საპარლამენტო უმრავლესობის წევრი, ზაქარია ქუცნაშვილი აცხადებს, რომ მისთვის ცნობილია ვინ არის პიროვნება, რომელზეც იური ვაზაგაშვილი საუბრობდა. ქუცნაშვილის თქმით, თუ ზურა ვაზაგაშვილის მკვლელობის საქმეში დადასტურდა ძალოვან უწყებებში გამოძიებისთვის ხელის შეშლის ფაქტი, ეს აუცილებლად გამოიწვევს მნიშვნელოვან საკადრო ცვლილებებს.

რა ინფორმაციას ფლობს საქმეში არსებული ახალი მოწმის შესახებ, ამ საკითხთან დაკავშირებით for.ge ზაქარია ქუცნაშვილს ესაუბრა.

თქვენ აცხადებთ, რომ იცით ვინ არის ის მოწმე, ვის შესახებაც საუბრობდა იური ვაზაგაშვილი. ვისგან გაქვთ ამ მოწმის შესახებ ინფორმაცია?

-18 იანვარს იყო ჩემი ბებიას სამოქალაქო პანაშვიდი, მოსული იყო ბატონი იური ვაზაგაშვილი და პირადად მომიყვა ამ მოწმის შესახებ - სად იმყოფება ეს მოწმე. ასე რომ, თუ იურას მკვლელების მიზანი იმაში მდგომარეობდა, რომ მისი მოკვლით დაეფარათ დანაშაული და არ ყოფილიყო ზურაბ ვაშაგაშვილის მკვლელობის გამოძიების მომთხოვნი პირი, ამ შემთხვევაში მინდა ვუთხრა მათ, რომ ეს მიზანი შეუსრულებადია. იმიტომ, რომ იურას მეგობრები ცოცხლები ვართ და მე პირადად ვიცი ვინ არის ეს პიროვნება, სად იმყოფება და რა ინფორმაციის მატარებელია.

თუ გითხრათ ვაზაგაშვილმა რა ინფორმციას ფლობს ეს მოწმე? დაცვის მხარე ამტკიცებს, რომ ეს არის მოწმე, რომელიც სრულიად ცვლის ხელისუფლების ოფიციალურ ვერსიას, მისი ჩვენებით იცვლება ამ საქმის მიმართულებაც...

- ჩვენ მას ვუწოდეთ მთავარი მოწმე. მთავარი მოწმე კი, ნიშნავს იმას, რომ ის ფლობს იმ სახის ინფორმაციას, რომელიც არსებითი ხასიათის არის. ის, რაც მოხდა 20 იანვარს, შეიძლება ორ მიზანს ემსახურებოდეს. ჩემი ვარაუდით, ვაზაგაშვილი ააფეთქეს იმის გამო, რომ დაეფარათ სხვა დანაშაული, ანუ ზურაბ ვაზაგაშვილის მკვლელობა და მეორე, იური ვაზაგაშვილი ააფეთქეს იმის გამო, რომ შეეშინებინათ საქართველოს საზოგადოება და გამოეწვიათ პოლიტიკური და სოციალური სტრუქტურების დესტაბილიზაცია.

ეს არის ორი განსხვავებული მიზანი. ალბათობა იმისა, რომ ამ ორი მიზნით მოქმედებდნენ, არსებობს, მაგრამ საკმაოდ დაბალი. აქედან გამომდინარე, პროკურატურამ როგორც დააკვალიფიცირა განზრახ მკვლელობა, ეს არის სწორი, იქამდე, სანამ არ იქნებიან დაკავებულნი კონკრეტული პირები და მათი დაკითხვისა და სხვა საგამოძიებო მოქმედებების შედეგად არ გაირკვევა მკვლელობის რეალური მიზანი.

იარკლი სესიაშვილმა არ გამორიცხა მუხლის გადაკვალიფიცირება, განზრახ მკვლელობა გადაკვალიფიცირდეს, როგორც ტერორისტული აქტი. ამ საკითხზე მსჯელობდა უმრავლესობა?

- ეს უმრავლესობის საქმე არაა. ჩვენ შეგვიძლია მხოლოდ ვარაუდი გამოვთქვათ. მე როგორც იურისტი ვამბობ, რომ ყველა დანაშაულს აქვს თავისი მიზანი. თუ მკვლელობა ჩადენილი იქნა სხვა დანაშაულის დაფარვის მიზნით, ეს არის განზრახ მკვლელობა. მაგრამ, თუ დანაშაული ან მკვლელობა ჩადენილი იქნა აფეთქების გზით საზოგადოების დაშინების მიზნით, მაშინ ეს არის ტერორისტული აქტი. აქედან გამომდინარე, მიზანი გავლენას ახდენს კვალიფიკაციაზე. სასჯელი კი ორივე დანაშაულზე ერთია და ეს არის მუდმივი პატიმრობა.

თქვენ მოითხოვეთ პარლამენტის დახურულ სხდომაზე მოგეწვიათ შსს-ს და პროკურატურის წარმომადგენლები. თუმცა, უმრავლესობა არ დაგეთანხმათ. ეკა ბესელია ამბობს, რომ მიზანშეწონილი არაა, ამ თემებზე ისაუბროს პროკურატურამ, იგივეს აცხადებს გია ვოლსკი და თვლის, რომ სისხლის სამართლის საქმეებზე სხდომის გამართვა, ხშირ შემთხვევაში, სპეკულაციის საგანი ხდება. რატომ არაა ამ საკითხზე ერთიანი უმრავლესობა?

- ეს ვოლსკის და ბესელიას უნდა ჰკითხოთ. საპარლამენტო კონტროლი გამოძიების შინაარსში ჩარევას კი არ ნიშნავს, საპარლამენტო კონტროლი, მათ შორის, მოითხოვს კანონმდებლობის აღსრულების კონტროლს. კანონმდებლობა კი ასეთია - გამოძიება უნდა იყოს გონივრულ ვადებში და საკადრო პოლიტიკა უნდა ექვემდებარებოდეს კანონზომიერაბას.

აქედან გამომდინარე, არსებობს სავსებით ლეგიტიმური კითხვები, რატომ დასჭირდა ორი წელი იმას, რომ ზურაბ ვაზაგაშილის საქმე მისულიყო რაღაცა კონდიციამდე? ასევე, - რატომ დასჭირდა ეს ამდენი პერიოდი იმ ადამიანების კადარებიდან დრობით ჩამოშორებას, ვისზეც საუბრობდა იური ვაზაგაშვილი? თუ იციან პასუხი ამ ბატონება, მაშინ უპასუხონ საზოგადოებას, ან ერთმა, ან მეორემ.

საკადრო პოლიტიკა ახსენეთ, რატომ დასჭირდა ეს დრო ამ საქმის გამოძიებას და რატომ არიან ეს ადამიანები ისევ თანამდებობებზე, ამ კითხვას სვამდა იური ვაზაგაშვილიც ორი წლის განმავლობაში და ღიად ამბობდა, რომ უმრავლესობის წევრები მას არ ეხმარებიან სამართლის დადგენაში. პარლამენტში იყო შს მინისტრი, იყო მთავარი პროკურორის მოადგილეც, როგორც უმრავლესობის წევრმა რატომ არ დაუსვით მათ ეს კითხვა?

- რაც შეეხება იმას - ზაქარია ქუცნაშვილი როგორ იყო ჩართული და რა კითხვებს სვამდა, ეს შეგიძლიათ ჰკითხოთ ოჯახის წევრებს, მის მეგობრებს და გეტყვიან. ასე რომ, ეგ შენიშვნა ზაქარიას არ ეხება. თუ აღმოჩნდა, რომ ძალოვან უწყებებში არიან პირები, ვინც ხელს აფარებენ მისი შვილის მკვლელებს, ამ შემთხვევაში, უკვე სხვა პროცესი წავა და მას მთელი რიგი სერიოზული ხასიათის საკადრო გადაწყვეტილებები უნდა მოყვეს.

გასაგებია, მაგრამ პარლამენტი რატომ ერთხელ მაინც არ დაინტერესდა ორი წლის განმავლობაში ამ საკითხით?

- ეს ჰკითხეთ შესაბამის თანამდებობის პირებს. მე არ ვარ არც პარლამენტის და არც უმრავლესობის სახელით მოლაპარაკე პირი. მე ვლაპარაკობ ჩემი სახელით. ეს შეკითხვები რომ მაქვს ამიტომაც მოვითხოვე ძალოვანი სტრუქტურის მოსვლა პარალამენტში. ეს არის ის საქმე, რომელიც, ჩვენი ვალია, რომ გამოვიძოთ.

თუ ვინმეს უნდოდა, რომ სამართლიანობის დადგენის სურვილი მოეკლა, იური ვაზაგაშვილის მკვლელობით ეს მიზანი არ უნდა იქნეს მიღწეული. მთავარი იდეალი რაც ჩვენ „ქართულმა ოცნებამ“ ხელისუფლებაში მოსვლისას განვაცხადეთ, ეს იყო ადამაინი, თუ ადამიანის სისცოცხლეს ვინმე ემუქრება, ის ემუქრება სახელმწიფოს. ამიტომ, ყველამ თავი დაანებოს ყალბ ღირებულებაზე სწორებას და გააკეთოს სწორება მთავარ ღირებულებაზე – ადამიანზე.