ე.წ. გასაღების სასამართლოს ხელში არსებობა რთულად მესახება

ე.წ. გასაღების სასამართლოს ხელში არსებობა რთულად მესახება

ე.წ. გასაღების სასამართლოს ხელში არსებობა უზენაესი სასამართლოს თავჯდომარე, კონსტანტინე კუბლაშვილს რთულად ესახება.

როგორც კუბლაშვილმა ჟურნალისტებს განუცხადა, პროექტს, რომლის მიხედვით ე.წ. გასაღები სასამართლოს ხელში უნდა იყოს, კარგად არ იცნობს. მისი თქმით, სასამართლო სისტემასთან და იუსტიციის უმაღლეს საბჭოსთან ერთად ამ საკითხზე სავარაუდოდ მსჯელობა გაიმართება, რის შემდეგაც სასამართლოს პოზიცია გახდება ცნობილი.

"ძალიან რთული საკითხია. სიღრმისეულად არ მაქვს შესწავლილი ეს პროექტი. ყველამ კარგად იცის, რომ მოსამართლე არის ფარულ მოსმენებზე პროცესის მთავარი მონაწილე, რომელიც გასცემს ბრძანებას, რის გარეშეც არ შეიძლება მოსმენა ან თვალყურის დევნება. ჯერ რთულად მესახება, რომ პროცესის მთავარი მონაწილე, რომელიც ბრძანებას გასცემს, ამ პროცესში შემდგომში იყოს განმახორციელებელი ამ ბრძანებისა სხვასთან ერთად და გააკონტროლოს ეს პროცესი. გაცემული ბრძანების შედეგად მიღებული მტკიცებულებები ისევ უკან უბრუნდება მოსამართლეს და ხელმეორედ უნდა განიხილოს სხდომის წარმართვის დროს. ამას ძალიან დიდი დაფიქრება სჭირდება და არა მხოლოდ მე, არამედ მთელი სასამართლო სისტემა, იუსტიციის უმაღლესი საბჭო ალბათ ვიმსჯელებთ ამაზე და დავაფიქსირებთ პოზიციას", - განაცხადა კონსტანტინე კუბლაშვილმა.

არასამთავრობო ორგანიზაციები ე.წ. ორგასაღებიანი სისტემის ამოქმედების ინიციატივით გამოდიან, რომელთაგან ერთი გასაღები ექნება სასამართლოს, ხოლო მეორე - მობილურ კომპანიებს.