კანადაში, ჰალიფაქსის საერთაშორისო უსაფრთხოების ფორუმის ფარგლებში, "თავისუფალი დემოკრატების" ლიდერი, ირაკლი ალასანია, კონფერენციაში მონაწილე მაღალი რანგის სტუმრებთან შეხვედრებს მართავს.
"თავისუფალი დემოკრატების" ინფორმაციით, პარტიის თავმჯდომარე ნატო-ს გენერალური მდივნის მოადგილეს, ალექსანდრე ვერშბოუს შეხვდა. ირაკლი ალასანიამ ასევე შეხვედრები გამართა ნატო-ს გენერალური მდივნის სპეციალურ წარმომადგენელთან სამხრეთ კავკასიასა და ცენტრალურ აზიაში ჯეიმს აპატურაისთან და კანადის საგარეო საქმეთა მინისტრ ჯონ ბეირდთან.
მხარეებმა საქართველოს ნატო-ში ინტეგრაციის პერსპექტივები განიხილეს. შეხვედრების ერთ-ერთი მთავარი თემა იყო ნატო-ს უელსის სამიტზე საქართველოსთვის მინიჭებული არსებითი პაკეტის იმპლემენტაცია.
საუბარი ასევე შეეხო საქართველოს წინაშე მდგარ საფრთხეებს და ბოლო დროს რეგიონში არსებულ უსაფრთხოების გამოწვევებს.
