შინაგან საქმეთა სამინისტროს სპორტულ კომპლექსში მსოფლიოს ცხრაგზის რეკორდსმენმა, შსს-ს საპატრულო პოლიციის დეპარტამენტის თანამშრომელმა, პოლიციის კაპიტანმა იოსებ ხუციშვილმა ცალ ხელზე აზიდვაში გინესის რეკორდი დაამყარა. მან კანადელი რეკორდსმენის მიერ 2007 წელს დამყარებული რეკორდი მოხსნა და მარცხენა ხელის მუშტზე წუთში 65 აზიდვა შეასრულა. ხუციშვილის მიერ დამყარებული გინესის რეკორდი საქართველოს რეკორდების ფედერაციის მსაჯებმა დააფიქსირეს.

პირველი მსოფლიო რეკორდი იოსებ ხუციშვილმა აზიდვებსა და ორძელზე აზიდვაში 2010 წელს დაამყარა. მისი სარეკორდო ღონისძიებები შინაგან საქმეთა სამინისტროს ხელშეწყობით ტარდება.

შსს-ს სპეციალური ოპერაციების ცენტრის თანამშრომელმა ჟანრი ნოდიამ სიმძიმით აზიდვაში გასულ წლებში ამერიკელი სპორტსმენის მიერ დამყარებული რეკორდი გააუმჯობესა. მან 46,2 კილოგრამის სიმძიმის ტვირთით წუთში 29 აზიდვა შეასრულა.

ამავე სამსახურის თანამშრომელმა გიორგი მანველიძემ იოსებ ხუციშვილის მიერ 2012 წელს ორ ხელზე აზიდვაში დამყარებული მსოფლიო რეკორდი მოხსნა.

სპორტული ღონისძიების მონაწილეებს წარმატება შინაგან საქმეთა სამინისტროს საპატრულო პოლიციის დეპარტამენტის დირექტორმა დავით ცინარიძემ და სამინისტროს სხვა წარმომადგენლებმა მიულოცეს.