წლებია, თბილისის ქუჩები ვერ აუდის ტრანსპორტის გაზრდილ ნაკადს. საავტომობილო გზებზე გაუვალი ხერგილების პრობლემა განსაკუთრებით იჩენს ხოლმე თავს სასწავლო წლის დაწყებისას, როცა არდადეგებიდან დაბრუნებული მოსწავლეები და სტუდენტები სასწავლებლებს მიაშურებენ. როგორ შეხვდა ახალი სასწავლო წლის დაწყებას თბილისის სატრანსპორტო ინფრასტრუქტურა და როგორ აპირებს თბილისის მერია ვითარების განმუხტვას?
თეა მაისურაძე სამსახურში საზოგადოებრივი ტრანსპორტით დადის და14 სექტემბრის დილითაც, ჩვეულებისამებრ, ავტობუსით იმგზავრა დიღმის მასივიდან რუსთაველის გამზირამდე:
„ყველაზე რთული ვითარება იყო აღმაშენებლის ქუჩიდან თამარ მეფის ხიდამდე. თითქმის ნახევარი საათი ვიდექით თითქმის გაუნძრევლად, ძლივის გადმოვლახეთ ეს ადგილი. ხიდის შემდეგ კიდევ შეგვხვდა ერთი ხერგილი, სადაც 20 წუთამდე ვიდექით. შემდეგ გმირთა მოედნიდან მეტ-ნაკლებად სწრაფად გამოვაღწიეთ, თუმცა არც იქ იყო გზა თავისუფალი“.
თეა მაისურაძე სატრანსპორტო ხერგილების გაჩენას ახალი სასწავლო წლის დაწყებას უკავშირებს. შიგანან საქმეთა სამინისტროს მონაცემებითაც, 14 სექტემბერს, დღის პირველ ნახევარში, მოძრაობა შეფერხებული იყო საბურთალოზე - ბულაჩაურისა და შარტავას ქუჩებზე, ასევე სააკაძის მოედანთან და სანაპიროზე, იუსტიციის სახლთან, სადაც გზის სარეაბილიტაციო სამუშაოები მიმდინარეობს. თბილისის საკრებულოს წევრის ალექსანდრე ელისაშვილის თქმით, ხშირ შემთხვევაში სატრანსპორტო კოლაფსი საქალაქო სამსახურებისა და მერიის ხელმძღვანელობის მიზეზით ხდება.
„ახლა შეიძლებოდა იუსტიციის სახლთან ასფალტის აყრა, როცა იცი, რომ სწავლა იწყება და საოცარი მოძრაობა იქნება? ეს არის მერის უთავბოლობის შედეგი და აშკარაა, რომ ამ ადამიანის მერობა დღითი დღე უფრო მძიმე გახდება. ისედაც პრობლემურ ქალაქს სჭირდება ენერგიული და გადაწყვეტილების უნარის მიღების მქონე მერი. წინასწარ ხომ უნდა დაინახო რა, როგორ და როდის უნდა გააკეთო. სად იყვნენ მთელი ზაფხული, არ იცოდნენ იუსტიციის სახლთან რომ გზა უნდა დაეგოთ? ეს არის არაეფექტური და უღიმღამო მართვის შედეგი“, უთხრა ალექსანდრე ელისაშვილმა რადიო თავისუფლებას.
დეპუტატის კრიტიკის პასუხად, თბილისის მერიაში ამბობენ, რომ ზაფხულის განმავლობაში თბილისში ბევრი ინფრასტრუქტურული პროექტი ხორციელდებოდა, თუმცა, როგორც რადიო თავისუფლების რედაქციაში სტუმრობის დროს თბილისის ვიცე-მერმა ირაკლი ლექვინაძემ განაცხადა, ვერ მოხერხდა ყველა მათგანის დასრულება სასწავლო წლის დადგომამდე, რის გამოც მერია მოქალაქეებს ბოდიშს უხდის. ვიცე-მერის თქმით, მერია ინტენსიურად მუშაობს სატრანსპორტო სტრუქტურის გამართვაზე. სულ მალე თბილისს ექნება ტრანსპორტის გენერალური გეგმა, რომელმაც უნდა უზრუნველყოს ტრანსპორტის სტრუქტურის გამართული მუშაობა ოპტიმალური ტრანსპორტითა და სამარშრუტო გეგმებით. ირაკლი ლექვინაძის თქმით, უნდა განახლდეს როგორც საზოგადოებრივი ტრანსპორტი, ასევე ინფრასტრუქტურა:
„პირველი არის სწორედ ინფრასტრუქტურული პროექტები, რომლებმაც ალტერნატიული გზებისა და ხიდების განვითარება უნდა უზრუნველყოს და ამ კუთხით უნდა მოხდეს განტვირთვა დღეს არსებული ძირითადი კვანძების. მეორე - ეს არის მოძრავი შემადგენლობები და ტრანსპორტის ალტერნატიული მიმართულებები. მაქსიმუმს ვაკეთებთ იმისათვის, რომ თბილისში შემოვიტანოთ ახალი ავტობუსები, რომლებიც ბევრად უფრო კომფორტული და უსაფრთხო იქნება მგზავრებისთვის. ვფიქრობთ, თუ იქნება ახალი ავტობუსები, მაშინ მგზავრების დიდი ნაკადი გადაინაცვლებს ავტობუსების მიმართულებით“.
ირაკლი ლექვინაძის თქმით, საერთაშორისო საფინანსო ინსტიტუტების ჩართულობით, მერია აპირებს ტენდერის გამოცხადებას 200 თანამედროვე სტანდარტის, ადაპტირებულ და ბუნებრივ არეზე მომუშავე ავტობუსის შეძენაზე. თბილისში, ვიცე-მერის თქმით, ყოველდღიურად ქალაქში 600 ავტობუსი მოძრაობს, რეალურად კი თბილისელთა მოთხოვნილების დასაკმაყოფილებლად 800-ია საჭირო. თბილისის მერიის ძალისხმევა ასევე მიმართულია მეტროსა და საბაგირო გზების განვითარებისკენ. გიორგი ბაბუნაშვილი, დამფუძნებელი არასამთავრობო ორგანიზაციისა „თბილისის ტრამვაი“, დარწმუნებულია, რომ ელექტროტრანსპორტის განვითარების გარეშე, მხოლოდ გზებისა და ესტაკადების მშენებლობით, თბილისის მერია ვერ გაუმკლავდება ავტომობილების მოზღვავებას.
„რაღაც რაოდენობის მგზავრი რომ გადავიყვანო მეტროთი ან ტრამვაით, მჭირდება ბევრად უფრო ცოტა ფართობი, ვიდრე იმავე რაოდენობის მგზავრების გადასაყვანად დამჭირდებოდა ავტობუსით ან სამარშრუტო ტაქსით. შესაბამისად, არაოპტიმალურია ქალაქში მგზავრების გადაყვანა მცირე ავტობუსებით. რაც უნდა ბევრი ესტაკადა და გზა ავაშენოთ, ეს ვერ იქნება პრობლემების გრძელვადიანი გადაწყვეტა. ახალ გზას მოჰყვება მეტი ავტომობილი და, საბოლოოდ, ეს ახალი გზაც ჩაიხერგება. ჩვენი განვითარების სტრატეგია უნდა იყოს არა ახალი გზების მშენებლობა, არამედ ხალხის საზოგადოებრივ ტრანსპორტზე გადაყვანა და, პლუს ამას, უნდა გაკეთდეს ველოსიპედის ბილიკები, რათა რაც შეიძლება ცოტა ადამიანმა იმოძრაოს საკუთარი ტრანსპორტით“, უთხრა გიორგი ბაბუნაშვილმა რადიო თავისუფლებას.
კერძო ავტომობილი კი თბილისში, მართლაც, ბევრი მოძრაობს. ოფიციალური ინფორმაციით, თბილისში 385 ათასი კერძო ავტომობილია რეგისტრირებული, ყოველდღიურად კი დედაქალაქის ქუჩებში დაახლოებით ნახევარი მილიონი სატრანსპორტო საშუალება გადაადგილდება.
