პოლიტიკური დაპირისპირების მიუხედავად, „ნაციონალურ მოძრაობაში“ ის ადამიანები მაინც რჩებიან, რომლებიც ჯერ კიდევ ფიქრობენ, რომ პარტიას დაშლის საფრთხე არ ემუქრება. მათ შორისაა ლევან ბეჟაშვილიც, რომელიც მიიჩნევს, რომ „ნაციონალური მოძრაობა“ ერთი გუნდია, რომელიც ერთ აზრზე არ არის, მაგრამ პარტიის წევრებს ისტორია, გაკეთებული საქმეები, გარკვეული შეცდომები და მომავალი გამარჯვება აერთიანებთ.

პარტიაში მიმდინარე პროცესების თაობაზე, for.ge ყოფილ დეპუტატს, პარტიის წევრს, ლევან ბეჟაშვილს ესაუბრა:

„ნაციონალური მოძრაობის“ ერთმა ნაწილმა საორგანიზაციო კომისია შექმნა, რომლის წევრებიც ეკა ხერხეულიძე, პეტრე ცისკარიშვილი, ზურაბ მელიქიშვილი, დავით კირკიტაძე და ნუგზარ წიკლაური არიან. პარტიის მეორე ნაწილი მიიჩნევს, რომ აღნიშნული კომისია არალეგიტიმურია. თქვენ როგორც კომისიის შექმნის ერთ-ერთი ავტორი, მოწინააღმდეგეების პოზიციას რას უპასუხებთ?

- ეს კომისია ვინმეს მიერ ხელოვნურად კი არ შეიქმნა, არამედ კომისიის შექმნა გათვალისწინებულია პოლიტსაბჭოს 30 ნოემბრის გადაწყვეტილებაში, რომელსაც მეშვიდე ყრილობის საორგანიზაციო წესი ჰქვია. განსაზღვრავრულია ასევე ის, დელეგატებად მოწვეული ვინ უნდა იყვნენ, საორგანიზაციო საქმიანობას ვინ წარმართავს, ხმების დათვლა როგორ ხორციელდება და ა.შ. ამ წესის თანახმად, ყრილობის საკითხებს საორგანიზაციო კომისია წარმართავს. ასევე კომისიის შემადგენლობას პოლიტსაბჭო განსაზღვრავს. კერძოდ, პოლიტსაბჭოს ხუთ წევრს კომისიის ერთი წევრის დასახელების უფლება აქვს. ანუ, 60 წევრიან პოლიტსაბჭოს 12 ადამიანის არჩევა შეუძლია, რომლებიც საორგანიზაციო საკითხებს უზრუნველყოფენ. ეს კომისია პოლიტსაბჭოს ჩანაცვლებას, ან მისი საწინააღმდეგო გადაწყვეტილებების მიღებას არ აპირებს. ეს ისეთი კომისია იქნება, რომელიც ისეთ დეტალებს განიხილავს როგორიცაა: მანდატების გაცემა, საინფორმაციო უზრუნველყოფა და ა.შ. როცა საუბარია ლეგიტიმაციაზე, გეტყვით, რომ კომისია პოლიტსაბჭოს მიერ შეიქმნა.

როცა საორგანიზაციო კომისიას ქმნიდით, ეს პარტიის მეორე ნაწილს რატომ არ ამცნეთ? მათ ეს „სიურპრიზად“ რატომ მიიღეს?

- რას ჰქვია, წინასწარ საქმის კურსში არ ჩავაყენეთ? - ეს წესი პოლიტსაბჭოს სხდომაზე იქნა განხილული და მიღებული. მას მხარი პოლიტსაბჭოს უმრავლესობამ დაუჭირა. ეს თემა არავისთვის მოგონილი არ ყოფილა და უცნაურ ტერმინებს იყენებენ, რაც მათი მხრიდან კარგი საქციელი არ არის. კომისიის შექმნა სიურპრიზი არავისთვის ყოფილა. კომისია ფუნქციონირებს, დღის წესრიგი მომზადდება და პარტია მომავალ საქმიანობასთან დაკავშირებით გადაწყვეტილებას მიიღებს.

არ ფიქრობთ, რომ უკვე იმ პოლიტიკურ ფაზაში ხართ შესულები, საიდანაც გამოსვლა რთულია და პარტია შესაძლოა, დაგეშალოთ?

- არ ვფიქრობ, რომ პარტია დაშლის პირასაა. „ნაციონალურ მოძრაობას“ ბევრად უფრო რთული პერიოდები გადაუტანია. შიდა დისკუსია, პოლიტიკური თამაშის წესების განსაზღვრა და პარტიული აქტივის მოსმენა, ეს ის ნიშაა, რაც პარტიის სიძლიერეს და დემოკრატიულობას უზრუნველყოფს. საბოლოო ჯამში, პარტიის აქტივისტებისა და დელეგატების მონაწილეობით ისეთ გადაწყვეტილებას მივიღებთ, რაც პარტიას კიდევ უფრო ძლიერ და მონალითურ ძალად აქცევს.

პარტიის ერთი ნაწილი მეორე ნაწილს ბიძინა ივანიშვილთან პოლიტიკურ გარიგებაში ადანაშაულებს და ერთიანობის შენარჩუნების იმედი მაინც გაქვთ?

- ასეთი ბრალდებები არ ყოფილა. ლოგიკური კითხვები და თემებია. მაგალითად - პარტიის თავმჯდომარეზე საუბარი რატომ დაიწყო?! ბათუმში 700 დელეგატს შევხვდით და მათ კითხვა დასვეს, ამ თემის წინ წამოწევა საჭირო რატომ გახდა, როცა სააკაშვილისგან პარტიის გამიჯვნაზე საუბრობენ და ზოგიერთები ამ პროცესის აღსაწერად სხვადასხვა ტერმინებს იყენებენო. ქვეყანაში ბევრად უფრო მძიმე ვითარებაა და ოპოზიციური პარტია ეკონომიკასა და ლარის ვარდნაზე უნდა საუბრობდეს, არადა, ამის ნაცვლად, იმ თემებზე ვსაუბრობთ, რაც არავის ინტერესებში არ შედის. ბუნებრივია, ეს კითხვებს აჩენს. ეს თემები საიდან მოდის? - მეორეს მხრივ, შეთქმულების თეორიაში გადავარდნა არ გვჭირდება და ამიტომ, ყველა კითხვას და საჭირბოროტო საკითხს პასუხი 20 იანვარს ყრილობაზე უნდა გაეცეს.

თქვენ ამბობთ, რომ ლოგიკური კითხვები გაქვთ. ალბათ, პარტიის თავმჯდომარის არჩევის საკითხსაც გულისხმობთ. როცა იმაზე აპელირებთ, რომ პარტია დემოკრატიულად ვითარდება, ეს პროცესი ახალი ხელმძღვანელის არჩევას არ ითვალისწინებს? ახალი თავმჯდომარის არჩევას რატომ ეწინააღმდეგებით?

- თქვენს მოსაზრებას თავისი ლოგიკა აქვს, მაგრამ პარტიას რა სჭირდება და როგორ უნდა განვითარდეს, ეს 24 ადამიანმა კი არ უნდა გადაწყვიტოს, არამედ პარტიის აქტივმა. ანუ, იმ ადამიანებმა, რომელთაც ამ არჩევნებზე იბრძოლეს და პროკურატურის მხრიდან ზეწოლა გაიარეს. როცა პარტიის განვითარებაზე ვსაუბრობთ და იმაზე, თუ ვინ უნდა იყოს ხელმძღვანელობაში, ეს ყველაფერი ყრილობამ უნდა გადაწყვიტოს და არა 24 ადამიანმა. პარტიის ისეთი მომავალი განვითარება ექნება, რასაც ყრილობა გადაწყვეტს. მეც იმას ვამბობდი, ამ თემის საჯაროდ გამოტანა რა აუცილებლობას წარმოადგენდა? რეალობა კითხვებს ბადებს, მაგრამ შეთქმულების თეორიები და წიაღსვლების გაკეთება საჭირო არ არის.

თქვენ თქვით, რომ ოპოზიციური პარტია ეკონომიკასა და ლარის ვარდნაზე უნდა საუბრობდეს. „ნაციონალური მოძრაობის“ საპარლამენტო გუნდი უმრავლესობას მწვავე ოპონირებას უწევს და პასუხებს როგორც ეკონომიკურ, ასევე პოლიტიკურ საკითხებზე სთხოვს. მათგან სხვას რას ითხოვთ? ეს ადამიანები თქვენ უნდა გებრძოლონ და სააკაშვილის ბრალდებები მოიგერიონ, თუ საპარლამენტო საქმიანობა წარმართონ?

- მათ თავს არავინ ესხმის. ზოგიერთი თანაგუნდელის მხრიდან წინ ის თემები წამოვიდა, რომელიც საჯაროდ განსახილველი არ იყო. ვინმეს არ ვაკრიტიკებ და საპარლამენტო წარმომადგენლობა თავის საქმიანობას ახორციელებს, მაგრამ ამავდროულად, პარტიას სხვა სტრატეგია სჭირდება. მხოლოდ საპარლამენტო მუშაობით და ოპონირებით საზოგადოებრივი აზრის ფორმირება და პრობლემების წარმოჩენა ვერ ხდება. ამიტომ, საპარლამენტო ტრიბუნის ნაცვლად, ხალხთან უნდა გავიდეთ, მათი პრობლემები გავიგოთ და შევეცადოთ, რომ მათთან ერთად ხელისუფლებას პრობლემები დავანახოთ. სხვა პოლიტიკური აქტივობით უნდა შევეცადოთ, პრობლემების წარმოჩენა და მათზე ყურადღების გამახვილება მოხდეს.

სხვა რა პოლიტიკური ბერკეტი გაქვთ, რითაც პრობლემების წარმოჩენას შეეცდებით?

- ნებისმიერი პოლიტიკური პარტიის არსენალშია სხვადასხვა პოლიტიკური ბერკეტები. იქ არის გამოსვლები, ხალხთან ურთიერთობა, შეხვედრები, სატელევიზიო გაშუქება. ანუ, ყველაფერი კანონის და კონსტიტუციის ფარგლებში.

სააკაშვილის და თქვენი გუნდის გაღიზიანების მთავარი მიზეზი ის ხომ არ არის, რომ ბოკერიას ე.წ. ფრთა ყოფილი პრეზიდენტის მოთხოვნას არ დაემორჩილა, რომელიც აქციების მოწყობას და ბარიკადებზე გასვლას გულისხმობდა?

- რა ბარიკადებს გულისხმობთ?

იმ ფარულ ჩანაწერებს ვგულისხმობ, სადაც სააკაშვილი ქვეყანაში არეულობის მოწყობას ითხოვდა...

- ინტერპრეტაციები ხდებოდა და რა მონტაჟით, კაცმა არ იცის. სჯობს, ამაზე ყურადღებას ნუ გავამახვილებთ. საუბარია იმაზე, ჩვენ როგორც მთავარმა ოპოზიციურმა პარტიამ მაქსიმალურად მეტი გავაკეთოთ იმისთვის, რომ პრობლემები სააშკარაოზე გამოვიტანოთ, რაც „გასაოცარი დემოკრატიის“ მეოთხე წელს ხდება.

არ ფიქრობთ, რომ ეს რადიკალური გზა არ გამოგადგებათ?

- არ ვფიქრობ, რომ „ნაციონალური მოძრაობა“ დაიშლება. პარტიის შიგნით ცხარე დისკუსია და აზრთა სხვადასხვაობა ყოველთვის იყო. მთავარი ღირებულება ისაა, რომ პარტიაში აზრთა სხვადასხვაობის მიუხედავად, საქმიანობას ერთად ვაგრძელებდით. ჩვენი საერთო საქმიანობა ქვეყანას სჭირდება და გამოვრიცხავ, რომ რაიმე რადიკალური ცვლილებები განხორციელდეს.

შეგიძლიათ, თქვათ, რა არის ის, რაც ჯერ კიდევ გაერთიანებთ?

- რას ნიშნავს, ჯერ კიდევ გვაერთიანებს? - ჩვენ ერთი გუნდი ვართ, რომელიც ერთ აზრზე არ არის და შეიძლება, მიზნისკენ მისასვლელი სხვადასხვა გზაც იყოს, მაგრამ ჩვენი ისტორია, გაკეთებული საქმეები, გარკვეული შეცდომები და მომავალი გამარჯვება გვაერთიანებს.