რუსეთის ფედერაცია საქართველოს მოთმინებას ყოველდღიურად ცდის და ქვეყნის კონფლიქტში ჩათრევას ცდილობს, -აღნიშნული განცხადებით თავდაცვის მინისტრი თინა ხიდაშელი კიდევ ერთხელ გამოეხმაურა შიდა ქართლში საოკუპაციო ხაზის ირგვლივ განვითარებულ მოვლენებს.
თავდაცვის მინისტრმა ხაზგასმით აღნიშნა, რომ საქართველოს ხელისუფლება რუსულ პროვოკაციაზე აყოლას არ დაუშვებს. "ტრაგიზმი, რომელიც ჩვენს პირობით, ხელოვნურად გავლებულ საზღვართან ბოლო 7 წლის განმავლობაში ვითარდება, ყველას თანაბარი წუხილის საგანია. თუმცა, მთავარი ამოცანაა ქვეყანა ამ პროვოცირების მსხვერპლი არ გავხადოთ, იმ პროვოკაციებისა, რომელსაც რუსული სახელმწიფო ჩვენი ქვეყნის წინააღმდეგ მუდმივად ეწევა. ბანერს აქ თუ სადმე სხვაგან დადგამ, არ მგონია ამას რუსული სახელმწიფოსთვის რაიმე სტარტეგიულ-პოლიტიკური მნიშვნელობა ჰქონდეს, გარდა იმისა, რომ ისინი ყოველდღიურად ცდიან ჩვენს მოთმინებას და ცდილობენ გამოგვიწვიონ, კონფლიქტში ჩაგვითრიონ, რასაც საქართველოს დღევანდელი ხელისუფლება არ დაუშვებს", - განუცხადა ჟურნალისტებს თინა ხიდაშელმა.
თავდაცვის მინისტრის თქმით, მიმდინარე მოვლენებთან დაკავშირებით საერთაშორისო თანამეგობრობის ყურადღება და რეაქცია მაღალია. "პროვოცირებით ძალიან დიდ შეცდომას უშვებს რუსული სახელმწიფო, რადგან ისედაც დაძაბულ ურთიერთობებს, რომელიც მას ცივილიზებულ სამყაროსთან ჩამოუყალიბდა, კიდევ უფრო მეტად ამძიმებს და მორიგ ქვებს დებს ამ ურთიერთობების გამძაფრებაში, გართულებაში. ეს მათი არჩევანია, თუმცა ქართულ სახელმწიფოებრიობას ამით უფრო მეტი მეგობარი და მხარდამჭერი ემატება", - განაცხადა ხიდაშელმა.
