პარლამენტის თავდაცვის კომიტეტის თავმჯდომარე ირაკლი სესიაშვილი მიიჩნევს, რომ „რუსთავი 2“ „ნაციონალური მოძრაობის“ პოლიტიკური სხეულის ნაწილია და ქვეყანაში ვითარების ესკალაციის მიზნით, სააკაშვილის, „პოლიტიკური მაფიებისა“ და ნაციონალების მხრიდან ნიკა გვარამიას გამოყენება ხდება.
პოლიტიკურ ფლანგზე მიმდინარე პროცესების შეფასების მიზნით, for.ge ირაკლი სესიაშვილს ესაუბრა:
მთავარი პროკურატურის ინფორმაციით, ზეწოლის თაობაზე ნიკა გვარამიას ინფორმაცია ალექსი ახვლედიანმა მიაწოდა, რომელიც ხელისუფლებასთან დაახლოებული პირია. მის ამ ნაბიჯს, რითი ხსნით?
- საჯარო მოხელეობა იმას არ ნიშნავს, რომ ესა თუ ის პირი ვინმესთან დაახლოებულია. გვარამია აცხადებს, რომ ახვლედიანი მისი მეგობარია. მთავარმა პროკურატურამ უნდა გაარკვიოს, გვარამისა და ახვლედიანს შორის იყო თუ არა მეგობრული საუბარი, საერთოდ, ახვლედიანმა უთხრა თუ არა გვარამიას რაიმე და ამას გვარამია ყიდის თუ არა სახელისუფლებო გზავნილად. ყველაზე მეტად ხელისუფლებაა დაინტერესებული, რომ პროცესი გამჭვირვალე იყოს და საზოგადოებას კითხვები არ დარჩეს. პოლიტიკური ჯგუფები დაინტერესებულნი არიან, რომ „რუსთავი 2“-ის გარშემო განვითარებული მოვლენები ისე შეფუთონ და გაყიდონ, როგორც თავად აწყობთ. თუკი ვინმეს ინტერესში შედის, რომ ქვეყანაში დაძაბულობა იყოს და რევოლუციური მოწოდებები კეთდებოდეს, ეს ნაციონალების მიზნებს ემსახურება. „ნაციონალური მოძრაობა“ ვადამდელ არჩევნებს ითხოვდა, მაგრამ მათ ბუშტი გაბერეს და თან გაქრნენ. „რუსთავი 2“ მათი პოლიტიკური სხეულის ნაწილია და ისინი მიზნის მიღწევისთვის ამ ტელევიზიას როგორც საშუალებას ისე იყენებენ და სიტუაციას ძაბავენ. ამ პროცესში სხვა პოლიტიკურ ძალებსა და პირებს ვხედავ, რომლებსაც, როგორც ჩანს, საკუთარი ინტერესები გააჩნიათ. ოპოზიცია არჩევნებისთვის იბრძვის, მათი მიზანია, რომ საზოგადოების თვალში ხელისუფლების რეიტინგი დაეცეს, რათა ისინი გამოჩნდნენ.
გვარამია აცხადებს, რომ ხელისუფლებას მისი პირადი ცხოვრების ამსახველი ფარული ჩანაწერები გააჩნია. თქვენ როგორც თავდაცვის კომიტეტის თავმჯდომარე ინფორმაციას ფლობთ, არსებობს თუ არა მსგავსი კადრები? თუკი არსებობს, წინა ხელისუფლება მსგავმა პოლიტიკამ დაღუპა და თქვენც იგივეს აგრძელებთ?
- ცხრაწლიანი სერიალების შემდეგ, საზოგადოებაში ფარულ მოსმენა-მიყურადებაზე ეჭვები დარჩენილია, მაგრამ სრული პასუხისმგებლობით ვაცხადებ, რომ ჩვენი მმართველობის პერიოდში ჩაწერილ მსგავსს კადრებს ვერ იპოვით. ის ჩანაწერი, რაც შს მინისტრის ყოფილმა მოადგილემ ფარესაშვილთან მიმართებაში გაავრცელა, ეს მანამდე გაკეთებული იყო. ჩვენი ხელისუფლების ჩანაწერების წარმოება პრინციპულად მიუღებელია, რის გამოც კანონმდებლობაში ამკრძალავი ნორმა ჩავდეთ. თუკი ამ კადრების გავრცელებაა აკრძალული, მის ჩაწერას აზრი არ აქვს. რაც შეეხება გვარამიას, სულელი არავინ არის და კარგად ვხვდებით, რომ ის ამ პროცესში პაიკია, რომელსაც სააკაშვილი, ძველი პოლიტიკური მაფიები და ნაციონალები იყენებენ. იქ გვარამია რომ არ იყოს, სხვა იქნება. მათთვის გვარამია ყველაზე წამგებიანი პერსონაა, რადგან ეს ის პირია, რომელიც 2007 წელს, „იმედის“ განადგურების დროს პროკურორი იყო. ეს ბატონი გამოვიდა და გვითხრა, რომ ყველაფერი კანონიერად მოხდაო. თუკი ხელისუფლებას გვარამიას ჩამოცილება უნდა, ამით ხელისუფლება მისთვის სასარგებლო შედეგს კი არ მიიღებს, პირიქით. ის ამ პროცესში ნეგატივია და ვინაიდან პაიკია, მისი შეცვლა პრობლემა არაა.
ხელისუფლების წარმომადგენლები ამტკიცებთ, რომ ქიბარ ხალვაშის უკან ბიძინა ივანიშვილის ინტერესები არ დგას. თუ ეს ასეა, ვერ ამჩნევთ, რომ ამ პროცესში ყველაზე მეტად ხელისუფლება და ქვეყანა ზიანდება? „ევროპის სახალხო პარტიამ“ „რუსთავი 2“-ის გარშემო განვითარებული მოვლენების თაობაზე რეზოლუცია მოამზადა, სადაც საუბარი თავისუფალი სიტყვის დევნაზეა. ქვეყანა უვიზო მომისვლის რეჟიმის მიღების მოლოდინშია, როგორც ამბობენ, ევროპა უარის სათქმელად მიზეზებს ეძებს და არ ფიქრობთ, რომ ისინი ამ საკითხს გამოიყენებენ?
- მელამ თავის კუდი მოწმედ მოიყვანაო. ასეთ განცხადებებს შევეგუეთ და სატყუარას არ ვჭამთ. ევროპას რაც უნდა დიდ პატივს ვცემდეთ, აქ პოლიტიკური დაპირისპირება და აზრთა სხვადასხვაობა ყოველთვის გვექნება. ნაციონალები „სახალხო პარტიის“ წევრები არიან და თავის დროზე, ერთად კარგად ჭამდნენ და სვამდნენ. კარლ ბილტს პრობლემები თავის ქვეყანაში აქვს და ის საგარეო საქმეთა მინისტრიც აღარ არის. როგორც ჩანს, მას საკუთარი წილი ვალდებულება აქვს და თავის განცხადებებს აკეთებს.
27-29 ოქტომბერს, ევროპარლამენტი „რუსთავი 2“-თან დაკავშირებით, საკმაოდ კრიტიკული რეზოლუციის მიღებას გეგმავს. ეს ასოცირების პროცესზე რა გავლენას იქონიებს?
- რისკები არსებობს. „ნაციონალური მოძრაობის“ ქმედებები მიმართულია იქითკენ, რომ როგორმე ქვეყანა დააზიანონ. ისინი ცდილობენ, რომ საქართველო დააშანტაჟონ. ქვეყანას ეუბნებიან, რომ მათი პოლიტიკური ინტერესები თუ არ გატარდება, მაშინ სახელმწიფოს ზურგში ნაჯახს ჩაარტყამენ და შეეცდებიან, რომ ევროპამ ვიზა-ლიბერალიზაცია არ მოგვცეს. ისინი პირდაპირ შანტაჟზე მიდიან. ისინი ქვეყნის ინტერესებს პირველ ადგილზე არასოდეს არ აყენებენ. ისინი პატრიოტები მხოლოდ იმ შემთხვევაში ხდებიან, თუკი ხელისუფლებაში არიან. სხვა შემთხვევაში, ნაციონალებს საკუთარ პოლიტიკურ მარცხს ქვეყნის უბედურება ურჩევნიათ.
ნაციონალები ოპოზიციაში არიან და არც მალავენ, რომ ხელისუფლებაში დაბრუნება სურთ. შესაბამისად, ისინი მიზეზებს ეძებენ. ხელისუფლება მათ დღის წესრიგს რას უპირისპირებს?
- ხელისუფლებაში მოსვლა ყველა პოლიტიკურ ძალას უნდა, მაგრამ ეს იმას არ ნიშნავს, რომ სახელმწიფო ინტერესების წინააღმდეგ უნდა წახვიდე. სამწუხაროდ, ბევრი ამ გზას ადგას. ჩვენი პასუხია - კანონის უზენაესობის პრინციპების დაცვა, გამჭვირვალე პროცესი და საკუთარი ხალხის წინაშე ანგარიშვალდებულება. შეიძლება, ზოგჯერ, დასავლეთთან მესიჯის სწორად მიტანა არ გამოგვდის, მაგრამ ეს იმ ნაღმების ბრალია, რომელიც წლების მანძილზე, იქაც იდებოდა. ამის არ უნდა შეგვეშინდეს. დარწმუნებული ვარ, რომ დასავლეთი ქვეყანაში მიმდინარე პროცესებს საღად შეხვდება. ნაციონალებმა და „რუსთავი 2“-მა რაც უნდა ბევრი მოიტყუონ, ჩვენს პარტნიორებს სრული და ობიექტური ინფორმაცია აქვთ.
საზოგადოების რაღაც ჯგუფი აცხადებს, რომ „რუსთავი 2“-ის დასაცავად კარვებს და თერმოსებს მოიმარაგებენ და აქციებისთვის მზად არიან. ესკალაციის საფრთხეს ხედავთ?
- აზრის გამოთქმის უფლება ყველას აქვს ისევე, როგორც კანონის ფარგლებში, მიტინგების გამართვისა და შეკრების უფლება. თუკი საჭიროება მოითხოვს, სადაც დაშვებულია, მათ კარვის გაშლის უფლებაც აქვთ. სააკაშვილმა გვამცნო, რომ თურმე, NDI-ის კვლევებით მისი პარტია პირველ ადგილზე ყოფილა. ამ კვლევებს „ნაცების ოცნებას“ ვეძახი. საზოგადოებამ კარგად იცის, რომ ნაციონალები და „რუსთავი 2“ ერთ პოლიტიკურ მიზანს ემსახურებიან. როგორც ისინი აცხადებდნენ, ურთმელიძეს გადაწყვეტილება დღესვე უნდა მიეღო და მათ „რუსთავი 2“ უნდა წართმეოდათ. აქციაზე ხალხის გარკვეული რაოდენობა დავინახე, რომელთა უმეტესობას პოლიტიკური ინტერესი აქვს. აქციაზე დაახლოებით ის 14 პროცენტი იყო, რაც NDI-იმ აჩვენა.
ანუ, რევოლუციის საშიშროებას ვერ ხედავთ?
- როცა რევოლუციას აწყობ, ამის საფუძვლები უნდა იყოს, რაც არ არსებობს. ნაციონალები სიტუაციის ხელოვნურ დაძაბვას ცდილობენ, რათა ვითარების ესკალაცია მოახდინონ. რევოლუციის საშიშროებას არ ვხედავ, მაგრამ უფრო მეტად იმის მეშინია, რომ თუკი ნაციონალები რევოლუციურ მუხტს ვერ დაინახავენ, ისინი პროვოკაციაზე ხელოვნურად არ წავიდნენ, რაც არაერთხელ გაუკეთებიათ. თუნდაც, „მოდელირებულ ქრონიკას“ გაგახსენებთ. იმაზე ნუ იოცნებენ, რომ ხელისუფლება არეულობის ნაწილი გახდება და სისხლის გუბეები დადგება. რიგგარეშე არჩევნებს ახსენებენ და მათ ვეტყვი, პარლამენტში უღირსად და მოპარული ხმებით რომ სხედან, ადგნენ, ქუჩაში გავიდნენ და პარლამენტი დატოვონ.
თუკი თქვენს ინტერესებში შედის, რომ „რუსთავი 2“ის პროცესები გამჭვირვალედ წარიმართოს და კითხვებმა არ იარსებოს, არ ფიქრობთ, რომ ურთმელიძეს ამ საქმეზე აცილება უნდა გაეკეთებინა?
- გამიხარდებოდა, რომ ურთმელიძეს აცილება მიეცა. ეს იმის გამო გამიხარდებოდა, რომ საზოგადოებაში ამ მიმართულებით კითხვა მოიხსნებოდა და ვიღაცას ზედმეტი სალაპარაკო არ ექნებოდა. თუკი ხელისუფლება სასამართლოს საქმიანობაში ერევა, მას გამოცვლიდა, მაგრამ რადგან არ ვერევით, ეს ხაზს იმას უსვამს, რომ სასამართლო დამოუკიდებელია. ვისაც ამის არ სჯერა, ე.ი. მას არ აწყობს, რომ სჯეროდეს.
ურთმელიძის განცხადება, რომ მის გადაწყვეტილებაზე დედის ფაქტორი გავლენას ვერ მოახდენს, ეს პოზიცია თქვენთვის სარწმუნოა?
- ამ პროცესზე დამკვირვებელი ვარ, მაგრამ თუ სწორ ანალიზს გავაკეთებთ, ჩანს, რომ ხელისუფლების მხრიდან სასამართლოს საქმიანობაში ჩარევა არ არის, განსხვავებით, პრეზიდენტისა და გვარამიას ზეწოლისგან.
პრეზიდენტის მხრიდან მოსამართლეზე განხორციელებული ზეწოლა რაში გამოიხატა - მის მოწოდებაში?
- მან მოსამართლეს მოუწოდა, რომ ნაჩქარევი და ხისტი გადაწყვეტილება არ მიიღოო. ე.ი. ფაქტობრივად, მარგველაშვილმა ურთმელიძეს უთხრა, რომ გადაწყვეტილება დღეს არ გამოაქვეყნოო. ეს ზეწოლა არ არის? - პრეზიდენტია და არა რიგითი საჯარო მოხელე. პრეზიდენტმა მოსამართლის სავარაუდო გადაწყვეტილება ხისტად უკვე შეაფასა. მისმა განცხადებამ სიტუაციის დეესკალაციას ხელი ნამდვილად არ შეუწყო.
თქვენ პრეზიდენტს აკრიტიკებთ, მაგრამ პრემიერის განცხადების პათოსი, რომ ხალხი ნაციონალებს პასუხს აგებინებს, მართებული იყო? მაშინ, როდესაც ნაციონალების პარტიულ ოფისებზე, ობიექტური თუ სუბიექტური მიზეზების გამო თავდახმები ხდება, ღარიბაშვილის განცხადებით აგრესიული ადამიანების წახალისება ხომ არ მოხდება?
- პრემიერის ეს განცხადება წმინდა პოლიტიკურია. მან არაერთხელ შეახსენა ყველას, რომ ის არ დაგვიწყებია, რაც ნაციონალებმა ქვეყანასა და ხალხს დამართეს. მათ საკუთარი ქმედებებისთვის ბოდიში ერთხელ არ მოუხდიათ და პირიქით, მათ რაღაც ამბიციები აწუხებთ. ჩვენი ხელისუფლების მშვიდი პოლიტიკის შედეგია ის, რომ ამ ადამიანებს ლინჩის წესით პასუხი არ აგებინეს. მათი უფლებების დაცვა ჩვენ გადავწყვიტეთ. მიუღებელია ის, რომ ნაციონალებს გააზარებული არ აქვთ, თუ რა ჩაიდინეს.
თქვენ დანაშაულებრივ ქმედებებზე მიანიშნებთ და თანამდებობის პირებს პასუხი რატომ არ აგებინეთ?
- კანონმდებლობით, პოლიტიკური რეჟიმის გასამართლების მექანიზმი არ არსებობს. წამებისა და არადამიანური მოპყრობის გამო, წინა ხელისუფლების დროინდელი 100-მდე საჯარო მოხელე დაკავებულია.
