საქართველოს პრეზიდენტი, გიორგი მარგველაშვილი იმედს გამოთქვამს, რომ ევროპული საბჭოს პრეზიდენტის, დონალდ ტუსკის საქართველოში ვიზიტი კიდევ უფრო დააჩქარებს და ახლა იმპულსს მისცემს საქართველოს ევროპაში ინტეგრაციის პროცესს. ამის შესახებ გიორგი მარგველაშვილმა პრეზიდენტის ადმინისტარციაში, დონალდ ტუსკთან გამართული შეხვედრის შემდეგ ერთობლივ პრესკონფერენციზე განაცხადა.
საქართველოს პრეზიდენტმა დონალდ ტუსკს "ასეთი რთული დღის წესრიგის პირობებში" საქართველოში ჩამოსვლისთვის მადლობა გადაუხადა.
"უმნიშვნელოვანესია, რომ იმ დაძაბული დღის წესრიგის ფონზე, რომელიც არის ევროკავშირში, ევროპის ლიდერს მიეცა შესაძლებლობა ჩამოსულიყო ჩვენს ქვეყანაში და იმ რთულ განვითარებაზე, რომელიც ეხება საქართველოს ტერიტორიაზე საოკუპაციო ხაზის დემარკაციას და მის მოძრაობას, ამ მომენტში ჩამოსულიყო და დაეფიქსირებინა თავისი პოზიცია.
ჩვენ მოგვეცა შესაძლებლობა გვესაუბრა არა მხოლოდ სირთულეებზე, არამედ იმ მომავალ პერსპექტივაზე, რაც არსებობს საქართველოსა და ევროკავშირს შორის.
პირველ რიგში ეს არის ის გეოპოლიტიკური მისია, რომელსაც საქართველო, როგორც ევროპასა და აზიას შორის სატრანზიტო ქვეყანა, ძალიან სერიოზულად აგრძელებს და ავითარებს. ამ თვალსაზრისით ძალიან მნიშვნელოვანია ჩვენი თანამშრომლობა რეგიონში, ის რა შესაძლებლობებსაც ჩვენი ქვეყანა უხსნის პარტნიორებს, როგორც ევროპის, ისე აზიის მიმართულებით, ეს არის ენერგოპროექტების შესაძლებლობა, სატრანსპორტო პროექტები და ის შესაძლებლობები, რომელსაც ჩვენი ქვეყანა ხსნის. ჩვენ განსაკუთრებული ყურადღება დავუთმეთ ევროკავშირის დღის წესრიგის ეფექტურ იმპლემენტაციას, იმ დღის წესრიგს, რომელიც არის და გრძელდება როგორც ჩვენი ქვეყნისთვის ერთ-ერთი მთავარი პოლიტიკური მამოტივირებელი და მთავარი პოლიტიკური ვექტორი. ამ თვალსაზრისით ბუნებრივია ჩვენ შევეხეთ იმ დღის წესრიგის დანერგვას, რომელიც მიგვიყვანს ეფექტურ რეფორმებამდე და საბოლოო ჯამში ვიზალიბერალიზაციის პროცესის ეფექტურ დასრულებამდე", - განაცხადა გიორგი მარგველაშვილმა.
საქართველოს პრეზიდენტმა მადლობა გადაუხადა ევროპელ კოლეგებს აქტიური ჩართულობისთვსის, თანამშრომლობისთვის, მუდმივი ყურადღებისა და ინტერესისთვის, რომელსაც ისინი საქართველოს მიმართ იჩენენ. "მინდა იმედი გამოვთქვა, რომ ევროპული საბჭოს პრეზიდენტის ვიზიტი კიდევ უფრო დააჩქარებს და ახალ, ეფექტურ იმპულსს მისცემს საქართველოს ევროპაში ინტეგრაციის პროცესს", -აღნიშნა მარგველაშვილმა.
