მართალია, სასამართლოს ვერდიქტი ჯერ არ გამოუტანია, მაგრამ ე.წ. “კაბელების საქმე” ახალ კალაპოტში გადავიდა - თავდაცვის მინისტრმა, თინა ხიდაშელმა საქმის ფიგურანტები, რომლებმაც საპატიმრო ამას წინათ დატოვეს, ძველ თანამდებობებზე აღადგინა. პოლიტიკურ წრეებში გაჩნდა მოსაზრება, რომ ამ ნაბიჯით თინა ხიდაშელმა და, საერთოდ, “რესპუბლიკელებმა” მმართველ კოალიციას “ხელთათმანი ესროლეს”. შესაძლოა, არც უამისობაა, თუმცა ირაკლი ალასანიას თანაგუნდელი, “თავისუფალი დემოკრატი” ნინო გოგუაძე ამ შეფასებას არ იზიარებს და “ქართულ სიტყვასთან” საუბრისას განმარტავს, რომ ქალბატონმა მინისტრმა, უბრალოდ, კანონი აღასრულა. იქნება თუ არა “კაბელების საქმე” წინასაარჩევნო კამპანიის ხერხემალი? - “ქართული სიტყვა” დეპუტატ ნინო გოგუაძეს ესაუბრა.
- ქალბატონო ნინო, “კაბელების საქმის” ფიგურანტების სამსახურში აღდგენით, თინა ხიდაშელმა პოლიტიკური ნაბიჯი გადადგა?
- მოდით, პოლიტიკურ დისკუსიასა და განხილვაში არ შევალ, რადგან ამ გუნდში ისედაც ძალიან ბევრი დაპირისპირებაა და არ მინდა, ჩემი კომენტარით ეს დაპირისპირებები გავაღრმავო.
- რა, სახელისუფლებო გუნდს უფრთხილდებით?
- ჯობია, ცეცხლზე ნავთი არ დავასხა და სადამდეც მივა, მივიდეს. ეს გუნდი, ჩემი აზრით, ისედაც დაპირისპირებისთვისაა განწირული... მოკლედ, ვერ ვიტყვი, ეს პოლიტიკური გადაწყვეტილება იყო თუ არა, მაგრამ მინისტრი პოლიტიკური ფიგურაა და პოლიტიკურ გადაწყვეტილებებს იღებს, მით უმეტეს, იმ ქვეყანაში, სადაც ხელისუფლების მთავარი პრინციპი კანონის უზენაესობა არაა. მოკლედ, როცა მინისტრი ასეთ გახმაურებულ საქმეზე იღებს გადაწყვეტილებას, რომ მასზე კონსტიტუციითა და კანონით დაკისრებული მოვალეობა აღასრულოს, ეს პოლიტიკური გადაწყვეტილებაა... ჩვენი ქვეყანა არც დემოკრატიულია და არც - სამართლებრივი.
- ნება მომეცით, ქალბატონო ნინო, არ დაგეთანხმოთ, რამეთუ თავდაცვის მინისტრის ზემოხსენებული გადაწყვეტილება სწორედ დემოკრატიულობასა და სამართლიანობაზე მიანიშნებს...
- ეს არის იმის პრეცედენტი, რომ რთულად, მაგრამ ამ ქვეყანაში ოდესმე კანონის უზენაესობა დამკვიდრდება. იმისთვის, რომ კანონის აღსრულების გადაწყვეტილება მიიღო, მინისტრს მადლობა გადავუხადე! ნორმალურ ქვეყანაში მსგავსი რაღაცებისთვის მადლობას არავის უხდიან, რადგან ეს, თავისთავად, ასე უნდა იყოს, მაგრამ რადგან არასამართლებრივი, არადემოკრატიული და პოლიტიკისგან ვერგამიჯნული სახელმწიფო გვაქვს, ამ პოლიტიკურ კონიუნქტურაში, მინისტრის მხრიდან გადადგმული ნაბიჯი, დიახ, ჩემგან მადლობის გადახდის საფუძველი გახდა!
- წინ 2016 წლის არჩევნებია და ეგებ, სამადლობელო არაფერია? - სხვა თუ არაფერი, “თავისუფალ დემოკრატებს” საარჩევნოდ სალაპარაკო აღარ გექნებათ, ხელისუფლება უსამართლოდ იქცევაო?
- სალაპარაკო ნამდვილად არ გამოგვეცალა, რადგან არ შეიძლება, კონკრეტული შემთხვევა განვაზოგადოთ. ეს ერთი კონკრეტული შემთხვევაა, რომელიც იმას არ ნიშნავს, რომ ხელისუფლება სამართლებრივად, დემოკრატიულად იქცევა და მისი მოქმედების პრინციპი კანონის უზენაესობაა. მადლობის გადახდა და საქციელის მოწონება არასოდეს მიჭირს. ასევე, საწინააღმდეგოს თქმაც, თუ ამის საჭიროება იქნება, არასოდეს გამიჭირდება.
- მაინც, მგონია, რომ მადლობის გადახდა ნაადრევია - “კაბელების საქმეს” სასამართლო განიხილავს და არავინ იცის, განაჩენი როგორი იქნება... თუკი მოსამართლე ამ საქმის ფიგურანტებს დამნაშავეებად სცნობს, თინა ხიდაშელი, როგორც იტყვიან, სიტყვას, ალბათ, უკან წაიღებს და თქვენც უხერხულობაში აღმოჩნდებით...
- უხერხულობაში არ აღმოვჩნდები, რადგან დარწმუნებული ვარ და თავიდანვე ვიცოდი, რომ დანაშაულს ადგილი არ აქვს. ეს, უბრალოდ, პოლიტიკურად მოტივირებული საქმეა, რომელიც ირაკლი ალასანიას, როგორც პოლიტიკოსის წინააღმდეგაა მიმართული. დიახ, ეს საქმე იმიტომ შეიკერა, რომ ირაკლი ალასანია კორუფციაში გაესვარათ და მისი მზარდი რეიტინგი, პირველ რიგში კი, რეპუტაცია შეებღალათ.
- შებღალეს?
- რა თქმა უნდა, ვერა. როცა ადამიანი მართალია, ადრე თუ გვიან, აუცილებლად გამოჩნდება და, მიუხედავად იმისა, რომ ეს საქმე ირაკლი ალასანიას წინააღმდეგ იყო წამოწყებული, დარწმუნებული ვიყავი, რომ ირაკლის რეპუტაციას ვერ შებღალავდა, რადგან ირაკლი წესიერი და მართალი ადამიანია! საქართველოში არაა ადამიანი, ვისაც ეჭვი არ ეპარება, რომ ეს საქმე პოლიტიკურად იყო შეკერილი.
სხვათა შორის, მადლობა თავის დროზე მოსამართლე დავით ჯუღელსაც გადავუხადე. საერთოდ, არ მინდა, ის ადამიანები დავივიწყოთ, რომლებიც ასეთი პოლიტიკური კონიუნქტურისა და ზეწოლის დროს სამსახურეობრივ მოვალეობას ობიექტურად წარმართავენ და ეს გმირობის ტოლფასია! მოსამართლე დავით ჯუღელმა ყველას იმის იმედი მოგვცა, რომ ოდესმე საქართველოში დამოუკიდებელი სასამართლო, შესაძლოა, მართლა იყოს - მან პროკურატურისგან თუ სხვადასხვა პირებისგან ყველა ზეწოლას გაუძლო და ის გადაწყვეტილება მიიღო, რომელიც უნდა მიეღო, ანუ ვიდრე საქმე სააპელაციოში წავიდოდა, მოსამართლე ჯუღელმა პროკურატურის მთავარი მტკიცებულება დაუშვებლად სცნო. იმისთვის, რომ საქმე გაგრძელებულიყო, გარიგებაში კანონით შევიდნენ...
- რას გულისხმობთ?
- სააპელაციო სასამართლოს იმ მოსამართლეებს, რომლებსაც დამნაშავეებად მოიხსენიებდნენ და პირადად იუსტიციის მინისტრი ჩასაქოლად იმეტებდა, გასამრჯელო კანონით გადაუხადეს. სააპელაციო სასამართლომ, მტკიცებულებები იმ ექსპერტის დაკითხვის ოქმის საფუძველზე დააბრუნა, რომელი ექსპერტიც, პროკურატურის მონაცემებითვე, ჯერ დაკითხული არ იყო, ანუ მტკიცებულებები არარსებული ოქმის საფუძველზე დაბრუნდა და, დიახ, საქმე გაყალბდა! რადგან სააპელაციო სასამართლომ მტკიცებულებები დააბრუნა, მოსამართლეს უფლება არ ჰქონდა, რომ საქმე შეეწყვიტა... ასე რომ, არსებითი განხილვა გაგრძელდება. დარწმუნებული ვარ, დიდ ძალისხმევას დაუთმობენ, რომ ამ ადამიანების ბრალი დაამტკიცონ, მაგრამ სიმართლე თავის გზას აუცილებლად იპოვის!
- ამ ადამიანებს მინდია ჯანელიძემ, როგორც მაშინდელმა თავდაცვის მინისტრმა, სამსახურეობრივი უფლებამოსილება უკანონოდ შეუწყვიტა?
- არა. უკანონობა და პოლიტიკურად მოტივირებული მათი დაპატიმრება იყო და რაკი საპატიმროში იყვნენ, ჯანელიძემაც სამსახურიდან ამიტომ დაითხოვა. თინა ხიდაშელმა კი თქვა, საპატიმროში აღარ არიან და ამიტომ, აქვთ უფლება, რომ სამსახურში აღვადგინოთო.
- თუკი მოსამართლე ჯუღელი გმირია, მაშინ თინა ხიდაშელიც გმირი გამოდის!
- გმირს ვერ ვიტყვი... მგონია, რომ სხვა შემთხვევაში, არც მადლობა უნდა გადავუხადოთ, მაგრამ ახლა, დიახ, თავდაცვის მინისტრი ისე მოიქცა, როგორც პრემიერის გუნდის სხვა მინისტრები არ მოიქცეოდნენ.
- ისე, ჩვენში დარჩეს და, ხიდაშელის გადაწყვეტილება მხოლოდ თქვენმა ყოფილმა თანაგუნდელმა მინისტრმა გააპროტესტა. ამას რითი ხსნით?
- ჩემს ყოფილ თანაგუნდელზე ლაპარაკი არ მინდა... თავიდანვე ვიცოდი, რომ ამ გადაწყვეტილებას ღარიბაშვილის გუნდი მშვიდად ვერ მიიღებდა იმიტომ, რომ ამ გუნდის წევრები გადაწყვეტილებებს დიდი ხანია, პოლიტიკური მიზანშეწონილობით იღებენ და არ ესმით, რომ “ქართული ოცნების” კი არა, საქართველოს მთავრობის წარმომადგენლები არიან და კანონით უნდა იხელმძღვანელონ. ხიდაშელის გადაწყვეტილება ყველაზე მძაფრად ქალბატონმა თეა წულუკიანმა გააპროტესტა - ვნახეთ, როგორი განრისხებული იყო. ამ თემაზე ბევრი ლაპარაკი არ მინდა და იუსტიციის მინისტრი თავის თავს მაინც გამოუტყდეს, ასე რამ განარისხა.
- სხვათა შორის, თეა წულუკიანმა მითხრა, რომ ყოფილ თანაპარტიელებზე ნაწყენია, რადგან საჯარო განცხადებებით შეურაცხყოფა მიაყენეთ. მისივე თქმით, პრესკონფერენციაზე, როცა ალასანიამ “კაბელების საქმეზე” ცნობილი განცხადება გააკეთა, არ დაპატიჟეთ და ამის შესახებ მედიიდან შეიტყო...
- არ მგონია, რომ ადამიანი პირადი პრიზმიდან დანახული წყენებით უნდა მოქმედებდეს. ადამიანებს პრინციპები და ღირებულებები აქვთ და სწორედ მათ სადარაჯოზე უნდა იდგნენ... ვერ გეტყვით, მისი განაწყენების საფუძველი რა გახდა და, საერთოდ, წყენაზე არ ვლაპარაკობ!
- კეთილი... ქალბატონო ნინო, “კაბელების საქმის” ფიგურანტების სამსახურში აღდგენას, როგორ ფიქრობთ, ავტომატურად პროკურატურაში საკადრო წმენდა ხომ არ უნდა მოჰყვეს?
- დარწმუნებული ვარ, ეს ადამიანები გამართლდებიან, რასაც ყველას პასუხისმგებლობა უნდა მოჰყვეს, ვინც ეს საქმე შეკერა! მათი სამსახურში აღდგენა კიდევ ერთხელ მიუთითებს, რომ ამ ადამიანების პატიოსნებაში ეჭვი თავად სახელისუფლებო გუნდში არ ეპარებათ, თორემ იგივე თანამდებობაზე ხომ არ აღადგენდნენ? როგორც კი სასამართლო “ვერდიქტს” გამოიტანს და ეს ადამიანები საბოლოოდ გამართლდებიან, ამ საქმეზე ლაპარაკს მაინც არ დავამთავრებთ და, რა თქმა უნდა, ყველა იმ პირის პასუხისმგებლობის საკითხს დავაყენებთ, ვინც ეს საქმე შეკერა და სახელმწიფოში ასეთი კატაკლიზმები გამოიწვია!
- მოკლედ, ქალბატონო ნინო, ალასანიას გუნდი ხელისუფლების მთავარი ოპონენტია?
- დიახ, ასეა.
- “კაბელების საქმის” პერსონაჟები “თავისუფალი დემოკრატების” წევრები არიან?
- არა და არასოდეს ყოფილან. უბრალოდ, უდანაშაულო ადამიანებს ვიცავდით...
- ეს გასაგებია, მაგრამ ვიღაცამ შეიძლება, თქვას, რომ თქვენთან ვალში არიან...
- იმიტომ არ ვიცავთ, რომ ჩვენთან ვალში იყვნენ! ჩვენ ჩვენს პრინციპს ვიცავდით - არ შეიძლება, უდანაშაულო ხალხი ციხეში იყოს! შეგვეძლო, ისე მოვქცეულიყავით, როგორც იქცევიან ხოლმე - ისინი გაგვეწირა, მაგრამ ამას არ გავაკეთებთ, რადგან უდანაშაულო ადამიანების დაცვა ჩვენი ღირსების საქმეა!
- გამორიცხავთ, რომ “კაბელების საქმის” ფიგურანტები პროვოკაციის მსხვერპლნი გახდნენ, ვთქვათ, ხომ შეიძლება, ვინმემ ჩათვალოს, რომ თავდაცვიდან ალასანიას ინფორმაციებს აწვდიან და ბრალდება დაუმძიმონ?
- ამ ქვეყანაში, სადაც პოლიტიკური დაპირისპირებები ყოველგვარი წესების გარეშე მიმდინარეობს, არაფერს გამოვრიცხავ! ამ პოლიტიკურ დაპირისპირებებს ადამიანების სიცოცხლე, ჯანმრთელობა და თავისუფლება ეწირება. საშინელებაა, როცა ბრძოლა წესების გარეშე მიდის. ამიტომ, არც იმის დადასტურებულად თქმა შემიძლია, რომ პროვოკაციას არ მოუწყობენ და არც იმისი, დღევანდელ საქართველოში ამას არავინ იკადრებს-მეთქი. ვნახოთ, მოვლენები როგორ განვითარდება. საერთოდ, მგონია, რომ საქართველოს დამოუკიდებლობის მოპოვებიდან დღემდე, საზოგადოება გაიზარდა და ასე ადვილად ვეღარ მოატყუებენ.
- ზემოხსენებული გადაწყვეტილებით, თინა ხიდაშელმა ის მოარული ხმა ხომ არ დაადასტურა, ალასანიას გუნდი და “რესპუბლიკელები” “მონათესავეები” არიან და 2016 წლიდან ერთად იქნებიანო?
- არა. ამ გადაწყვეტილებით თინამ კანონი აღასრულა!
- შეეძლო, არ აღესრულებინა.
- დიახ, მაგრამ იმ თინა ხიდაშელს, რომელსაც ვიცნობ და რომელსაც პატივს ვცემ, კანონი აუცილებლად უნდა აღესრულებინა! ამ ნაბიჯით ხიდაშელმა დაადასტურა, რომ შეუძლია, კანონი პოლიტიკური კონიუნქტურისგან დამოუკიდებლად აღასრულოს.
დიახ, ჩვენ მონათესავე პარტიები ვართ: ჩვენც და “რესპუბლიკელებიც” ლიბერალები ვართ და ეს აქამდეც დეკლარირებული გვქონდა. მსოფლმხედველობისა და ღირებულებების შეცვლას არც ამის მერე ვაპირებთ. მიუხედავად ამისა, ჩვენ ხელისუფლების მთავარი ოპოზიცია ვართ, “რესპუბლიკელებს” კი, სამთავრობო კოალიციაში ყოფნა და თანამდებობის დაკავება არ უჭირთ. ასე რომ, დღეს ჩვენი გზები მკაფიოდ გაყოფილია. ვნახოთ, მომავალში რა იქნება... ჩვენი ღირებულება ადამიანი, სამართლებრივი სახელმწიფო, სასამართლოს დამოუკიდებლობა და ინსტიტუტების გაძლიერებაა.
- ისე, “ნაციონალებიც” ამბობენ, მთავარი ოპოზიციური ძალა ვართო...
- ეს ხალხის გადასაწყვეტია!.. მოსახლეობას “ნაციონალების” ხელისუფლებაში ყოფნა ძალიან კარგად ახსოვს. ახლა, ხელისუფლებაში “ოცნება” ჩვენს გარეშეა. სხვათა შორის, რაც კოალიციიდან გამოვედი, ერთი წელი გადის და ძალიან კარგად ვხედავთ, ქვეყანა საითკენაც მიდის. ჩვენ კი დავამტკიცეთ, რომ პრინციპებს თანამდებობებზე არ ვცვლით. ამასთან, კოალიცაში ყოფნისას ისიც დავამტკიცეთ, რომ ყველა ის სამინისტრო, რომელიც ჩვენი გუნდის წევრებს ჰქონდათ ჩაბარებული, “ოცნების” ხელისუფლებაში ყველაზე წარმატებული იყო. მოკლედ, ჩვენ მართვაც შეგვიძლია...
- ქალბატონო ნინო, ჩათვალეთ, რომ თქვენი ოპონენტი ვარ. ჰოდა, რომელ წარმატებულ მართვაზე ლაპარაკობთ, როცა 4 მილიონის მითვისებაზე საქმეა აღძრული?
- 4 მილიონის მითვისებაზე “ოცნებაც” აღარ ლაპარაკობს! ყველასთვის ცხადია, რომ ამ ფაქტს ადგილი არ ჰქონია!
- რა ამის პასუხია და, “თავისუფალი დემოკრატები” “რუსთავი 2”-ის დამცველთა რიგებში ხართ. ეს პოლიტიკური ნაბიჯია? სხვათა შორის, “რუსთავი 2”-ს აქტიურად მხოლოდ “ნაციონალები” და “ლეიბორისტები” იცავენ...
- ჩვენი და “ნაცმოძრაობის” ინტერესები გავმიჯნოთ.
- კი ბატონო, გავმიჯნოთ...
- ჩვენ ყოველთვის ღირებულებების სადარაჯოზე ვდგავართ. მედიის თავისუფლება კი, ყველაზე ფუნდამენტური ღირებულებაა, რომელზეც დემოკრატია ემყარება. საერთოდ, იქ, სადაც სიტყვის თავისუფლება იზღუდება, ადამიანის ყველა სხვა უფლება გაყალბებული და შეზღუდულია. ამიტომაც იყო საბჭოთა კავშირში ადამიანის ყველა უფლება გაყალბებული. ჩვენ სიტყვის თავისუფლებას მაშინაც ვიცავდით, როცა “მედიას” “ნაციონალების” ხელისუფლება უხეშად ზღუდავდა - როცა “ნაციონალებმა” “იბერია” დახურეს, მაშინ რიგითი მოქალაქე ვიყავი და ამ ტელევიზიას ვიცავდი, რადგან ეს სიტყვის თავისუფლების შეზღუდვა იყო. ეს კი არადა, მიუხედავად იმისა, რომ ყველამ ვნახეთ, ფული იყო აღებული, შალვა რამიშვილის პროცესებზეც დავდიოდი, რადგან ვთვლიდი, რომ ეს ტელეკომპანია “202”-ის დახურვის გამო მოწყობილი პროვოკაცია იყო... “იმედის” დარბევა კი, საშინელება იყო და ამიტომ, მთელი საზოგადოება ვიცავდით. ახლა, “რუსთავი 2”-ს ვიცავ, რომელიც შეიძლება, “ნაციონალების” გავლენის ქვეშაა, მაგრამ ის ხელისუფლებისგან თავისუფალი ტელევიზიაა. სიტყვის თავისუფლებას დაცვა სწორედ ხელისუფლებისგან სჭირდება. ჩვენი კანონმდებლობა პარტიულ ტელევიზიებსაც არ კრძალავს. ხელისუფლებას არ აქვს უფლება, რომ მისთვის მიუღებელი კერძო ტელეკომპანიის მაუწყებლობა შეზღუდოს...
- ხელისუფლება ამბობს, რომ “რუსთავი 2”-ს არ ზღუდავს და ის, რაც ხდება, კერძო დავაა...
- როგორ არ ზღუდავს?! მთელი პროცესი, რაც “რუსთავი 2”-ის წინააღმდეგ მიმდინარეობს, სწორედაც ხელისუფლების მხრიდანაა წარმოებული. ძალიან მინდა, საზოგადოებამ გაიგოს, რომ არ შეიძლება, ვიღაცის მხარეს იყოს. შენ, საზოგადოება შენს მხარეს უნდა იყო და შენი პრინციპების სადარაჯოზე იდგე. როცა პრინციპს იმის გამო იცვლი, ესა თუ ის ტელევიზია მოგწონს თუ არა, დემოკრატია, სიტყვის თავისუფლება მთავრდება და სხვა ტიპის სახელმწიფოში აღმოვჩნდებით. ამიტომ, ნურავის მხარეს ნუ იქნებით! საკუთარი ინტერესი დაიცავით, რადგან ხელისუფლებამ ტელევიზია, რომელიც შეიძლება, მიუღებელი იყოს, არ შეზღუდოს!
- “მე-9 არხის” დახურვა მედიაზე ზეწოლა იყო?
- არა. “მე-9 არხის” დახურვის გადაწყვეტილება მფლობელმა მიიღო, ანუ ხელისუფლებას “მე-9 არხის” წინააღმდეგ სამართლებრივი პროცესი არ უწარმოებია... “რუსთავი 2”-თან დაკავშირებით კი, სხვა სიტუაციაა - საქართველოში ერთი ადამიანიც კი არ იტყვის, რომ ეს ტელევიზია ქიბარ ხალვაშის იყო - მასაც გადააბარეს. “რუსთავი 2” ჩემთვის ყველაზე მიუღებელი მაშინ იყო, როცა ხელისუფლების პროპაგანდას ეწეოდა და ამიტომ არ ვუყურებდი.
- დღეს უყურებთ?
- დიახ.
- რატომ?
- იმიტომ, რომ განსხვავებული და ოპოზიციური მოსაზრებები საინტერესოა. სხვათა შორის, “რუთავი 2”-ის ყურება ხელისუფლებაში მოსვლის მეორე დღიდან დავიწყე, რადგან საკუთარი ხელისუფლებისთვის სხვა თვალით შემეხედა.
- “რუსთავი 2”-ის სარედაქციო პოლიტიკა არც მაშინ გაბრაზებდათ?
- ზოგჯერ - კი, ზოგჯერ - არა, მაგრამ ეს ნორმალურია. მოვლენებს ყველა ერთი თვალით არ უყურებს, განსხვავებული თვალსაზრისები არსებობს და სახელმწიფო იმისთვის არსებობს, რომ ეს განსხვავებული თვალსაზრისები მივიღოთ. განსხვავებული თვალსაზრისის ადამიანები ერთმანეთს სიძულვილით კი არა, მხოლოდ კანონის ძალით უნდა ელაპარაკებოდნენ. ნებისმიერი დავა ლინჩის წესით კი არა, დამოუკიდებელი სასამართლოს მიერ უნდა წყდებოდეს. ვიდრე ამას არ გავიგებთ, სულ ამ ვნებათაღელვაში, წარსულსა და დაპირისპირებაში ვიქნებით. ზოგჯერ მგონია, რომ წარსულმა ჩაგვითრია და მომავალი გამოგვრჩა...
- რა ამის პასუხია, ქალბატონო ნინო და, ხომ არ ელით, რომ ერთ მშვენიერ, უფრო სწორად, არამშვენიერ დილას, ე.წ. ადმინისტრაციული საზღვარი თბილისის შემოსასვლელში დაგვხვდება?
- ძალიან ცუდი პროცესები მიდის. საერთოდ, ორ უკიდურესობაში ვართ: მიშა ყველაფერს აპროტესტებდა, ფეხებს აბაკუნებდა და რუსეთს ომს უცხადებდა. მხოლოდ აგვისტოს მოვლენებს არ ვგულისხმობ: ალბათ, გახსოვთ, მანამდე ანაკლიაში, რუსი ჯარისკაცები ყვირილით რომ გაყარა. ასეთი სხვა გაუგებარი სცენებიც გვინახავს. ახლა კი, გვეუბნებიან, მთავარია, გავიტრუნოთ, ჩუმად ვიყოთ და პროვოკაციას არ ავყვეთ, ეს ჩვენი დიდი მონაპოვარიაო. ამასობაში, საზღვარი ჩვენი სამშობლოს ცენტრისკენ იწევს...
- ამაზე “თავისუფალი დემოკრატები” რატომ არ ხმაურობთ?
- ჯერ ერთი, როგორ არ ვხმაურობთ?! მეორეც, ხელისუფლებაში არ ვართ, მაგრამ ვამბობ, მთავარია, პრინციპულები ვიყოთ. დიახ, ხელისუფლების პასიური საგარეო პოლიტიკა არ მოგვწონს - ძალიან პასიურია, თითქოს უნდა, რომ საქართველო მთელ მსოფლიოს დაავიწყოს. ხელისუფლება ძალიან აქტიური უნდა იყოს და ყველაფერზე განგაშს ტეხდეს, მთავრობის წარმომადგენლები აშშ-სა და ევროპის წამყვან ქვეყნებში უნდა ისხდნენ. შესაბამისად, ყველა საერთაშორისო დღის წესრიგში საქართველოც ისეთივე პრობლემა უნდა იყოს, როგორც - უკრაინაა. ისტერიული და პრინციპული პოლიტიკა ერთმანეთისგან უნდა გავმიჯნოთ. “ნაციონალებს” პრინციპული კი არა, ისტერიული პოლიტიკა ჰქონდათ, დღევანდელ ხელისუფლებას კი, უპრინციპო აქვს...
- “კაბელების საქმის” დაწყების საბაბი, პრინციპში, საგარეო პოლიტიკური კურსი გახდა...
- დიახ, მაშინ გაგვიჩნდა ეჭვი, რომ ქვეყნის ევროატლანტიკურ კურსს საფრთხე დაემუქრა.
- ეს ეჭვი დღესაც გაქვთ?
- ყოველ შემთხვევაში, არ გაგვბათილებია, თუმცა, დადასტურებულად არ ვამბობთ, რომ ეს ნამდვილად ასეა.
- თავის დროზე ეჭვი რატომ გაგიჩნდათ?
- იმიტომ, რომ თავდაცვის სამინისტროს თანამშრომლები დემონსტრაციულად მაშინ დაიჭირეს, როცა მინისტრი უცხოეთში მნიშვნელოვან მოლაპარაკებებზე იმყოფებოდა, თან დაურეკეს და ურჩიეს, რომ ხელშეკრულებაზე ხელი არ მოეწერა. ბევრი რამეა, რაც ეჭვს კი არ გვიფანტავს, არამედ, გვიღრმავებს...
- ქალბატონო ნინო, ისტორია მეორდება: პრეზიდენტი და პრემიერი ისევ გაერო-ში გამგზავრებაზე კინკლაობენ. ერთი წლის წინ, როცა ეს პრობლემა დადგა, “თავისუფალი დემოკრატები” სამთავრობო კოალიციაში იყავით. მაშინ როგორ ფიქრობდით და ახლა როგორ ფიქრობთ: პრეზიდენტი უნდა გაემგზავროს თუ პრემიერი?
- მტკივნეული თემაა... ყოველთვის ვფიქრობდი, რომ გაერო-ში პრეზიდენტი უნდა წავიდეს, რადგან კონსტიტუციით სახელმწიფოს მეთაურია. საერთოდ, ჩვენი პარტია პრეზიდენტის ინსტიტუტთან დაპირისპირებაში არასოდეს შესულა. ახლაც მიგვაჩნია, რომ თუკი ცივილიზებული ქვეყანა ვართ, უნდა მოილაპარაკონ, გაერო-ში ერთი დელეგაცია უნდა წავიდეს და ეს პრეზიდენტი უნდა იყოს, მით უმეტეს, თუ გავითვალისწინებთ, რომ შარშან პრემიერი იმყოფებოდა. მოკლედ, მთავარია, მოილაპარაკონ...
- და ბოლოს, “კაბელების საქმე” წინასაარჩევნო კამპანიაში რა როლს შეასრულებს?
- ვნახოთ, მოვლენები როგორ განვითარდება. ეს საქმე პოლიტიკისთვის არ დაგვიწყვია. ეს სამართლიანობის საქმეა.
- თუკი სასამართლო გამამტყუნებელ განაჩენს გამოიტანს, ვთქვათ, სტრასბურგში ხომ არ წახვალთ?
- აუცილებლად. ეს საქმე შავი ძაფით შეკერილია და, რა თქმა უნდა, ბოლომდე მივყვებით!
