31 იანვარს, საქართველოს პატრიოტთა ალიანსმა რუსთაველზე საპროტესტო აქცია გამართა... მოგვიანებით, აქციის მონაწილეებმა, რომელთა შორის ემზარ კვიციანიც იყო, პარლამენტისკენ გადაინაცვლეს და მთავარი მოთხოვნებიც გააჟღერეს _ ძალოვანი სტრუქტურების ,,ზონდერი' ნაციონალებისგან გაწმენდა, დამნაშავეების დასჯა, სამართლიანობის აღდგენა. უფრო კონკრეტული და საინტერესო მოთხოვნებით ხელისუფლებას პარტიის გენმდივანმა, ირმა ინაშვილმა მიმართა: ,,არანაირი კოჰაბიტაცია _ ყველა დამნაშავე ციხეში! წინა ხელისუფლების პირობებში, სიცოცხლეს 146 ახალგაზრდა გამოასალმეს. ახლახან, საკუთარი შვილის საფლავზე ააფეთქეს იური ვაზაგაშვილი. ამ ხელისუფლებამ კი ზურაბ ადეიშვილი გაუშვა, სააკაშვილი გაუშვა, ზოდელავა თბილისის ქუჩებში თავისუფლად დადის. ეს ადამიანები დამნაშავეები არიან და მათზე არაერთი კომპრომატი დევს. კიდევ ერთხელ მივმართავ ხელისუფლებას კითხვით: რატომ გაუშვით დამნაშავეები?.. ვიწყებთ იმ პირების გამოვლენას, რომლებიც ანტიტერორისტულ ცენტრში, კონტრდაზვერვის სამსახურში, შინაგან საქმეთა სამინისტროს სხვადასხვა დეპარტამენტში არიან მოკალათებულნი! ვინ ნიშნავს ამ ხალხს თანამდებობებზე, რატომ უგდებს ,,ოცნება' მათ ხელში მთავარ ბერკეტებს?!' ინაშვილის კითხვებზე ხელისუფლებიდან პასუხი, ცხადია, არავის გაუცია... აქცია ულტიმატუმისმაგვარი განცხადებით დასრულდა, თუ ჩვენი მოთხოვნები არ შესრულდება, მარტიდან რეგიონებში პერმანენტულ აქციებს დავიწყებთო... ,,ვერსია' ხელისუფლების პოზიციის მოსასმენად კოალიციისა და პარტია ,,ოცნების' ერთ-ერთ ლიდერს, ადამიანის უფლებათა დაცვის საპარლამენტო კომიტეტის თავმჯდომარის მოადგილე გედევან ფოფხაძეს დაუკავშირდა.      - აქციის მოთხოვნებიდან გამომდინარე, ერთის თქმა შემიძლია: თუ არსებობს საფუძვლიანი ინფორმაცია, რომ უშიშროებაში ვიღაც ისეთი მუშაობს, ვინც სისხლის სამართლის დანაშაული ჩაიდინა, რეაგირება უნდა მოჰყვეს. ასეთ თემებზე აქციებიც რომ არ დაიწყოს, ხელისუფლებას ადეკვატური რეაქცია უნდა ჰქონდეს. სხვა მხრივ, აქციაზე გამოთქმულ რაღაც მოთხოვნაზე, მით უმეტეს, ულტიმატუმზე, რეაგირება სავალდებულო ნამდვილად არ არის. პოლიტიკურმა ძალამ, რომელსაც თავისი პოზიცია აქვს, ჩვეულებრივი აქცია ჩაატარა - ესაა და ეს. ვფიქრობ, მიტინგზე კონკრეტული პოლიტიკური საკითხები საერთოდ არ უნდა წყდებოდეს - ეს არასოდეს მომწონდა. თუ ვინმე დამნაშავეა, ეს სამართლებრივი ფორმით უნდა დადასტურდეს და არა აქციით. 

- აქციის მთავარი მოთხოვნა სამართლიანობის აღდგენა და დამნაშავეების დასჯა იყო; ასევე იმ მოსამართლეების დათხოვნა, ვინც გახმაურებულ საქმეებზე არასწორი განა- ჩენი გამოიტანა. 
- თუ დადასტურდება, რომ ცალკეული მოსამართლეების გადაწყვეტილებები არასწორი, პოლიტიკურად მოტივირებული და დანაშაულებრივი იყო, სახელმწიფოს მხრიდან სამართლებრივი რეაგირება მართლაც უნდა მოჰყვეს, თუმცა ეს პროცესი სამართლებრივ ჩარჩოში უნდა მოექცეს. შეიძლება, ბევრი მოსამართლე არც მე მომწონს, მაგრამ სამართლებრივი ჩარჩოების დაცვა მაინც აუცილებელია. 

- სწორედ ამას გეკითხებით: სამართლებრივად, ეს პროცესი როგორ წარმოგიდგენიათ? 
- ნაციონალებმა ხალხი რომშეკრიბონ და მიტინგი მოაწყონ, ვინმე პოლიტიკიდან წავიდეს, რადგან ცუდი ძალაა და არ მოგვწონსო. ეს მოთხოვნა უნდა შევასრულოთ?! თუ მოთხოვნა სამართლიანია, შესაბამისი საფუძველიც უნდა ჰქონდეს. მიტინგზე ემოციური გამოსვლა პოლიტიკურ გადაწყვეტილებად და რეალობად ვერ იქცევა, თუმცა ამ აქციის მიმართ ისეთი დამოკიდებულება სულაც არ მაქვს, მერე რა, რომ ხალხი შეიკრიბა და რაღაც სისულელეს ითხოვდა-მეთქი. ეს დემოკრატიული პროცესია. მთავარია, არსებობდეს მტკიცებულებები სისხლის სამართლის დანაშაულზე და რეაგირებაც ამ შემთხვევაში იქნება. არასწორი იქნება, ვთქვა, არიქა, ხალხი შეიკრიბა, რაღაცას ითხოვს და შევასრულოთ-მეთქი. ქუჩის დემოკრატიის მომხრე არც ვყოფილვარ და არც ვიქნები. 

- აქციის ორგანიზატორების თქმით, იმ დამნაშავე ნაციონალების გვარები იციან, ვინც შსს-სა და სხვა სტრუქტურებში დღემდე მუშაობენ. რამეს არც ეს ინფორმაცია ნიშნავს? 
- ამ გვარებს მტკიცებულებები უნდა ერთვოდეს. ასე, მეც ვიცი ასეთი ადამიანები, ვინც სტრუქტურაში ნაცების დროს მუშაობდნენ და ახლაც იქ არიან. მეც მაქვს მათთან ადამიანური პრეტენზიები, მაგრამ ეს არაფერს ცვლის! 

- კი მაგრამ, თუ იცით, ვინ არიან და მათთან პრეტენზიები გაქვთ, ამის დამტკიცებას რაღა უნდა? 
- სწორედ ამაშია განსხვავება - მე ამ ადამიანებთან მორალური პრეტენზია მაქვს, მაგრამ მორალის გამო, სამსახურიდან გაშვების საკითხს ვერ დავაყენებ. ნაციონალების დროს ინსტიტუციები პოლიტიზებული იყო, ეს მორალურად გაუმართლებელია, მაგრამ ახლა რა ვქნა, ამის გამო პასუხი მთელ ინსტიტუციას ვაგებინო?! გვარების დასახელების შემთხვევაში, ამ ადამიანების გაშვებაშიც არ მივიღებ მონაწილეობას, რადგან უფლებამოსილება არ გამაჩნია. 

- აქციაზე ითქვა, რომ მოთხოვნების შეუსრულებლობის შემთხვევაში, მარტიდან რეგიონებშიც მასშტაბური გამოსვლები დაიწყება. ეს ვადამდელი არჩევნების წინაპირობა ხომ არ გახდება? 
- ზოგადად, აქციები და პროტესტის თავისუფლად გამოხატვა დემოკრატიის ნაწილია. ვარდების რევოლუციის დროსაც მიმაჩნდა, რომ პოლიტიკური პროცესი ქუჩიდან არ უნდა იცვლებოდეს. ამ შემთხვევაში, ხალხი შეიკრიბა და ის გააპროტესტა, რაც არ მოსწონს, რაც ჩემთვის სავსებით მისაღებია. ამ აქციის საერთო განწყობას რომ ვეთანხმებოდე, მისი მონაწილეც ვიქნებოდი. 

- გასაგებია, მაგრამ ნაციონალებისთვის მოსვლიდან 2 წელში აქციები არ მოუწყვიათ. ამიტომ გეკითხებით, წყალი ხომ არ შეგიდგათ? 
- აქციას როდის მოუწყობდნენ ნაციონალებს, ეს მარტო იმაზე არ იყო დამოკიდებული, იყვნენ თუ არა ისინი სამართლიანები, თუმცა ამ პოლიტიკურ ძალასთან პრეტენზიები მოსვლის პირველივე დღიდან მქონდა. 

- შეიძლება, მაგრამ მათთვის აქცია არ მოგიწყვიათ! 
- ჩვენ იმის რესურსი არ გვქონია, აქცია მოგვეწყო. 

- ინაშვილს აქვს რესურსი? ისე, ამბობენ, პატრიოტთა ალიანსს სწორედ ,,ქართული ოცნება' აფინანსებს. რა გამოდის - აქციას ნაციონალებს არ უწყობდით და ახლა საკუთარი რესურსით საკუთარ თავს უწყობთ? 
- ჯერ ერთი, მგონი, თავისუფალი რესურსი ახლა უფროა ქვეყანაში, ვიდრე ნაციონალების დროს იყო. რაც შეეხება ,,ოცნებისა' და პატრიოტთა ალიანსის ურთიერთობას, ასეთი თეორიების შემფასებლად არ გამოვდგები. ლოგიკურად, ამ ხმის გავრცელება იმას აწყობს, ვისაც ირმა ინაშვილის პოლიტიკური ძალა ამომრჩეველს ეცილება. ,,ოცნებას' რომ ამ პარტიის დაფინანსება აწყობდეს, მსგავსი სოციალური და პოლიტიკური შეხედულებები უნდა გვქონდეს, განსხვავებული პარტიის დაფინანსება რაში უნდა მაწყობდეს?! საზოგადოებაში არის რაღაც მოთხოვნა, რომელსაც თავისი გამჟღერებელი ჰყავს. ეს აბსოლუტურად დამოუკიდებელი პოლიტიკური პროცესია. ვინმეს დადანაშაულება, რომ ამ პროცესს ხელოვნურად ქმნის, არასწორია. ასე რომ, თქვენს მიერ ჩამოყალიბებულ თეორიას არ ვიზიარებ. 

- კითხვაზე არ მიპასუხეთ: ოპოზიციის დიდი ნაწილი ვადამდელ არჩევნებს ითხოვს და ამბობს, რომ ხალხშიც იგივე განწყობაა. ეს აქციები ვადამდელი არჩევნების წინაპირობა ხომ არაა? 
- თუ ვადამდელი არჩევნები ხალხისთვის იმის გარანტიაა, რომ მომავალი პარლამენტი უფრო სანდო იქნება, მაშინ ჩატარდეს ვადამდელი არჩევნები, პრობლემას ვერც ამაში ვხედავ. ზოგადად, რიგგარეშე არჩევნები პოლიტიკური კრიზისის დროს ინიშნება, ხალხის ქუჩაში გამოსვლა კი კრიზისს სულაც არ ნიშნავს. თუ რიგგარეშე არჩევნების დანიშვნა ქვეყანაში შექმნილი გამოუვალი პოლიტიკური ან სოციალური მდგომარეობის განმუხტვის საშუალებაა, ეს ნაბიჯი ამ შემთხვევაშია გამართლებული. უნდა საზოგადოებას ახალი პარლამენტი? - მაშინ ესეც უნდა უზრუნველვყოთ, თუმცა ეს ერთი, ან ორი პოლიტიკური ძალის გადასაწყვეტი კი არა, საზოგადოებრივი შეთანხმების საგანია. 

- რამდენი ადამიანი უნდა გამოვიდეს ქუჩაში, ეს მოთხოვნა რომ შეასრულოთ? 
- ამ მიზნის მისაღწევად ხალხის პროვოცირება არასწორია. თუ ვინმეს სურს, რომ პოლიტიკური შედეგის ამ გზით მიღწევა კარგია, ვერ დავეთანხმები. სასურველია, არჩევნების კონსტიტუციური ვადები დავიცვათ, მაგრამ თუ ამით ქვეყანაში პოლიტიკური კლიმატი გაჯანსაღდება, პრობლემას მართლა ვერ ვხედავ.