[რეზონანსი ეკა ბასილაია]

რუსულენოვანი ვებგვერდი "სოროკა.ნეტ" უკვე მეორედ აქვეყნებს ქართველ მაღალჩინოსანთა სატელეფონო ჩანაწერს, რომელიც საქართველოში გახმაურებულ მოვლენას უკავშირდება. ამჯერად საუბარია 6 ფარულ სატელეფონო ჩანაწერზე, რომლებშიც, საიტის მიხედვით, შს მინისტრი ვანო მერაბიშვილი იუსტიციის მინისტრ ზურაბ ადეიშვილს, საქართველოს პრეზიდენტ მიხეილ სააკაშვილს, შსს-ს ანალიტიკური დეპარტამენტის უფროსს, შოთა უტიაშვილსა და პრესსამსახურის უფროსს, შოთა ხიზანიშვილს ესაუბრება. 6-ვე ჩანაწერი ჯაშუშობის ბრალდებით 5 ივლისს დაკავებული ფოტორეპორტიორების საქმეს უკავშირდება და საიტმა 4 აგვისტოს გამოაქვეყნა.

ეს სწორედ ის ვებგვერდია, რომელმაც 2010 წლის მარტში გამოაქვეყნა ფარული ჩანაწერი, სადაც "ტელეიმედის" მმართველი გიორგი არველაძე და საინფორმაციო გამოშვების პროდიუსერი ეკა წამალაშვილი 13 მარტისათვის "მოდელირებულ ქრონიკას" გეგმავენ.

იმის თქმა, თუ რამდენად რეალურია ეს ჩანაწერები, რთულია. თუმცა მასზე დაფიქსირებული ხმები საკმაოდ ჰგავს შესაბამისი ქართველი მაღალჩინოსნების ხმებს, თუმცა თუკი ამ ჩანაწერებში სწორედ პრეზიდენტი, იუსტიციის მინისტრი და შსს-ს მაღალჩინოსნები საუბრობენ, ექსპერტთა შეფასებით, ეს ბევრ რამეზე მეტყველებს.

უსაფრთხოების საკითხებში ექსპერტი ირაკლი სესიაშვილი მიიჩნევს, რომ წინანდელისგან განსხვავებით, დაუკვირვებელი თვალისათვის ეს ჩანაწერი ხელისუფლებას ფოტორეპორტიორების დაკავების მეტნაკლებად "გასაპრავებლადაც" უწყობს ხელს, თუმცა იქვე აცხადებს, რომ ამ ფაქტს გამოძიება და ქვეყნის უშიშროებაზე პასუხისმგებლ პირთა თანამდებობიდან გათავისუფლებაც კი უნდა მოჰყვეს.

"როცა მაღალი რანგის ჩინოვნიკების საუბარს ასე მარტივად მოიპოვებს რომელიღაც საიტი, ეს ნიშნავს, რომ სახელმწიფოს უსაფრთხოებაში ყველაფერი რიგზე არ არის და როგორც "ვიკილიქსის" სკანდალის დროს აშშ-ში მაღალჩინოსნების სამსახურებიდან გათავისუფლება მოხდა, აქაც იგივე სერიოზულობით უნდა მოხდეს საკითხის დაყენება. მერაბიშვილმა ჯაშუშები ფოტორეპორტიორებში კი არა, საკუთარ სამინისტროში უნდა ეძებოს", - განმარტავს სესიაშვილი.

ერთ-ერთი ფოტორეპორტიორის, გია აბდალაძის ადვოკატი ეკა ბესელია აცხადებს, რომ ეს ჩანაწერები ძალიან მნიშანელოვანი ინფორმაციის მატარებელია და ოფიციალურ ბრალდებასა და ამ საუბრებს შორის ძალიან ბევრი შესაბამობაა. ასევე ბევრი კანონსაწინააღმდეგო ფაქტიც ვლინდება, რის მიხედვითაც შესაძლოა ფოტორეპორტიორების საპროცესო შეთანხმება გასაჩივრდეს და გაუქმდეს კიდეც.

შეუსაბამობები და კანონდარღვევები

ბესელიას თქმით, გამოძიების წარმოებისას ქვეყნის პირველი პირისათვის ანგარიშის ჩაბარება ნიშნავს, რომ ხელისუფლების გადანაწილების პრინციპი უგულველყოფილია და ყველაფერს პრეზიდენტი განკარგავს. გარდა ამისა, ამ ჩანაწერით დამტკიცდა, რომ ხდებოდა ვაჭრობა ადვოკატების გარეშე, ფარულად მიმდინარეობდა აღიარებითი ჩვენების მიღება და საპროცესო შეთანხმებაზე მოლაპარაკება, რაც კანონით დაუშვებელია.

"ჩანაწერი არის უმნიშვნელოვანესი მტკიცებულება, რაც ადასტურებს ყველაფერს, რაზეც მე ფოტოკორესპონდენტების გათავისუფლებამდე ვსაუბრობდი. ვამბობდი, რომ აბდალაძესთან უკანონო ოპერატიული მუშაობა მიმდინარეობდა, რაც გულისხმობს იმას, რომ მიმდინარეობდა საპროცესო შეთანხმებაზე მოლაპარაკება და ამას მერაბიშვილ-საკაშვილის საუბარი ადასტურებს, როცა ამბობს, რომ ჩვენ აღიარება ადვოკატების გარეშე უკვე მივიღეთ, ახლა კი ამის ადვოკატებთან ერთად გავასაჯაროებთო.

"სს სამართლის საპროცესო კოდექსი გამონაკლისი სახითც კი არ უშვებს ადვოკატი გარეშე შეთანმებას. კანონის თანახმად, ამ სატელეფონო ჩანაწერით ჩანს, უკანონოდ მიღებული აღიარება და საპროცესო შეთანხმება თუნდაც ამ საბაბით რომ გასაჩივრდეს, სასამართლომ უნდა გააუქმოს განაჩენი. ხელისუფლების მიერ არის სწორედ დამკვიდრებული, როცა მხოლოდ სატლეფონო საუბრებით ხდება ამა თუ იმ პირის დადანაშაულება.

"გარდა ამისა, პოლიტიკური კონტექსტით ნათლად გამოჩნდა, როგორ ხდება ძალიან მნიშვნელოვან სამართლებრივ საკითხებზე გადაწყვეტილებების მიღება და ასევე უწყებათაშორისო ურთიერთობა; როგორ ურთიერთობენ შს სამინსტრო და პროკურატურა საქმესთან დაკავშირებით და როგორ აბარებენ ანგარიშს ქვეყნის პირველ პირს. სატელეფონო ანგარიშების ჩაბარება სააკაშვილისათვის ნიშნავს იმას, რომ ხელისუფლების განაწილების პრინციპზე ლაპარაკიც კი ღიმილისმომგვრელია და ყველაფერს ერთი ადამიანი აკონტროლებს.

"რაც შეეხება მტკიცებულებეს. ოფიციალური ბრალდებით საუბარი იყო იმაზე, რომ თითქოს აბდალაძის კომპიუტერიდან დისკი იყო ამოღებული. ჩანაწერში საუბარია, რომ კომპიუტერში ვერაფერი იპოვეს.

"ჩემთან საუბრისას აბდალაძეც ამტკიცებდა, რომ მისი კომპიუტერიდან არანაირი დისკი ამოღებული არ ყოფილა. შესაბამისად, გამოდის, რომ ნებისმიერი ნივთმტკიცება იმის მიხედვით იდებოდა მასალაში, როგორც შს მინისტრისთვის იყო მისაღები.

"თანაც, უტიაშვილთან საუბრისას მერაბიშვილი ამბობს - 200 დოკუმენტიდან 7 დადეთო. ალბათ, გასაჯაროება იგულისხმება. ამ კუთხითაც ეს ქმედება უკანონოა. თუ საქმე გრიფით საიდუმლოა, შს მინისტრი კი არ წყვეტს, რა დოკუმენტი უნდა გახდეს საჯარო, ჯერ უნდა გაირკვეს, რომელი დოკუმენტია სახელმწიფო საიდუმლოების შემცველი და თან ამის ზედამხდველობას პროკურატურა უნდა ახორციელებდეს და არა შს მინისტრი.

"საინტერესოა, როცა მერაბიშვილი ამბობს - სამ წელზე ვევაჭრებით, შეიძლება 2 წელიც მივცეთ და თუ ყველაფერს იტყვიან, გავათავისუფლებთო. მე ვამბობდი, რომ თავიდან 5 წლის მისჯაზე იყო საუბარი, შემდეგ ჩამოვიდნენ 2 წელზე, გათავისუფლებაზე გადაწყვეტილების მიღება კი ბოლო დღეს მოხდა, როცა სიტუაცია შიგნით დაიძაბა და ძალიან სახიფათო გახდა იმ დოკუმენტებთან შეხება, რომლის ნახვაზეც უკვე თანხმობაც მქონდა მიღებული. ეს დოკუმენტები რომ არ მენახა, ამიტომაც მოხდა აბდალაძის მიერ ჩემი აცილებაც. ამიტომაც მიიღეს გათავისუფლების გადაწყვეტილება, რადგან ხმაურის შეეშინდათ", - ყურადღებას დეტალებზე ამახვილებს ბესელია.

მისივე თქმით, ჩანაწერებში გამოჩნდა, როგორ ცდილობენ მერაბიშვილი და ადეიშვილი პრეზიდენტისა და გიგა ბოკერიას დარწმუნებას იმაში, რომ ფოტორეპორტიორები მართლა ჯაშუშები არიან.

ეკა ბესელია: "შთაბეჭდილება დამრჩა, რომ ერთგვარად საუბარს კონტროლს უწევდნენ. თუმცა, იმ დაშვებულ სითამამეშიც იკითხება ის, რომ ფოტოკორესპონდენტების დაპატიმრების გადაწყვეტილება ადეიშვილ-მერაბიშვილს აქვთ მიღებული. ხოლო შემდეგ, რადგან ამ ფაქტმა საერაშორისო სკანდალი გამოიწვია, ისინი ბოკერია-სააკაშვილთან ცდილობენ დაამტკიცონ, რომ მართლა ჯაშუშები დააკავეს.

"როგორც ჩანს, იქ იყო მტკიცებულებების წარდგენის პრობლემა და ჩანს, როგორ არწმუნებდნენ სააკაშვილ-ბოკერიას, რომ ბრალეულობის დამადასტურებელი დოკუმენტები არსებობდა და რომ დაკავებულთა აღიარება მერაბიშვილისთვის თავის მოწონების საშუალება იყო".

ბესელიას მტკიცებით, ფოტორეპორტიორების დაკავება რელიგიურ საკითხს უკავშირდებოდა და რადგანაც მეორე დღეს პატრიარქს პრეზიდენტისათვის ვეტოს დადების მოთხოვნით უნდა მიემართა, ამიტომაც მოსალოდნელი არეულობა ამ სპონტანური დაკავებით გადაფარეს.

"მათი დაპატიმრების გადაწყვეტილებ 7-ში ღამით არის მიღებული. თან, ჩანს, არაკომპეტენტურადაც. მერაბიშვილი მხოლოდ მათი დაკავების შემდეგ არკვევს, "ეპა" რა ორგანიზაციაა.

"საიტერესოა ისიც, რომ აბდალაძე მოხელეა და ხდება იმის გარკვევა, ჰქონდა თუ არა "ეპა"-სთვის ინფორმაციის გადაცემის უფლება. თუ ჯაშუშობაზეა საუბარი, რა მნიშვნელობა აქვს მოხელეა თუ არა?! ანუ ეს კითხვა ძალიან არაკომპეტენტურია", - დასძენს აბდალაძის ყოფილი ადვოკატი.

მიზანმიმართული "ფარული" ჩანაწერი, თუ ჯაშუშები შს სამინისტროში

ირაკლი სესიაშვილი მიიჩნევს, ფოტორეპორტიორების ჯაშუშობაში ბრალდების შემდეგ მათი მალევე გათავისუფლების გამო საზოგადოებაში ეჭვი არსებობდა, რომ ხელისუფლებამ ფოტოგრაფებს ეს "საქმე" "შეტენა". ამიტომაც ხელისუფლებას თავისი ქმედების გასამართლებლად რაღაც სჭირდებოდა და შესაძლებელია ეს ყველაფერი შსს-მ მიზანმიმართულად გამოაქვეყნა და მიაწოდა იმ რუსულ სააგენტოს, რომელმაც თავის დროზე მაკომპრომეტირებელი ჩანაწერები გამოაქვეყნა ხელისუფლების წარმომადგენელთა საუბრების შესახებ.

ირაკლი სესიაშვილი: "ორი ვერსია მაქვს. იმისათვის, რომ საზოგადოებას დარჩენოდა შთაბეჭდილება, რომ შსს სამართლიანად იქცეოდა და რეალურად ცდილობდა ჯაშუშობის ფაქტის გამოძიებას, შსს-მ ეს სატელეფონო საუბრები დაგეგმა და პირდაპირ თუ ირიბად მიაწოდა იმავე რუსულ სააგენტოს, რომელმას წინა წელს, მისი მაკომპრომატირებელი ჩანაწერი გამოაქვეყნა. ის, რომ ასეთი საიტების მოსყიდვა შეიძლება და ინფორმაციის პირდაპირ თუ არაპირდაპირ "შეტენვა" ხდება ხოლმე, ყველასათვის ცნობილია.

"მეორე ვერსია არის ის, რომ ჯაშუშები ფოტოგრაფებში კი არა, შსს-ში უნდა ვეძებოთ, იმიტომ, რომ ასეთი ჩანაწერების გაკეთების საშუალება მხოლოდ შსს-ს აქვს. ამიტომაც, როცა ასეთი ჩანაწერები ქვეყნდება, გამოდის, რომ შსს-ში არიან ადამიანები, რომლებიც ასეთი ტიპის ჩანაწერებსა და ინფორმაციებს იპარავენ და ყიდიან.

"თუმცა, ეჭვი მეპარება, რომ ეს ასე იყოს იმიტომ, რომ ვანოს და პრეზიდენტის მოსმენა ასეთი ადვილი ვერ იქნება, მით უმეტეს, როცა ის საკუთარი მოსმენის დაშვებაზე მკაცრ კონტროლს განახორციელებს და ისე არ იქნება, რომ ვიღაცას საშუალება ჰქონდეს, მოუნდეს და ასე მარტივად უსმენდეს მათ. ამიტომ ეფრო პირველ ვერსიას ვემხრობი, რომ ეს ლაპარაკი დადგმულია იმისათვის, რომ შემდეგ ამ საიტზე დადებულიყო".

სესიაშვილი აცხადებს, რომ "ნებისმიერ შემთხვევაში, ხელისუფლებამ, სამართალდამცველმა ორგანოებმა გამოძიება უნდა დაიწყონ, თუ როგორ აღმოჩნდა უმაღლესი თანამდებობოს პირების საუბარის ჩანაწერი ხელმისაწვდომი.

"აქ საუბარი არ არის იმაზე, თუ ვის რა ზიანი მიადგა. თუ პრეზიდენტისა და შს მინისტრის საუბრების ჩაწერის საშუალება ვიღაცას აქვს, ე.ი. ქვეყანაში ყველაფერი მთლად წესრიგში არ არის. ეს ნიშნავს, რომ ჩვენს სახელმწიფოში სახელმწიფო საიდუმლოება არ არსებობს.

"ასე რომ, რა ვერსიასაც უნდა გავყვეთ, ხელისუფლებას ყველა ვერსიაზე პასუხის გაცემა მოუწევს. თუკი იტყვიან იმას, რომ ჩანაწერი აუთენტური არ არის, ხელისუფლების მხრიდან ეს ყველაზე სუსტი გამოსავალი იქნება. აუთენტურობაზე ობიექტური ექსპერტიზა უნდა ჩატარდეს და თუ ჩანაწერი შეთითხნილია, დამტკიცდეს. თუმცა მგონია, როგორც წინა შემთხვევებში, ახლაც ექსპერტიზა არ მოხდება და ხელისუფლება მხოლოდ სიტყვიერად უარყოფს ყველაფერს".

სესიაშვილი ამბობს, რომ წესით, გამოძიების დაწყებამდე უშიშროების სამასახურის ხელმძღვანელები, შსს მინისტრი და მაღალი თანამდებობის პირების მთელი კასტა, რომლებსაც უსაფრთხოება ეხებათ, თანამდებობოდან უნდა გადადგნენ. არა აქვს მნიშვლელობა ეს მათი ბრალი იყო თუ არა. ისინი ხელფასს იღებენ, რომ ქვეყანაში უსაფრთხოება უზრუნველყონ. "ვიკილიქსის" სკანდალს აშშ-ში უსაფრთხოების სამსახურების სერიოზული წმენდა მოჰყვა, ძალიან ბევრი პირი დააკავეს კიდევაც და მსგავსი რეაგირება უნდა იყოს ჩვენთანაც.

უშიშროების გენერალი ანზორ მაისურაძე ამბობს, რომ "თუ მართლა მინისტრისა და პრეზიდენტის საუბარია ჩაწერილი, ეს ნიშნავს იმას, რომ სახელმწიფოს პირველმა პირებმა არ დაიცვეს შიდა განაწესი, შიდა განკარგულება, რომლითაც უნდა ხელმძღვანელობდეს ყველა, ვინც ვალდებულია დაიცვას სახელმწიფო საიდუმლოება. პირველი პირების სატელეფონო საუბრები კი ყველგან სახელმწიფო საიდუმლების რანგშია აყვანილი და რა თქმა უნდა, მათი მოსმენის შესაძლებლობა არ უნდა არსებობდეს.

"საბჭოთა კავშირში ასეთი რამ წარმოუდგენელი იყო. ჩვენ დროს მას მაღალი სიხშირეებით საუბარი, ე.წ. ვეჩე ერქვა, რომლის მოსმენის შესაძლებლობა სხვა ქვეყნის მიერ გამორიცხული იყო.

პირველი პირების საუბრის ასე გამომზეურება ქვეყნის პრესტიჟისათვისაც საზიანოა, ე.ი. სათანადო ორგანოები არ მუშაობენ და თუკი ეს ჩანაწრები რეალურია, ამაზე რეგირება აუცილებად უნდა მოხდეს".

"რა გამოძიება უნდა მოხდეს, არ გადამრიოთ..."

შოთა უტიაშვილი "მთელ კვირასთან" საუბარში ამტკიცებს, რომ მას მსგავსი საუბარი არ ჰქონია და ეს ჩანაწერი ფაბრიკაციააა.

შოთა უტიაშვილი: "ამ ჩანაწერების გამოქვეყნება რუსული სპეცსამსახურების ოპერაციას ჰგავს. მე მსგავსი დიალოგი არ მქონია. ვერ დავადასტურებ იმას, რომ ეს ჩანაწერი აუთენტურია...

"მაღალჩინოსნები ყველა თემაზე ღიად არ საუბრობენ. ინსტრუქცია არა, მაგრამ არსებობს საუბრის ზოგადი წესები, რისი თქმა შეიძლება და რისი არა და ეს წესი დაცულია...

"რაც შეეხება მაღალჩინოსანთა სატელეფონო საუბრების მოსმენის დაცულობას, გარანტირებულად დაცული სატელეკომუნიკაციო სისტემა არ არსებობს, ყველა სისტემას თავისი გასაღები აქვს. მაღალსიხშირიანი ტელეფონები, ე.წ ვეჩე, ეს საბჭოთა პერიოდში "კაგებეს" ოფიციალური კავშირი იყო და საქართველოს მთავრობამ რატომ უნდა გამოიყენოს რუსეთის კაგებეს მომსახურება, ჩემთვის გაუგებარია".

მისივე თქმით, ამ საიტის მიერ ადრე გაავრცელებული ჩანაწერიც ფაბრიკაცია იყო: "მაშინაც განვაცხადეთ, რომ არ ვადასტურებდით ჩანაწერის რეალურობას. ზოგ შემთხვევაში იყო სრული ფაბრიკაცია, ზოგ შემთხვევაში იყო სხვადასხვა საუბრების კომბინაცია".

უნდა ჩატარდეს თუ არა მოკვლევა იმის გასარკვევად, თუ საიდან ხვდება რუსული სპესსამსახურების ხელში მსგავსი ჩანაწერები და მოხდება თუ არა ჯაშუშების ძიება შს სამინისტროში? უტიაშვილი აცხადებს, რომ არაფერიც არ მოხდება.

"არ გვქონია შემთხვევა, რომ ქვეყნის შიგნით მოეხდინოს ვინმეს მაღალჩოსნის საუბრის ჩაწერა და გატანა. ჩანაწერი ფაბრიკაციაა და რა უნდა მოყვეს? მსგავსი დიალოგი მე არ მქონია და რათ უნდა ამას ექსპერტიზა... რა გამოძიება უნდა მოხდეს, არ გადამრიოთ..."

არის თუ არა ეს საუბარი ფაბიკაცია, ამ თემაზე რაიმე კომენტარის გაკეთებაზე პრეზიდენტის პრეს-სპიკერმა მანანა მანჯგალაძემ უარი განაცხადა.

არც ფოტორეპორტიორმა გია აბდალაძემ ისურვა საუბარი, იმ მიზეზით, რომ მას პრესასთან ყველანაირი კომენტარი აკრძალული აქვს.

სატელეფონო ჩანაწერები

ფოტოგრაფების საქმესთან დაკავშირებული ჩანაწერების გამოცემა "ნეტგაზეთმა" შაბათს აღმოაჩინა. ჩანაწერების რაღაც ნაწილები არ ისმინება, თუმცა საერთო ჯამში შინაარსის დადგენა შესაძლებელია. ჩანაწერებს შემოკლებული სახით გთავაზობთ.

"სოროკას" მიხედვით, პირველი სატელეფონო ჩანაწერში, თითქოსდა საუბრობენ შს მინისტრი ვანო მერაბიშვილი და შსს-ს ანალიტიკური დეპარტამენტის უფროსი შოთა უტიაშვილი.

ჩანაწერი #1

"უტიაშვილი": ალო

"მერაბიშვილი": შენა და მანდ დოკუმენტები ბევრი არ გინდა, 100 და 200 კი არ გინდათ...

"უტიაშვილი": არა, ახლა მე აქ მაქ რამდენიმე დოკუმენტი, ერთი 7 დოკუმენტი კარგი, გემრიელი, კარგი

"მერაბიშვილი": ჰო, მეტი არ გინდათ... და რა მაინტერესებს კიდე, ჰკითხე მაზმიშვილს, ეს ტიპი ხო ვიღაცასთან, გარდა ამ მთავარი ტიპისა, მე მგონი, რაღაცა ჰქონდა კიდე ამ პრეზიდენტის იმას უცხოეთში.

"უტიაშვილი": პრეზიდენტისას ჰქონდა უცხოეთშიო? ამ ტიპის გარდაო? ამ გედენიძეს ჰქონდაო... გარდა ქურციკიძისა? (პაუზა) არაო.

"მერაბიშვილი": სქემაში რაღაცა იყო. სქემა რომ მომიტანეს იქ იყო რაღაცა რომ...

(უტიაშვილი ვიღაცას ელაპარაკება. პაუზა)

"უტიაშვილი": არაო, არაო, გედენიძეს არა, ქურციკიძს, მაგრამ ისეთი, რა..."მერაბიშვილი": არა არა, რუსეთის რაღაც, ჩერეზ გერმანია, არა ხო?

"უტიაშვილი": აა, ვიცი, ვიცი, კონტაქტი ქონდა ამ "ეპას" (ევროპის პრეს ფოტო) წარმომადგენელთან რუსეთში, რომელიც ლეგიტიმური ტიპია რა და მეორე ქალთან კიდევ, რომელიც ასევე ლეგიტიმურია.

"მერაბიშვილი": და რა მაინტერესებს კიდე. აი, ის ტელეფონების საუბრები ნახე?

"უტიაშვილი": ჰო, ეგ არ გამოგვადგება არაფერში.

"მერაბიშვილი": რომელი, კაცო?

"უტიაშვილი": აი, ის საუბრები, არაფერ შედეგს არ მოგვიტანს.

"მერაბიშვილი": არა, კაცო, მაგას არ გეუბნები, სინიცინთან და იმასთან რომაა.

"უტიაშვილი": აა, მაგას ვაჩვენებთ აუცილებლად, ოღონდ რაღაც ნაწილს გავაშავებთ.

"მერაბიშვილი": ჰო, გავაშავოთ. ვისი ნარეკია, სინიცინის ამასთან, თუ ორივე?

"უტიაშვილი": ქურციკიძეს აქვს დანარეკი და კიდევ ამისგან აქვთ საერთო კონტაქტი, რომელიც 24 შიც იყო და 31 შიც.

"მერაბიშვილი": 11-ში სინიცინი უკვაშირდებოდა ვიღაცას?

"უტიაშვილი": არა, რაღაც ნომერზე რომელზეც ადრე სინიცინი რეკავდა 24-ში 31-ში, რეკავდა ესეც, რა...

"მერაბიშვილი": და თვითონ პირდაპირი კავშირი არის ამას და სინიცინს შორის?

"უტიაშვილი" (ეკითხება ვიღაცას და მერე პასუხობს): კი, კი

"მერაბიშვილი": 4-ში და 5-ში, ხო?

"უტიაშვილი" (ეკითხება ვიღაცას - "4-ში და 5-ში?" მერე პასუხობს): ოთხშია მარტო.

"მერაბიშვილი": კარგი, რა უნდა მეკითხა კიდე - და შენ რომ მითხარი განმცხადებელიო, ვინ დადო ეგ განცხადება?

"უტიაშვილი": ეგ განცხადება დადო ამ ტიპმა რუსეთში.

"მერაბიშვილი": აა, "ეპა" ამბობს მე მივეცი ფული იმასო?

"უტიაშვილი": ჰო.

"მერაბიშვილი": რუსმა და არა დირექტორმა, ხო?

"უტიაშვილი": რუსმა, რუსმა, ხო.

"მერაბიშვილი": ეგ ვაბშე რა ორგანიზაციაა?

"უტიაშვილია": დიდია რა, ფოტოსააგენტოა დაახლოებით "როიტერის" ზომის, რა. ეგ დააარსეს ერთად "დოიჩე პრესმა" და "ფრანს პრესმა".

"მერაბიშვილი": რა ჩათლახები ვართ, სწრაფად მივეცით ახლაო, ხო (იცინის).

"უტიაშვილი": ჰო, ახლა... (არ ისმის) მარა ეს ტიპი სხვა რაღაცას იძახის, რაღაცა ოფისის ხარჯებიც იყოო... ჰო, ეგ არ არის არაფერი, ეგ არ არი მტკიცებულება. მტკიცებულება არის, რომ ეგ ქაღალდები ჰქონდა, რა...

"მერაბიშვილი": არის, როგორ არ არის, ფული რომ გაქვს ამხელა...

"უტიაშვილი": რა დავარქვათ, თუ ახლა ვიტყვით, რომ ამას ხელს აფარებს, გამოვა, რომ მთელი ორგანიზაცია...

"მერაბიშვილი": არა, მაგას არ გეუბნები, კაცო... ნორმალური ადამიანი 9 ათას ევროს სახლში არ აჩერებს, ჰო?

"უტიაშვილი": ჰო, თუმცა ახლა ეგ მტკიცებულება არ არის...

"მერაბიშვილი": არა, სხვა რაღაცებთან ერთად ახლა არის და ისე არ არის. სხვა სატელეფონო საუბარი არაფერში არ გამოდგება, ჰო?

"უტიაშვილი": არა, არა, ის ვაბშე თავიდან არ უნდა გვეჩვენებინა, რა - ანგარიში გამომიგზავნე, ანგარიშზე ჩაგირიცხავ...

"მერაბიშვილი": თუმცა ფიზიკურად არც ერთს არ უნდა ეკეთებინათ, ჰო?

"უტიაშვილი": ფიზიკურად არ უნდა ეკეთებინათ გედენიძეს და აბდალაძეს და ქურციკიძეს... იძახიან, რომ ჩვენც ვაკეთებთ მაგასო.

"მერაბიშვილი": არც აბდალაძეს და არც გედენიძეს, ჰო? ორივე ხომ ის იყო, სახელმწიფოს თანამშრომელი, ჰო?

"უტიაშვილი": ერთი სახელმწიფოს თანამშრომელი იყო ჩოტკად, ეს გედენიძე და ის "ალიას" ტიპი იყო კონტრაქტით საგარეოსთან და იყო "ეპა"-ს სტრინგერი.

"მერაბიშვილი": აა, "ეპა"-შიც მუშაობდა? კაი, კაი მოკლედ, კაი.

ჩანაწერი #2

მეორე სატელეფონო ჩანაწერის მიხედვით ვანო მერაბიშვილი იუსტიციის მინისტრს, ზურაბ ადეიშვილს ესაუბრება.

"მერაბიშვილი": მეტი რა ვქნა ახლა... მიშა ატრაკებს რამეს, თუ?

"ადეიშვილი": ყველაფერი კარგად არის.

"მერაბიშვილი": ამ აღიარების მერე რამე შეკითხვა ექნება?

"ადეიშვილი": შეკითხვა აღარა აქვს. ახლა ვნახავ და... (შემდეგ არ ისმის)

"მერაბიშვილი": ახლა უთხარი მიშას და გიგას, არის თუ არა ეს ბილეთი?

"ადეიშვილი": გიგასაც ხომ არ სჯეროდა და აქედან გამომდინარე მას არ ვეტყვი... არ ვეუბნები ჯერ...

"მერაბიშვილი": ახლა მე დავურეკავ და ვაგინებ.

ადეიშვილი: კაი, კაი...

ჩანაწერი #3

მესამე ჩანაწერის მიხედვით ვანო მერაბიშვილს შსს-ს პრესამსახურის უფროსი შოთა ხიზანიშვილი უყვება გამოძიების მიმდინარეობას:

"შოთა ხიზანიშვილი": "ასეთ რაღაცას ამბობს, ზურა ქურციკიძეს ვიცნობ დიდი ხანიაო, მაგრამ ის განსაკუთრებით დამიახლოვდა მას შემდეგ, რაც დავიწყე მუშაობა პრეზიდენტის ადმინისტრაციაშიო და თავიდან მომთხოვა ფოტოების მიცემა მისთვისო პრეზიდენტის ვიზიტების და შეხვედრების შესახებო და მაში გარკვეულ საზღაურს მიხდიდაო. მერე გარკვეული პერიოდის მერე მითხრა, რომ ამ ფოტოებთან ერთად გამეკეთებინა კომენტარებიცო - ვინ იყო შეხვედრაზე, ვის გადაუღო ფოტოები. და ამისთვის გამიზარდა ანაზღაურებაო.

"გარკვეული პერიოდის მერე მომთხოვა დამატებითი ინფორმაციის მიწოდებაო, რომელიც უკვე ჩემს ფოტომასალას აღარ ერგებოდაო. ვიცოდი სპეცსამსახურებთან ჰქონდა კავშირი და მოსკოვში აგზავნიდა ამ ფოტოებს და ვუთხარი უარიო, მაგრამ ფოტოები, რომელიც მიცემული მქონდაო და ფული მქონდა აღებულიო, მითხრა, რომ ამას ჩემს საწინააღმდეგოდ გამოიყენებდაო...

"ამის შემდეგ შემეშინდაო დაშანტაჟებისო და ურთიერთობა გავაგრძელეო. ფულს მიხდიდა თავიდან ნაღდი ანგარიშსწორებითო, და ბოლოს მითხრაო საბანკო რეკვიზიტები მომეცი, რომ აწი ანგარიშზე გადმოგირიცხო ფულიო."

ხიზანიშვილი ასევე საუბრობს, რომ "ხომ არ შევამციროთ სატელეფონო საუბრები, ქურთაზე რომ არის ლაპარაკი? მე შევამცირე ეგ. შემცირებული ვარიანტი მაქვს. ტყეშლაშვილმა მოუსმინა და ხომ არ გავზარდოთო... აღიარებაც გვაქვს... მე ახლა წამოვედი, ადეიშვილმა - მოიტა, მაჩვენეო და ცოლიც მზად არის რომ გველაპარაკოს."

ჩანაწერი #4

მეოთხე ჩანაწერის მიხედვით ისევ მერაბიშვილი და შოთა უტიაშვილი საუბრობენ:

"უტიაშვილი": აბდალაძის გარდა ყველას ელაპარაკნენ, თუმცა არაფერს მნიშვნელოვანს არ ამბობენ, რაც არ აწყობთ, არ ლაპარაკობენ. აბდალაძე შიმშილობს და როცა ჩამოხვალ და გადაწყვეტ, სჯობს აბდალაძესაც დაელაპარაკონ.

"მერაბიშვილი": მაგის კომპიუტერებში ვერაფერი მონახეთ? აბდალაძის...

"უტიაშვილი": მაგას კომპიუტირი არა აქვს. მაგის კომპიუტერი იქ არის, რაღაც საერთო და იქ არაფერი არაა.

"მერაბიშვილი": სახლში არაფერი არ ჰქონდა, ჰო?

"უტიაშვლი": სურათები და რაღაცები აქვს ეხლა... არაფერი არ არის ისეთი.

"მერაბიშვილი": და როდის დავილაპარაკებო?

"უტიაშვილი": არ ვიცი, ბუინობს და განცხადებებს აკეთებს.

ჩანაწერი #5

მეხუთე ჩანაწერში ისევ მერაბიშვილისა და უტიაშვილის სუბარია.

"მერაბიშვილი": ცხვირჩამოშვებულო, როგორ ხარ?

"უტიაშვილი": ცხვირჩამოშვებული რა, სპეცრაზმელს გავარდნია ტყვია და იმას შემოკვდომია. აი, ქალი რომ კვდება, ოსს კი არა, ჩვენს სპეცრაზმელს გავარდნია ტყვია...

...ჰო, ახლა ვეტყვი ბიჭებს, გავაკეთებთ რა მაგას და, მგონი, ძაან კარგი გამოვა.

"მერაბიშვილი": "ძაანაც" რას ნიშნავს, "მე მგონი" რას ნიშნავს? გამოსულია და ესაა.

"უტიაშვილი" (იცინის): ჰო, გამოსულია.

"მერაბიშვილი": არის დოკუმენტები?

"უტიაშვილი": არის დოკუმენტები და პრესკარტა.

"მერაბიშვილი": უფრო ვისია მეტი გაკეთებული?

"უტიაშვილი": ახლა ვნახულობთ.

"მერაბიშვილი": დოკუმენტები აიღეთ, დაასკანერეთ, დაასვით რიცხვი და ლამაზად დაადე შავები. შეეცადეთ მაქსიმალურად ცოტა რაღაცას დაადოთ შავი, რომ ინტრიგა ბევრი იყოს, მიხვდი?! სულ რომ შავი იყოს, არ გვინდა, რა... როგორ ქენით იცი? სახელი და გვარი წერია, იმას გადაუსვი შავები. "ეპა"-ს დირექტორი ჩამოდისო, რუსია ეს დირექტორი?

"უტიაშვილი": არა, არა, გერმანელია.

"მერაბიშვილი": უთხარი, ჩამოვიდეს. ხომ არის ეს დოკუმენტები... ეს დოკუმენტები აიღეთ, რომ ხვალ საღამოს ყველაფერი მქონდეს. ცალკე ტელეფონებით, ცალკე ჯგუფმა იმუშაოს. კომპიტერზე დასვით, სკანერზე გადაიღეთ. ხაზეთ და ხაზეთ. კომპიუტერშიკები თუ არ გყოფნით, ხოშტარიას კომპიტერშიკები დაიხმარეთ. მთელი ჯგუფი ჰყავს. ანალიტიკური ხალხი გამოყარე, რას მიკეთებთ. მთელი ღამე იმუშავეთ. დავაი, დავაი...

ჩანაწერი #6

საიტზე გამოქვეყნებული ბოლო ფარული ჩანაწერის მიხედვით შს მინისტრი და საქართველოს პრეზიდენტი საუბრობენ:

"მერაბიშვილი": ალო.

"სააკაშვილი": ჰო.

"მერაბიშვილი": გიორგაძესთან ვიყავიო.

"სააკაშვილი": გარიგება დაუდეთ?

"მერაბიშვილი": არა, კაცო, რა გარიგება დაუდეთ ჯერ. ჯერ ადვოკატმა უნდა მოგვცეს ჩვენება და ტელევიზიით უნდა გამოვიდეს, თორემ ახლა პირობა აქვს მაგას წამოყენებული, რომ სამ წელზე მეტი არ მომცეთო და ჩვენ ეხლა ვევაჭრებით.

"სააკაშვილი": ჰოდა კაია.

"მერაბიშვილი": რა გარიგება უნდა დავუდოთ? თუ ტელევიზორში გამოვა და რაღაცას იტყვის, შეიძლება მერე ორი წელი მივცეთ. მერე თუ კიდევ რაღაცას იტყვის - კიდევ ერთი წელი. ვაფშე, მამენტ, თუ ყველაფერს მოყვება, შეიძლება გარიგებაც დავუდოთ.

"სააკაშვილი": ჰო.

"მერაბიშვილი": 2002 წელში დამავერბოვკეს ცხინვალში რუსებმაო. რა გინდოდა ცხინვალში 2002-შიო? კონტრაბანდა გადმომქონდაო.

"სააკაშვილი": დაჭერილი ჰყავდათ?

"მერაბიშვილი": კონტრაბანდა გადმომქონდა და დამიჭირესო.

(პაუზა)

"მერაბიშვილი": ალო...

"სააკაშვილი": ჰოდა ხომ გაბაზრდა, მანდ რომ მისცა ჩვენება?

"მერაბიშვილი": სად გაბაზრდა? ჯერ არ გაბაზრებულა. ჯერ ადვოკატის გარეშეა.

"სააკაშვილი": მეორე ხომ გაბაზრდა?!

"მერაბიშვილი": მეორე გაბაზრდა, კი. ის გამოვიდა, ბესელია. პირველი ჩვენება მისცაო, მარა ვაჟკაცურად დგასო... სასაცილო ამბავი გითხრა?

"სააკაშვილი": საფრანგეთში ვარ, ჰომ იცი?!

"მერაბიშვილი": ვიცი. ვიცი სადაც დგეხარ (იცინის). ცოლი ამბობს, კაცი ხარ და ვაჟკაცივით უნდა იყოო, რა...

"სააკაშვილი": ჰო.

"მერაბიშვილი": მე ასეთი ქმარი არ მინდაო, შერცხვენილი გამოვიდეს ციხიდანაო.

"სააკაშვილი": ჰო.

"მერაბიშვილი": ისაო, რა ქვიაო, თუ საჭიროა იჯექიო, ოღონდ ვაჟკაცი გამოდიო (იცინის).

"სააკაშვილი": ჰო, აბა რა იქნება ეხლა.

"მერაბიშვილი": არა, მოკლედ ეხლა ეგ ვაჭრობს რა, სამი წელი და რაღაცეები. რა ვიცი, ეხლა პროკურატურა როგორც იტყვის, ეგრე იქნება.

"სააკაშვილი": ჰო, ნუ, მოსაფიქრებელი გაქვთ. თავისთავად კარგია, რა.

"მერაბიშვილი": კარგი არ არის მარა მეორე მხრივ ცუდია. ეგ დედამ...-ები ყველა აგენტები როგორ არიან?!

"სააკაშვილი": ეგენი არიან იმ თაობის ხალხი, რომლებიც... ყველანი ეგენი...

"მერაბიშვილი": ჰო, ყველანი ეგენი არიან, მაშინ ვინც იყვნენ, 90-იან წლებში ვინც რამე იყო.

"სააკაშვილი": მაშინ რუსები ბოლომდე დედას გვ...ენ...

"მერაბიშვილი": ვინც უშიშროების მინისტრი იყო მოვიდა და გვეუბნებოდა - რუსების კაცი ვარო და დამტოვეთო და რა გიკვირს?!

"სააკაშვილი": ეგეთი დრო იყო. ეგეთი ხალხი იყო. ამიტომაც ვერ განვითარდა და ეგეთები არიან ჩარჩენილი წარსულში. მაგრამ მაგ თაობაში აღარ არის კაცი. ეგ არის მაგათი პრობლემა.

"მერაბიშვილი": ჰო, მაგრამ ეგენი ახალი თაობა მეგონა. ჩემზე ახალგაზრდები არიან ეგ დედამ...-ბი.

"სააკაშვილი": ჰო, მაგრამ ეს მაინც ის თაობაა.

"მერაბიშვილი": რა ვიცი, მაგათი...