებობაზეა. "ჯერჯერობით ნიკა გვარამია არ გადამდგარა თანამდებობიდან. თუ რაიმე ცვლილება იქნება, ამას ოფიციალურად გამოაცხადებენ", - განაცხადა ზაალ უდუმაშვილმა.