"მე არ ვითხოვ სისხლისღვრას, მაგრამ "ქართული პარტია"  მზადაა ნებისმიერი რადიკალური ქმედებისათვის. აქ იგულისხმება აქციები, თუ საჭირო გახდა ბოლო ნაბიჯის გადადგმაც. ადამიანებს უფლება აქვთ, დაიცვან საკუთარი უფლებები. თუ კუდის და სოდის ოფიცრები მათ უსწორდებიან, ადეკვატური ზომით უნდა დაიცვან თავი და ეს შეიძლება იყოს იმავე ძალის პროპორციული, რასაც ისინი იყენებენ - ეს იქნება ხელკეტი თუ რამე სხვა საშუალება", - აცხადებს "ქართული პარტიის" თავმჯდომარე სოზარ სუბარი, რომელსაც სამომავლო გეგმებზე ვესაუბრეთ.

სოზარ სუბარი: უახლოესი ორი თვის გეგმა არის იმ ამოცანის შესრულება, რაც ყრილობაზე ითქვა. კერძოდ, პარტიის ძირითადი სტრუქტურის მშენებლობის დასრულება - ყველა რაიონში უნდა გვყავდეს წარმომადგენლები, ყველა საარჩევნო უბანზე მინიმუმ 5 აქტივისტი. აპრილის ბოლომდე ყველა რაიონს ვერ მოვიცავთ, თუმცა, უმრავლესობას დავფარავთ. პარალელურად ვატარებთ რაიონულ კონფერენციებს და ვარკვევთ, რამდენად შესრულდება დასახული გეგმა.

რა იქნება ორი თვის შემდეგ?

- ამას, ალბათ, ორი თვის შემდეგ გადავწყვეტთ. მთლიანობაში, როდესაც ვამბობთ, რომ ჩვენი სტრუქტურები ეფუძნება საარჩევნო უბნებს, ვგულისხმობთ იმას, რომ არჩევნებში ვაპირებთ გამარჯვებას. ოღონდ იმ შემთხვევაში, თუკი არჩევნები ისე ჩატარდება, როგორ აქამდე - გაყალბებული სიებით, უზარმაზარი ფინანსური რესურსების გამოყენებით, ამ შემთხვევაში სხვა ტიპის გამოწვევებისათვის ვიქნებით მზად. სხვა ტიპის გამოწვევებში ვგულისხმობ აქციებს, რევოლუციას, შეიძლება ეს საკითხიც დადგეს დღის წესრიგში.

ვითხოვთ, რომ არჩევნები უნდა ჩატარდეს კონსტიტუციურ ვადაში, ხშირად პრესაში არასწორად ხდება ჩემი ნათქვამის ინტერპრეტაცია, რომ მე ვითხოვ ვადამდელ არჩევნებს. ეს ტყუილია, რადგან არჩევნების კონსტიტუციური ვადა არის მიმდინარე წლის ოქტომბერი. შემდეგ პარლამენტი ხდება არალეგიტიმური. პარლამენტმა ახალ კონსტიტუციის მიღებით გაიმეორა ის, რაც გაკეთდა 2007 წელს, როდესაც გაიხანგრძლივა თავის უფლებამოსილება და ამას მოჰყვა ცნობილი გამოსვლებიც.

ახლაც იგივე პროცედურასთან გვაქვს საქმე. პარლამენტმა როგორც საკუთარ თავს, ასევე პრეზიდენტს, გაუზარდა საარჩევნო ვადა. თუ ამ დარღვევას არ გამოასწორებს ხელისუფლება, მაშინ ჩვენ გვაქვს უფლება, ვიმოქმედოთ ნებისმიერი გზით და ხალხი დაიბრუნებს ძალაუფლებას.

იქნებ, დააკონკრეტოთ, რა ვადების დარღვევაზე საუბრობთ...

- პარლამენტს უფლებამოსილების ვადა აქვს მიმდინარე წლის ოქტომბრამდე. პარლამენტს ვირჩევთ 4 წლით, პრეზიდენტს - 5 წლით. ჩავთვალოთ, რომ ლეგიტიმურად ავირჩიეთ. 4 წელს რომ გადასცდება პარლამენტი, უკვე არალეგიტიმურია. კონსტიტუცია ითვალისწინებს ამვადის გაგრძელებას, თუ არის საომარი ან საგანგებო მდგომარეობა. ამ შემთხვევაში კონსტიტუცია უფლებას აძლევს პარლამენტს, თავისიუფლებამოსილება განახორციელოს. კონსტიტუციის ახალ ვარიანტში წერია, რომ არჩევნები უნდა ჩატარდეს ოქტომბერში. თუ შევაერთებთ ამ ორ პუნქტს, რომ მხოლოდ ოქტომბერი და და მხოლოდ 4 წელი, არჩევნები უწევს წელს, რადგან მაისში რომ არჩევნები ჩავატაროთ, ესაა ვადის დარღვევაა. ასევე, წესით, პრეზიდენტის არჩევნები 2012 წლის ოქტომბერში უნდა ჩატარდეს. კონსტიტუციაში პირდაპირ ჩაწერეს, რომ პრეზიდენტი უნდა აირჩეს 2013 წელს, რაც ნიშნავს მისთვის ათი თვით უფლებამოსილების გახანგრძლივებას.

მაგრამ იმის მიხედვით, რასაც თქვენ ითხოვთ, პარლამენტს დააახლოებით 7-8 თვით უმცირდება უფლებამოსილების ვადა...

- პარლამენტს ვადა შეიძლება შეუმცირდეს სამი წლით და უფრო მეტითაც. პირველი ექვსი თვის შემდეგ პრეზიდენტს შეუძლია დაითხოვოს თუნდაც ბიუჯეტის დაუმტკიცებლობის გამო, შესაბამისად, აქ კონსტიტუციის დარღვევა უფრო მნიშვნელოვანია.

მე ასევე ვეთანხმები საარჩევნო გარემოს ცვლილებას და ოპოზიციური რვიანის ყველა მოთხოვნას. დავამატებდი მხოლოდ ორს - რომ ჩატარდეს ოქტომბერში არჩევნები და აქ არ უნდა იყოს განმსაზღვრელი, რამდენი პარტია იქნება ამისთვის მზად, მთავარია, კონსტიტუცია იყოს დაცული. ჩვენ ოქტომბრისათვის მზად ვიქნებით.

მეორე მოთხოვნაა, რომ სისხლის სამართლის კოდექსში შევიდეს ცვლილება, რაც გულისხმობს არჩევნების დროს ნებისმიერი ტიპის გაყალბებისათვის ძალიან გამკაცრდეს პასუხისმგებლობა დადანაშაულის ხანდაზმულობის ვადა მოიხსნას.

თუკი ოპოზიცია ვერ მიაღწევს დათმობებს ხელისუფლების მხრიდან, მე დარწმუნებული ვარ, რომ ამ პარტიების უმრავლესობა დადგება იმ პოზიციაზე, რაზეც ჩვენ ვართ. ნაწილი კი, რომელსაც ურჩევნია, რომ ხელისუფლებასთან ლაქუცით ტკბილი ლუკმა ჰქონდეს, გააგრძელებს ამ გზას.

თქვენ გჯერათ, რომ ხელისუფლება ოქტომბერშიჩაატარებს არჩევნებს?

- წინააღმდეგ შემთხვევაში ჩვენ გვაქვს უფლება, დავიბრუნოთ ის, რაც წაგვართვეს.

მაშინ პირდაპირ გკითხავთ, რევოლუციისთვისემზადებით?

- რევოლუციისთვის ვემზადებით, თუკი ხელისუფლება არ დათმობს იმას, რაც მიიტაცა.

ძალიან ხშირად მიდის საუბარი ეგვიპტის მოვლენების განმეორებაზე, შესაძლებელია?

- მე ვფიქრობ, რომ საქართველოში უნდა განმეორდეს ის, რაც მოხდა 2003 წელს.

დღეს არის 2003 წლის მოვლენების განმეორების რესურსი? თან თუ გავითვალისწინებთ, რომ ოპოზიცია რამდენიმე ბანაკადაა დაყოფილი...

- თქვენ ფიქრობთ, რომ 2003 წელს ოპოზიცია ერთიანი იყო?

ამ შემთხვევაში ვგულისხმობ პარტიათა უმრავლესობას, თუ პოლიტიკურ დაფას გადავხედავთ, ერთ ფლანგზეა ოპოზიციური რვიანი, მეორეზე - `ქართული პარტია~, ცალკე გზას მიუყვებიან ნინო ბურჯანაძე და `სახალხო კრება~...

- თქვენ არ იცით, იმ დანარჩენ რვა პარტიასთან ჩვენ რა ურთიერთობები გვაქვს და რა სახის დიალოგს ვაწარმოებთ. ნუ იმსჯელებთ ასე. მაშინ, როდესაც ჩვენ `ქართული პარტიის~ შექმნაზე ვლაპარაკობდით, ვერავინ იფიქრებდა, რომ მე და ეროსი, ან მე და ირაკლი დიალოგს ვაწარმოებდით.

ანუ `რვიანში~ შემავალ პარტიებთან მოლაპარაკებებსაწარმოებთ?

- რვა პარტიიდან კი არა, არამედ რვა პარტიასთან და კიდევ ცალკეულ სუბიექტებთან. ეს ჩვეულებრივი სამუშაო პროცესია. ამასთან, მხოლოდ რვა ოპოზიცური პარტია არ არის ოპოზიციური სპექტრი.

ძირითად საკითხს რომ დავუბრუნდეთ, მაინც მივდივართ აქციებისკენ და, სავარაუდოდ, ეს შემოდგომა იქნება?

- არ ვარ დარწმუნებული, რომ იქნება შემოდგომა. ეს შეიძლება იყოს გაზაფხული ან ზაფხული. როდესაც ვვარაუდობთ აპრილის ბოლოს პარტიული სტრუქტურის დასრულებას, ეს ნიშნავს, რომ ნებისმიერი აქტივობისათვის ვართ მზად. რა იქნება მოთხოვნები, ეს ხელისუფლების ქცევიდან გამოჩნდება, იქნება თუ არა ქვეყანაში სამართლის ნიშნები, სიტყვის თავისუფლება და ა.შ.

ჩვენ, ერთის მხრივ, ვლაპარაკობთ სამართლიან საარჩევნო გარემოზე, მაგრამ როგორ წარმოგიდგენიათ, სამართლიანი საარჩევნო გარემო იყოს იმ ქვეყანაში, სადაც ტელერადიოკომპანია `იმედს~ ართმევენ მფლობელს და შემდეგ გაურკვეველ პირებზე გადაფორმება ხდება? იმ ქვეყნაში, სადაც `რუსთავი 2~-ს ართმევენ ეროსი კიწმარიშვილს, შემდეგ გადასცემენ ქიბარ ხალვაშს, რომელიც ახლა პოლიტიკური დევნილია. ასეთ ქვეყნაში რა საარჩევნო გარემოზეა საუბარი?

ანუ ყველა გზა აქციებამდე მიდის?

- ბუნებრივია, იგივე რვიანის ფორმატში თუ რაიმეს მიაღწევენ, ეს დადებითი მოვლენა იქნება, მაგრამ არ ნიშნავს სამართლიან საარჩევნო გარემოს. კუდი და სოდი არჩევნებზე აქტიურობას არ შეწყვეტს, თუ ძალა არ დავანახეთ. ეს ძალა იქნება მუშტი, აქციები, ხალხის რისხვა, რომელიც დამოკლეს მახვილივით დაეკიდება ხელისუფლების თავზე.

თუმცა, თქვენი თანაგუნდელები აცხადებენ, რომ 50 ათასკაციანი `არმია~ უნდა შექმნან. ამ რაოდენობის ადამიანი საკმარისია ხელისუფლების შესაცვლელად?

- ამ შემთხვევაში ვგულისხმობთ პარტიულ რესურსს. ამის გარდა შეიძლება ქუჩაში გამოვიდეს გაცილებით ბევრი ადამიანი, რომელიც `ქართულ პარტიას~ არ უჭერს მხარს, მაგრამ ოპოზიციონერია.

რაც არ უნდა ისაუბრონ სააკაშვილის კარის ექსპერტებმა, რომ არაფერია საერთო ეგვიპტესა და საქართველოს შორის, ერთი რამ ცხადია - საერთაშორისო საზოგადოების დამოკიდებულება ავტოკრატების მიმართ შეიცვალა და ხალხის წინააღმდეგ სროლა დღეს ლეგიტიმური ვერ იქნება. მეორეც, თუ გამოვიდა 50 ათასი კაცი, მეორე დღეს მარტივად გამოვა 200 ათასი. ოქტომბერ-ნოემბერში როდესაც დავდიოდი პარტიული სტრუქტურების დასაფუძნებლად, შიშნარევი უიმედობა იყოს, დღეს ეს შიში გაქრა და მისი ადგილი დაიკავა გაბოროტებამ და ბრძოლოს ჟინმა. მე არ ვიტყვი, რომ ეს აბსოლუტური სურათია, მაგრამ ეს განწყობა არის.

საზოგადოებამ ძალიან ბევრი უშედეგო აქცია ნახა, თქვენ შემთხვევაში რა გარანტია არსებობს, რომ ისევ უშედეგოდ დაიშლებით?

- მაშინ ლიდერებმა ვერ მიიღეს გადაწყვეტილება უფრო რადიკალურ ზომებზე იმიტომ, რომ სისხლისღვრის შეეშინდათ და ისინი მოიქცნენ აბსოლუტურად სწორად. ამას ვამბობ სრული პასუხისმგებლობით, მიუხედავად იმისა, რომ შესაძლოა ომიც კი აგვერიდებინა და ბევრი სხვა უბედურებაც.

ახლა სისხლისღვრა გაცილებით ძნელია ხელისუფლების მხრიდან, საერთაშორისო საზოგადოების პოზიციის გათვალისწინებით. სააკაშვილს ამის გაკეთება გაუჭირდება, რადგან საქართველო უცხოეთიდან შემოსულ ფულზეა დამოკიდებული, რომლის შეწყვეტის შემთხვევაში ხელისუფლება ჩამოიშლება.

თქვენ მაინც თვლით, რომ ხელისუფლების შესაცვლელად მსხვერპლი გარდაუვალია?

- პირიქით, დღეს რაც ხდება არაბულ სახელმწიფოში, იმის გათვალისწინებით მგონია, რომ მსხვერპლი არ იქნება, რადგან ხელისუფლება ვერ წავა ამ ნაბიჯზე. მე არ ვითხოვ სისხლისღვრას, მაგრამ "ქართული პარტია" მზადაა ნებისმიერი რადიკალური ქმედებისათვის.

რა ქმედებებს გულისხმობთ, რომ დავაკონკრეტოთ...

- იგულისხმება აქციები, თუ საჭირო გახდა, ბოლო ნაბიჯის გადადგმაც. ადამიანებს უფლება აქვთ, დაიცვან საკუთარი უფლებები. თუ კუდის და სოდის ოფიცრები მათ უსწორდებიან, ადეკვატური ზომითუნდა დაიცვან თავი და ეს შეიძლება იყოს იმავე ძალის პროპორციული, რასაც ისინი იყენებენ -  ეს იქნება ხელკეტი თურამე სხვა საშუალება.

როგორ შეიძლება, რომ ხელისუფლება მშვიდობიანი გზით შეიცვალოს?

- შესაძლებელია, მაგრამ თქვენ მინდა შეგეკითხოთ - როგორ წარმოგიდგენიათ სააკაშვილის ხელისუფლებიდან წასვლა არჩევნების გზით, თუ ძალა არ დავანახეთ? წარმოგიდგენიათ, რომ კუდი და სოდი არ ივლიან არჩევნებზე, პატიმრების მშობლებს არ დაატერორებენ და უგულავა არ დაიქირავებს არჩევნებამდე 15 ათას ახალგაზრდას, რომ საკუთარ აქტივისტებად აქციოს? შესაბამისად, ძალა უნდა ვანახოთ. ძალის დემონსტრირება ზოგჯერ სისხლისღვრის თავიდან ასაცილებლად ხდება. ცივი ომის დროს ბირთვული იარაღი სწორედ შემაკავებელიფაქტორი იყო და არა - პირიქით.

იმ რადიკალური განცხადებების ფონზე, რომელიც კეთდება, პოლიტოლოგთა ნაწილმა განაცხადა, რომ ზოგიერთმა ლიდერმა კარიერა შესაძლოა, ციხეში დაასრულოს. არის ამის საფრთხე?

- დაპატიმრებები ხელისუფლებამ შეიძლება დაიწყოს, მაგრამ აქ ყველაფერი საზოგადოებაზეა დამოკიდებული. თუ იქნება მუხტი, არჩევნების მოახლოებასთან ერთად ეს არ მოხდება. რევოლუციას სოზარ სუბარი ვერ მოახდენს, ამას ხალხი სჭირდება.

ერთია, რომ ხელისუფლებას აკრიტიკებთ, მაგრამ ოპოზიცია რამდენად სწორი გზით მიდის?

- ხშირად ამბობენ, რომ საქართველოში ოპოზიცია არაა ძლიერი, მაგრამ ლიბიაში იყო? ავტორიტარული რეჟიმების დროს ოპოზიცია არ არსებობს. რაა ოპოზიციის სიძლიერე? თუ ინტელექტუალური კუთხით ავიღებთ, ოპოზიციაში გაცილებით მეტი ინტელექტი და გამოცდილებაა, ვიდრე ხელისუფლებაში. თუ შეგიძლიათ, გაიხსენოთ ათზე მეტი მოლაპარაკე თავი საქართველოს პარლამენტში? ვერ გაიხსენებთ.

ოპოზიცია რომ ვერ თანხმდება, ეს გამოწვეულია სხვადასხვა მიზეზებითაც. ზოგი ფიქრობს, რომ სააკაშვილი უნდა იყოს და თავად ხელისუფლებაში 2018 წელს ან უფრო გვიან მოვა. მე არ ვამბობ, რომ ოპოზიცია უნდა გაერთიანდეს, მაგრამ არის ჯგუფები, რომელთა ხედვა არის ერთიანი და შეთანხმება შესაძლებელია.

”ქართული პარტიის” კონკურენტად ”სახალხო კრებას” მოიაზრებთ?

- ჩვენ კონკურენტად მოვიაზრებთ ”ნამცმოძრაობას” და, მგონია, რომ ოპოზიციას უნდა ჰყავდეს ერთი მოწინააღმდეგე.