დავით უსუფაშვილის საკონსტიტუციო ინიციატივას ხელს არ მოაწერს, პარლამენტის თავდაცვისა და უშიშროების კომიტეტის თავმჯდომარე. ირაკლი სესიაშვილი ფიქრობს, რომ ბურჯანაძის ინიციატივის „უბლოკო სტატუსის“ საწინააღმდეგოდ, დავით უსუფაშვილის საკონსტიტუციო წინადადება საარჩევნო პიარის ნაწილია და ამბობს, რომ უმრავლესობა ბურჯანაძე-უსუფაშვილის პიარ პინკონგს არ აყვება.

for.ge ირაკლი სესიაშვილს ესაუბრა.

პარლამენტის თავმჯდომარის ინიციატივა, რომ კონსტიტუციის პრეამბულაში, იქ სადაც საუბარია, რა სურს ქართველ ხალხს, უნდა დაემატოს ფრაზა - „დავიმკვიდროთ სრულფასოვანი ადგილი დემოკრატიული სახელმწიფოების უსაფრთხოების და თანამშრომლობის ევროატლანტიკურ სისტემაში“, რატომ არის ეს ინიციატივა მიუღებელი მმართველი ძალისთვის?

ირაკლი სესიაშვილი: აშკარაა, რომ ბურჯანაძის და უსუფაშვილის ინიციატივები მათი წინასაარჩევნო კამპანიის ნაწილია. საქმე გვაქვს არა რეალურ ინიციატივასთან, არამედ საარჩევნო კამპანიასთან. შესაბამისად, ამ პოლიტიკური ინიციატივის აყოლა წინასაარჩევნო პერიოდში არ მგონია ჩვენთვის გამართლებული. „ქართულ ოცნება“ არ აყვება ზოგ-ზოგიერთების პროვოკაციას და ამით მით უფრო ნაკლები პროვოკაციის გაკეთების შანსი და საშუალება ექნება ჩვენს მოწინააღმდეგეს.

ფიქრობთ, რომ ბურჯანაძის ინიციატივა უბლოკო სტატუსთთან დაკავშირებით, რუსული პროვოკაციის ნაწილია?

- რა თქმა უნდა, უბლოკო სტატუსი ფაქტობრივად, ოკუპაციის აღიარება და შეგუებაა, ეს არის საქართველოს ბუფერულ ზონად გადაქცევა. უბლოკო სტატუსის აღირება ნიშნავს იმას, რომ რუსეთმა სამხრეთ კავკასიაში თავისი ინტერესები ფაქტობრივად გატარებულად ჩათვალოს, რაც ეწინააღმდეგება ჩვენს სუვერენიტეტს, დამოუკიდებლობას და თავისუფლებისკენ სწრაფვას. მით უმეტეს, ფაქტობრივად შეუძლებელია უბლოკო სტატუსი აღიარონ ჩვენმა მეზობლებმა, რადგან, თავისთავად ცხადაია, რომ რუსეთი მოგთხოვს აღიარე აფხაზეთი და ცხინვალის რეგიონი და ამის შემდეგ ვაღიარებ უბლოკო სტატუსსო.

ამ შემთხვევაში საინტერესოა ის ფაქტი, რომ გარანტია ჰქონდა უკრაინას, მაგრამ რუსეთმა მოახდინა მისი ტერიტორიების ოკუპაცია, რაც ადასტურებს, რომ არ შეიძლება რუსეთი იყოს სანდო პარტნიორი ქვეყანა?

- რა თქმა უნდა, ჩვენზე მაგარი გარანტიები ჰქონდა უკრაინას და მისი უსაფრთხოების გარანტი იყო აშშ, დიდი ბრიტანეთი, საფრანგეთი და რუსეთი. მაშინ, როდესაც ბირთვული იარაღის არსენალზე უარი თქვა უკრაინამ, სწორედ ასეთი გარანტია მიიღო. მე მგონია, რომ ამაზე ძლიერ გარანტიას ვერ მიიღებდა ვერც ერთი სახელმწიფო. მიუხედავად ამისა, ვხედავთ, რომ რუსეთმა მოახდინა მისი ოკუპაცია. ფაქტობრივად, ბურჯანაძე გვთავაზობს შევცვალოთ ორბიტა და გავხდეთ რუსეთის ვასალები.

რაც შეეხება პარლამენტის თავმჯდომარის ინიციატივას?

- რატომღაც ბურჯანაძის ამ წინასაარჩევნო პიარულ სვლას, შეხმატკბილებულად მოჰყვა უსუფაშვილის პიარული სვლა. 4 წელი იყვნენ პარალამენტში რესპუბლიკელები და, თუ ასეთი ინიციატივის დაყენება უნდოდათ, ალბათ, უმჯობესი იყო ეს პირველივე წელს დაეყენებინათ. მაგრამ, ჩვენთვის ამ ინიციატივის კონსტიტუციაში ასახვასთან ერთად, უფრო მნიშვნელოვანია ის, რასაც ვაკეთებთ ამ მიმართულებით. ჩვენმა ხელისუფლებამ საქმით აჩვენა, რომ „ქართული ოცნება“ არის გამოკვეთილად პროდასავლური ძალა, რომელმაც მიაღწია ასოცირების შესახებ შეთანხმებას, ნატოს-თან ინტენსიურ ურთიერთობებს და მთელი რიგი პერსპექტივები გვიჩნდება ვიზალიბერალიზაციის კუთხითაც, რასაც ძალიან მალე ველოდებით.

ამიტომ, ჩვენი ევროატლანტიკური სივრცისკენ სწრაფვა ეს არის ჩვენი ერთ-ერთი მთავარი პოლიტიკური მიზანი. ამ ვითარებაში არ მიმაჩნია სწორად ჩვენ ბურჯანაძე-უსუფაშილის პოლიტიკური პიარ-დუეტის ნაწილი გავხდეთ. ჩვენ ევროატლანტიკურ სივრცესთან მიმართებაში კონსტრუქციულ მიდგომებს დავუბრუნდებით არჩევნების შემდგომ და შეგვიძლია ვისმჯელოთ, ღირს თუ არა კონსტიტუციაში ამის ჩაწერა.

ის, რომ „ქართული ოცნება“ მყარად და მტკიცედ გააგრძელებს პროდასავლურ კურსს, ამის გარანტიას ვაძლევ მოსახლეობას და სწორედ, ამ პათოსით ვარ „ქართული ოცნების“ აქტიური წევრი. კონსტიტუციაში უნდა ჩაიწეროს, თუ ცალკე კანონი დაიწეროს, უმჯობესი იქნება, რომ ამაზე ახალმა პარლამენტმა იმსჯელოს. ასე რომ, ჩვენ ბურჯანაძე-უსუფაშვილის პიარ პინკონგს არ ავყვებით.

რას ნიშნავს ბურჯანაძე-უსუფაშვილის პიარ პინკონგს არ ავყვებით, ფიქრობთ, რომ საერთო გეგმით მოქმედებენ?

- გულწრფელად გეტყვით, ნადვიალდ ვერ ვიფიქრებ, რომ შეთანხმებულად მოქმედებენ, ნამდვილად არა. ბურჯანაძემ დაიწყო და როგორც ჩანს, უსუფაშვილმა ჩათვალა კარგი მომენტია იმისათვის, რომ გამოჩნდნენ. ყოველთვის, მაშინაც კი, როცა რესპუბლიკელები კოალიციაში იყვნენ, ცდილობდნენ, რომ ექსკლუზივი ჰქონოდათ პროდასავლურ კურსზე, რაც არასწორი იყო კოალიციური მმართველობის პირობებში, რადგან „ქართული ოცნება“ საქმით აჩვენებდა, რომ ჩვენ ძალიან სერიზულ ნაბიჯებს ვდგამდით დასავლეთის მიმართულებით. ეს ექსკლუზივი რესპუბლიკელებს სჭირდებათ ბურჯანაძის საპასუხოდ. ამიტომ ვფიქრობ, რომ ეს იყო სწორედ წინასაარჩევნო კამპანიის ნაწილი.

მოსახლეობის უდიდესმა ნაწილმა გადაწყვიტა, რომ ქვეყნის მისწრაფება და მომავალი არის სწორედ ევროპული და ევოატლანტიკური ოჯახი, ამის მუხედავად მისი კონსტიტუციაში ასახვის აუცილებლობის წინაშე დგას ქვეყანა? მით უმეტს, რომ დასავლეთის ქვეყნების კონსტიტუციაში მსგავსი ჩანაწერი არ არსებობს...

- დიახ, არ აუწერია არც აშშ-ს, გერმანიას, საფრანგეთს, დიდ ბრიტანეთს. მეტიც, ჩვენს კონსტიტუციაში არც ერთი საერთაშორისო ორგანიზაცია არაა ნახსენები. ამიტომ ვთვლი, რომ ეს არის წინასაარჩევნო კამპანიის ნაწილი, რომელიც შემოთავაზებულია უსუფაშვილის მხრიდან. ნადვილად არ მინდა და არ მგონია, რომ საჭირო იყოს დაბალრეიტინგიანი პოლიტიკური ძალების პოლიტიკური დღის წესრიგი გახდეს ეს საკითხი. „ქართულ ოცნებას“ გაცილებით მნიშვნელოვანი საქმეები აქვს ახლა და სწორდ ამით ვარ დაკავებული.

იმ ფონზე, როდესაც საქართველოს უახლოეს მომავალში უვიზო მიმოსვლა ექნება ევროკავშირთან, რამდენად მართებულია უბლოკო სტატუსზე დისკუსიის დაწყება?

- ქართული სახელმწიფოს არჩევანია, რომ იყოს ცივილიზებული, თავისუფალი სამყაროს ნაწილი, ეს თემა დისკუსიას არ ექვემდებარება. სამწუხაროდ, ქვეყანაში არიან პოლიტიკური ძალები და არა მარტო ქალბატონი ბურჯანაძის პოლიტიკური ძალა, რომლებიც არ ვიცი, რა ინტერესებისთვის გვექაჩებიან რუსეთისკენ პირდაპირ, თუ არაპირდაპირ. მათი პოლიტიკური სტრატეგია ემყარება არა იმას, რომ რუსეთს გაუმარჯოს, არამედ, ვითომდა პროქართული ინტერესების სახელით და დროშების ფრიალით, ფაქტობრივად, გვიჭრიან იმ გზას, რომელიც გრძელვადიან პერსპექტივაში უნდა იყოს ჩვენი ქვეყნის უსაფრთხოების სტაბილურობის და დემოკრატიის გარანტი - ეს არის და ეს.

ზოგი გველაპარაკება უბლოკო სტატუსით, ზოგი გველაპარაკება, რომ ჩვენ მხოლოდ ქართული ინტერესი უნდა გავატაროთ, ზოგი პირდაპირ გვეუბნება, რომ პუტინის პენსია და ხელფასი ავიღოთო.

ანუ, ფიქრობთ, რომ რუსული აგრესიული პროპაგანდის ნაწილია როგორ ბურჯანაძის, ასევე ბედუკაძის ინიციატივა?

- ეს ძალები ნებსით თუ უნებლიედ, ან საერთაშორისო საკითხებში პოლიტიკური გაუთვიცნობიერებლობით, ფაქტობრივად გვიბიძგებენ და გვეუბნებიან, რომ რუსულ ორბიტაზე გადავიდეთ, რაც არ და ვერ მოხდება, იმიტომ, რომ საქართველო პროდასავლური თავისუფალი არჩევანის გზაზე დგას. ეს პოლიტიკური ჯგუფები ცდილობენ, რომ წინასაარჩევნოდ შეკრიბონ მცირედი ელექტორატი და თავიანთკენ გადაქაჩონ, ვისაც შეიძლება პირადი, თუ სხვა ინტერესების გამო, რუსული 37 მანეთი ენატრება.

ამ ვითარებაში რამდენად რთული იქნება საარჩევნო კამპანია მმართველი გუნდისთვის? ერთის მხრივ ნაციონალები პრორუსულ ძალად მოგიხსენიებენ, მეორე მხრივ არიან აგრესიული პრორუსული ძალები...

- საარჩევნო კამპანია სრულიად თავისუფალ გარემოში მიმდინარებს, რაც მეამაყება. სწორედ „ქართული ოცნების“ მიღწევაა დემოკრატიული ინსტიტუტების გაძლიერება და ის, რომ ქვეყანაში თავისუფალი ცხოვრებაა. სწორედ, ამ თავისუფლების განმტკიცებისთვის ვაგრძელებთ ძალიან ძლიერ საარჩევნო კამპანიას და თქვენ ხედავთ, რომ ძალიან სერიოზული მხარდაჭერა გვაქვს მოსახლეობის მხრიდან.

ამ თავისუფლების ფონზე, ყველა პოლიტიკური ძალა ცდილობს, რომ საკუთარი ინტერესი გაატაროს და ელექტორატი მოიპოვოს. ყველა ებრძვის ძლიერს და ძლიერი ამ შემთხვევაში არის „ქართული ოცნება“.

ჩვენთვის მთავარი გამოწვევა არის არა „ნაციონალური მოძრაობა“ და პრორუსული პარტიები, არამედ ჩვენთვის მთავარია, რომ ჩვენს საზოგადოებამდე მივიტანოთ ყველა ის მიღწევა, რაც ქვეყანამ შეძლო და ვუთხრათ, რა გველოდება შემდგომი 4 წლის განმავლობაში.

ეს იქნება ძალიან სწრაფი განვითარება ჩვენი ქვეყნისთვის, ძალიან სერიოზული პროგრესი და ძალიან სერიოზული ნახტომი ძლიერი დემოკრატიული სახელმწიფოსკენ, რაც თითოეულ ჩვენთაგანს მოუტანს კეთილდღეობას. ჩვენ ვიწყებთ მოსახლეობასთან შეხვედრას და ყველა პროგრამას, რომელსაც ჩვენ ვახორციელებთ100% -იანი მხარდაჭერა აქვს მოსახლოებაში.

ამ მოსახლეობაში იგრძნობა რუსეთის ნოსტალგია?

- არა, რა თქმა უნდა. პირველ რიგში, ხალხს უნდა თავისუფლება. ქართველი ხალხისთვის თავისუფლება არის პირველი ღირებულება, თავისუფლება სად არის, ამას ყველა კარგად ხედავს და სწორედ ამიტომ არის ჩვენი კურსი პროდასავლური. ჩვენ მოსახლეობისგან სრული მხარდაჭერა გვაქვს და ისიც კი, ვინც თვლის, რომ შეიძლება მისთვის რუსული ორბიტა საინტერესო იყოს, აქტიურად საუბრობს და კმაყოფილია ვიზალიბერალიზაციის პროცესით, ევროკავშირთან სავაჭრო ურთიერთობით და მათ შორის რუსეთთან სავაჭრო ურთიერთობით, რომელსაც ჩვენ მივაღწიეთ. დღეს საქართველოს აქვს შანსი, რომ ძალიან დიდი პროგრესს მიაღწიოს და ჩვენ ამას შევძლებთ.