დაიწყო თუ არა საქართველოს ხელისუფლებაზე დასავლეთიდან ზეწოლის ახალი ციკლი და რისთვის მზადდება ნიადაგი? - როგორც ოპოზიციაში ამბობენ, დასავლეთის პარალელურად, ქვეყნის შიგნითაც მზადება უნდა დაიწყოს იმისთვის, რომ ბიძინა ივანიშვილი და „ოცნება“ ამ წნეხს ვეღარ გაუძლებს და ახალ არჩევნებს დანიშნავს.

საქართველოს ხელისუფლების და მისი მოქალაქეების შანტაჟი კი ვიზალიბერალიზაციის საკითხით და ევროკავშირში გაწევრიანების ირგვლივ ისევ გრძელდება. ამას ემატება სანქციები გერმანიიდან და დიდი ბრიტანეთიდან.

საფრანგეთის ელჩმა საქართველოში ხელისუფლებას სამი ძირითადი საკითხი წარუდგინა, რომელსაც ევროკავშირი მისგან ითხოვს. შერაზ გარსი სოციალურ ქსელში ამ ჩამონათვალს აქვეყნებს.

„ევროკავშირის მნიშვნელოვანი გზავნილი საქართველოს: შეწყდეს რეპრესიები, გათავისუფლდნენ უსამართლოდ დაკავებული პატიმრები, ჩაერთეთ დიალოგში კრიზისიდან დემოკრატიული გამოსავლის მოსაძებნად“, - წერს საფრანგეთის ელჩი საქართველოში.

„საკითხი მაგიდაზე დევს“, - ეს კი ესტონეთის საგარეო საქმეთა მინისტრის განცხადებაა, რომელიც ევროკავშირს მოუწოდებს, საქართველოსთან ვიზალიბერალიზაციის პოლიტიკის გადახედვის პროცესი დაიწყოს.

„ეს საკითხი (ვიზალიბერალიზაციის გადახედვა) მაგიდაზე დევს და სჭირდება 15 წევრი ქვეყნის თანხმობა პროცესის დასაწყებად. ესტონეთს უკვე ათობით მაღალჩინოსანი ჰყავს სანქციების ქვეშ მოქცეული ბიძინა ივანიშვილის და ირაკლი კობახიძის ჩათვლით. მოვუწოდებთ ევროკავშირს, დაიწყოს პროცესი ვიზალიბერალიზაციის გადახედვაზე, ეს საკითხი დევს მაგიდაზე და სჭირდება 15 წევრი ქვეყნის თანხმობა პროცესის დასაწყებად, რათა მოეთხოვოს რეჟიმს, შეცვალოს მისი ქცევა“, - განაცხადა მარკუს ცაჰკნამ.

საგარეო საქმეთა და უსაფრთხოების საკითხებში ევროკავშირის უმაღლესმა წარმომადგენელმა და ევროკომისიის ვიცე-პრეზიდენტმა კაია კალასმა და გაფართოების საკითხებში ევროკომისარმა, მარტა კოსიმ კი საქართველოსთან დაკავშირებით ერთობლივი განცხადება 2 აპრილს გაავრცელეს.

განცხადებაში ვკითხულობთ, რომ „უცხოეთის აგენტთა რეგისტრაციის შესახებ“ და „მაუწყებლობის შესახებ“ კანონები საქართველოს ხელისუფლებას დამატებით შესაძლებლობას აძლევს ოპოზიციის დათრგუნვისა და რეპრესიული პოლიტიკის გამკაცრებისთვის.

განცხადებაში კაია კალასი და მარტა კოსი ხელისუფლებას მოუწოდებენ, რომ აიღოს რეალური და უპირობო ვალდებულება ევროკავშირის გზაზე დასაბრუნებლად.

ასევე, საქართველოზე სანქციების პოლიტიკით წნეხი გრძელდება. 2 აპრილს დიდმა ბრიტანეთმა მოსამართლეებს - ლევან მურუსიძესა და მიხეილ ჩინჩალაძეს სანქციები დაუწესა.

 „ქართული ოცნება“ გერმანიის მიერ დაწესებულ თანამდებობის პირების მიმართ 26 მარტს დაწესებულ ახალ სანქციებს ასევე „დიფ სთეითის“ მორიგ შურისძიებად აფასებს.

თანამდებობის პირებს საქართველოში, გერმანულმა მხარემ დამატებითი შეზღუდვები დაუწესა. გადაწყვეტილების შესახებ გერმანიის საგარეო უწყებამ სოციალურ ქსელში დაწერა. მიზეზი, როგორც გერმანული მხარე განმარტავს, საპროტესტო აქციებისთვის ხელის შეშლა და მომიტინგეებზე ძალადობაა.

ქალაქის მერი კახა კალაძე კი ამბობს, რომ საქართველოს წინააღმდეგ დაწყებული შეტევა და ახალი სანქციები იმ პოლიტიკის გაგრძელებაა, რასაც საქართველოს ხელში ჩაგდება ჰქვია.

„ეს, უბრალოდ, სიტყვების ბრახაბრუხია, რა გონივრული ეჭვი?! - კონკრეტული მაღალი თანამდებობის პირების დასანქცირება შანტაჟის ერთ-ერთი ელემენტია - ამით სურვილი აქვთ, როგორმე ქვეყანა ხელში ჩაიგდონ, რომ შემდეგ გამოიყენონ თავიანთი ინტერესების გასატარებლად“, - ამბობს „ქართული ოცნების“ გენერალური მდივანი.

მისი თქმით, „ეს არის იმ ხაზის გაგრძელება, რასაც ჩვენ ვხედავდით ბოლო თვეების და წლების განმავლობაში“.

„იცით, თუ როგორ უსამართლოდ ექცევიან ჩვენს ქვეყანას. დღესაც გრძელდება ეს - მუდმივი შანტაჟი, ცილისწამება, მბრძანებლური ტონი. კონკრეტული მაღალი თანამდებობის პირების დასანქცირება შანტაჟის ერთ-ერთი ელემენტია. ამით სურვილი აქვთ, რომ როგორმე ქვეყანა ხელში ჩაიგდონ, რომ შემდეგ გამოყენებული იყოს ისეთ ქვეყნები როგორიც საქართველოა, უკრაინაა, თავიანთი ინტერესების გასატარებლად. ჩვენ ამას ვებრძვით და ამისთვის ძალიან ბევრი რამის მოთმენა მოგვიწია. ძალიან რთული იყო. მარტივი პროცესი არ ყოფილა. დღესაც გრძელდება, სამწუხაროდ, მაგრამ როცა საქმე ეხება სამშობლოს, რა თქმა უნდა, ყოველთვის დავდგებით იქ, სადაც ჩვენს ქვეყანას სჭირდება“, - განაცხადა კალაძემ.

საერთაშორისო საკითხების სპეციალისტი თამარ კიკნაძე for.ge-თან ამბობს, რომ საქართველოზე ახალი შეტევის ციკლი დაიწყო, მაგრამ ამას ვერ ექნება ხელისუფლებაზე ბერკეტის სახე, რადგან „ოცნებამ“ ამაზე მძიმე სიტუაციას გაუძლო.

„საქართველოს ხელისუფლება უკვე დიდი ხანია განსაკუთრებული ზეწოლის ქვეშ იმყოფება, მაგრამ ვხედავთ, რომ ამაზე უკვე იმუნიტეტი გამოიმუშავა. პირიქით, უფრო გაძლიერდა, არჩევნებშიც დაამარცხა ოპოზიცია, რომელსაც ეს ძალები გულშემატკივრობდნენ და საარჩევნო კამპანია ჩაუტარეს. უფრო გაძლიერებულია ხელისუფლება და უკვე მათი მხილება დაიწყო. ვხედავთ საგამოძიებო კომისიაზე ხალხი რას ჰყვება წინა ხელისუფლების მესვეურებზე და ახლაც ოპოზიციაში მოღვაწე ზოგიერთ ლიდერზე. ხელისუფლება, პირველ რიგში, საკუთარი ხალხის და ეროვნული ინტერესებიდან გამომდინარე მოქმედებს. გარედან ნაკარნახევი დირექტივით საქართველოს ხელისუფლება ვერ იმოქმედებს, როცა მით უმეტეს ეს არ არის ქართველი ხალხის ინტერესების გამტარებელი მოთხოვნები. ამიტომ სანქციების, შანტაჟის და მუქარის მიუხედავად, საქართველოს ხელისუფლება ვერ უღალატებს ხალხს.

ბიძინა ივანიშვილს რამდენი მილიონი დაუყადაღეს უკვე და რის გამო ასანქცირებენ? ამის ერთი წესიერი არგუმენტი არ მოაქვთ. გულშემატკივრობენ ოპოზიციას, რომლის თვალით დანახვაც ჩვენს მოსახლეობას არ უნდა. თავად საკუთარ ამომრჩეველშიც ისე აქვთ სახელი შელახული, რომ აქციებზე გამოსვლასაც ვერ ბედავენ. ამიტომ, ეს ოპოზიცია პოლიტიკურად ბოლომდე უნდა ჩაირეცხოს. ყველას სახე უნდა გამოჩნდეს, რომ ერთხელ და სამუდამოდ, უცხო ძალებთან ერთად ქვეყნის წინააღმდეგ მოქმედება შეწყვიტონ“, - ამბობს კიკნაძე.

მისივე თქმით, რა თქმა უნდა, ამ ზეწოლას აქვს ერთი მიზანი, რომ როგორმე საქართველოს ხელისუფლება გატყდეს და შიდა დაპირისპირება გამოიწვიონ. სხვაგვარად ოპოზიცია, რომელიც ხალხს არ სურს, ხელისუფლებაში ვერ ბრუნდება. „ოცნება“ ახლა იმაზე ბევრად ძლიერი და ერთიანია, ვიდრე 2 წლის წინ იყო.

„ის ძალები, რომლებიც აქ პოლიტიკურ პროცესებს გეგმავენ, ფსონს დღევანდელ ოპოზიციაზე დებენ. იმაზე მეტყველებს, რომ ისინი აქ მიმდინარე პროცესებში ვერ ერკვევიან. ეს ოპოზიცია არ არის ის ძალა, რომელიც შესაძლოა ხელისუფლებაში მოვიდეს. ამიტომ მისი რევოლუციის გზით მოყვანა სურთ. არც ეს არ გამოსდით, რადგან ხალხი ამ მავნებლებს მიუხვდა და ქუჩაში რევოლუციაზე არ მიჰყვება. ასევე, ძალიან ფხიზლად არიან ჩვენი სპეცსამსახურები. შესაბამისად, დარტყმას ახორციელებენ მოსამართლეებზე და სხვა სახელისუფლებო თანამდებობის პირებზე, მაგრამ არც ეს ამართლებს. ხელისუფლება გუნდის შიგნით სიმშვიდეს და პრინციპულობას ინარჩუნებს. ამას თან ახლავს კანონის გამკაცრება და ასეთი დესტრუქციული ქმედებების წინააღმდეგ ნამდვილად კანონის გამკაცრებაა საჭირო. არადა ზუსტად ამ ქვეყნებში მოქმედებს ასეთი კანონები აქციის მონაწილეების წინააღმდეგ. როგორ შეიძლება საფრანგეთი გველაპარაკებოდეს უსამართლობაზე, პოლიტიკურ დევნაზე, როცა ოპოზიციის ყველაზე პოპულარულ და გავლენიან ლიდერს მარი ლე პენს არჩევნებში მონაწილეობა აუკრძალეს და შესაძლოა დააკავონ კიდევაც. ეს ორმაგი სტანდარტები ქართველმა ხალხმა კარგად დაინახა და ეს ტერორი, რომელიც ვიზალიბერალიზაციის შეწყვეტას ეხება, არ მუშაობს“, - ამბობს კიკნაძე.