რატომ ეშინიათ “ნაციონალებს” გივი თარგამაძის ალაპარაკების და ვისზე გავა გამოძიება 3 ტონამდე თხევადი “ჰეროინით”

ციტატა: “შსს-ში ორი მიმართულება ერთმანეთთან იყო დაპირისპირებული, ანუ არსებობდა მერაბიშვილისა და კოდუა-თარგამაძის მიმართულებები. თუ გახსოვთ, 2010 წელს, მიწაში ჩამარხული “კოკაინის” ამოღებისას, ითქვა, რომ დაკავებულ ხუთკაციან ჯგუფს კავშირი ე.წ. კანონიერ ქურდ შაქრო კალაშოვთან ჰქონდა. არაოფიციალურად კი ცნობილი გახდა, რომ ამ ხუთკაციანი დაჯგუფების ერთ-ერთი წევრი, “კრიმინალური ავტორიტეტი” თენგიზ გურჩიანი ერეკლე კოდუასთან იყო დაკავშირებული... სწორედ ფულმა განაპირობა შსს-ს კლანების დაპირისპირება. მართალია, სააკაშვილი ცდილობდა, რომ ეს კონფლიქტი ფართო ასპარეზზე არ გამოსულიყო, მაგრამ საქმე იქამდეც კი მივიდა, რომ დათა ახალაიამ, როგორც მაშინ ითქვა, კოდუას ესროლა და დაჭრა. საერთოდ, დეპარტამენტის უფროსები ერთმანეთს სასიკვდილოდ სამსახურეობრივ ნიადაგზე არ იმეტებენ. ეს ინციდენტი, დარწმუნებული ვარ, სწორედ იმ ფულისა და შავი ბიზნესის გამო მოხდა, რომელშიც ყველა მხარე იყო ჩართული”.

რამდენიმე დღის წინ, ქართველმა სამართალდამცავებმა უპრეცედენტო სპეცოპერაცია ჩაატარეს - 3 ტონამდე თხევადი “ჰეროინი” ამოიღეს. ოფიციალური ინფორმაციით, ავტომობილი, რომელიც 93 ერთეული 30-კილოგრამიანი კასრით იყო დატვირთული, აზერბაიჯანიდან, საქართველოს გავლით, თურქეთის მიმართულებით მოძრაობდა. შსს-ს ინფორმაციითვე, საქმე ნარკოტიკული საშუალების უკანონო ტრანზიტით საერთაშორისო გადაზიდვის ფაქტზე აღიძრა. ასევე, ცნობილია, რომ პოლიციამ საქართველოს ორი მოქალაქე დააკავა... უშიშროების თადარიგის პოლკოვნიკი, უსაფრთხოების ექსპერტი კონსტანტინე ფორჩხიძე “ქართულ სიტყვასთან” საუბრისას ორი თვის წინ, სომხეთში, ასევე, დიდი ოდენობით ნარკოტიკის დაკავებას იხსენებს, რა დროსაც ქართველი მძღოლი დააკავეს და აცხადებს, რომ ეს ორი ფაქტი შესაძლოა, ერთმანეთთან იყოს დაკავშირებული. ამასთან, ფორჩხიძე ამბობს, რომ ნარკოტრაფიკი იარაღის უკანონო ბიზნესის განშტოებაა. შესაბამისად, ქართველი სპეცსამსახურელი ეჭვობს, რომ 3 ტონამდე თხევადი “ჰეროინის” კვალი შესაძლოა, იარაღის იმ უკანონო ვაჭრობამდე მივიდეს, რომელსაც “ნაცმოძრაობის” ლიდერები აწარმოებდნენ და რომლის შესახებაც “ქართულ სიტყვაში” არაერთი დოკუმენტური მასალა გამოქვეყნდა. სხვათა შორის, 2010 წელს, სააკაშვილის ხელისუფლების ხერხემალმა, ამჟამად პატიმრობაში მყოფმა შს ყოფილმა მინისტრმა და, ასევე, ყოფილმა პრემიერმა ივანე მერაბიშვილმა დიდი ზარ-ზეიმით გვამცო, რომ “კოკაინის” გადამტანი ხუთკაციანი ჯგუფი დააკავა, რომელსაც ორგანიზებას ე.წ. კანონიერი ქურდი შაქრო კალაშოვი უწევდა. არაოფიციალურად კი ითქვა, რომ ამ ჯფუფის ერთ-ერთ წევრს, ვინმე თენგიზ გურჩიანს კავშირი პოლიციის იმჟამინდელ მაღალჩინოსან ერეკლე კოდუასთან ჰქონდა. უშიშროების თადარიგის პოლკოვნიკი 90 კილოგრამი კოლუმბიური “კოკაინის” საქმეზე საუბრისას ამბობს, რომ მაშინ ყველაფერი ეს “ნაციონალურ კლანებს” შორის გარჩევებს უკავშირდებოდა... რა ხდება დღეს, რატომ უნდა დაინტერესდეს გამოძიება გადამზიდავი კომპანიებით და ვისი ალაპარაკების უნდა ეშინოდეს ყველაზე მეტად ყოფილ მმართველ გუნდს? - “ქართული სიტყვა” აგრძელებს სკანდალური ინტერვიუების ციკლს მერაბიშვილის მიერ სპეცსამსახურიდან გაგდებულ კონსტანტინე ფორჩხიძესთან:

- დიდი რაოდენობით ნარკოტიკი მე-20 საუკუნის 90-იან წლებშიც ამოიღეს, მაგრამ მაშინ საუბარი არც “ჰეროინზე” იყო და არც - “კოკაინზე”. საერთოდ, ჩვენს, ასე ვთქვათ, არეალში, ანუ ახლო აღმოსავლეთსა და კავკასიაში “კოკაინი” იშვიათობაა და დიდი რაოდენობით “კოკაინი” ერთადერთხელ, 2010 წელს ამოიღეს... ჩვენთან ძირითადად ავღანური ნარკოტიკი ტრიალებს...

- ნარკოტიკი ირანშიც იწარმოება?

- ნაკლებად, რადგან ირანი ფუნდამენტალისტური ქვეყანაა, ფუნდამენტალისტური ისლამი კი, ნარკოტიკის მხოლოდ მიღებას კი არა, წარმოებასაც კრძალავს, დასჯის მეთოდებიც სასტიკია...

90-იან წლებში, თუ არ ვცდები, ჯემალ გახოკიძის უშიშროების მინისტრობისას, საქართველოს ტერიტორიაზე “მარიხუანის” დიდმა პარტიამ გაიარა, რომელიც თურქეთში დაკავეს.

- ქართველებმა დააკავეს?

- დიახ, ქართველებმა, თურქ სამართალდამცავებთან ერთად. კარგად მახსოვს, ამ ოპერაციას დიდი გამოხმაურება მხოლოდ პოსტსაბჭოთა სივრცეში კი არა, დასავლეთშიც მოჰყვა, მით უმეტეს, რომ ეს ქართველი და თურქი სპეცსამსახურების თანამშრომლობის პირველი შემთხვევა იყო. ამის შემდეგ, ნარკოტრანზიტის კიდევ რამდენიმე ფაქტი გამოვლინდა, მაგრამ ამხელა, ასე ვთქვათ, ტვირთთან შეხება ქართველ სამართალდამცავებს ხშირად არ აქვთ.

სხვათა შორის, წინა ინტერვიუებშიც გითხარით, რომ დაახლოებით, ორი თვის წინ, სომხეთში დიდი რაოდენობით ნარკოტიკი ამოიღეს, სადაც ანალოგიური სქემა მუშაობდა. აღსანიშნავია, რომ სომხეთში დაკავებული სატვირთო მანქანის მძღოლი, ვინმე ავთანდილ მარტიაშვილი იყო.

- სომხეთში დაკავებულ ნარკოტიკს საქართველოში ამოღებულ თხევად “ჰეროინს” რატომ უკავშირებთ?

- ყველაფერი ეს ნიშანია, თუმცა ვიდრე დეტალებზე გადავალ, მინდა, ქართველ სამართალდამცავებს მადლობა გადავუხადო, რადგან ამ რაოდენობის ნარკოტიკის ამოღება საერთაშორისო დონის სპეცოპერაციაა და ეს იმაზე მიანიშნებს, რომ ქართულ სპეცსამსახურებში პროფესიონალები ჯერ კიდევ მუშაობენ. სხვათა შორის, 3 ტონამდე თხევადი “ჰეროინის” ღირებულება შავ ბაზარზე, იცით, რამდენია? - რამდენიმე ათეული მილიონი.

- როგორც ჩანს, საქართველო ნარკოტრანზიტია, მაგრამ “წამალი” საიდან მოდის და სად მიდის?

- დიახ, საქართველო ტრანზიტია და უნდა ვივარაუდოთ, რომ ეს ირანზე გამავალი მარშრუტია.

- ანუ, ნარკოტიკი ირანიდან მოდის?

- არა, ავღანეთიდან ნარკოტიკი ჯერ ირანში მიდის, მერე - აზერბაიჯანში, აზერბაიჯანიდან - საქართველოში. საქართველოდან კი, ორი გზა არსებობს: ერთი რუსეთში მიდის, მეორე - თურქეთში. ამ შემთხვევაში, საუბარია, რომ ნარკოტიკი თურქეთში მიდიოდა, თუმცა სიმართლე გითხრათ, არ მჯერა, რომ თურქეთისთვის განკუთვნილი ტვირთი იყო. შეიძლება, მარშრუტში ასე ეწერა, მაგრამ ვფიქრობ, რომ თხევადი “ჰეროინი” რუსეთში მიდიოდა... თურქეთიც ტრანზიტული ქვეყანაა.

გავრცელებული ინფორმაციით, საქმეში გერმანული გადამზიდავი კომპანია ფიგურირებს და, როგორც ვიცი, პროდუქტის დასახელებაც ქართულია - ავტომანქანა თითქოს “ქართული საპნით” თუ მსგავსი დასახელების ტვირთით იყო დატვირთული. ამიტომ, ამ ნარკოტრანზიტის ფესვი საქართველოშიც უნდა ვეძებოთ. საერთოდ, ყველა გადამზიდავი კომპანია ოპერატიული მეთვალყურეობის ობიექტი უნდა იყოს.

- რატომ?

- იმიტომ, რომ იარაღის უკანონო ბიზნესშიც სწორედ გადამზიდავი კომპანიებია ჩართული და წინა ინტერვიუებში რამდენიმე დავასახელე კიდეც.

- თუ არ ვცდები, ამ გადამზიდავი კომპანიებიდან ერთ-ერთი ვანო მერაბიშვილის ნათესავის საკუთრებაა, არა?

- დიახ, ერთი გადამზიდავი კომპანია ვანო მერაბიშვილთანაა დაკავშირებული, მეორე კი, - თავდაცვის სამინისტროს ყოფილ მაღალჩინოსნებთან. ამ მაღალჩინოსნებიდან ერთი დღესაც მაღალ თანამდებობაზეა და ამით გამოძიება უნდა დაინტერესდეს... სიტყვამ მოიტანა და, დარწმუნებული ვარ, რომ იარაღის უკანონო ვაჭრობასთან დაკავშირებით, რის შესახებაც “ქართულ სიტყვაში” ამდენი თვეა, ვსაუბრობ, გამოძიება აუცილებლად დაიწყება.

რაც შეეხება გადამზიდავ კომპანიებს, ოპერატიული მუშაკები ამ კომპანიების ყველა კავშირს არკვევენ, რადგან როცა გადამზიდავი კომპანიის სატრანსპორტო საშუალება ნარკოტრეფიკშია ჩართული, ეს იმას ნიშნავს, რომ საქმე ნარკოტრაფიკის კარგად ჩამოყალიბებულ სატრანზიტო სქემასთან გვაქვს. სხვათა შორის, არც ისაა გამორიცხული, რომ საუბარი ბარტერზე იყოს.

- რას გულისხმობთ?

- ამ მარშრუტით, აზიაში შეიძლება, იარაღი მიდის, აზიიდან კი, რუსეთში ნარკოტიკი შეაქვთ.

- ბატონო კოტე, არსებობის უფლება ნებისმიერ ვერსიას აქვს, მით უმეტეს, თუკი ამ ვერსიას თქვენ, უშიშროების თადარიგის პოლკოვნიკი უშვებთ... ისე, ხომ არ გგონიათ, რომ ამხელა ნარკოტრანზიტის გამოვლენა იარაღით უკანონო ვაჭრობის გამოძიების დაწყების წინაპირობაა?

- დიახ, ეს გარკვეული მესიჯი და არაპირდაპირი გზაა, რომელიც საბოლოოდ, იარაღით უკანონო ვაჭრობასთან მივა.

- თუკი ასეა, გამოდის, რომ ქართული სახელმწიფო დიდ საერთაშორისო კრიმინალურ სინდიკატს უპირისპირდება...

- ასეა... ქართველმა სამართალდამცავებმა, პრაქტიკულად, “კანალების” გადაკეტვა დაიწყეს, რაც იმას ნიშნავს, რომ შემდგომში, ასეთი საქმიანობა დროზე გამოვლენილი და აღკვეთილი იქნება.

- ნარკოტრაფიკისა და იარაღის უკანონო ბიზნესის კავშირებს თუ გავყვებით, ჩიხში შევალთ და აი, რატომ: 2010 წელს, მიწაში ჩამარხული 90 კილოგრამი კოლუმბიური “კოკაინის” გამოვლენით, “ნაციონალურმა” ხელისუფლებამ საკუთარ თავს დაარტყა?

- ეს კლანებს შორის გარჩევა იყო...

- მოდით, თემა უფრო გაშალეთ...

- კარგად მოგეხსენებათ, რომ შსს-ში ორი მიმართულება ერთმანეთთან იყო დაპირისპირებული, ანუ არსებობდა მერაბიშვილისა და კოდუა-თარგამაძის მიმართულებები. თუ გახსოვთ, 2010 წელს, მიწაში ჩამარხული “კოკაინის” ამოღებისას, ითქვა, რომ დაკავებულ ხუთკაციან ჯგუფს კავშირი ე.წ. კანონიერ ქურდ შაქრო კალაშოვთან ჰქონდა. არაოფიციალურად კი ცნობილი გახდა, რომ ამ ხუთკაციანი დაჯგუფების ერთ-ერთი წევრი, “კრიმინალური ავტორიტეტი” თენგიზ გურჩიანი ერეკლე კოდუასთან იყო დაკავშირებული. როგორც დოკუმენტებით ირკვევა, ნარკოტიკებით ვაჭრობასაც ის ლობირებს, ვინც იარაღის უანონო ბიზნესშია ჩართული. სხვათა შორის, წინა ინტერვიუში, შაქრო კალაშოვისა და იარაღით მოვაჭრე ნარკობარონების ურთიერთობაზე ვრცლად ვისაუბრე...

- 2012 წლის პირველ ოქტომბრამდე, საქართველოში იარაღისა და შესაბამისად, ნარკობიზნესს ვინ ლობირებდა?

- ვინ და, - უმაღლესი ხელისუფალი, ანუ მიხეილ სააკაშვილი და “უკრსპეცექსპორტის” ყოფილ ხელმძღვანელთან, ბონდარჩუკთან საუბრისას აღიარა კიდეც, რომ მოწადინებული იყო, საქართველოში იარაღი შემოსულიყო...

- სხვათა შორის, 90 კილოგრამი კოლუმბიური “კოკაინის” ამოღებიდან მალევე, კოდუა, ასე ვთქვათ, ჩამოალაბორანტეს, ანუ “წამალი” და მიწაში ჩამარხული 1,7 მილიონი ევრო წმინდა კლანური დაპირისპირება იყო?

- რა თქმა უნდა, თან ისეთი დეტალებიც გამოიკვეთა, რაც ფულის გადანაწილებას ეხებოდა. სწორედ ფულმა განაპირობა შსს-ს კლანების დაპირისპირება. მართალია, სააკაშვილი ცდილობდა, რომ ეს კონფლიქტი ფართო ასპარეზზე არ გამოსულიყო, მაგრამ ალბათ, გახსოვთ, საქმე იქამდეც კი მივიდა, რომ დათა ახალაიამ, როგორც მაშინ ითქვა, კოდუას ესროლა და დაჭრა. საერთოდ, დეპარტამენტის უფროსები ერთმანეთს სასიკვდილოდ სამსახურეობრივ ნიადაგზე არ იმეტებენ. ეს ინციდენტი, დარწმუნებული ვარ, სწორედ იმ ფულისა და შავი ბიზნესის გამო მოხდა, რომელშიც ყველა მხარე იყო ჩართული.

- სამ ტონამდე თხევადი “კოკაინის” გამოძიების კვალი შეიძლება, დაპატიმრებულ “ნაცლიდერებთან” მივიდეს და ვთქვათ, ვანო მერაბიშვილს, როგორც ნარკოტრაფიკის ლობისტს, ბრალი დაუმძიმდეს?

- პირდაპირ ვერ ვიტყვი, რომ ნარკოტრაფიკს მერაბიშვილი ლობირებდა, მაგრამ ჩვეულებრივი პრაქტიკაა: როცა ქვეყანაზე ამდენი ნარკოტიკი გადის, ამ ქვეყნის საზღვარზე და ძალოვანებში ლობისტები უნდა გყავდეს, თან ნუ დაგავიწყდება, თუ როგორ იყო საქართველოს შსს-ს მაშინ მოწყობილი, როცა მინისტრი მერაბიშვილი გახლდათ.

- ვის შეეძლო 3 ტონამდე თხევადი “კოკაინის” “ჩაშვება”?

- ეს “ჩაშვების” კი არა, კარგი ოპერატიული მუშაობის შედეგია - ნარკოტიკის ამხელა პარტიას ვერ ამოიღებ, თუ შესაბამისი წინმსწრები ინფორმაცია არ გაქვს და ამ ინფორმაციას არ დაამუშავებ. მოკლედ, როგორც ჩანს, წინასწარი ინფორმაცია არსებობდა, რომელიც დამუშავდა და შესაბამისი ღონისძიებაც გატარდა, რაც ქართული სპეცსამსახურების დიდი პლიუსია, რომელიც ჩვენს დასავლელ მეგობრებს შეუმჩნეველი არ დარჩებათ.

- შეიძლება, ჩავთვალოთ, რომ “ნაცმოძრაობის” შავი ფულით დაფინანსების კიდევ ერთი გზა გადაიკეტა?

- შესაძლოა, ასეცაა... პირდაპირ ვერ ვიტყვი, რომ ეს ფული “ნაცმოძრაობასთან” მიდიოდა, თუმცა გამოძიებას ვურჩევ, გადამზიდავ კომპანიებს კარგად ჩაჰყვეს, ძალოვან სტრუქტურებთან მათი კავშირები შეისწავლოს და ისიც გაარკვიოს, ეს გერმანული კომპანია იმ გადამზიდავებთან, რომლებიც იარაღის ტრაფიკში არიან ჩართულნი, რა კავშირშია.

- მკითხველს რომ გავახსენოთ, ეს კომპანიებიც გერმანულია?

- არა, ეს უკრაინაში დარეგისტრირებული რუსული კომპანიების შვილობილი კომპანიები არიან და წესდებებში უწერიათ, რომ აღმოსავლეთ ევროპაში, ამიერკავკასიაში, ავღანეთში, ირანსა და ერაყში ოპერირებენ. საერთოდ, ეს წლების განმავლობაში შექმნილი სქემაა, თორემ ნარკომოვაჭრეები სულელები არ არიან, რომ ნარკოტიკის გადაზიდვა “გაუჭრელ კანალზე” დაიწყონ.

- სხვათა შორის, “ნაცმოძრაობა” ნარკომანიას ხმალამოღებული ებრძოდა...

- ეს ფასადური ბრძოლა იყო, თორემ გაიხსენეთ, “ნაცმოძრაობა” ნარკომომხმარებლებს როგორ მართავდა და ყველაფერი ნათელი გახდება.

- 2005 თუ 2006 წელს, თბილისში კამპანია დაიწყო - ადამიანები ცალკეული სუბიექტების სახლებზე წარწერებს აკეთებდნენ: “აქ ცხოვრობს ნარკობარიგა!” თავის დროზე ითქვა, რომ ამ კამპანიის უკან “ნაციონალები” იდგნენ...

- ეს კამპანია მეც მახსოვს, მაგრამ ამის უკან სხვა დინებები იყო...

- “ნარკობარიგების გამოვლენის” კამპანია ვიღაცების “დავერბოვკებას” ხომ არ ემსახურებოდა, ან ერთი კლანი მეორის ჩაძირვას ხომ არ ცდილობდა?

- გამორიცხული არაფერია... სხვათა შორის, ყველა არჩევნების წინ, “ნაცმოძრაობა” ნარკომანებს, რომლებიც აღრიცხვაზე იყვნენ, აიძულებდა, რომ მათ ოჯახებს არჩევნებზე, მინიმუმ, 100-100 ხმა მიეტანათ, ანუ ნარკომანიასთან ბრძოლას “ნაციონალები” პოლიტიკურ ასპექტში იყენებდნენ.

- ბატონო კონსტანტინე, რა ამის პასუხია და, ადასტურებთ, რომ “ქართულ სიტყვაში” გამოქვეყნებული თქვენი სერიული ინტერვიუების საფუძველზე, იარაღით უკანონო ვაჭრობაზე გამოძიება დაიწყო?

- ვიმედოვნებ, რომ ფართომასშტაბიანი გამოძიება მალე დაიწყება და ამაზე 3 ტონამდე თხევადი “ჰეროინის” ამოღებაც მიანიშნებს. საერთოდ, იარაღისა და ნარკოტიკების ბიზნესს ერთმანეთისგან არ ვანსხვავებ, რადგან ეს ურთიერთგადაჯაჭვული ბიზნესია და ორივე იმ რეგიონზეა გათვლილი, სადაც ომია.

- სამ ტონამდე თხევადი “ჰეროინის” გამოვლენა, ნადირაშვილ-ჯაფარიძის აზერბაიჯანული სკანდალი და უგულავას დაჭერა, შეიძლება, ერთ კონტექსტში განვიხილოთ?

- ასე პირდაპირ ცოტა ძნელია, თუმცა არსებობს ნარკოტიკის ამოღების ორი გაშიშვლებული ფაქტი, რომელიც ერთი სომხეთში, ასე ვთქვათ, მოხდა, მეორე კი, - საქართველოში და ორივე ფაქტი, ჩემი აზრით, ურთიერთკავშირშია.

- ბატონო კონსტანტინე, იზიარებთ მოსაზრებას, რომ “ნაციონალების” ერთიანობა იდეას კი არა, ფულს ეფუძნება?

- რა თქმა უნდა. როგორ შეიძლება, “ნაციონალების” იდეოლოგიურ ერთობაზე ვისაუბროთ, როცა “ნაცმოძრაობის” ერთი ფრთა პირდაპირ რუსეთზე იყო მიბმული, მეორე კი - ამერიკულ ნეოკონსერვატორებზე.

- ამ ფრთებს, პირობითად, შეგვიძლია, გიგასა და ვანოს ფრთები დავარქვათ, არა?

- დიახ.

- საგულისხმოა, რომ თავის დროზე მერაბიშვილის მხარდასაჭერად “ნაციონალებმა” ისეთი გადამჭრელი ზომები არ მიიღეს, როგორიც უგულავას დაჭერის შემთხვევაში. მაგალითად, დაიწყეს კამპანია - “წერილი გიგის”, რომელშიც ხელოვნების წარმომადგენლებიც ჩართეს...

- არ გეთნხმებით - პატარა კამპანია მერაბიშვილის დაჭერის შემდეგაც დაიწყეს, თუმცა ვანო პოლიტიკური ფიგურა არაა. მოდით, რა, ერთ რამეზე შევთანხმდეთ - რაღაცაში “ოცნების” ხელისუფლებაც ცოდავს.

- მაინც, რაში?

- როცა დასავლეთში ამბობენ, დათა თუ ბაჩო ახალაიასა და ვანო მერაბიშვილის დაჭერა პოლიტიკური დევნააო, “ოცნება” რატომ არ ასაბუთებს, რომ პოლიტიკური დევნა არაფერ შუაშია? მაგალითად, დათა ან, სულაც, ბაჩო ახალაია ოფიციალური საჯარო მოხელე იყო.

- უგულავაც საჯარო მოხელე იყო, მით უმეტეს, არჩეული...

- გიგი ცოტა სხვა მომენტია... როცა “პაგონები გაკერია”, რომელ პარტიაშიც უნდა იყო, პოლიტიკური ფიგურა კი არა, ჩვეულებრივი მოხელე ხარ და ამიტომ, ახალმა ხელისუფლებამ დასავლეთს პირდაპირ უნდა უთხრას, კი ბატონო, ახალაიები “ნაცმოძრაობის” მხარდამჭერები არიან, მაგრამ პირველ რიგში, საჯარო მოხელეები იყვნენო. სხვათა შორის, საჯარო მოხელეს პოლიტიკური პარტიის წევრობას კანონი უკრძალავს...

- მგონი, პარტიის წევრობა პრეზიდენტსაც ეკრძალება...

- პრეზიდენტი პოლიტიკური ფიგურაა, ახალაიებს კი პოლიტიკურ ფიგურებად ნუ წარმოვიდგენთ. ისინი ჩვეულებრივი ჩინოვნიკები იყვნენ და მეტი არაფერი. ამიტომ, მათგან პოლიტიკური დევნილის შექმნა ლოგიკაში არ ჯდება. ამავე კონტექსტში ერეკლე კოდუა და ზურაბ ადეიშვილიც უნდა ვახსენო - ძალიან მაინტერესებს, ყოფილი მთავარი პროკურორი და იუსტიციის მინისტრი პოლიტიკურ თავშესაფარს როგორ იღებს, როცა პოლიტიკური ფიგურა არასოდეს ყოფილა? როგორ შეიძლება, ყოფილი მთავარი პროკურორის წინააღმდეგ საქმის აღძვრას პოლიტიკური დევნის იარლიყი მიაკერო?

- გეთანხმებით, რომ არ შეიძლება, თუმცა გიგი უგულავასა და ვანო მერაბიშვილის შემთხვევაში საქმე ცოტა სხვანაირადაა - დაპატიმრების დროს, მერაბიშვილი “ნაცმოძრაობის” გენერალური მდივანი იყო, უგულავა კი, საარჩევნო შტაბს ხელმძღვანელობდა...

- “ნაცმოძრაობამ” გიგი უგულავას რებრენდინგი დაიწყო, ანუ მომავალში უგულავას ლიდერობაზე ზრუნავს.

- ესე იგი, გიგა ბოკერია გვერდზე გასწიეს?

- რა თქმა უნდა.

- რატომ?

- იმიტომ, რომ ბოკერიას ქართული საზოგადოება ვერ მიიღებს, ყოველ შემთხვევაში, ამ ეტაპზე მაინც.

- რატომ გგონიათ, რომ საზოგადოება უგულავას მიიღებს?

- გიგი მაინც განსხვავებული ფიგურაა და “ნაცმოძრაობა” თვლის, რომ ხალხი გიგის მიიღებს. სხვათა შორის, დარწმუნებული ვარ, რომ უგულავა ციხეში დიდხანს არ დარჩება. ყველაფერ ამას თავი შეიძლება, სტრასბურგის დახმარებით დააღწიოს და საამისოდ “ნაცმოძრაობას” საკმარისზე მეტი ფული აქვს...

- თქვენი ინფორმაციით, შემდეგი “ნაციონალი”, ვისაც დაიჭერენ, გიგა ბოკერია ხომ არ იქნება? სხვათა შორის, კახა ბენდუქიძე ბოკერიას შესაძლო დაჭერას სამარცხვინოს უწოდებს... უგულავა-ბოკერია-ბენდუქიძე “ნაცმოძრაობის” ერთი ფრთაა?

- გიგის მხარდამჭერ განცხადებებს მიხეილ მაჭავარიანიც აკეთებს, მაგრამ ეს იმას არ ნიშნავს, რომ “ნაცმოძაობაში” ერთიანობაა. გიგის, როგორც პოლიტიკური ფიგურის წამოწევა და მისთვის წამებულის იმიჯის შექმნა, ალბათ, უფრო ამერიკული პოლიტიკის ნეოკონსერვატიული ფრთის დამსახურებაა. მოკლედ, “ნაცმოძრაობის” რებრენდინგი გარდაუვალია და ამას “ნაცმოძრაობის” იმ ფრთასაც მიახვედრებენ, რომელიც სააკაშვილზეა მიჯაჭვული. საამისოდ კი, პირველი ნიშანი გიგის გარშემო გაერთიანებაა.

მოდით, ნარკოტიკებისა და იარაღის ტრაფიკს დავუბრუნდეთ, 2009-2010 წლებში იარაღის რამდენიმე ბარონის დაჭერით, ამერიკელებმა იარაღის ტრაფიკის ალჟირის, იორდანიისა და არაბული ქვეყნების მიმართულება გადაკეტეს. ერთადერთი ხაზი, რომელიც ამ დრომდე არსებობს, ამიერკავკასიაა, საიდანაც ირანში იარაღის ტრაფიკის განხორციელებაა შესაძლებელი. ლაპარაკია ჩვეულებრივ შეიარაღებაზე, რომლის გაკონტროლებაც გაერო-სა და სპეცსამსახურების მიერ ძალიან ძნელია. 2010 წელს, აშშ-ის ელჩმა, ჯონ ბასმა სწორედ ამიტომ გამოთქვა შეშფოთება საქართველო-ირანს შორის უვიზო მიმოსვლასთან დაკავშირებით, ანუ ეს ამერიკელებისთვის სიგნალი იყო და გადაწყვიტეს, რომ ეს არხი, ადრე თუ გვიან, გადაეკეტათ. ჩემს ხელთარსებული მასალების გაანალიზებით, ვფიქრობ, რომ სააკაშვილის ხელისუფლებიდან ჩამოცილება სწორედ ამ ნარკო და იარაღის ტრაფიკის გადაკეტვას ემსახურებოდა. 3 ტონამდე თხევადი “ჰეროინის” ამოღებაც სწორედ ამ ჯაჭვის ერთ-ერთი რგოლია და არ გამოვრიცხავ, რომ ამ სპეცოპერაციაში, რაღაც ფორმით, ამერიკული სპეცსამსახურებიც იყვნენ ჩართულნი.

საქართველო აშშ-ის სტრატეგიული პარტნიორია, რაც მხოლოდ ხელშეკრულებების გაფორმებას კი არა, გარკვეულ ვალდებულებებსაც ნიშნავს. ამიტომ, ნარკო და იარაღის ტრაფიკის აღკვეთა რაკი აშშ-ის სახელმწიფო ინტერესებში შედის, ჩვენს ინტერესებშიც უნდა შედიოდეს და, ამ შემთხვევაში, ინტერესების დამთხვევა სახეზეა, ანუ საქართველო იარაღისა და ნარკოტრაფიკის გამტარებელი არ უნდა იყოს.

- ბატონო კონსტანტინე, ნარკოტიკი საქართველოში რომ რჩებოდეს, გასაგებია, ამით ვინც იხეირებდა, მაგრამ ტრანზიტის შემთხვევაში, ფული როგორ ნაწილდება?

- ტრანზიტის დროს, მოგებას გადამზიდავი კომპანიები და ელიტურ კორუფციაში ჩართული მაღალჩინოსნები ნახულობენ. ავტორიტარული ხელისუფლებით “ნაციონალები” ისე გაირყვნენ, რომ ამ სიბინძურეში თავიდან ფეხებამდე ჩაეფლნენ.

- ყოველივე ზემოთქმულიდან გამომდინარე, “ნაციონალებს” ყველაზე მეტად ვისი ალაპარაკების უნდა ეშინოდეთ?

- ვისი და, - მაგალითად, კოდუასი.

- თუ კოდუა ალაპარაკდა, რა მოხდება?

- სააკაშვილი სერიოზულად დაზარალდება... ასევე, გივი თარგამაძის ალაპარაკებისაც უნდა ეშინოდეთ. როცა ამხელა არალეგალურ ბიზნესში ხარ ჩართული, შენს თავს კი არა, უკვე ტრანსნაციონალურ დანაშაულებრივ სინდიკატს ეკუთვნი, საიდანაც თავის დაღწევა ძალიან რთულია და ეს მცდელობა ადამიანს, შეიძლება, სიცოცხლის ფასადაც დაუჯდეს.

- მაშასადამე, თუკი იარაღით უკანონო ვაჭრობის გამოძიება სტარტს აიღებს, რასაც ნარკოტრაფიკიც დაემატება, შესაძლოა, ყოფილი მაღალჩინოსნების სერიული მკვლელობები დაიწყოს?

- საერთოდ, მაფიისთვის თავის მოკვეთა, ხშირად ახალი თავის გაჩენას იწვევს და ამიტომ, მაფიაზე ფორსირებული შეტევა არაეფექტურია. სპეცსამსახურები, როგორც წესი, ოპერატიული ვითარების შესაბამისად მოქმედებენ და ზოგჯერ მხოლოდ პრევენციული ღონისძიებებით შემოიფარგლებიან. 3 ტონამდე თხევადი “ჰეროინის” ამოღებაც შესაძლოა, სწორედ პრევენციული მეთოდია.

რაც შეეხება მკვლელობებს, თუ ბევრს არ იყრანტალებენ და სინდიკატს ზიანს არ მიაყენებენ, არ მგონია, ვინმეს ფიზიკური ლიკვიდაციის საკითხი დადგეს.

წეღან ჯონ ბასი ვახსენე, რომელიც ირანთან საზღვრის გახსნაზე დიდ შეშფოთებას გამოთქვამდა და ეს ბუნებრივიც იყო, რადგან საზღვრის გახსნით საქართველოში არაერთი კომპანია შემოვიდა. ამასთან, ირანში ოპერირება შერეული საწარმოებისთვისაც გაადვილდა. ირანთან საზღვრის გახსნას ქართული მხარე იმით ამყარებდა, რომ თითქოს პრევენცია მოახდინა, რათა ირანს ჩვენი ოკუპირებული ტერიტორიების - აფხაზეთისა და სამხრეთ ოსეთის დამოუკიდებლობა არ ეღიარებინა, თუმცა სინამდვილეში, ირანი თავის გავლენაზე ზრუნავს და საქართველოს დაკარგული ტერიტორიები სულ არ აინტერესებს. ირანი ცდილობს, რომ რუსეთს რაც შეიძლება, მაქსიმალურად დაუახლოვდეს და ამ გზაზე აზერბაიჯანი და საქართველოა გაჩხერილი. ირანისთვის მთავარი რუსეთთან სამხედრო-ტექნიკური თანამშრომლობაა. ამერიკელებმა კი, იმდენი მოახერხეს, რომ ირანი “იარაღის შიმშილის” პირას აღმოჩნდა. ასეთ დროს საქართველო-ირანის საზღვრის გახსნა თეთრი სახლისთვის, რა თქმა უნდა, შემაშფოთებელი იყო და ბასი თავის საიდუმლო წერილში წერს კიდეც, ამ მიმართულებით მოვლენების განვითარებას ვაკვირდებითო. “დაკვირვება”, სპეცსამსახურების ენაზე, ოპერატიულ საქმიანობას ნიშნავს. ჩემი აზრით, სააკაშვილი იძულებული გახდა, რომ ირანთან სავიზო რეჟიმი გაემარტივებინა.

- ვინ აიძულა, კრემლმა?

- დიახ, ეს, პირველ რიგში, რუსული ინტერესი იყო და სამწუხაროა, რომ საქართველოს პრეზიდენტი, რომელიც თავის დროზე მოსახლეობის დიდმა უმრავლესობამ აირჩია, დიდი გეოპოლიტიკური თამაშის მონაწილე აღმოჩნდა.

- თუკი იარაღისა და ნარკოტიკის ტრაფიკი რუსეთის აორტაა, ამ კუთხით ქართველი სამართალდამცავების გააქტიურებას ოფიციალური მოსკოვი გარკვეულ ზომებს დაუპირისპირებს, არა?

- დიახ, მაგრამ გაერო-ში საერთაშორისო ვალდებულებები რუსეთსაც აქვს აღებული და ზომებს ღიად ვერ მიიღებს, თუმცა შეიძლება, პატარ-პატარა რაღაცები იყოს, რომლებითაც საქართველოსთან პოლიტიკურ ვაჭრობას დაიწყებს.

- ესე იგი, ის, რასაც ჩვენ დიდ გეოპოლიტიკას ვეძახით, სინამდვილეში, მაფიაა?

- დიახ, რა თქმა უნდა. მაფია კი, პირველ რიგში, მერკანტილურ ინტერესებს, ანუ ფულს ეფუძნება.

- მაფიას თავისი კანონები აქვს. შესაბამისად, სამართლიანობის აღდგენა და თუნდაც გიგის დაჭერა მასაზე გათვლილი “ტრიუკია”?

- დიახ... მოდით, რა, ძალიან გულუბრყვილოები ნუ ვიქნებით და ნუ დავიჯერებთ, რომ ისეთი დამოუკიდებელი პოლიტიკის წარმოება შეგვიძლია, სადაც დიდი მოთამაშეების ინტერესებს არ გავითვალისწინებთ. საქართველო პატარა ქვეყანაა, პატარა ქვეყნის მთავარი გამოსავალი კი, მოკავშირის ძებნაა. საბედნიეროდ, აშშ-სა და ევროკავშირის სახით, მოკავშირე უკვე გვყავს.

- მაფია ხომ აშშ-შიც “მუშაობს”?

- თუ მუშაობს, აშშ-ში მუშაობს... სხვათა შორის, იარაღით უკანონო ვაჭრობის შემდეგ, მსოფლიოში ყველაზე დიდი მოგება ნარკობიზნესს მოაქვს. ავღანეთი ამ ორივე ინტერესის, ასე ვთქვათ, ჯამია - იქ ნარკოტიკი იწარმოება, თან კონფლიქტური რეგიონია და იარაღია საჭირო. ხვდებით, საქმე რასთან გვაქვს და ავღანეთში რა რაოდენობის თანხაზეა ლაპარაკი?

- ბატონო კოტე, ქართული “ნაციონალური” მაფიის ბოსი ვინ იყო?

- ამის თქმა ძალიან რთულია. ბოსამდე რომ მიხვიდე, გამოძიებამ ქვედა რგოლების შესწავლა უნდა დაიწყოს. საამისოდ კი, მაფიაში სპეცსამსახურებმა საკუთარი ჯგუფები უნდა ჩანერგონ. სხვათა შორის, ისრაელის სპეცსამსახურები სწორედ ასე მუშაობენ - ისრაელში არსებობენ ოფიციალური კომპანიები, რომლებიც იარაღით უკანონო ვაჭრობაში არიან ჩართულები და სპეცსამსახურები სქემებსა თუ მარშრუტებს სწორედ ასე იგებენ. ამ კუთხით, ისრაელის სპეცსამსახურები ყველაზე ძლიერები არიან.

- გამორიცხავთ, რომ 3 ტონამდე თხევადი “ჰეროინის” საქმეში თუნდაც გადამზიდავი გერმანული კომპანია ქართული სპეცსამსახურის ჩანერგილი იყოს?

- ოპერატიული საქმის დეტალებს არ ვიცნობ, თან ამ თემაზე საუბარი მიზანშეწონილად არ მიმაჩნია. ჩვენთვის მთავარია, რომ საქართველო არ იქცეს ტერიტორიად, სადაც ნარკოტიკისა და იარაღის ტრაფიკი გადის. ნარკოტიკების გარკვეული რაოდენობა ტრანზიტულ ქვეყნებშიც ილექება და ამით მოგებას გარკვეული ჩინოვნიკები ნახულობენ ხოლმე...