„არ იყო ფინანსების ის რაოდენობა, რომელიც სჭირდება ამ საქმეს წარმატების მისაღწევად. რატომ არ იყო, ამაზე საუბარი შორს წაგვიყვანს“, - აცხადებს for.ge-სან საუბრისას პარლამენტის წევრი ზურაბ აბაშიძე და აქვე ამბობს, რომ განცხადებები, რომ არც ერთ პარტიას არ ვუჭერ მხარს, ეს ნიშნავს, რომ მხარს უჭერ „ნაციონალურ მოძრაობას“.

რატომ ვერ გადალახეს „თავისუფალმა დემოკრატებმა“ ბარიერი და რატომ იყო განსხვავებული პოზიციები პარტიაში? ამ საკითხებთან დაკავშირებით for.ge ზურაბ აბაშიძეს ესაუბრა.

პარტია „თავისუფალი დემოკრატები“დატოვეთ, მაგრამ ჯერჯერობით არ ხართ „ქართული ოცნების“ გუნდში. გია ვოლსკის განცხადებით, თქვენთვის არაფარი შეუთავაზებიათ, მაგრამ ეკა ბესელია ამბობს, რომ შეიძლება რაღაცა მიმართულება მოიძებნოს „თავისუფალი დემოკრატების“ ყოფილი წევრებისთვის. ბატონო ზურაბ, გაქვთ შემოთავაზება აღმასრულებელი ხელისუფლებისგან?

ზურაბ აბაშიძე: აბსოლუტურად გულწრფელად და ყოველგვარი მიკიბ-მოკიბვის გარეშე შემიძლია გითხრათ, რომ ასეთი შემოთავაზება არ ყოფილა. ამას ვამბობ იმ ადამიანების გასაგონად, ვისაც ჰგონია, რომ რაღაცა გამორჩენის მიზნით გავაკეთეთ ასეთი განცხადებები. ეს არის ჩვენი შინაგანი მდგომარეობა, გნებავთ სულიერი. მე და ჩემმა მეგობრებმა მივიღეთ ეს გადაწყვეტილება და ვთლით, რომ ასე უნდა გაგვეკეთებინა.

პარტიამ ვერ გადალახა ბარიერი, ვერ მოიპოვა საზოგადოების მხარდაჭერა. ძალიან ბევრ საარჩევნო ოლქში დაინიშნა მეორე ტური, შესაბამისად, მივმართეთ იმ ადამიანებს, ვინც ჩვენ მხარი დაგვიჭირა და ვინც ჩვენთან ერთად იდგა ამ საარჩევნო პერიოდში, რომ მხარი დაუჭირონ „ქართულ ოცნებას“. მინდა გითხრათ, რომ ყველას აინტერესებდა ჩვენი ღია პოზიცია. შესაბამისად, ეს იყო პოზიცია, რომელიც დავაფიქსირეთ.

რატომ „ქართული ოცნება“ და არა „ნაციონალური მოძრაობა“?

- არაერთხელ განმიცხადებია, რომ ჩემს მეგობრებთან ერთად ვიბრძოდი „ნაციონალური მოძრაობის“ წინააღმდეგ და საზოგადოებას კარგად ახსოვს ჩემი შემთხვევა. რომ არა თავდასხმა, მე მაინც ვერ ვითანამშრომლებდი „ნაციონალურ მოძრაობასთან“. ამ შემთხვევაში არჩევანი არის ასეთი, ჩვენ მხარი უნდა დავუჭიროთ „ქართულ ოცნებას“. ამ ძალასთან ერთად ვიბრძოდით 2012 წლიდან და ამ ძალასთან მოგვიწია ოპოზიციის რეჟიმში ყოფნა, მაგრამ ჩვენ არასოდეს არ ვყოფილვართ ჩვენი ქვეყნის და ხალხის ოპოზიციაში.

ოპოზიციაში ყოფნის პერიოდს თუ გადავხედავთ, ამ მმართველ პოლიტიკურ ძალასთან გქონდათ კითხვები, დღეს თუ გაქვთ ეს კითხვები?

- ბუნებრივია, დღესაც მაქვს ძალიან ბევრი კითხვა, ბევრი რაღაცეები არ მომწონს, რაც ბუნებრივია, მაგრამ ამ ძალასთან არ გვქონია პრობლემა ძალადობასთან და ადამიანის უფლებების დარღვევის თვალსაზრისით. არის რაღაცა თემები, რომელიც უნდა მოგვარდეს.

ის, რომ „ქართულ ოცნებას“ მხარდაჭერა გამოვუცხადეთ, რა თქმა უნდა, ეს პირდაპირ უკავშირდება საკონსტიტუციო უმრავლესობის აღებას „ქართული ოცნების“ ხელში. ამ თვალსაზრისით, ქართული სახელმწიფოს ძალიან ცუდი გამოცდილება აქვს, როდესაც ასეთი უმრავლესობა სააკაშვილის და „ნაციონალური მოძრაობის“ ხელში იყო და

ვიცით, როგორ მოირგეს კონსტიტუცია თავის თავზე. მჯერა, რომ ასეთ შეცდომას არ გაიმეორებს დღევანდელი ხელისუფლება და საკონსტიტუციო უმრავლესობას არ გამოიყენებს თავისი ვიწროპარტიული მიზნისთვის.

იმის პრობლემაც არ იქნებოდა მეთქვა, რომ არაფერს არ გააკეთებენ, ეს ყველაფერი იქნება ფარსი და ა.შ. მაგრამ რატომ უნდა მქონდეს წინასწარ ნიჰილიზმი, როცა შეიძლება საპირისპირო მოხდეს? მაგრამ აქ მნიშვნელოვანია ის ფაქტორი, რომ მე არ მჯერა იმისა, რომ „ნაციონალურმა მოძრაობამ“ ფერი იცვალოს.

ნაციოალების მხრიდან კეთდება შეფასებები, რომ რეალისტები გახდით, ასეა?

- არა, არა, ეს არის რევანშისტული ძალა. ჰიპოტეტურად დავუშვათ, რომ მეორე ტურში ყველა ოლქში მოიგოს „ნაციონალურმა მოძრაობამ“, ეს ნიშნავს, რომ ისინი უმრავლესობას იღებენ პარლამენტში. ეს ჩემთვის წარმოუდგენელი და მიუღებელია. ასევე, განცხადებები - არც ერთ პარტიას მხარს არ ვუჭერთ - დიდი ბოდიში, მაგრამ ეს არ არის ჩემთვის პოზიცია. ეს ნიშნავს, რომ მხარს უჭერ „ნაციონალურ მოძრაობას“, ნიშნავს, რომ მათ წისქვილზე ასხამ წყალს. პოლიტიკას უყვარს მკაფიო და გამბედავი ნაბიჯები. პოლიტიკაში ვერ იქნები გამარჯვებული, თუ შუაში მოგინდება რაღაცეებით საუბარი. ამიტომ, ეს ძალიან რისკიანი საქმეა, ვინც არ რისკავს, ის ვერასდროს ვერაფერს ვერ იგებს. ეს ასეა, მიუხედავად იმისა, რომ შეიძლება ბევრს არ მოეწონა ჩვენი განცხადება.

თქვენი განცხადება არ მოეწონა თქვენივე თანაგუნდელს ნინო გოგუაძეს, რომლის განცხადებით, ხელისუფლების მხარდაჭერისკენ მოწოდება, პარტიისთვის მიუღებელია და მისი პარტია მხარდაჭერისკენ არც ერთ მოქალაქეს არ მოუწოდებს...

- ეს ნინოს პოზიციაა, მე სხვა პოზიცია მაქვს. მჯერა იმის, რასაც ვამბობ. პოპულისტურად არ გამიკეთებია ეს განცხადება. „თავისუფალ დემოკრატებში“ ვიყავი იმიტომ, რომ მჯეროდა, მიუხედავად იმისა, რომ ოპოზიციაში გასვლა არ იყო მარტივი თემა, ძალიან მტკივნეული თემა იყო. ოპოზიციაში გადასვლის შემდეგ მოგვეცა ძალიან სერიოზული შანსი, რომ „თავისუფალი დემოკრატები“ ჩამოყალიბებულიყო ალტერნატიულ ძალად, რაც ძალიან მნიშვნელოვანი იქნებოდა ქვეყნისთვის. მერე უკვე, პარლამენტში ვისთან ვითანამშრომლებდით, ამაზე დამატებით ვისაუბრებდით.

წინასაარჩევნო პერიოდში აანონსებდით „თავისუფალი დემოკრატების“ ნაწილი, რომ ითანამშრომლებდით მმართველ გუნდთან...

- რა თქმა უნდა, და რატომ არის გასაკვირი დღეს ჩემი განცხადება? არ მესმის რატომ არის ეს აჟიოტაჟი? ამ ადამიანებს რაც თვითონ უნდა ჩაედინათ, ახლა უნდათ, რომ სხვას დააბარლონ? ეს არასწორია და ეს მე არ მაშინებს. ამ საქმეს მივეჩვიე, არ ვარ გუშინდელი ბიჭი ამ საქმეში, რომ რაღაცეები მიკვირდეს. არაფერი არ მიკვირს.

შესაძლებლობა იყო, რომ „თავისუფალი დემოკრატები“ ალტერნატიულ ძალად ჩამოყალიბებულიყვნენ, მაგრამ ვერ ჩამოყალიდით. ამ გადასახედიდან როგორ აპირებთ ხელისუფლებასთან თანამშრომლობას?

- პირდაპირ გეტყვით, ამ გადასახედიდან ხელისუფლებასთან თანამშრომლობის ფორმა არ არსებობს. ჯერ კიდევ ვარ პარლამენტის წევრი და სწორედ პარლამენტის ტრიბუნიდან გავაკეთე ეს განცხადება ჩემს მეგობრებთან ერთად და არა პარტიიდან, იმიტომ, რომ პარტია დავტოვე. ისიც მოვისმინე, რომ ალასანია მიატოვესო, რას ნიშნავს ალასანია მიატოვეს? ალასანია თვითონ წავიდა პარტიიდან, მან თქვა, რომ პოლიტიკიდან გადის და თქვა ისიც, რომ ჩვენ ერთმანეთის მიმართ პოლიტიკური ვალდებულება აღარ გაგვაჩნია.

ეს ნიშნავს იმას, რომ ზურაბ აბაშიძე, გიორგი ცაგარეიშვილი, ვიქტორ დოლიძე და დათო ონოფრიშვილი წავიდნენ პარტიიდან, გახდნენ დამოუკიდებელი ადამიანები პარტიის გარეშე და ამიტომ, პარტიასთან ყოველგვარი შეთანხმების გარეშე აკეთებენ იმ განცხადებას, რომელსაც აკეთებენ. ვერ გავიგე ამ ადამიანების განცხადების შინაარსი და აგრესია. „ნაციონალური მოძრაობის“ და „თავისუფალი დემოკრატების“ წარმომადენლების განცხადებები ერთმანეთის მსგავსია, ესე ძალიან დამაზიანებელია ამ პარტიისთვის.

გავრცელდა ასეთი ინფორმაცია, რომ თქვენ შემოგთავაზეს აფხაზეთის ა-რ მთავრობის თავმჯდომარის თანამდებობა, იყო ამ თემაზე საუბარი თქვენთან?

- არა, არანაირი შემოთავაზება არ ყოფილა. არავითარი აფხაზეთის მთავრობა, ჭორია ეს ყველაფერი, ჭორი. ჩვენ ჭორებზე ვერ ვისაუბრებთ. რაც შეეხება მომავალს, მე დავაფიქსირე ის, რისი დაფიქსირებაც მინდოდა და საკმაოდ გავთავისუფლდი. მოდით, პირდაპირ ვთქვათ, რომ 8 ოქტომბერს საკმაოდ სერიოზული სტრესი მივიღეთ ამ პარტიის ლიდერებმა. ყველას გვჯეროდა, რომ ამ პარტიას შეეძლო სერიოზული შედეგის მიღება, მაგრამ ასე არ მოხდა. ამ რეალობას თვალი უნდა გავუსწოროთ. ვაგრძელებ ცხოვრებას, ვარ ადამიანი, რომელსაც აქვს თავისი ბიოგრაფია, გამოცდილება, მაგრამ ჯერჯერობით ჩემს თავს ვერსად ვერ ვხედავ. აღარა ვარ ოპოზიციაში, მაგრამ არც ხელისუფლებაში ვარ. ვარ დამოუკიდებელი ადამიანი. ხვალ სად ვიქნები და რას ვიზამ, ამას დრო გვიჩნებს. არც ერთი კონკრეტული შემოთავაზება ჩვენთან მიმართებაში არ ყოფილა.

მაგრამ თუ იქნება შემოთავაზება, დათანხმდებით?

- თუ იქნება რაიმე შემოთავაზება, ამაზე მერე ვიმსჯელოთ. ვიქნები თუ არა საჯარო სამსახურში, ამას მომავალი გვიჩვენებს. ცხოვრებისეული გამოცდილება, რომელიც დამიგროვდა, როგორც პოლიტიკური, ასევე საქმიანი, ვფიქრობ, რომ სადღაც უნდა გადაითარგმნოს. ეს გადაითარგმნება კერძო სექტორში, პირობითად ჟურნალისტიკაში, სპორტში თუ სად, ამას დრო გვიჩვენებს.

გაკრიტიკებენ იმიტომ, რომ მხარდაჭერა გამოუცხადეთ ხელისუფლებას, მაგრამ როგორც ირკვევა გუნდში იყო მსჯელობა „ნაციონალურ მოძრაობასთან“ თანამშრომლობაზე. ბატონო ზურაბ, ვინ უჭერდა მხარს ნაცმოძრაობასთან თანამშრომლობას?

- მე არ გამოვდგები იმ ტიპის რესპოდენტად, რომელიც გამოვა და ყველა დეტალს, რაც პარტიაში ხდებოდა, საჯაროდ გამოიტანს. თქვენ თუ დააკვირდებით ჩვენი პარტიის ლიდერების გამოსვლების ქრონოლოგიას და შეფასებებს სხვადასხვა პოლიტიკური მოვლენების მიმართ, თქვენ თავად ნახავთ იყო თუ არა სხვაობები.

პოლიტიკურ შეფასებებში იყო სხვაობები გუნდის წევრებს შორის, რითი იყო ეს გამოწვეული?

- ამას ხედავდით თქვენ და ბუნებრივია, ამას ხედავდა საზოგადოება, რამაც იმოქმედა შედეგზე. როდესაც ჩვენ აღმოვჩნდით ოპოზიციაში, ეს არ იყო მარტივი, იმიტომ, რომ მთავარ ოპოზიციურ ძალად „ნაციონალური მოძრაობა“ იყო წარმოდგენილი პარლამენტში, რომელსაც ჰქონდა დომინანტის როლი. დაიწყო „ნაციონალურ მოძრაობასთან“ გაიგივების მომენტი, რაც იყო ძალიან დამაზიანებელი პარტიისთვის და რამაც ძალიან სერიოზულად იმოქმედა არჩევნების შედეგებზე.

„ნაციონალურ მოძრაობასთან“ გაიგივება იყო ერთადერთი შეცდომა?

- რა თქმა უნდა, ეს არ იყო ერთადერთი შეცდომა. ჩვენი მთავარი პრობლემა მაინც იყო ფინანსური რესურსი, რომელიც აუცილებლად სჭირება ამ საქმეს. არ იყო ფინანსების ის რაოდენობა, რომელიც სჭირდება ამ საქმეს წარმატების მისაღწევად. რატომ არ იყო, ამაზე საუბარი შორს წაგვიყვანს. განსხვავებები იყო, ყველა ძალიან დიდი დაკვირვებით გვიყურებდა და გამადიდებელი შუშა ეჭირა, აბა რას იტყოდა აბაშიძე, დოლიძე, რას იტყოდა პეტრიაშვილი, გოგუაძე და მათ შორის ალასანია, ეს სხვაობა ტერმინოლოგიურადაც განსხვავებული იყო. ეს განსხვავებები ყოველთვის იგრძნობოდა, მაგრამ ჩვენ მაქსიმალურად ვცდილობდით ერთიანობის შენარჩუნებას, ერთმანეთისთვის პატივი გვეცა და შედეგებამდე მიგვეყვანა ჩვენი ბრძოლა.

როგორც წესი, ყოველთვის ძალიან გაწონასწორებული და ობიექტური იყო შეფასებებში ვიქტორ დოლიძე და სხვათა შორის „რუსთავი 2“-ის გენერალურმა დირექტორმა თქვა, რომ დოლიძე ხორცით „თავისუფალი დემოკრატია“, სულით მეოცნებეო. მაგალითად, როდესაც პარტიის პრეზენტაცია გქონდათ „რუსთავი 2“-ის ეთერში, აშკარა იყო, რომ სამინიზნე სწორედ ვიქტორ დოლიძე იყო, რომ სწორედ ის არის გუნდში უცხო...

- „რუსთავი 2“ ამ ტრენდის შექმნას ცდილობდა. ვიკა დოლიძე ყოველთვის იყო სახელმწიფოებრივად მოაზროვნე ადამიანი, ასე იქნება ყოველთვის.

მაშინ თქვენი შეფასება, რომ არც ერთ თანამდებობაზე არ იყიდებით, ეს ფრაზა დღეს აქტიურია „რუსთავი 2“-ისთვის...

- მე „რუსთვი 2“-ის და მათი გენერალური დირექტორის ნიკა გვარამიას ჭკუით არასოდეს არ მივლია და არც მომავალში ვივლი მისი შეხედულებებით. ეს არის ჩემი პირდაპირი ნათქვამი. ერთი წამით არ ვნანობ იმას, რომ „რუსთავი 2“-ის ბარიკადებთან არ მივედით, რომელიც ძალიან პრინციპული თემა იყო ყოველთვის, მაგრამ დღესაც ვფიქრობ, რომ „რუსთავი 2“ უნდა დარჩეს ისე, როგორც არის. ეს არის აუცილებელი ქვეყნისთვის, რომ ჩანდეს რა არის „რუსთავი 2“.

მეორე - ეს არის ხელისუფლებისგან დამოუკიდებელი, მაგრამ არის „ნაციონალური მოძრაობის“ და მიხეილ სააკაშვილის ტელევიზია. დღეს ნაცმოძრაობის „წარმატება“ არის „რუსთავი 2“-ის დამსახურება და მეტი არაფერი. უნდა იყოს „რუსთავი 2“, იმიტომ, რომ „ნაციონალური მოძრაობა“ და „რუსთავი 2“ არის ერთი და იგივე. ამას ვამბობდი მაშინაც და დღესაც იმავე აზრზე ვრჩები.

ბატონო ზურაბ, თქვენ არ ხართ „თავისუფალი დემოკრატების“ წევრი, მაგრამ როგორია დღეს თქვენი პოზიცია, დაკავებული თავდაცვის სამინისტროს მაღალჩინოსნებთან დაკავშირებით, დღესაც ფიქრობთ, რომ ისინი უდანაშაულოები არიან?

- თავიდანვე მიმაჩნდა და ახლაც მიმაჩნია, რომ ეს ადამიანები უდანაშაულოები არიან. მიმდინარეობს სასამართლო პროცესი და იმედი მაქვს, სასამართლო მიიღებს სწორ გადაწყვეტილებას. მიუხედავად იმისა, რომ არ არის ნდობა სასამართლოს მიმართ, მინდა მჯეროდეს, რომ სასამართლო მიიღებს სწორ გადაწყვეტილებას. ეს ადამიანები უნდა განთავისუფლდნენ და მე, როგორც მოქალაქე ამ ადამიანების გვერდით ვიდგები. დანარჩენს დრო გვიჩენებს.