რესპუბლიკელი ლევან ბერძენიშვილი ფიქრობს, რომ „ქართული ოცნება“ როგორც პარტია ვერ შედგა და „რესპუბლიკური პარტიისგან“ განსხვავებით, ის არჩევნების წაგებისთანავე გაქრება. კანონმდებელი „ოცნების“ მიერ წარდგენილ სიას აკრიტიკებს, პოლიტიკაში „ყველა მატჩის წამგები“ ფეხბურთელების მოყვანას აპროტესტებს და ამბობს, რომ მმართველი გუნდის აპოლიტიკური სია პარლამენტის დაკნინების და უწყებისთვის პოლიტიკური შინაარსის გამოცლის მცდელობაა.
თუ ვის აქვს მეცხრე მოწვევის პარლამენტის თავმჯდომარის თანამდებობის დაკავების შანსი და თუ როგორი სპიკერი იყო დავით უსუფაშვილი, ამას for.ge-ს ინტერვიუდან შეიტყობთ, რომელიც ევროინტეგრაციის კომიტეტის თავმჯდომარე ლევან ბერძენიშვილთან ჩავწერეთ:
დავით უსუფაშვილის იდეა, რომ კონსტიტუციის პლეამბულაში საქართველოს უსაფრთხოების ნაწილი გაძლიერდეს, იდეად რჩება, რადგან „ქართული ოცნება“ საკითხის ინიცირებისგან თავს იკავებს. რატომ?
- ისინი თვლიან, რომ ეს პარლამენტის თავმჯდომარის ავტორიტეტს ზედმეტად გაზრდის, მაგრამ მისი ავტორიტეტი მაინც მაღალია. ავტორიტეტთან დაკავშირებით, „რესპუბლიკურ პარტიასა“ და პარლამენტის თავმჯდომარეს შორის განსხვავებაა. საქართველოს პარლამენტს ძალიან ღირსეული თავმჯდომარე ჰყავს და ამას ვამბობ როგორც რიგითი დეპუტატი და არა მისი თანაპარტიელი. ვნახეთ, რომ უსუფაშვილმა გზები ყველასთან იპოვა და ის დაძაბულ ვითარებაშიც კი, კორექტულად საუბრობდა. მას ამის უნარი აქვს, რაც შესაშურია და მისგან ეს უნდა ვისწავლოთ.
რაც შეეხება „აღმოჩენას“, რომ თურმე, ჩვენ ნინო ბურჯანაძესთან რაღაც სპეციალური კავშირები გვაქვს, ეს გარკვეული თვალსაზრისით, ლოგიკის პრობლემაა, რადგან ეტყობა, ვიღაც ვერ აზროვნებს. პარლამენტის თავმჯდომარეს რუსეთთან დასაკავშირებლად აბსოლუტურად უმნიშვნელო პარტიის - ნინო ბურჯანაძის კავშირი რაში სჭირდება? ხალხო, ის პარლამენტის თავმჯდომარეა და თუკი მას რუსეთთან კავშირი უნდოდა, ამას რამენაირად მოახერხებდა. ამას მეც მოვახერხებდი, მთელ მსოფლიოში დავდივარ და ასეთი შავბნელი საქმისთვის ნინო ბურჯანაძე რად გვინდა?
ის, რაც ირაკლი სესიაშვილმა თქვა, იმაზე მიუთითებს, რომ აზროვნება არ აქვს და ფიქრი ეზარება. ასეთი გაუაზრებელი შენიშვნები პოლიტიკურად უმნიშვნელოა და „ქართული ოცნების“ წევრები ტყუილად დაიხარჯნენ. უსუფაშვილმა როგორც პარლამენტის თავმჯდომარემ დეპუტატებს შემოგვთავაზა, კონსტიტუციის პრეამბულაში ის ავსახოთ, რაც ისტორიულად ქართველმა ხალხმა დაადასტურა, რომ ჩვენი ადგილი ევროპაშია. აქ გაუგებარი არაფერია და თუ თვლიან, რომ არ უნდა აისახოს, გასაგებია. გაღიზიანება რა შუაშია?
უსუფაშვილის მხრიდან აღნიშნული წინადადების წარდგენა დაგვიანებული ხომ არ არის? საკონსტიტუციო ცვლილებების მიღებას ორი სესია სჭირდება, მერვე მოწვევის პარლამენტის ბოლო სხდომა კი, 7 სექტემბერს გაიმართება.
- ასეთი რაღაც დაგვიანებული არასოდეს არ არის და სჯობს, გვიან, ვიდრე არასდროს. ეს პასუხია ნინო ბურჯანაძის ინიციატივაზე, რომელიც საქართველოს უბლოკო სტატუსს ეხებოდა. ეს ძალიან კარგი პასუხია და ხალხი ნაწყენი მხოლოდ იმიტომ არის, კარგი პასუხი თავში რესპუბლიკელ უსუფაშვილს რატომ მოუვიდა და არა „ოცნების“ ლიდერებს. ეს იდეა თავში ბიძინა ივანიშვილს, გიორგი კვირიკაშვილს ან გია ვოლსკის რომ მოსვლოდათ, მაშინ კარგი იქნებოდა.
„ქართული ოცნება“ თვლის, რომ უსუფაშვილის მხრიდან ამ ინიციატივის გაჟღერება წინასაარჩევნო პიარსვლაა....
- პიარსვლა დედის გინებაა? - დიახ, ყველაფერი პიარსვლაა. მილიონი სამუშაო ადგილის შექმნა იყო პიარსვლა. ბიძინა ივანიშვილის ყველა დაპირება პიარსვლა იყო. პიარი ცუდი სიტყვაა? უკაცრავად, მაგრამ ფეხბურთელების დასახელება როგორი სვლაა - ფილოსოფიური? პოლიტიკაში პოპულარული ადამიანების მოყვანა პიარსვლა არ არის? „ვაკის პარკის“ მომღერლის ვაკის ნომერ მესამე ოლქში წარდგენა პიარსვლა არ არის? ვინმემ თქვა, რომ პიარი აკრძალულია? - ამით რას ლაპარაკობენ, ვერ გავიგე. დავით უსუფაშვილმა სწორი სვლა გააკეთა და ამას თუ გინდათ, პიარი დაარქვით და თუ გსურთ, თენგიზი.
საქართველო ნატოს წევრი უნდა გახდეს და ეს პირველად დღეს ვთქვით, თუ გუშინწინ? - ეს ირაკლი წერეთელმა რომ თქვა, მას შემდეგ საქართველო ამაზე ოცნებობს. ჩემი მეგობრის გოდერძი ტოტოჩავას მამა არჩილ ტოტოჩავა მეგობართან ერთად შავ ზღვაში გადიოდა და საბჭოთა დროში ზღვას უყურებდა, ემანდ, ამერიკის მეექვსე ფლოტი ხომ არ შემოვიდაო. ნატოს ასე ველოდებოდით და ეს ხალხი რამ გააკვირვა? სესიაშვილს უბლოკო სტატუსზე ეს პასუხი არ უნდა უხაროდეს? ირაკლი სესიაშვილი ნატოს საპარლამენტო ანსამბლეის დელეგაციის ხელმძღვანელია და მას არ სურს, პლეამბულაში ეწეროს, რომ ის სწორ კომიტეტს ხელმძღვანელობს? როგორც ჩანს, არ იცის, იქნება თუ არა კვლავ თავდაცვის კომიტეტის თავმჯდომარე და მოხვდება თუ არა პარლამენტში.
„ოცნების“ თავშეკავების მიზეზი რა შეიძლება იყოს?
- აქ ბევრი რამ უნდა ვეძებოთ. ზოგიერთი კონსტიტუციაში ისეთი რაღაცის ჩაწერას იმიტომ ეწინააღმდეგება, რომ მერე სხვა რამე რომ დასჭირდეს?.. ზოგიერთი ფიქრობს, რომ ქვეყნის საგარეო ორიენტაციის საკითხი ერთხელ და სამუდამოდ გადაწყვეტილი არ არის. ანუ, ისინი ხელისუფლებაში იმ შემთხვევაშიც უნდა დარჩნენ, თუკი რუსეთის მონები გავხდებით. ზოგი სხვა რამეს ფიქრობს, ზოგი რუსეთის აგენტია, ხოლო ზოგმა მშვენივრად იცის, რომ ევროპაში გვინდა, მაგრამ ამასთან უსუფაშვილის სახელის დაკავშირება არ უნდა მოხდეს. ზოგიერთი ფიქრობს, რომ ნამდვილი ევროპული პარტია ისაა, სადაც მეჭიაური იშვა, ხოლო სადაც უსუფაშვილია, ის დასავლური ორიენტაციის არ არის.
„ქართული ოცნება“ სწორედ თქვენს ამ პათოსს აპროტესტებს და მიიჩნევს, რომ თქვენ - „რესპუბლიკური პარტია“ საგარეო კურსზე ექსკლუზიურ უფლებას იტოვებთ...
- რატომ ღიზიანდებიან? კონსტიტუცია უფრო დიდხანს იცოცხლებს, ვიდრე „რესპუბლიკური პარტია“ და „ქართული ოცნება“. გარწმუნებთ, რომ „რესპუბლიკური პარტია“ ოცი წლის შემდეგაც იქნება, ხოლო „ქართული ოცნება“ ხუთი წლის შემდეგაც აღარ იქნება.
რატომ?
- როცა წააგებენ, დაიშლებიან. ბიძინა წავა, „ოცნება“ - დაიშლება. კვირიკაშვილი წავა, დაიშლებიან. შევარდნაძე წავიდა, მისი პარტია დაიშალა.
რამდენად მოსალოდნელია, რომ ივანიშვილი წავიდეს?
- შესაძლებელია. ბიძინა კი არა, რეიგანი წავიდა.
ბიძინა ივანიშვილი პოლიტიკიდან ოფიციალურად წასულია და თქვენ მის საიდან წასვლას გულისხმობთ?
- ეს საკითხი არ ვიცი, ეს მათი პრობლემებია. რამდენადაა წასული და რამხელა გავლენას ახდენს, ამას ჩემთვის მნიშვნელობა არ აქვს. ბიძინას შეცდომებია თუ კვირიკაშვილის, მათ შორის განსხვავება აღარ არის. ვფიქრობ, რომ „ქართული ოცნება“ როგორც პარტია ვერ შედგა, მაგრამ მას ხელისუფლების შენარჩუნება შეუძლია, რადგან ბიძინა ივანიშვილის ავტორიტეტის რაღაც ნარჩენები კიდევ არის. თუ ბიძინა ივანიშვილი ნამდვილად წავა და ამას დავინახავთ, „ქართული ოცნება“ ვერც ერთ ხმას ვერ აიღებს, რადგან პოლიტიკაში არც ერთ დიდ ფეხბურთელს არც ერთი ხმა არ ეკუთვნის. ადამიანს ხმა მხოლოდ იმიტომ არ ეკუთვნის, რომ კარგი მომღერალი იყო, ან კარგი ფეხბურთელი.
გადასარევი ლექტორი ვარ, მაგრამ ამის გამო ხმას არავინ არ მაძლევს. იმდენი ხმა რომ მივიღო, რამდენი ხმაც „არტარეა“-ზე ჩემს გამოსვლას აქვს, „რესპუბლიკური პარტია“ საარჩევნო ბარიერს არა მხოლოდ გადალახავს, არამედ პარლამენტს გადაავსებს. რამაზ საყვარელიძემ თქვა, პოლიტიკაში სპორტსმენების და მომღერლების მოყვანა ჩვეულებრივი ხერხიაო. რამაზმა ამის შესახებ რა იცის? სადმე გაუგია, რომ პარლამენტში ხუთი ფეხბურთელი და ორმოცი მოჭიდავე იყოს? ჩვენი ექსპერტები, მტრები და მოყვარეები დაუფიქრებლად ლაპარაკობენ.
განსაკუთრებულ აქცენტს პოლიტიკაში სპორტსმენების მოყვანაზე რატომ აკეთებთ? სხვებმა გაამართლეს?
- თბილისის სიის პრობლემაა ის, რომ სიაში ყველაზე დიდი პოლიტიკოსი გია ვოლსკია. ვოლსკის გარდა, მაგ სიაში არც ერთი დიდი პოლიტიკოსი არ არის. ამ შემადგენლობაში ვოლსკი გამოჩნდა, როგორც პელე. ვოლსკი ბევრად უფრო გამორჩეულია, ვიდრე მთელი მისი გუნდი, თუმცა, ესეც გაჭირვების ლაპარაკია. უკეთესიც გვინდა და უფრო პასუხისმგებლიანიც. ისეთი ხალხია წარდგენილი, რომლებიც პოლიტიკაში და პარტიის ოფისშიც კი, ნამყოფები არ არიან. კაცი, რომელიც საკრებულოში არ ყოფილა, პარტიაში არ ყოფილა, პოლიტიკა არ აინტერესებს და ფეხებზე ჰკიდია, საქართველოს ბედის გადამწყვეტი უნდა გახდეს და ეს მხოლოდ შემაშფოთებელი კი არ არის, სისულელეა. მათ ეს როგორ უნდა ავუხსნა, არ ვიცი.
ამ მოწვევის პარლამენტმა აჩვენა, რომ სპორტსმენი დეპუტატები საკუთარ გადაწყვეტილებებში უფრო თავისუფლები იყვნენ, ვიდრე სხვა დანარჩენები. სპორტის კომიტეტმა სპორტის მინისტრის პოსტიდან ლევან ყიფიანიც გადააყენა. ამასთანავე, როცა რაღაც გასაპროტესტებელი იყო, ეს ადამიანები ამას არ ერიდებოდნენ...
- იცით, რას გეტყვით? - მაშინ, ისიც თქვით, ამ კომიტეტში ვინ იყვნენ. თუკი საუბარია ოლიმპიურ ჩემპიონებზე, როცა ოლიმპიური ჩემპიონი ხარ, ხანდახან, ხმასაც ამოიღებ. როცა ყველა მატჩის წამგები საქართველოს ნაკრების ფეხბურთელი ხარ, იქნებ, ლევან კობიაშვილი იმდენი არც ვალაპარაკოთ. ეს ადამიანი ჩემი საყვარელი ფეხბურთელი იყო, თუმცა, ოლიმპიური ჩემპიონი კი არა, არაფრის ჩემპიონი არ ყოფილა. მისი სპორტული წარმატება იყო ნული და მან საქართველოსთვის ვერაფერი ვერ მოიტანა. საუბარი პელესა და მარადონაზე კი არ არის, არამედ საუბარია მარადიულად წარუმატებელ, საქართველოს ნაკრების კარგ ფეხბურთელებზე, რომელთაც პირადად ჩემთვის ერთი სიხარულიც არ მოუტანიათ. კიდევ კარგ სიტყვებს ვამბობთ. მათ ოლიმპიური კომიტეტის თავმჯდომარეს ლერი ხაბელოვს ან შოთა ხაბარელს როგორ შევადარებ?
ანუ, თქვენ ამბობთ, რომ ამ მოწვევას უფრო წონიანი და ტიტულოვანი სპორტსმენები ჰყავდა, ვიდრე შესაძლოა გვეყოლოს?
- ზურაბ ზვიადაურს როგორც პარლამენტის წევრს ძალიან დაბალ შეფასებას მივცემ, მაგრამ პარლამენტში მასეთ სპორტსმენს, ერთს, მარტო მხოლოდ ავიტანთ, რომ ის თავის წონაში მსოფლიოში ყველაზე ძლიერი ძიუდოისტი იყო. როცა მეუბნებიან, რომ ყაველაშვილი აიტანეო, ჩვენი საქმე მთლად ასე არ არის. თუ გვუებნებიან, რომ სპორტსმენები ავიტანოთ, ოლიმპიური ჩემპიონები მაინც მოიყვანონ. ეს წაგებული ფეხბურთელები, რა უბედურებაა?! ისეთი საუბრების მომხრე არ ვარ, რომ კახი კალაძემ თავის კარში გოლები გაიტანა. ამ ბიჭებს ასეთ ვითარებაში რატომ აყენებენ?
კახი კალაძის შემთხვევაში ვნახეთ, რომ მან პოლიტიკური ალღო გამოიჩინა და მეტ-ნაკლებად პოლიტიკოსად ჩამოყალიბდა...
- პოლიტიკოსად ჩამოყალიბდა, რომლის სახელს შეიძლება კორცხელის ეპიზოდი უკავშირდებოდეს. გასაგებია, რად ჩამოყალიბდა. ფეხბურთთან ეს ამბები ყოველთვის ტრიალებს. მან მარბიელებზე თქვა, რომ ხალხის გვერდით იქნება. პოლიტიკოსის მაგალითად კალაძეს ნუ მომიყვანთ. ფეხბურთელ გატუზოს მაგონებს. სხვათა შორის, კალაძე მინდორზე წესიერი კაცი იყო, პოლიტიკაში კი, გატუზო აღმოჩნდა.
ანუ, მაფიოზია?
- ამ სიტყვებს მე არ ვიყენებ. რომ გითხრათ, ქართულ პოლიტიკაში ამხელა კაცი მოვიდა და გვეშველა-თქო, ეს ასე არ არის. არც მისი პოლიტიკა მომწონს და სხვათა შორის, ყოველთვის რესპუბლიკელებს გვებრძოდა, მაშინაც კი, როცა ერთად ვიყავით.
კალაძის მხრიდან ბრძოლა რაში გამოიხატებოდა?
- მაგალითად იმაში, საგარეჯოს არჩევნებში ვინ როგორ იქცეოდა. დინებები იყო და ის ჩვენიანი არასოდეს არ იყო. ვიღაცას მეტი სიმპათია ჰქონდა, ვიღაცას ნაკლები. პოლიტიკაში ერთი და ორი კალაძე შეიძლება, მაგრამ პრინციპი, რომ მხოლოდ ისინი უნდა იყვნენ, რომელთაც არანაირი პოლიტიკური გამოცდილება და ინტერესი არ აქვთ, მიუღებელია. გარწმუნებთ, რომ პოლიტიკაში მომღერლები და მონადირეები საჭირო არ არიან. თუკი კარგი პოლიტიკოსები დადგებიან, ჩემს სიტყვებს უკან წავიღებ, მაგრამ თან იმღერო და თან კარგი პოლიტიკოსი იყო, ეს ამბავი არ გამოვა. „ქართული ოცნების“ მიერ წარმოდგენილია აპოლიტიკური სია, რომელიც პარლამენტის დაკნინების და პოლიტიკური შინაარსის გამოცლის მცდელობაა, რასაც ქართველმა ხალხმა იმით უნდა უპასუხოს, რომ მათ პოლიტიკოსები დაუპირისპიროს.
საბურთალოს ოლქში უსუფაშვილს გოგიჩაიშვილი დაუპირისპირდება. ამას რითი ხსნით, „ქართულმა ოცნებამ“ უსუფაშვილი მძიმეწონიან კონკურენტად არ ჩათვალა?
- ამას იმით ვხსნი, რომ ეტყობა, ვიღაცას უსუფაშვილი ეზიზღება და ისე ხედავს, რომ მას ლევან გოგიჩაიშვილი უნდა მოერიოს. საქართველოს პარლამენტს უსუფაშვილი სჭირდება. გოგიჩაიშვილს ცხოვრებაში თავისი გზა და ბედი აქვს, მაგრამ ჩემი აზრით, პარლამენტში მისი ადგილი არ არის. ჩემი აზრი ვთქვი და პასუხად ლანძღვა-გინება მივიღე. კონტინენტი არ დარჩა, საიდანაც არ მაგინეს. როგორც ჩანს, ეს ნიშანია იმისა, რომ შემეშალა და სიტყვა ბანდიტი კი არა, სხვა სიტყვა უნდა გამომეყენებინა. ლევან გოგიჩაიშვილი შეიძლება ნაწყენია, მაგრამ მისგან პასუხი არ მიმიღია.
თუმცა, თავის დროზე, თქვენ „ბანდიტ“ ლევან გოგიჩაიშვილის პოლიტპატიმრად გამოცხადებას მხარი დაუჭირეთ. მაშინაც, ასე ფიქრობდით?
- პოლიტპატიმრად არა მხოლოდ ის, არამედ ყველა ის ადამიანი ვაღიარეთ, ვინც არასწორად იჯდა. ეს იმას არ ნიშნავს, რომ მას ის არ ეკუთვნოდა, რაც მიუსაჯეს. დანაშაული ჩადენილი იყო, მან დანა აიღო და კაცს ჩაარტყა, რაც სხეულის განზრახ დაზიანება იყო. უბრალოდ, სხვა ვითარებაში, ეს სხვანაირად გაფორმდებოდა და სასჯელი ნაკლები იქნებდა. რაც მთავარია, ის ამ შვიდ წელს წამებაში არ გაატარებდა. საბჭოთა ციხეში ვიჯექი, მაგრამ ფიზიკურად არ გვაწამებდნენ. შიმშილი და სიცივე იყო, მაგრამ ყველა ერთ ვითარებაში ვიყავით. საბჭოთა ციხეში ის არ გამომივლია, რაც გოგიჩაიშვილმა და სხვებმა სააკაშვილის ციხეებში გამოიარეს. ადამიანებს პოლიტპატიმრის სტატუსი სწორად მივეცით, მაგრამ ეს იმის თქმაში ხელს არ მიშლის, რომ პარლამენტში დანის დამრტყმელი კაცი არ მინდა.
მე არ მინდა და ყველას თავისი გემოვნება აქვს. იქნებ, ვოლსკის მიაჩნია, რომ ასეთი კაცი უნდა. ნაციონალებთან ჩხუბი რომ იქნება, იქნებ, ოლიმპიური ჩემპიონები, მკლავები და ძალა აღარ გვყოფნის და ვინმეს დანა უნდა დავარტყათ?! რატომ ჰგონიათ, რომ ეს ყალბი შეშფოთებაა? უსუფაშვილი, რომელიც ჩემზე ათასჯერ უფრო კორექტული და ენამოვლილი ადამიანია, თქვა, რომ გოგიჩაიშვილი არის შესანიშნავი ახალგაზრდა და მისი კონკურენტობა სიამოვნებს.
უსუფაშვილი გამარჯვებას შეძლებს?
- დიახ, ის უპირობო ლიდერია და ნამდვილად გაიმარჯვებს. უსუფაშვილთან ერთად ქართველი ხალხის ბედი წყდება. ქართველ ხალხს უსუფაშვილის არარჩევით შეუძლია თავის თავს განაჩენი გამოუტანოს, რომ იგი ბრმაა და პოლიტიკაში ვერაფერს ხედავს. მაპატიეთ, მაგრამ თუკი უსუფაშვილის ნაცვლად გოგიჩაიშვილი გაიმარჯვებს, საბურთალოზე მცხოვრები პირების ნაწილზე ღრმა და ყოვლისმომცველი შეხედულება ჩამომიყალიბდება.
თქვენი შეხედულება, რაში მდგომარეობს?
- ამ ხალხს ხანგძლივი განათლება სჭირდება იმისთვის, რომ გაერკვეს, პოლიტიკა რა არის. ეს არ მოხდება, რადგან საბურთალო ძალიან კარგად გაერკვევა, ქართულ პოლიტიკას უფრო ვინ სჭირდება - უსუფაშვილი თუ ვინმე სხვა. ვარსკვლავი სალომე ზურაბიშვილით დაწყებული და კვირიკაშვილით დამთავრებული, საქართველოში პოლიტიკოსი არ ვიცი, რომელიც უსუფაშვილის ოდნავი ტოლფარდი იქნებოდა.
ამ მოწვევის პარლამენტში დავით უსუფაშვილი მაჟორიტარი დეპუტატიც არის. გასაგებია, თქვენი ხედვით, უსუფაშვილი როგორი პოლიტიკოსია, მაგრამ მან ოთხი წლის მანძილზე, საბურთალოს ამომრჩევლისთვის რა გააკეთა და რა შეძლო?
- ვფიქრობ, რომ უსუფაშვილმა როგორც საბურთალოსთვის, ასევე საქართველოსთვის მაქსიმალური გააკეთა. სხვებმა, რა გააკეთეს? საქართველოს პარლამენტში მყოფი 73 მაჟორიტარი დეპუტატიდან 72 არაფერს არ აკეთებდა, თუკი ერთ-ორ გამონაკლისს არ ჩავთვლით. ყველა პრობლემა უსუფაშვილს არ უნდა გადაეწყვიტა და ის ორიენტირებული საქართველოზე იყო. ნამდვილად ვიცი, რომ მასთან ისეთი ტიპის პრეტენზიები ნაკლებია, რა გააკეთა და სხვა. საქართველოს პარლამენტში მიღწეულ წარმატებებში უსუფაშვილის წვლილი ძალიან დიდია. ამავე დროს, წარუმატებლობებიც ხომ არის? - ამის უკან უსუფაშვილი არ დგას, რადგან მიუღებელ კანონპროექტებს მან ხმა არ მისცა.
არ ფიქრობთ, რომ უსუფაშვილს მეტის გაკეთება შეეძლო და ნაკლები გააკეთა? მხედველობაში თუნდაც კვორუმის უზრუნველყოფა და მეტი ორგანიზებულობა მაქვს...
- პარლამენტის პრობლემები ორგვარია. პარლამენტს უმცირესობა ჰყავდა, რომელსაც ნებისმიერ მომენტში ბოიკოტის გამოცხადება შეეძლო და ამას აკეთებდა კიდეც. ასევე არიან მაჟორიტარი დეპუტატები, რომლებიც სესიაზე არ დადიოდნენ. კვორუმის პრობლემას ყოველთვის „ქართული ოცნება“ ქმნიდა. მაჟორიტარები არ დადიოდნენ და ეს ყველაფერი ფეხებზე ეკიდათ. მათ მხოლოდ მანდატი სჭირდებათ, რომ თავის რაიონში ღმერთები იყვნენ. „ქართული ოცნება“ არ ვარგა და მოსაშორებელია. ქართული საზოგადოება ძალიან რთული ამოცანის წინაშე დგას.
როცა ამბობთ, რომ „ქართული ოცნება“ არ ვარგა და მოსაშორებელია, უხერხულობას არ გრძნობთ, რადგან კოალიცია ბოლო რამდენიმე თვეა, რაც დატოვეთ?
- არანაირ უხერხულობას არ ვგრძნობ, რადგან მათგან ყოველთვის შორს ვიყავი. „ქართულ ოცნებასთან“ ვთანამშრომლობთ, მაგრამ მე და ვოლსკის სხვადასხვა მსოფლმხედვლობა გვაქვს. „ქართულ ოცნებას“ პრობლემა აქვს, ის პარტიად ვერ ჩამოყალიბდა. „ოცნებასთან“ და ბურჯანაძესთან ერთი პრობლემა მაქვს. ისინი პარტიები არ არიან. საქართველოში 100 პროცენტით პარტია მხოლოდ „რესპუბლიკური პარტიაა“, „ნაციონალური მოძრაობა“ აშკარად ნაკლები პროცენტითაა, ხოლო „თავისუფალი დემოკრატები“ ძალიან ცდილობენ, რომ პარტია იყოს. ჩვენ გავლენით პატარა პარტია ვართ, მაგრამ დიდი პარტია იმით ვართ, რომ დროს გავუძელით და არ დავიკარგეთ. „სუს“-ის მუშაობის მიუხედავად, დიდი დანაკარგები არც ახლა გვაქვს. რაც დავკარგეთ, მაგის გარეშეც იმდენი გვეკუთვნის, რამდენიც მათთან ერთად. ბავშვობის მეგობარი მყავდა, რომელიც 28 წელი „რესპუბლიკური პარტიის“ წევრი იყო და ჟურნალ „სამრეკლოს“ ინახავდა. 40 წლის მეგობრობის და 28 პარტიულობის შემდეგ, პარტიას უღალატა და „ნაცი“ გახდა. მასთან ურთიერთობა იმ დღიდან დავკარგე, რაც შეიძლება უზრდელობა, გოიმობა და ქაჯობაა, მაგრამ მე ასეთ ადამიანებს ვკარგავ. უსუფაშვილზე ვგიჟდები და მგონია, რომ მას არასოდეს არ დავკარგავ, მაგრამ ერთმანეთს რომ ვუღალატოთ, არ ვიცი, რა მოხდება. უსუფაშვილი რას იზამს, ვიცი.
რას იზამს?
- მე რომ ვუღალატო, მაინც იტყვის, რომ ღირსეული კაციოა.
ანუ, გიგლა აგულაშვილი დაკარგეთ, რომელმაც „რესპუბლიკურ პარტიას“ „ოცნება“ ამჯობინა?
- გიგლა აგულაშვილი იმ თვალსაზრისით არ დამიკარგავს, რომ მასთან ძალიან ახლოს არ ვიყავი. მასთან ყოველდღიური ურთიერთობა არ მქონდა და ის რაც მინისტრი გახდა, მას შემდეგ ნანახი ერთი-ორჯერ მყავს.
შეიძლება ითქვას, რომ თქვენთვის მეგობრობა პარტიულ ინტერესებზე გადის?
- გიგლა აგულაშვილი უსუფაშვილის მეგობარი იყო და მას უნდა ჰკითხოთ, მაგრამ ის ცუდს არ იტყვის, რადგან მაღალკულტურული კაცია, მე კი, ეს კულტურა არ მაქვს. ადამიანზე არც ცუდს ვიტყვი, მაგრამ ამავე დროს ზედმეტ ქებას არ დავიწყებ. გოგიჩაიშვილზე მე ცუდი სიტყვა ვთქვი, უსუფაშვილმა კი, ის ცაში აიყვანა.
უსუფაშვილს სწორედ ეს თვისება - „მაღალკულტურულობა“ ხომ არ ღუპავს? ხშირად, მას ბიძინა ივანიშვილის მხარდამჭერ, ხოტბისშემსხმელ წერილს ახსენებენ, რომელიც დასავლურ პრესაში გამოქვეყნდა...
- სახარებაში ნათქვამია, რომ „ვინც უცოდველია, ქვა პირველმა მან ისროლოს“. არ მგონია, რომ ივანიშვილთან ურთიერთობა შეცდომა იყო, რადგან დღის წესრიგში სააკაშვილის ხელისუფლების დემონტაჟი იყო. ურთიერთობა სააკაშვილთანაც გვქონდა და ამოცანა შევარდნაძისა და აბაშიძის ხელისუფლების დემონტაჟი იყო. „რესპუბლიკური პარტია“ ალიანსში ვისთანაც შედიოდა, მათ შესახებ შემდეგ შეგიძლია თქვა, იმასთან რა გინდოდა, მაგრამ პარტია ყოველთვის სწორ ამოცანებს ასრულდებდა. თუ ეს წერილი იმ მომენტში ამ მიზანს ემსახურებოდა, ის შეცდომა არ იყო. უსუფაშვილი ძალიან ფრთხილი და მოზომილი პოლიტიკოსია, რომელიც საქართველოს პარლამენტის თავმჯდომარეს სჭირდება. ჩემნაირი არ სჭირდება, რადგან მიკერძოვებული პარლამენტის თავმჯდომარე ვიქნები.
„ქართული ოცნების“ მიერ წარდგენილი პირებიდან უსუფაშვილის შემცვლელს ხედავთ?
- არა და ახალავე გეუბნებით, რომ ის კომიკური თავმჯდომარე იქნება. პარლამენტის თავმჯდომარეობის შანსი აქვთ გია ვოლსკის და თამარ ჩუგოშვილს, მაგრამ როცა მათ უსუფაშვილს ვადარებ, ეს მძიმე შთაბეჭდილებებს აღძრავს. შეიძლება სადმე ისეთი ვარსკვლავი იმალება, რომელსაც არ ვიცნობთ, მაგრამ მას რატომ აირჩევენ? მათ ვურჩევ, ვინც არის, ისევ ის აირჩიონ.
