დეკანოზი ილია ჭიღლაძე სოციალურ ქსელში მსოფილიო პატრიარქის მიერ უკრაინული ეკლესიის ავტოკეფალიის აღიარებას ეხმაურება.

"დღეს ზოგიერთებისგან ვრცელდება მცდარი აზრი და ცრუ შიში ქართულ საზოგადოებაში, რომ კონსტანტინოპოლის მსოფლიო საპატრიარქოსგან უკრაინის ეკლესიის ავტოკეფალურად გამოცხადება იმოქმედებს აფხაზეთის ეპარქიის საკითხზე და აფხაზეთიც მიიღებს ავტოკეფალიას. რატომაა ეს აზრი სრული სიცრუე და სისულელე?!

1. აფხაზეთი არ წარმადგენს საერთაშორისო ნორმებით აღიარებულ სახელმწიფოს, მაშინ როდესაც ძლიერი სახელმწიფოებრიობაა ავტოკეფალური ადგილობრივი ეკლესიის ჩამოყალიბების ერთერთი უმთავრესი საფუძველი და მიზეზი;

2. სეპარატისტული აფხაზეთის მარიონეტული ხელისუფლება ცალსახად რუსული რეჟიმია და ის არ დაუშვებს აფხაზეთის მართლმადიდებლობაში კონსტანტინოპოლის გაძლიერებას და მოსკოვის საპატრიარქოს გავლენების შემცირებას;

3. მსოფლიო პატრიარქმა ბართლომეოსმა წინა წლის დეკემბერში ტვ იმედისათვს მიცემულ ინტერვიუში მკაფიოდ და ცალსახად განაცხადა, რომ აფხაზეთის ეპარქია საქართველოს საპატრიარქოს კანონიკური ტერიტორიაა და არანაირად არ განიხილება ავტოკეფალიის მინიჭება, ასევე კონსტანტინოპოლისათვის (გინდ სხვა საპატრიარქოსადმი) მისი მიერთების სურვილი გამორიცხულია. ყოვლადუწმინდესი ბართლომეოსი სიტყვის კაცია, განსხვავებით რუსეთის პატრიარქ კირილესაგან. ბართლომეოსის ყოველი სიტყვა არის "ასჯერ აწონილი და ათასჯერ გაზომილი" და ის არ იცვლება (კირილე რომ სიტყვის კაცი არაა, კრეტის კრებაზეც გამოჩნდა: კრების წინა თვეებში ამბობდა, კრებაზე მივდივარო, მართლმადიდებელთა ერთობას მთელს მსოფლიოს ვაჩვენებთო და ბოლოს, გამგზავრების წინა დღეებში გადათქვა და ობსტრუქცია მოაწყო, რითაც მთელს მსოფლიოს აჩვენა მართლმადიდებელთა არაერთსულოვნება, დააკნინა მართლმადიდებლობა და ნახევარი საუკუნის მანძილზე ნამზადები დიდი კრება).

4. როგორ შეიძლება 40 მილიონიან უკრაინის სახელმწიფოს შევადაროთ ჯუჯა აფხაზეთი და მისი პატარა ეპარქია, სადაც მართლმადიდებლობა არცაა აბსოლუტურ უმრავლესობაში და ისლამი, აფხაზური წარმართობა და სომხური სარწმუნოება მას არ ჩამორჩება რაოდენობით?!

5. კონსტანტინოპოლს არაფერში სჭირდება საქართველოს საპატრიარქოს და ქართველი ერის მომდურება და სამტროდ განაწყენება. ეს თუ ვინმეს აწყობს და უნდა ისევ ოიმპერიალისტური რუსეთია!

6. ოპონენტებს არგუმენტად მოაქვთ პროკონსტანტინეპოლურად განწყობილი, რუსებისგან ნაკურთხი და მერე მათგან გამდგარი (იქნებ რუსული ფსბ-ს კარნახითაც) აფხაზი სასულიერო პირის, დოროთე დბარის ვიზიტი მსოფლიო პატრიარქთან და ერთობლივად გადაღებული ფოტოები. მაგრამ ოპონენტებს ავიწყდებათ, რომ მსოფლიო პატრიარქთან აუდიენცია ყველა ქრისტიანს მარტივად შეუძლია და არც ფოტოების მასთან გადაღებაა "რჩეულთა" პატივი და ფუფუნება.

7. თუ საიდანმე მოდის საფრთხე, ესაა მოსკოვის საპატრიარქო, რომელც დე-ფაქტოდ აკონტროლებს აფხაზეთის ეპარქიას, დაპყრობილი აქვს ყველა ეკლესია-მონასტერი (გარდა ახალი ათონის მონასტრისა) და 15-ამდე მღვდელი ჰყავს აფხაზეთში. მაგრამ მოსკოვის საპატრიარქოს ქმედებებს აფხაზეთის ეპარქიის მისატაცებლად კანონიკური კუთხით იგივე ფასი აქვს, რაც პუტინის რუსეთის მიერ აფხაზეთის და ცხინვალის სეპარატისტების აღიარებას საერთაშორისო სამართლებრივ სივრცეში!" - აღნიშნა დეკანოზმა ილია ჭიღლაძემ.