რა არის მიზეზი, რის გამოც აშშ-ის ახალი ადმინისტრაცია საქართველოსთან დაკავშირებით ჯერ კიდევ დუმილს ინარჩუნებს? ოპოზიციაში სახდეპის ბოლო განცხადებას საქართველოს ხელისუფლების მხრიდან ახალ ადმინისტრაციასთან შეუმდგარ ურთიერთობას ასახელებენ. თუმცა ანალიტიკოსების აზრით, პირიქით, სახდეპის წინა ადმინისტრაციის განცხადებებს თუ გადავხედავთ, ეს განცხადება რადიკალურად შერბილებული და ორაზროვანია.
ფილოსოფოსი ზაზა შათირიშვილი აშშ-ს ახალი ადმინისტრაციის ჯერ ვერ ჩამოყალიბებული პოზიციის მიზეზს ასახელებს და ამბობს, რომ ამას ერთადერთი ახსნა აქვს - „დიფ სთეითმა“ არ იცის, რა უნდა გააკეთოს საქართველოსთან მიმართებით. თუმცა ფილოსოფოსის აზრით, უკვე დროა, რომ ახალმა ადმინისტრაციამ არჩევანი გააკეთოს - სურს საქართველოს ლეგიტიმურ ხელისუფლებასთან ურთიერთობის ახალი ფურცლიდან დაწყება და საქართველოში „დიფ სთეითის“ აგენტოკრატიის გაქრობა თუ არა?!
„ქართულ ოცნებაში“ კიდევ ერთხელ აცხადებენ, რომ მზად არიან სუფთა ფურცლიდან დაიწყონ აშშ-თან ურთიერთობა და შემხვედრ პოზიციებს ელოდებიან. მათი თქმით, დაუშვებელია დონალდ ტრამპი რუსეთთან ურთიერთობის აღდგენაზე საუბრობდეს და პარალელურად, ბიძინა ივანიშვილს, რომელსაც რუსეთთან თანამშრომლობის ბრალდებით სანქციები ადევს, არ უხსნიდნენ.
რაც შეეხება ამერიკის ადმინისტრაციის მიერ ბოლო განცხადებას, ტემი ბრიუსისადმი დასმულ კითხვაზე - ჰქონია თუ არა კომუნიკაცია საქართველოს მმართველ პარტიასთან, მან ორაზროვნად უპასუხა.
„ჩვენ განვაგრძობთ ჩვენი მიდგომის შეფასებას საქართველოს მიმართ ამერიკული ინტერესების წინსვლისთვის. აშშ-მა ნათლად დააფიქსირა ის ნაბიჯები, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-თან ურთიერთობის გაუმჯობესებით. რაც შეეხება „ქართული ოცნების“ მთავრობის მიერ განხორციელებულ განგრძობით ანტიდემოკრატიულ ქმედებებს - როგორც ვიცე-პრეზიდენტმა ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე, ვერ მოიპოვებთ მას ძირითადი ელექტორატის პოზიციის უგულებელყოფით, თუ ვინ უნდა გახდეს ჩვენი საერთო საზოგადოების ნაწილი. შეერთებული შტატები, 33 წლის განმავლობაში, საქართველოსა და ქართველი ხალხის პარტნიორია და ამ ხნის განმავლობაში, ძლიერი მხარდამჭერი საქართველოს დამოუკიდებლობის, სუვერენიტეტისა და ტერიტორიული მთლიანობის საკითხებში“, - ნათქვამია სახელმწიფო დეპარტამენტიდან მიღებულ წერილში.
ფილოსოფოსი ზაზა შათირიშვილი კი წერს, რომ ბაიდენის ოთხწლედის დროს, „დიფ სთეითი“, პრაქტიკულად, საკუთარი თავის ლეგალიზებას ცდილობდა. ყველამ იცოდა, რომ ამერიკას არა ბაიდენი, არამედ არაფორმალური ძალა მართავდა.
როგორც შათირიშვილი წერს, დონალდ ტრამპი ისევეა იძულებული, „დიფ სთეითს“ დაექვემდებაროს, როგორც ბაიდენი და აღნიშნავს, რომ ვინც თავის დროზე პრეზიდენტ კენედის მკვლელობა დაუკვეთა, მისმა შვილიშვილებმა დაუკვეთეს საპრეზიდენტო კამპანიისას ტრამპის მკვლელობა.
ის ასევე აღნიშნავს, რომ ფუჭია იმის მტკიცება, რომ „დიფ სთეითი“ ბაიდენი და მისი ადმინისტრაციის ცალკეული წარმომადგენლები იყვნენ. შათირიშვილის თქმით, იგივე შეიძლება ითქვას USAID-ზე, NED-ზე, „ამერიკის ხმასა“ და „რადიო თავისუფლებაზეც“, რომლებიც მხოლოდ „დიფ სთეითის“ ინსტრუმენტების ფუნქციას ასრულებდნენ.
„შესაბამისად, ტრამპის სიტყვები „ან ამერიკა გაანადგურებს „დიფ სთეითს“, ან „დიფ სთეითი“ გაანადგურებს ამერიკას“ ისეთივე ფუჭია, როგორც იმის მტკიცება, რომ „დიფ სთეითი“, თურმე, ბაიდენი, ბლინკენი და სალივანი ყოფილან. რეალურად, ეს ადამიანები არა მმართველები, არამედ მართულები და „დიფ სთეითის“ დაკვეთების უბრალო შემსრულებლები იყვნენ“, - წერს ზაზა შათირიშვილი.
თბილისის მერის, კახა კალაძის განცხადებით, ახალი ადმინისტრაციის განცხადებების მიღმა ჯერ არ ჩანს ქმედითი ნაბიჯები არც საქართველოს და არც იმ ქვეყნების მიმართ, რომლებსაც ბაიდენის ადმინისტრაციის პირობებში პრობლემები ჰქონდა.
„დღეს ვართ მოლოდინის რეჟიმში, არის გარკვეული ვაკუუმი - ესეც უნდა აღინიშნოს. არსებობს ძალიან ბევრი კითხვა, მაგალითად, ბაიდენის ადმინისტრაციამ ბიძინა ივანიშვილი დაასანქცირა იმის გამო, რომ ვითომ, მას რაღაც ურთიერთობები ჰქონდა რუსეთთან. დღეს ვხედავთ, რომ ახლად არჩეული პრეზიდენტი, დონალდ ტრამპი თავისი ადმინისტრაციით პირდაპირ მართავს მოლაპარაკებებს რუსეთთან, საუბრობს ურთიერთობების გადატვირთვაზე, სავაჭრო ურთიერთობების გაღრმავებაზე და ამ დროს, ბიძინა ივანიშვილი ისევ დასანქცირებულია“, - განაცხადა კახა კალაძემ.
ანალიტიკოსი გია აბაშიძე for.ge-თან ამბობს, რომ სახდეპის ბოლო განცხადება საქართველოზე ოპოზიციისთვის ზედმეტი აჟიტირების საფუძველს არ უნდა იძლეოდეს. აბაშიძე აცხადებს, რომ გასაგებია, იქ ნახსენებია საქართველოს ხელისუფლება, რომელმაც დემოკრატია უნდა განავითაროს და არ უნდა დევნოს ოპონენტი, მაგრამ ეს არის შაბლონური და სტანდარტული განცხადება.
„სახდეპის მიერ გაკეთებულ განცხადებაში, მოხსენიებულია ვიცე პრეზიდენტის ჯეიდი ვენსის ნათქვამი, სადაც ამერიკის მეორე პირი რუმინეთის და გერმანიის მაგალითებზე საუბრობდა. ეს კი 2 თვის წინ იყო. საქართველოს ამ კონტექსტში მოხსენიება ცოტათი გაუგებარია. ამავე დროს იმაზე აპელირება, რომ აქ რაღაცა უფლებები შესაძლოა დაირღვეს, ესეც გაუგებარია. კონგრესმენის უილსონის და მისი ცალკეული კოლეგის დამახინჯებული მესიჯების გავრცელება არასერიოზულია. აქ სულ სხვა რაღაცაა უმთავრესი და ყურადსაღები. აშშ-ს ელჩი საქართველოში, დანიგანი საქართველოს ვიცე-პრემიერს, ეკონომიკის მინისტრს ლევან დავითაშვილს ეწვია, სადაც ამერიკის ახალი ადმინისტრაციის პირობებში ეკონომიკური ურთიერთობების პერსპექტივის გაფართოებაზე ისაუბრეს. იქვე აღინიშნა, რომ სანფრანცისკოში, ე.წ. სილიკონის ველზე ქართული სტარტაპი დაიწყება. გვახსოვს, რომ „ქართული ოცნების“ გუნდის წარმომადგენლებმა, ღიად და საჯაროდ, ბევრჯერ მოუწოდეს წინა ადმინისტრაციას, რომ საქართველოსთან ეკონომიკური თანამშრომლობა გაეფართოებინათ იმ პარტნიორობის ფორმატში, რომელიც მრავალი წლის წინ ორ ქვეყანას შორის ხელშეკრულებით არის განსაზღვრული. ამ ინიციატივით ამერიკის ელჩის საქართველოს ეკონომიკის სამინისტროში გამოჩენა საკმაოდ პოზიტიური და გასათვალისწინებელი ფაქტია“, - ამბობს აბაშიძე.
მისივე თქმით, მანამდე მოხდა ამერიკის ელჩის და საგარეო საქმეთა მინისტრის მაკა ბოჭორიშვილის პირისპირ შეხვედრა. ასევე, ბოჭორიშვილი ინდოეთში ამერიკის დაზვერვის დირექტორს ტულსი გაბარდს შეხვდა და ეს კომუნიკაცია დიდი ხნის განმავლობაში გაგრძელდა. ის მხოლოდ ხანმოკლე ფოტოსესიებისთვის არ ყოფილა.
„შესაბამისად, როდესაც ამერიკის ხელისუფლების წარმომადგენლები საქართველოსთან სამომავლო პროექტებზე საუბრობენ, საქართველოს მმართველი გუნდი წარმომადგენლებს ხვდებიან. ამიტომ რადიკალური ოპოზიციისგან ჩვეულ რეჟიმში საუბარი იმაზე, თითქოს აშშ-ს ახალ ადმინისტრაციასთან ურთიერთობა ვერ დაალაგა „ოცნებამ“, ბრიყვული თავის მოტყუებაა. ოპოზიციისთვის, რომელიც ადრე ტრამპს ლანძღავდა, ახლა კი ცალკეული რესპუბლიკელი კონგრესმენის და პრეზიდენტის ფოტოებით რუსთაველზე დარბის, სერიოზული ანალიზის თავი აქვს?
ამათი დასკვნები და ანალიზი მართლა სასაცილოა. ასევე, ძალიან ყურადსაღებია ელჩი დანიგანის შეცვლილი რიტორიკა საქართველოს ხელისუფლების მიმართ. ევროპელი დიპლომატებისგან განსხვავებით, ამერიკის ელჩი საერთოდ კომენტარს არ აკეთებს დაკავებულ ჟურნალისტზე, მზია ამაღლობელზე. სასამართლო პროცესზე საელჩოს არც ერთი მათი წარმომადგენელი არ ყოფილა მისული. ესეც ხომ მეტყველებს იმაზე, რომ ცვლილება აშკარაა?! ასევე, არ დაგვავიწყდეს, რომ მსოფლიოს სატარიფო სანქციების ფონზე, საქართველოს ყველაზე ცოტა 10%-იანი ტარიფი დაადეს. არადა ამ დროს მოლდოვას, რომელიც ევროპის ძალიან დიდი მხარდაჭერით სარგებლობს, დემოკრატიის ამომავალი წერტილია მათთვის, ტრამპმა 31%-იანი ტარიფი დაადო. მაშ, რაშია საქმე? ე.ი. ოპოზიციას ტყუილად უხარია და ამ სისულელეებით ისევ თავს იტყუებს“, - ამბობს აბაშიძე.
