ხელისუფლებაში დაპირისპირების ახალი ტალღაა, უფრო სწორად, კარგად დავიწყებული ძველის გახსენება... ირაკლი ალასანია გახდება თუ არა მესამე პოლიტიკური ძალა, დღეს ბევრი ექსპერტი თუ პოლიტიკური ანალიტიკოსი საკუთარ მოსაზრებას აფიქსირებს. დიდი ნაწილი თვლის, რომ ის თანამდებობას დაემშვიდობება და ოპოზიციაში გადავა. თუმცა, ვინც ასე ფიქრობს, როგორც ჩანს, "ალასანიას ფაქტორს" კარგად არ იცნობს. ის საკუთარი ნებით არჩევნებამდე ორი წლით ადრე ხელისუფლებას არ ჩამოსცილდება. თუმცა, გახდება თუ არა ტროას ცხენი კოალიციის შიგნით, რომელიც პოლიტიკურ ტექტონიკურ ძვრებს მოახდენს, ამის ნიშნები უკვე სახეზეა. მას აქტიურად ლობირებს "რესპუბლიკური პარტია". დავით ბერძენიშვილი თავდაცვის უწყების ხუთი მაღალჩინოსნის დაკავებამდე ღიად დაუპირისპირდა ირაკლი ღარიბაშვილს და განაცხადა, - ხელისუფლების შიგნით არიან ადამიანები, ვინც უკვეთენ ალასანიას "რესპუბლიკელების" კრიტიკას და აქებენ ღარიბაშვილს. ეს უკვე პირველი სიგნალია თავდაცვის მინისტრის ირგვლივ მხარდამჭერების შემოკრების. უფრო საინტერესო იყო, "რესპუბლიკელი" პარლამენტის თავმჯდომარის, დავით უსუფაშვილის განცხადება: "როდესაც თავდაცვის მინისტრი საფრანგეთსა და გერმანიაშია, სწორი საქციელი არ არის პირველ ნიუსად თანამშრომლების დაკავების შესახებ შეიტყოს. მინდა დავიჯერო, რომ ვინმემ სპეციალურად გამოიტანა საჯაროდ თავდაცვის მინისტრის თანამშრომლების დაკავება მინისტრის გამგზავრების შემდეგ..." თავად მინისტრის პოზიცია გერმანიიდან დაბრუნების შემდეგ იყო მკაცრი, ალასანიამ განაცხადა, რომ მაღალჩინოსნების საქმეში სამართლებრივად დაჩაგვრის ელემენტები უკვე ჩანს: "ჩემთვის მნიშვნელოვანია, რომ ჩემმა ბიჭებმა თავი სამართლებრივად დაცულად იგრძნონ..."

პრემიერ-მინისტრმა ირაკლი ღარიბაშვილმა ტელეკომპანია "იმედზე" გადაცემა "რეაქციაში" ამ საკითხზე კომენტირებისას განაცხადა: "არსებობს კითხვა, რატომ გადაიხადა თავდაცვის სამინისტრომ კაბელებში 6,5 მილიონი, როცა სამუშაოები 2,5 მილიონი ჯდება. 4 მილიონი გაიფლანგა. დღის წესრიგში დადგება თუ არა მინისტრის პოლიტიკური პასუხისმგებლობა, ამაზე ვერაფერს გეტყვით, რადგან, უნდა დაველოდოთ გამოძიებას. მინისტრი ჩამოვა და პასუხს გასცემს კითხვებზე..." რამდენიმე დღის წინ გაიმართა პოლიტსაბჭოს სხდომა, რა საუბრები შედგა ღარიბაშვილსა და ალასანიას შორის, მოითხოვა თუ არა ალასანიამ გამოძიების დასრულებამდე პოსტიდან გადადგომა? რა უპასუხა პრემიერს საჯაროდ დასმულ კითხვაზე? იცოდა თუ არა ირაკლი ალასანიამ, რომ შესაძლოა, დამდგარიყო მისი უწყების მაღალჩინოსნების პასუხისმგებლობის საკითხი?

ამ და სხვა მნიშვნელოვან კითხვებზე "ქრონიკას" ფრაქცია "ქართული ოცნება - დემოკრატიული საქართველოს" ხელმძღვანელი გია ვოლსკი უპასუხებს...

- ირაკლი ალასანიას გაუჩნდა განცდა, რომ სამართლებრივად დაჩაგვრის ელემენტები და წინაპირობები შეიმჩნევა. როგორი იყო პოლიტსაბჭოზე მისი პოზიცია? მის უწყებაში მომხდარ გაფლანგვაზე იღებს თუ არა მინისტრი პასუხისმგებლობას?
- დაძაბულობა ყოველთვის არსებობს ადამიანებში, მით უმეტეს, მაშინ, როცა მაღალ პოზიციებზე დგანან ადამიანები, მე ვფიქრობ, დღეს არ არის იმის დრო, ესა თუ ის გამოთქმა კრიტიკულად შევაფასოთ. ეს უბრალო საქმე არ არის, როდესაც მაღალი თანამდებობის სამხედრო ჩინოსნებს აკავებენ შესაძლო კორუფციის ბრალდებით. ასე რომ, ვფიქრობ, ყველა პოლიტიკოსმა თავი უნდა შეიკავოს ემოციური განცხადებებისგან. 1-ლი ნოემბრის სხდომაზე მინისტრებთან ერთად, მათ შორის ირაკლი ალასანიასთანაც, შევთანხმდით დაველოდოთ გამოძიების შედეგებს.

- ბატონო გია, რამდენად მოულოდნელი იყო ალასანიასთვის მისი უწყების ჩინოვნიკების დაკავება?
- არ ვიცი, ზუსტად რა და როგორ იყო. ერთი რამ ვიცი, რომ ამ საკითხის შესწავლა თავდაცვის უწყებაში საკმაოდ დიდხანს მიმდინარეობდა და რა თქმა უნდა, ამის შესახებ ირაკლი ალასანიამ იცოდა. მაგრამ მან საბჭოს სხდომაზე დაადასტურა, რომ შინაგანი რწმენა ჰქონდა, მისი თანამშრომლები არ იქნებოდნენ გადაცდომაში მხილებულნი და კიდევ ერთხელ აღნიშნა, რომ მათი პატიოსნების ბოლომდე სჯერა... მე ვფიქრობ, მისი მხრიდან ასეთი პოზიცია სავსებით გამართლებულია, თუმცა მაინც გამოძიების შედეგებს უნდა დაველოდოთ. ამას თავად ირაკლიც ამბობს.

- "რესპუბლიკელები" აქტიურად იცავენ ირაკლი ალასანიას, თქვენი აზრით, რა პროცესები მიდის კოალიციაში?
- ამ იერარქიაში, რასაც კოალიცია ჰქვია, საპასუხისმგებლო თანამდებობა მიკავია, მე ვარ ფრაქციის თავმჯდომარე. ჩემი მხრიდან ისეთი განცხადების გაკეთება, რომელიც უპირისპირდება ან ერთ, ან მეორე პოზიციას, არ იქნება გამართლებული. ამ საკითხს გვერდს იმიტომ კი არ ვუვლი, რომ ასეთი ხასიათი მაქვს, ეს ჩემი სტილი არ არის, ჩვენ ყველანი ვართ ეროვნული უსაფრთხოებისა და სტაბილურობის გარანტორები, რასაც ყველა ვემსახურებით. ძირითადი ღერძიდან გადაცდომები გამოვლინდება ხოლმე ცალკეულ განცხადებებში, მაგრამ ვფიქრობ...

- პარლამენტის თავმჯდომარე დავით უსუფაშვილი აცხადებს, როდესაც თავდაცვის მინისტრი საფრანგეთსა და გერმანიაშია, სწორი საქციელი არ არის თანამშრომლების დაკავების შესახებ პირველ ნიუსად შეიტყოს... ვის ბოსტანში ისვრის კენჭს უსუფაშვილი?
- ვფიქრობ, ეს ის შემთხვევაა, როდესაც დავით უსუფაშვილი საუბრობს არა როგორც "რესპუბლიკური პარტიის" წარმომადგენელი, არამედ, როგორც პარლამენტის თავმჯდომარე, რომელიც მხარეებს მიუთითებს, როგორ შეიძლებოდა მისი ხედვით ამ საკითხთან დამოკიდებულება გამოხატულიყო, რათა ეს ძირითადი კურსი, რაზეც ზემოთ გესაუბრეთ, იყოს შენარჩუნებული. უსუფაშვილი საკმაოდ ღიად გამოდის ამ თემაზე, 1-ლი ნოემბრის პოლიტსაბჭოს სხდომაზეც მან ღიად ისაუბრა, რათა ძირითადი კურსი იქნას შენარჩუნებული, საზოგადოებამ უნდა იცოდეს ყველაფერი გამჭვირვალედ და მათ მითქმა-მოთქმის საფუძველი არ უნდა მივცეთ. ხალხმა უნდა იცოდეს, რას ფიქრობს ალასანია, პრემიერი ღარიბაშვილი, პარლამენტის თავმჯდომარე უსუფაშვილი, ამ შემთხვევაში მე ჩემს პასუხისმგებლობასაც ვგრძნობ, რომ მათი პოზიციებისა და დაპირისპირების შეფასება კი არ დავიწყო, არამედ ჩემი პირადი აზრი გამოვხატო ამასთან დაკავშირებით. ჩემი აზრი კი ასეთია, ჩვენ ერთხელ და სამუდამოდ უნდა გავიგოთ, რომ საგამოძიებო ორგანოს ვერავინ უბრძანებს, ვერც პრემიერ-მინისტრი, ვერც პრეზიდენტი და ვერც პარლამენტის თავმჯდომარე, რა პერიოდში რა ღონისძიებები უნდა გაატაროს. ასე რომ, პროკურატურამ გადაწყვიტა, რომ ეს დაკავება უნდა მომხდარიყო, რაც პოლიტიკურ კონიუნქტურაზე არ არის დამოკიდებული. სხვათა შორის, დასავლეთში ეს ცუდად არ ესმით და იციან, რომ შეიძლება ასეთი რამეები მოხდეს, მაგრამ მთავარი ნუ გვავიწყდება, გადაწყვეტილება მიიღო სასამართლომ. ესე იგი სასამართლომ ჩათვალა საჭიროდ აღმკვეთი ღონისძიებების შეფარდება და არავითარ პოლიტიკურ კონიუნქტურას ანგარიში არ გაუწია.

- პოლიტსაბჭოზე ირაკლი ალასანიამ თქვა, რომ გადადგება გამოძიების დასრულებამდე, როგორც ეს სოფლის მეურნეობის მინისტრმა დავით კირვალიძემ გააკეთა?
- არ ყოფილა მისი მხრიდან ასეთი განცხადება გაკეთებული, სოფლის მეურნეობა სხვა თემაა, თავდაცვის სამინისტრო სხვა სისტემაა... მინისტრის ასე გადადგომა ქვეყნისთვის კარგი არ არის. პოლიტსაბჭოს სხდომაზე ბევრი რამ ითქვა, მათ შორის, ბევრი პოზიტიურიც, მაგრამ მე არ მაქვს უფლება, დახურული სხდომის დეტალები გავამჟღავნო. საერთოდ, ალასანიას გადადგომის საკითხი არც დასმულა.
- გასაგებია, ირაკლი ალასანიას გადადგომა რა ტექტონიკურ ძვრებს გამოიწვევს თქვენს ხელისუფლებაში, არა იმიტომ, რომ ირაკლი მაგარი მინისტრია, არამედ მას ზურგს ამერიკის შეერთებული შტატები უმაგრებს...
- არა მგონია, დიდი ტექტონიკური ძვრა გამოიწვიოს, სახელმწიფო სტაბილურად დგას ფეხზე, ქვეყანას სჭირდება სტაბილურობა. ხალხს უნდა მივცეთ იმის მაგალითი, როგორ უნდა ვმოქმედებდეთ ამა თუ იმ შემთხვევაში სახელმწიფო მოღვაწეები. მთავარია, ემსახურო შენი ქვეყნის ინტერესებს.

- ეთანხმებით თუ არა ალასანიას შეფასებას, რომ თავდაცვის სამინისტროს მაღალჩინოსნების დაკავებით, ქვეყნის უსაფრთხოებამ დიდი დარტყმა მიიღო?
- მე არ ვეთანხმები ალასანიას ამ შეფასებას, შეიძლება მიეღო დარტყმა, თუკი ამ თემას მოჰყვებოდა არასწორი მოქმედებების კასკადი. ასეთი არასწორი ქმედებები კი არც პრემიერ-მინისტრს, არც ალასანიას და არც საგამოძიებო სტრუქტურას არ ჩაუდენია. ამ მოქმედებას რომ მოჰყოლოდა პოლიტიკური შინაარსის განცხადებები, თუნდაც პრემიერ-მინისტრის მხრიდან, რომელმაც საკმაოდ დაბალანსებულად შეაფასა შექმნილი ვითარება, მაშინ შეიძლება ამას მოჰყოლოდა დარტყმა.

- როგორ ხსნით ამერიკის ელჩის მყისიერ განცხადებას, რომელმაც დაიცვა ალასანია და მისი უწყება და განაცხადა, რომ ამერიკა კმაყოფილია მინისტრის მუშაობით. თანადგომა გამოუცხადა ალასანიას შვეიცარიის საელჩომაც.
- ირაკლი ალასანიასადმი ნდობა დააფიქსირა პრემიერ-მინისტრმა, ეს პოლიტსაბჭოზეც განაცხადა, შვეიცარიის ელჩის განცხადება საკმაოდ დაბალანსებული იყო, მან იმედი გამოთქვა, რომ ხარისხიანად ითანამშრომლებს მთელი თავდაცვის სამინისტრო გამოძიებასთან, პოლიტსაბჭოზე მყოფი პოლიტიკოსებისა და მათ შორის ჩემი სახელითაც ვაფიქსირებ, რომ ირაკლი ალასანიას მიმართ უნდობლობის არანაირი ელემენტი არ არსებობს.

- მაშინ მიპასუხეთ, რის საფუძველზე შევიდა ირაკლი ალასანიას უწყებაში საგამოძიებო სტრუქტურა, თუკი მის მიმართ არსებობდა ნდობა? თქვენი განცხადება ერთია, მაგრამ რეალობა - სხვა, ალასანიას უწყების ხუთი მაღალჩინოსანი დაკავებულია, მის მოადგილეს დაკითხვაზე იბარებენ. ესე იგი ალასანიას გუნდი რაღაცაში არ ენდობა, რის გამოც შეამოწმეს...
- როცა დიდ სამინისტროში როდესაც რაღაც პროცესები მიდის, რასაკვირველია, ყველაფერზე ხელმძღვანელია პასუხისმგებელი, მაგრამ არის თემები, რაზეც თავდაცვის მინისტრი თავის ფუნქციონალური დატვირვით, შეიძლება ახლოსაც არ იყოს კონკრეტული საქმის დეტალებთან.

- პრემიერ-მინისტრმა პოლიტსაბჭოს სხდომაზე ჰკითხა, რატომ გადაიხადა თავდაცვის სამინისტრომ კაბელებში 6,5 მილიონი, როცა სამუშაოები 2,5 მილიონი ჯდება?
- პოლიტსაბჭოს სხდომის დეტალებზე საუბარი მიზანშეწონილად არ მიმაჩნია...

- კარგით, მაშინ მიპასუხეთ "რესპუბლიკელების" ორპუნქტიან შეთავაზებაზე... ისინი მოითხოვენ, გადაწყვეტილებები მიიღებოდეს ერთობლივი შეთანხმებით და პასუხისმგებლობა სრულყოფილად გადანაწილდეს, ასევე მოითხოვენ, რომ კოალიციაში შემავალ პოლიტიკურ პარტიებს საკუთარი პოზიციების ღიად დაფიქსირების საშუალება მისცეთ, ეს მაშინ, როცა პარლამენტის თავმჯდომარე "რესპუბლიკური პარტიის" ლიდერია და სწორედ ის უნდა იყოს საპარლამენტო დემოკრატიის გარანტი. აგვიხსენით, რა ხდება, როდის აუკრძალეთ ვინმეს აზრის გამოთქმის უფლება და ხომ არ ითხოვენ "რესპუბლიკელები" აღმასრულებელი რგოლი უფრო მეტად იყოს წარმოდგენილი, როცა პასუხისმგებლობის სრულ გადანაწილებას მოითხოვენ?
- მე, როგორც პარტია "ქართული ოცნება - დემოკრატიული საქართველოს" ერთ-ერთი ხელმძღვანელი, ვთვლი, რომ ამ თემის განხილვაა საჭირო, არ მინდა "რესპუბლიკელების" პოზიციების საწინააღმდეგო აზრი გამოვხატო, იმიტომ, რომ ხალხს ეს სულაც არ სჭირდება, შეიძლება მე რასაც ვფიქრობ, ის რომ ვთქვა, ადამიანების გარკვეულ ნაწილს გული მოვფხანო, განსაკუთრებით მათ, ვინც "რესპუბლიკური პარტიის" მიმართ კრიტიკულად არის განწყობილი, მაგრამ ჩემმა ნათქვამმა შეიძლება, მეორე მხრივ, იმ ხალხის გაღიზიანება გამოიწვიოს, ვინც ჩვენს მიმართ უარყოფითად არიან განწყობილნი. იქამდე, სანამ ჩვენ ვართ მოკავშირეები კოალიციაში, ერთიც და მეორე მხარეც უნდა ეცადოს, კოალიციის მხარდამჭერები არ გავაღიზიანოთ. მეტიც, მხარდამჭერთა არმია გავზარდოთ, თუკი, მაგალითად, ვინმეს მე არ მოვწონვარ და მოსწონს ჩემი კოლეგა დავით ბერძენიშვილი, ის იმ კოალიციას მხარს უნდა უჭერდეს, სადაც მე ვარ, თუკი ამომრჩეველს ჩვენი კოალიციის წარმატების სურვილი აქვს. შეიძლება ახლა მე პრიმიტიულად აგიხსენით, მაგრამ ეს უნდა იყოს ძირითადი ფორმულა, რაზეც დგას ამ კოალიციის ერთობა. თუკი რამე წინადადება აქვს "რესპუბლიკურ პარტიას", კეთილი უნდა ინებოს და ამის თაობაზე ღიად ილაპარაკოს ჩვენთან. მივესალმები, რომ მათ აქვთ შემოთავაზება საკუთარი პოზიციის უფრო ღიად დაფიქსირების თაობაზე, მეც ღიად ვუპასუხებ რესპუბლიკელების ამ განცხადებას, - ბატონებო, გააჩნია, რა შემთხვევაში უნდა შეგეძლოთ საკუთარი პოზიციის დაფიქსირება!..

- დავით ბერძენიშვილი ღიად გადადის ხელისუფლებასთან დაპირისპირებაზე და აცხადებს, რომ ხელისუფლების შიგნიდან უკვეთენ "რესპუბლიკური პარტიის" და ალასანიას კრიტიკას და აქებენ ირაკლი ღარიბაშვილს. ეს არის ფაქტი, რომელსაც გვერდს ვერ ავუვლით... ტოვებენ "რესპუბლიკელები" კოალიციას?

- მე არ მომწონს მათი ასეთი განცხადებები და შესაბამისად, არ მინდა იგივე გავაკეთო, რაც არ მომწონს. ამ თემას უფრო ფილოსოფიურად შევხედავდი, გასაგებია, ჟურნალისტს რომ ნებისმიერი განცხადების სკანდალი აინტერესებს, სწორიც არის, რაც უფრო სკანდალურია მედია, მით უფრო მეტად ცდილობენ პოლიტიკოსები, სტაბილურობა შეინარჩუნონ. სწორედ მედიამ უნდა გამოაფხიზლოს პოლიტიკოსები, იმოქმედონ სწორად. ორშაბათს დათო ბერძენიშვილს ვეტყვი, არიან ადამიანები, ვინც აკრიტიკებს "რესპუბლიკურ პარტიას", თუმცა არიან ისეთები, ვინც ჩვენც გვაკრიტიკებს. მაგალითებსაც მოვუყვან, როცა ჩვენ გვაკრიტიკებენ და აქებენ "რესპუბლიკელებს". ასე რომ, ასეთი პროცესები არსებობს, ეს არის რეალობა და იარსებებს მომავალშიც.