პარლამენტის დროებითი საგამოძიებო კომისიის N10 სხდომა, წინა სხდომებზე მძიმე აღმოჩნდა. სხდომაზე განსახილველი საკითხები იყო: საკუთრების უფლების დარღვევა, არაადამიანური მოპყრობის ფაქტები; სახელმწიფო უსაფრთხოებისა და 2008 წლის აგვისტოს ომი. სხდომაზე მოწვეულნი იყვნენ - რამაზ ახვლედიანი, გივი თარგამაძე, კახა დაბრუნდაშვილი. როგორც თეა წულუკიანმა აღნიშნა, კომისიაზე მოსმენილი ფაქტებით ირკვევა მამუკა ხაზარაძე და „თიბისი“ ბანკი“ ნაცმოძრაობის“ ხელისუფლების დროს რეალურად იყვნენ გარკვეული ტიპის ხელის ბიჭები, რომლებიც თავს და „თიბისი“ ბანკს მიხეილ სააკაშვილს, კეზერაშვილს და სხვებს აყენებინებდნენ იმისათვის, რომ მშრომელი ადამიანების საკუთრების უფლება შელახულიყო.
სხდომის დაწყებამდე კომისიის თავმჯდომარემ ურჩია გივი თარგამაძეს, რომ მობრძანდეს კომისიის სხდომაზე, ვინაიდან სისხლის სამართლებრივი პასუხისმგებლობის საკითხი დადგება და ეს იქნება გარდაუვალი.
„მობრძანდით და გაეცით პასუხი კითხვებს, რომლებიც ეხება აგვისტოს ომს და იმ რვაწლიან პერიოდს, როდესაც თქვენ მართავდით უშიშროების კომიტეტს პარლამენტში, როდესაც თქვენ საქართველოს შვილებს გვემუქრებოდით, რომ სულს ამოგვხდიდით. ზოგს, სამწუხაროდ, მართლაც დაუდგა შავ-ბნელი დღე და სული ამოხადა „ნაციონალური მოძრაობის“ ხელისუფლებამ ციხეში თუ ციხის მიღმა, ქუჩაში დახვრიტეს ხალხი, აწამეს არაერთი ადამიანი და მოხდა ისე, რომ ჩვენ, ვინც აქ ვართ, და არამხოლოდ ჩვენ, ვართ ცოცხლები და ვსვამთ კითხვებს, ვითხოვთ ამ კითხვებზე პასუხს.
ამიტომ, ბატონო გივი, ბუჩქებში ნუ დაიმალებით, გამობრძანდით, მობრძანდით, დაბრძანდით და აბსოლუტურად ცივილურ პირობებში გაეცით ჩვენს კითხვებს პასუხი. საზოგადოებას აქვს კითხვები და კეთილი ინებეთ, თუ ასეთი უშიშრები იყავით 9 წლის განმავლობაში, ბაჩო ახალიას, ზურა ადეიშვილის და ვანო მერაბიშვილის იმედად, ახლა მობრძანდით და გაეცით კითხვებს პასუხი“, - განაცხადა თეა წულუკიანმა.
კომისიის თავმჯდომარეს სოციალური ქსელით ოპერატიულად უპასუხა გივი თარგამაძემ და მიმართა: „მანდ კომისია გაქვთ თუ იუმორინა? ჩემგან საპასუხოდ რას ელით - შედი ქალო ბუტკაშიო -ыыы- რამე ასეთ ნაცნობს? ჩვენთან, დიფსთეითში, ტრამპამდე გარდაუვალი სულ ორი რამ იყო - სიკვდილი და გადასახადები. თქვენთან, საპუტინოში, მხოლოდ სიკვდილი, ოღონდ, ხშირად უეცარი - ხაზეინის განწყობასავით. პუტინის ძებნას, ბელორუსში მოსჯილ 25 წელს, მანქანაში აფეთქებულ მეტალის ელემენტებით გაჯერებულ ჰექსოგენის პაკეტს, კოვიდის უხანის ყველაზე ავ ვერსიას, მხუთავი აირით გაგუდვას, კიდევ ბევრ სიცოცხლისთვის პირდაპირ საფრთხეს გადავურჩი და თქვენი ტილიანი ციხით მაშინებთ? ძალზედ მშვიდი ნერვული სისტემა და ასეთივე ძილი მაქვს, ასე რომ, გააგრძელეთ ჯღანაობა, იმდენად არ მაინტერესებს ეგ თქვენი შაპიტო, არც დამესიზმრებით...“, - წერს გივი თარგამაძე.
ცხადია, რომ თარგამაძე საგამოძიებო კომისიასთან თანამშრომლობას არ აპირებს, რაც იმას ნიშნავს, რომ ყოფილ მაღალჩინოსანს, რომელიც აგვისტოს ომის ერთ-ერთი „გმირია“ პროკურატურის კითხვებისთვის მოუწევს პასუხის გაცემა. საგამოძიებო კომისიას ჩვენება მისცა ლისის ტბის ყოფილმა მფლობელმა, რამაზ ახვლედიანმა, რომელიც კლასიკური სახეა იმ სისტემური დანაშაულის, რომელშიც ჩართული აღმოჩნდა სააკაშვილის გუნდი და მათ შორის მამუკა ხაზარაძე. აღსანიშნავია, რომ კერძო ბიზნესის ტერორის თითქმის ყველა საქმეში ფიგურირებენ მამუკა ხაზარაძე და ბადრი ჯაფარიძე, როგორც „ნაციონალური მოძრაობის“ ნდობით აღჭურვული პირები.
ლისის ტბის ყოფილი მფლობელის, რამაზ ახვლედიანის განცხადებით, მიხეილ სააკაშვილმა მამუკა ხაზარაძის, ბადრი ჯაფარიძისა და ჰოლანდიელი ბობ მეიერის მიერ შექმნილ შპს „ლისი ლეიქ დეველოპმენტს“ პირდაპირი მიყიდვის წესით გადასცა მისთვის ჩამორთმეული ქონება, გამარტივებული პირობებით და ბინათმშენებლობის უფლებით. მისივე თქმით, მამუკა ხაზარაძემ შემდგომ ლიცენზიაც მოსთხოვა.
„ჩემთვის ყველზე შოკის მომგვრელი იყო, რომ 2010 წელს მიხეილ სააკაშვილმა მამუკა ხაზარაძის, ბადრი ჯაფარიძის და ჰოლანდიელი ბობ მეიერის მიერ შექმნილ შპს „ლისი ლეიქ დეველოპმენტს“ პირდაპირი მიყიდვის წესით გადასცა ჩემთვის ჩამორთმეული ქონებაც და ის, რაც იყო ლისის ტბაზე განკარგული, მაგრამ ბევრად უკეთესი პირობებით. იქ არც ლისის ტბის გადარჩენაზე იყო და მის ეკოლოგიურ მდგომარეობაზე ვალდებულება, ასევე საბაგირო გვქონდა ჩვენ ვალდებულებაში, ნუცუბიძის პლატოდან ამოდიოდა ზემოთ და ესეც მოუხსნა. ანუ, ძალიან გამარტივდა მათთვის შემდგომი ბიზნესი. 2012 წელს, როცა უკვე ეს ქონებაც გადაეცა, როცა ეს დაპირებებიც აღარ იყო საჭირო, მისი წარმომადგენელი დამიკავშირდა და მითხრა, რომ ლიცენზია, ტბაზე რომელიც მქონდა და გარემოს დაცვის ნებართვა, გადამეცა იმ კომპანიისთვის, რომელიც მათ შექმნეს და ის გააგრძელებდა შემდგომში მუშაობას.
გამიკვირდა და ვუთხარი, მამუკა, რაც მქონდა, ყველაფერი წამართვეს, დამრჩა ერთი ეს ლიცენზია, რომლითაც აქ შემიძლია ვისარგებლო, ვითანამშრომლო და შემდგომ განვითარებაზე ვიფიქრო. გაეცინა და მითხრა, არა უშავსო, ჩვენებთან დაილაპარაკეო და ნახეო. ამ დალაპარაკება-დალაპარაკებაში უკვე მეილიც კი მომივიდა შემდგომში, რომ ყველაფერი შეთანხმებული გვაქვს და გთხოვთ, წარადგინოთ თქვენი დოკუმენტაცია გარემოს დაცვის სამინისტროში, რათა შემდგომში გადაეცეს სხვა კომპანიას“, - განაცხადა რამაზ ახვლედიანმა.
რამაზ ახვლედიანის განმარტებით, ხაზარაძე მისი პარტნიორი გახდა 2005 წლის იანვრიდან და მისთვის არანაირი თანხა არ გადაუხდია. როგორც ახვლედიანმა აღნიშნა, ხაზარაძემ შეაფასებინა მის მიერ სახელმწიფოსგან გამოსყიდული ქონება აუდიტს და უთხრა, რომ ეს არის მილიონი დოლარი, ამიტომ შემოიტანდა 2 მილიონ დოლარს, ამით დაფუძნდებოდა სააქციო საზოგადოება, რასაც დაეთანხმა. ხაზარაძე გახდა სამეთვალყურეო საბჭოს თავმჯდომარე, ბადრი ჯაფარიძე იყო სარევიზიო კომისიის თავმჯდომარე, თავად სამეთვალყურეო საბჭოს თავმჯდომარის მოადგილე.
რომ მივხვდი, თავს არ მანებებდნენ და გამოსავალი აღარ იყო, დავთანხმდი, დავწერ ამ განცხადებას, მაგრამ ვის სახელზე-თქო და რა ფორმა შევარჩიო-თქო. შენ არ ინერვიულო, ჩვენ გიკარნახებთო და რატომღაც დამაწერინეს გიგი უგულავას სახელზე და მთავრობის სახელზე და არა იმ ადამიანზე, პრეზიდენტი მყავს მხედველობაში, რომელმაც ეს განკარგულება გამოსცა. დამაწერინეს, საერთო ჯამში, რომ არ მინდოდა ჩემი ქონება, ვალდებულებებს ვერ ვასრულებდი და ა.შ. ამ დროს, პრეზიდენტის განკარგულებით, სულ რომ არაფერი მქონოდა გაკეთებული, 2014 წლის ბოლომდე გვქონდა ვადა და ჩემი ეს განცხადება დაიწერა 2006 წლის 4 ნოემბერს. ბრძანებულება გამოცემულია 2006 წლის ივლისში“, - განაცხადა რამაზ ახვლედიანმა.
საგამოძიებო კომისიამ მოუსმინა „ნაციონალური მოძრაობის“ რეჟიმის მიერ ნაწამებ, დაზარალებულ კახა დაბრუნდაშვილს, რომელმაც მისი და ვამეხ აბულაშვილის მიმართ განხორციელებული ფიზიკური ანგარიშსწორება გაიხსენა, სადაც ფიგურირებენ დათა ახალაია, ოლეგ მელნიკოვი და გერონტი ალანია.
„ამ ყველაფრის მიზეზი იყო ვამეხის მეგობარი გოგონა. დათა ახალაიას 6-7 წლით წინ ამ გოგონასთან ჰქონდა ურთიერთობა და ეგ ხომ ეგეთი ავადმყოფია, რომ სიმთვრალეში ახსენდება ყველაფერი და რომელიღაც რესტორნიდან მთვრალმა, ნაბახუსევმა მოინდომა ქალბატონი და ურეკავს. ხვდება ვამეხი ტელეფონზე და ხდება შელაპარაკება“, - განაცხადა კახა დაბრუნდაშვილმა.
მან, ასევე, ცემის შედეგად მიყენებულ ტრავმებზე ისაუბრა და აღნიშნა, რომ ამან გამოიწვის ის, რომ დღევანდელი მდგომარეობით კახა დაბრუნდაშვილიც და ვამეხ აბულაშვილიც შშმ პირები არიან. დაბრუნდაშვილმა დეტალურად აღწერა მისი და მისი მეგობრის ცემის სცენა და აღნიშნა, რომ ვამეხ აბულაშვილი იმდენად სასტიკად იყო ნაცემი, მან თვალიც კი დაკარგა.
„ოქროყანაში ადგილზე მელნიკოვი გამოგვეცხადა და გასცა ბრძანება, ეს ვამეხ აბულაშვილი ქვემოთ და ეს - ჩემზე თქვა, აქ გყავდეთ, სანამ მე არ გეტყვით. ვამეხი მოხრილ მდგომარეობაში, ორ პირს უკავია და სირბილით მიჰყავთ პატარა ხევის მიმართულებით. მე უცბად უკნიდან ფეხებში მხვდება, ვიკეცები, მერე კეფაში, ვვარდები მიწაზე, მადგამს მუხლს ზურგზე და იარაღს მაბჯენს კისერზე ის, ვინც მანქანიდან გადმომიყვანა. ვამეხი რომ გაატარეს, ერთგვარი კორიდორი მოუწყვეს, წიხლის ჩარტყმა, გინებები, ფიზიკური შეურაცხყოფებით ჩაიყვანეს დაბლა. ჩემთან დარჩა სამი პიროვნება, დანარჩენები ჩავიდნენ ქვევით, სადაც ვამეხი ჩაიყვანეს.
აბსოლუტურად ყველაფერი მესმოდა - ყველა დარტყმა, ყველა გინება. თვალით ვერ ვხედავდი, თორემ, აბსოლუტურად ყველაფერი მესმოდა. რომ ვიწექი, სახე ხომ მედო მიწაზე და თავი შემოვაბრუნე, რაზეც შემდგნენ მე, როგორ გავბედე თავის შებრუნება. ამ ჩემი ცემის დროს ამოდის მელნიკოვი და ამათ მიმართ იგინება, მე ხომ გითხარით ხელი არ დაგეკარებინათ, არ გაგაფრთხილეთო. შემდეგ გასცა ბრძანება, წამოვეყვანე დაბლა და მეც ვამეხის გზით ჩამიყვანეს. ვხედავ, რომ ვამეხი მუხლებზე გდია, თვალების ადგილზე წარმოიდგინეთ, „ბრიტვა“ რომ გაუსვა ადამიანს და მარტო ის ხაზი რომ იყოს.
ნაცემიც მინახავს, ყველაფერი მინახავს, მაგრამ ასეთი - არაფერი. ვერც თქვენ წარმოიდგენთ იმას, რასაც ახლა მე გეუბნებით. ეს უნდა გენახათ, წარმოსახვითაც ვერ წარმოიდგენთ, რა დღეში იყო. პირველი ჩემი რეაქცია რაც იყო, მაისური გავიხადე, მივედი და სისხლს ვწმენდდი. ეს ვეღარც ხედავს, ვეღარც ლაპარაკობს, სისხლი სდის პირიდან, ყურიდან, თვალი დაკარგა, სხვათა შორის, თვალი ამოუგდეს. ვამეხი დაჩოქილია და მის უკან არის ხევი, ორი „ვერზილა“ უდგას, არიან დაახლოებით 40 თუ მეტი არა. ვამეხი ერთს თმებით უკავია და მეორე გამუდმებით ურტყამს, მერე ხელი ეტკინა, ალბათ, გადაიხვია მაისური თუ სპორტული და მერე იმით ურტყამდა“, - განაცხადა კახა დაბრუნდაშვილმა.
დაბრუნდაშვილის განცხადებით, მისი რეპლიკის შემდეგ, „რას შვებით, კლავთ?“, ვამეხ აბულაშვილთან ერთად, მასაც დაუწყეს ცემა. ამის შემდეგ კი, იხსენებს დათა ახალაიას მიერ იარაღით „თამაშს“, რომელიც, ცინიკური ღიმილით უსვამდა კითხვას, თუ რომელი მოეკლა პირველი, დაბრუნდაშვილი თუ მისი მეგობარი.
„მოპირდაპირედ არის პატარა შემაღლება, სადაც დგანან პატივცემული დათა ახალაია, ხელმარჯვნივ გვერდს უმშვენებს ოლეგ მელნიკოვი და ხელმარცხნივ გერონტი ალანია. ჩემი ცემა შეაწყვეტინა ახალაიამ და თან ცინიკური ღიმილით, რა თქვა მაგან მოკვლასთან დაკავშირებითო და ვისაც ჰკითხა, არ დავაცადე და მე ვუპასუხე ისევ, რომ მოსაკლავად მოგვიყვანეთ აქ-მეთქი? რაც მიწოდა, იმ სიტყვებისგან თავს შევიკავებ და მიპასუხა, აბა, შენ რა გგონია, აქედან სახლში ცოცხალი მიხვალო?
ამ დროს, დათა ახალაია პიჯაკს სწევს, იღებს იარაღს, ტენის და იწყებს თამაშს - ხან მე მომიშვერს, ხან ვამეხს - ეს გრძელდება ორი-სამი წუთი და თან იცინის, პირველი რომელი მოგკლათო? ჩემი დაუყოვნებელი კითხვა იყო, ანუ მართლა გვხოცავთ-თქო. ახალაია ეკითხება მელნიკოვს, ეს მართლა დებილია, თუ თავს იდებილებსო? გასაგებია, მაშინ პირველი მე მესროლეთ-მეთქი, მანამდე მელნიკოვთან რაღაცას საუბრობდა აგდებით და ეს რომ ვუთხარი, გაჩერდა, დასერიოზულდა და გაიმეორე, რა თქვიო?
მე ვუთხარი, დავრწმუნდი, რომ გვხოცავთ და კითხვაზე გიპასუხეთ, რომ პირველი მე მესროლეთ-მეთქი. რატომ შენო - მე ვუთხარი, ფაქტია, თქვენი თვალით ხედავთ, ეს ვერც ვერაფერს დაინახავს და ვერც ვერაფერს გაიგებს, ჩემი ბავშვობის მეგობრის, ჩემი ძმაკაცის, ნათლია-მირონის სიკვდილს ნუ მაყურებინებთ, ჯერ მე მესროლეთ და მერე მაგას, თქვენთვის აზრი ხომ არ აქვს-თქო. წევს ანალოგიურად პიჯაკს, იდებს იარაღს, ბრუნდებიან და იწყებენ სვლას გზისკენ და ეს ამალა მიჰყვება. ამ დროს ვამეხს ვეუბნები, რომ მიდიან. გამვლელების დახმარებით, რომლებმაც მანქანა გამიჩერეს, ნაცემი ვამეხის ხევიდან ამოყვანაშიც დამეხმარნენ და თბილისამდე ჩამოსვლა მოვახერხეთ“, - აღნიშნა კახა დაბრუნდაშვილმა.
პარლამენტის დროებითი საგამოძებო კომისიის მიმართ არის დიდი მოლოდინი საზოგადოებაში. თუმცა, ამ კომისიის პოლიტიკური მიზნებით გამოყენების ინტერსი თუ სიმართლის გარკვევის ინტერსზე მაღლა დადგა და ეს კომისია შეეცდება სიმართლის დამალვას, ანალიტიკოს ლევან ადეიშვილის განცხადებით, ეს ძალიან ცუდ შედეგს გამოიწვევს.
„ქართულმა ოცნებამ“ ამ კომისიის შექმნით თვითონ ჩაიყენა თავისი თავი იმ სიტუაციაში, რომ თუ ბოლომდე არ გაყვა, არ დაისაჯა ის ადამიანები, რომლებიც ამ საშინელ დანაშაულებში მონაწილეობდნენ, თუ არ იქნება სრულფასოვანი გამოძიება, ამას მოჰყვება მძიმე რეაქცია საზოგადოების მხრიდან. დღემდე მარტო მერაბიშვილი და ახალაია დაიჭირეს, დანარჩენები დაუსჯელები დარჩნენ, ნუ სააკაშვილის დაჭერითაც მაღლა ასწიეს თამასა და კარგი იყო, მაგრამ ამათი პატრონების და ზარების მიმცემების მხილება არ მოხდა.
ამიტომ, თუ საზოგადოება ვერ მიიღებს შედეგს იმისა, რომ მართლა იქნა გამოძიებული და დაისჯებიან დამკვეთები და შემსრულებლებიც, მაშინ ძალიამ ცუდ დღეში ჩაიგდებს საკუთარ თავს „ქართული ოცნება“, რომელიც შევიდა იმ თამაშში, სადაც მას გამოსავალი არ აქვს თუ ბოლომდე არ გავიდა, შედეგი იქნება მძიმე. რადგან დაიწყეს, უნდა გააკეთეონ. წინააღმდეგ შემთხვევაში ცუდად მოუბრუნდებათ ადგილობრივ არჩევნებში. ხალხი უკვე არ მიიღებს კოსმეტიკას, გამორიცხულია“, - აცხადებს for.ge-სთან საუბრისას ლევან ადეიშვილი.
პოლიტოლოგ სოსო მანჯავიძეს აქვს მოლოდინი, რომ საგამოძიებო კომისია დასკვნას შემდგომი რეაგირებისთვის გადასცემს გენერალურ პროკურატურას, რაც არის დეკლალირებული ამოცანა და მიზანი ამ კომისიის.
„აბსოლუტურად გაუგებარი იქნება საზოგადოებისთვის იმ საშინელი ფაქტების შედმეგ, რაც კიდევ ერთხელ გაიგონეს და მოისმინეს, ეს ფაქტები დარჩეს ხმად მღაღდებლისა უდაბნოსა შინა და უბრალოდ, ტელე-შოუდ გადაიქცეს - ეს შეუძლებელია. ამიტომ, შემდგომი რეაგირებისთვის პროკურატურას გადაეცემა ეს მასალები. ვინც უარს იტყვის თანამშრომლობაზე, მათ მიმართ აღძრულია სისხლის სამართლის საქემე.
არ შეუფარდეს ხაზარაძეს? - კი ბატონო. იგივე ბედს გაიზიარებს ყველა, ვინც უარს ამბობს, მივიდეს საგამოძიებო კომისიაში და უპასუხოს კითხვებს. სხვა თემაა რამდენად ღრმად წავა ეს ყველაფერი. იმედია, რომ პასუხგაუცემელი კითხვები არ დარჩება. როგორც ხევისბერ გოჩაშია „მოძმეთა სისხლი ცაში ღმერთს შესჩუხჩუხებს და პასუხს ითხოვსო“. რა თქმა უნდა, უნდა დაისაჯონ იმ დანაშაულზე, რაც ქვეყნის წინაშე ჩაიდინეს“, - აცხადებს პოლიტოლოგი.
რაც შეეხება ოპოზიციის ნარატივს, რომ დროებითი საგამოძიებო კომისია ემსახურება რუსულ ინტერესებს, პოლიტოლოგი ამბობს, რომ რუსეთისთვის გაკეთებული იყო 2008 წლის აგვისტოს ომი, რის შედეგადაც სამხრეთ კავკასიაში განათავსა თავისი სამხედრო ბაზები და შექმნა ორი მარიონეტული სახელმწიფო.
„ეს იყო რუსეთისთვის გაკეთებული საქმე! ასევე, თავიდან ბოლომდე განაიარაღა საქართველო, მიიღო უამრავი იარაღი ალაფად და მიიღო სტრატეგიული ობიექტები რეპარაციების სახით. საქართველოს აეკრძალა შეიარაღების შესყიდვა, რასაც დაედო ემბარგო, რამაც გამოიწვია ჩვენი თავდაცვისუნარიანობის კატასტროფული ვარდნა, რის შედეგებსაც დღესაც ვიმკით. აი, ეს იყო რუსეთისთვის გაკეთებული საქმე“, - აღნიშნა for.ge-სთან საუბრისას სოსო მანჯავიძემ.
