უმრავლესობის წევრი თამარ კორძაია აცხადებს, რომ მნიშვნელოვანია საგამოძოებო ორგანოებმა, დეპუტატებს დახურულ ფორმატში მიაწოდონ ინფორმაცია რა პერსპექტივა აქვს საქმის გამოძიებას და რამდენად არის შესაძლებელი გარკვეულ ვადებში გამოძიების დასრულება. დეპუტატი for.ge-სთან საუბრისას აცხადებს, რომ გამოძიების ინტერესებიდან გამომდინარე, შესაძლოა, ინფორმაციის ბოლომდე გამჟღავნება მიზანშეწონილი არ იყოს, მაგრამ თვლის, რომ პარლამენტის წევრებს მინიმალური ინფორმაცია მაინც უნდა მოეწოდოს უშუალოდ პროკურატურის მხრიდან, მამისა და შვილის გარდაცვალების საქმეებზე.

საქმის გამოძიების პროცესში მნიშვნელოვანია თუ არა საქმეში მონაწილე პირების უფლებამოსილების შეჩერება და რა კითხვები აქვს საგამოძიებო უწყებასთან? ამ საკითხებთან დაკავშირებით for.ge თამარ კორძაიას ესაუბრა.

თამარ კორძაია: არ შეიძლება 2-3 დღეში მოვითხოვოთ გამოძიების შედეგების დადება. თუმცა, განსხვავებული დამოკიდებულება მაქვს ზურაბ ვაზაგაშვილის საქმესთან დაკავშირებით, რომელზეც ამდენი წელია მიდის გამოძიება. 2006 წელს მოხდა ეს ფაქტი, ამ ხელისუფლებამ კი 2 წელი დაასრულა რაც ხელისუფლებაშია და ვფიქრობ, რომ საქმე უკვე დასრულებულიც უნდა იყოს. ამ საკითხის გამოძიებასთან დაკავშირებით ბევრად უფრო კრიტიკული ვიქნები, ვიდრე ბატონი იურის შემთხვევაში.

როგორც იურისტი ძალიან კარგად ვაცნობიერებ იმას, რომ აფეთქების შედეგად ძალიან რთული იქნება იქ დარჩენილი მტკიცებულებების მოძიება, რომელიც შეიძლება კვალზე მიდიოდეს. ასევე წარმოუდგენელია, რომ ვიღაცა ტელეფონში აგვარებდეს ისეთ საკითხებს, როგორ უნდა მოხდეს ადამიანის აფეთქება. ჩემი პოზიციიდან შემიძლია გითხრათ, რომ ძალზედ რთული იქნება ამ საქმის გამოძიება და ამიტომაც, არც ველოდები დღეს და ხვალ ამ საკითხზე გამოძიების შედეგებს.

მაგრამ, სწორედ იქედან გამომდინარე, რომ რაღაცა საგამოძიებო მოქმედებები უნდა მიმდინარეობდეს - რა პერსპექტივა აქვს ამ საქმეს, როგორ მიდის გამოძიება, როგორ ხედავს მომავალში ამ გამოძიების განვითარებას პროკურატურა? - აქედან გამომდინარე დავუჭირე მხარი იურიდიული კომიტეტზე პროკურატურის მოწვევას პარლამენტში.

როგორ მიდის გამოძიება და რა ვადებშია ამ საქმის გამოძიება შესაძლებელი, ეს არის ის საკითხი, რომელზეც საგამოძიებო ორგანოებმა შეიძლება ისაუბრონ თუნდაც დახურულ შეხვედრაზე?

- ბუნებრივია, მესმის, რომ საგამოძიებო ორგანოებმა შეიძლება დეტალებში არ ილაპარაკონ, თუნდაც დახურულ შეხვედრაზე, მაგრამ მნიშვნელოვანია რაღაცა მაინც გვითხრან. მხოლოდ და მხოლოდ სატელევიზო კომენტარების შედეგად არ უნდა იგებდეს პარლამენტის წევრი იმას, თუ რა ხდება ამ საკითხთან დაკავშირებით.

თქვენი კითხვები ეხება მხოლოდ იური ვაზაგაშვილის საქმეს, თუ კითხვები გაქვთ მისი შვილის საქმის გამოძიების ირგვლივ?

- ორივე ფაქტთან დაკავშირებით გვაქვს კითხვები, მაგრამ გაცილებით კრიტიკული ვართ ზურაბ ვაზაგაშვილის საქმეზე. იმიტომ, რომ ამდენი ხანი გავიდა და მოლოდინი ამ საქმესთან დაკავშირებით გაცილებით დიდია. როგორც გითხარით, რაღაცა სასწაული მოლოდინი მამის მკვლელობასთან დაკავშირებით არ მაქვს - ძალინ ცოტა დრო გავიდა და მკვლელობის ფორმა ისეთი იყო, რაც ძალიან ცოტა კვალს ტოვებს დანაშაულის ჩადენის ადგილას. ამიტომ მაქვს ამ საქმეზე ნაკლები მოლოდინი. თუმცა, რა ნაბიჯებს დგამს პროკურატურა, ზუსტად ეს გვანიტერესებს.

ამ საკითხზე გარკვეული აზრთა სხვასახვაობაა უმრავლესობაშიც. ეკა ბესელია ამბობს, რომ მიზანშეწონილი არაა, ამ თემებზე ისაუბროს პროკურატურამ, იგივეს აცხადებს გია ვოლსკი და თვლის, რომ სისხლის სამართლის საქმეებზე სხდომის გამართვა, ხშირ შემთხვევაში სპეკულაციის საგანი ხდება. რატომ არაა ამ საკითხზე ერთიანი პოზიცია უმრავლესობაში, რა ხდება?

- მე არ ვიცი რატომ არიან განსხვავებულ პოზიციაზე. მე უკვე გითხარით, რატომ მაქვს ეს პოზიცია. ჩვენ, პარლამენტის წევრებს გვაქვს ჩვენი პოზიცია და ვერ მივუთითებთ ერთმანეთს ვინ როგორ უნდა მოიქცეს. მე ვთვლი, რომ პარლამენტის წინაშე აღმასრულებელი ხელისუფლების ანგარიშვლადებულების ის მწირი ფორმაც კი, რაც არსებობს პროკურატურასთან დაკავშირებით, პარლამენტმა უნდა გამოიყენოს.

ადვოკატი ითხოვს გამოძიებისგან, რომ საქმის გამოძიებას სასწრაფოდ ჩამოშორდნენ ის ადამიანები, რომლებსაც პირდაპირი თუ ირიბი კავშირი ჰქონდათ ზურაბ ვაზაგაშილის საქმესთან. თუმცა, ჯერჯერობით, ისინი ისევ თანამდებობებზე რჩებიან. როგორ ფიქრობთ, რა მიზეზით არ ხდება ამ ადამიანებისთვის უფლებამოსილების შეჩერება?

- ეს საკითხი კანონით რეგულირდება. არსებობს აცილების წესები. რა თქმა უნდა, საქმის გამოძიებას უნდა ჩამოშორდნენ ის ადამიანები, რომლებსაც რაღაცა ფორმით შეიძლება კავშირი ჰქონდეთ საქმესთან და ამას პირდაპირ განსაზღვრავს კანონი. მე კარგად ვიცნობ ადვოკტს და ვთვლი, რომ ის მოთხოვნები, რასაც დაცვის მხარე აყენებს, საფუძვლიანია.

ეს გასაგებია, მაგრამ რატომ არ ხდება უფლებამოსილების შეჩერება, რა ხდება?

- ამ კითხვებზე პასუხი რომ მქონდეს, ამიტომ გვინდა მთავარ პროკურორთან შეხვედრა. ამ კითხვებზე ამ წუთას პასუხი არ მაქვს, ამიტომაც ვერ გეტყვით რა აფერხებს საქმის ბოლომდე მიყვანას და ა.შ. ამიტომაც ჩავთავლეთ საჭიროდ იურიდიული კომიტეტის წევრბემა, რომ მოსულიყვნენ და პირადად მათვის გვეკითხა, რა ხდება.

არ თვლით, რომ საქმის გამოუძიებლობა შესაძლოა საკადრო პოლიტიკის პრობლემაც იყოს?

- აქ ბევრ საკითხთან შეიძლება იყოს პრობლემა. მე არ მინდა მხოლოდ საკადრო საკითხებს მივაწერო ეს პრობლემა. პირველ რიგში, ძალიან ბევრი პრობლემა შეიქმნა იქიდან გამომდინარე, რომ 2006 წელს მომხდარ მკვლელობასთან დაკავშირებით იქნება უმარავი მასალა, შეიძლება რაღაცა კვალიც იყოს წაშლილი და უამრავი ხარვეზიც შეიძლება არსებობდეს.

მერწმუნეთ, წინა ხელისუფლებაში თუ ადგილი ჰქონდა საქმის გაყალბებას, მაშინ კვალსაც ძალიან გულმოდგინედ წაშლიდნენ. ამიტომ, ეს არაა მარტივად სამუშაო და მოსაგვარებელი თემები. ამას ემატება ადვოკატების და ოჯახის პრეტენზია, რომ ძველი თანამდებობის პირები, რომლებიც ამ სისხლის სამართლის საქმის გაყალბებაში იღებდნენ მონაწილეობას, ისევ თანამდებობებზე არიან და ეს პრეტენზია მაქვს მეც. ეს არის პრობლემების მთელი კომპლექსი, რომელსაც კომპლექსური მოგვარება სჭირდება.

P.S. შსს-სა და მთავარი პროკურატურის წარმომადგენლების პარლამენტში დახურულ სხდომაზე მოწვევას მიზანშეწონილად არ მიიჩნევენ ურავლესობის წევრები ეკა ბესელია და გია ვოლსკი. ჩვენ შევეცადეთ ამ საკითხთან დაკავშირებით, უმრავლესობის წევრების - გია ვოლსკის და მანანა კობახიძის პოზიცია მოგვესმინა, თუმცა ჩვენი სამდღიანი მცდელობის მიუხედავად, უმრავლესობის წევრმება ჩვენს სატელეფონო ზარს არ უპასუხეს.