„გორში გაჭედილ დარბაზში ბევრმა ადამიანმა გაიგონა გოკა გაბაშვილის ნათქვამი, „კაცო, ხომ გვითხრა მიშამ, რაც მეტს დახოცავენ, უკეთესია“. შემდეგ გოკამ მიმართა ხალხს, „ყველანი დარჩით, აქ რუსი ვერ შემოვა“. კარბელაშვილმა ხელი მაგრად ჰკრა გოკა გაბაშვილს, გამოგლიჯა მიკროფონი და ხალხს მიმართა, „მე არ ვიცი, რუსი რამდენ ხანში შემოვა, მაგრამ ეს არაკაცი (სალანძღავი სიტყვა გამოიყენა გოკას მიმართ) აქედან რომ გაიქცევა, იცოდეთ, რომ რუსი შემოდის“. ოც წუთში მართლაც გავარდა გოკა გაბაშვილი გორიდან“, - აცხადებს „მართვის სტრატეგიული ინსტიტუტის“ ხელმძღვანელი პეტრე მამრაძე for.ge-სთან საუბრისას.

ისტორიის ახლებურად დანახვის მცდელობაა, როცა ნაცები უცნაურ შეფასებას უძებნიან აგვისტოს ომში მომხდარ ღალატს, რომ ქართველმა გმირმა ჯარმა სააკაშვილის სარდლობით საქართველოს ტერიტორიის 20% კი არ დაკარგა, არამედ შემოსეული ვერაგი მტრისგან ქვეყნის 80% გადაარჩინა. ისტორიის უკუღმა წაკითხვა რას ემსახურება? დაახლოებით ეს ისეთივე საკითხია, იურისტები ერთსა და იმავე ფაქტს ურთიერთსაწინააღმდეგო პოზიციებიდან რომ ამართლებენ. რეალურად, ჩვენი ტერიტორიების 20% დავკარგეთ, თუ 80%-ის დაკარგვისგან გვიხსნა მხედართმთავარმა სააკაშვილმა?

- ამ თემასთან დაკავშირებით დოკუმენტური წიგნი მაქვს დაწერილი - „ავანტიურა 08.08.08“. ეს მოხდა საკმაოდ ხანგრძლივი მუშაობის შედეგად, ჯერ ერთი, პარლამენტის წევრი ვიყავი და ბევრი ინფორმაცია მომდიოდა, გარდა ამისა, მაინტერესებდა ეს პროცესები, ბევრ ადამიანს შევხვდი, მქონდა კონფიდენციალური, გულწრფელი საუბრები, მათ შორის, ლტოლვილებთან. მინდა გითხრათ, რომ ეს იყო სამშობლოს ძალიან დიდი ღალატი, რაც ჩაიდინა სააკაშვილმა. ამას ხანგრძლივი ისტორია აქვს, ეს არ დაწყებულა 7 აგვისტოს. ჯერ კიდევ 2004 წელს, 26 მაისს სააკაშვილმა პარადზე ილაპარაკა, „ჩემი პირველივე ვადის დროს ჩვენ აღვადგენთ საქართველოს ტერიტორიულ მთლიანობასო“, მაშინ ევროპელი, ამერიკელი დიპლომატები მეკითხებოდნენ, რას ნიშნავდა ეს?! ვპასუხობდი, ეს ნიშნავს მხოლოდ იმას, რომ ძალიან დიდი ალბათობით, სააკაშვილის პირველივე ვადის დროს ჩვენ უკვე განუსაზღვრელი დროით დავკარგავთ როგორც ცხინვალის რეგიონს, ასევე, აფხაზეთს. რომ არა 2007 წლის 7 ნოემბერი, სააკაშვილის გადადგომა და მერე უკვე ხელახალი არჩევნები, ამ ტერიტორიებს დავკარგავდით სააკაშვილის პირველი ვადის დროს. იმ პერიოდში, წესით, არჩევნები 2009 წლის იანვარში უნდა შემდგარიყო. 2004 წლის ივლის-აგვისტო ეს იყო რეპეტიცია მთელი ღალატის, როცა სააკაშვილის ქმედებების გამო 19 აგვისტოს 58-ე არმია მარშით მოდიოდა როკის გვირაბისკენ, რუსეთის ტელევიზია ამას აშუქებდა - ტანკები, ჯავშანტრანსპორტიორები... 2004 წლის 19 აგვისტოს სააკაშვილმა უკვე შეწყვიტა ავანტიურა, განცხადება გააკეთა, გამომყავს ჯარებიო და ბოლო მომენტში გადავრჩით.

იმ პერიოდში მართლაც ჟვანიამ შეაჩერა სააკაშვილი?

- ჟვანიას ფაქტორი დადებითი იყო მაშინ სააკაშვილის შეკავების თვალსაზრისით. გაიხსენეთ, ოსმა სეპარატისტებმა სოფელ ვანათიდან რომ წამოიყვანეს და ცხინვალში დააჩოქეს ჩვენი პოლიციელები, სააკაშვილი მეორე დღეს ჩამოვიდა ირანიდან, იმ ღამით ყვიროდა, ყველანი უნდა წავიდეთ იქ, ცხინვალში, არ შეიძლება ამის ასე შერჩენა, ვისაც უნდა, ის დარჩეს, სააკაშვილი ჯარიანად, ყველაფრიანად აპირებდა ცხინვალში შესვლას, ჟვანია მაშინ უყვიროდა სააკაშვილს, რა პრობლემაა, წავიდეთ ყველანი, მაგრამ ხვალ შენ პრეზიდენტი აღარ იქნები ამ კატასტროფის გამოო. ამან იმოქმედა სააკაშვილზე. მან გაიაზრა, რომ კატასტროფა მოხდებოდა და პირადად მას შეეხებოდა, თორემ მასზე არაფერი იმოქმედებდა.

ემზარ კვიციანი აგვისტოს ომის პრელუდიას 2006 წელს სოჭში სააკაშვილისა და პუტინის შეხვედრას უკავშირებს, რომ მაშინ დაიწყო სააკაშვილმა ომზე ფიქრი, ორფოლო წამოიწყო და ეს კოლექტიური ღალატი ჩვენი ქვეყნის წინააღმდეგ იყო ჩაფიქრებული. ამ პერიოდს როგორ გაიხსენებთ?

- ეს იყო მცდელობა, მაგრამ სააკაშვილი ბოლო მომენტში გაჩერდა. ერთი ცხინვალელი ლოთი კაცი, ბომჟი მოკლეს და დააგდეს, რადგან გვამი სჭირდებათ ხოლმე ნაცებს საჩვენებლად. სხვათა შორის, ამ თემასთან დაკავშირებით მახსენდება ბიძინა ივანიშვილის წერილი. 2011 წლის შემოდგომაზე ბიძინა ივანიშვილმა გამოაქვეყნა პირველი ღია წერილი პოლიტიკაში შემოსვლის თაობაზე, იქ ერთ წერილში მერაბიშვილს მიმართავს, „გახსოვს, ვანო, თქვენს თხოვნას დავყევი და შეგხვდი შენ, სააკაშვილს და ბოკერიას, 40 წუთში დავუმტკიცე ბოკერიას, რომ მისი გეგმა ცხინვალში შეიარაღებული ძალების შეყვანისა და ცხინვალის აღების შესახებ იყო ავანტიურა და კატასტროფით დამთავრდებოდა, შენ, ვანო, მაშინ აღტაცებას არ მალავდი“. მართლაც, ვანოს ძალიან არ უნდოდა ცხინვალში შესვლა, იმიტომ კი არა, რომ პატრიოტი იყო, არამედ ესმოდა, რომ მოხდებოდა კატასტროფა, თანამდებობას დაკარგავდა და ციხეში აღმოჩნდებოდა.

ცხინვალში შესვლა ბოკერიას გეგმა იყო, რომელსაც ეგონა, როკის გვირაბს გადაკეტავდა და ყველაფერი მორჩებოდა?

- დიახ, ბოკერიას გეგმა იყო. შეიძლება, გახსოვთ ბურჯანაძის ჩვენებაც, როცა იხსენებდა 2008 წლის გაზაფხულზე მათ შეხვედრას, ბოკერია ყვიროდა, კარტ-ბლანში გვაქვს ახლა, ნებართვა გვაქვსო, ახლა უნდა შევიდეთ, არ შეიძლება დროის დაკარგვაო.

სააკაშვილს არასწორ ინფორმაციას ბოკერია აწვდიდა, თუ სააკაშვილსაც თავისით ეგონა, რომ ცხინვალში შესვლის ნებართვა ჰქონდა?

- იცით, როგორ არის? ივანიშვილის წერილში მნიშვნელოვანი რამეა ნათქვამი, როცა ივანიშვილმა დაარწმუნა სააკაშვილის გარემოცვა, რომ ცხინვალში შესვლა არ იყო საჭირო, უცებ სააკაშვილმა ჰკითხა, კი მაგრამ, ბიძინა, რუსებმა თვითონ რომ შემოგვთავაზონ ამის გაკეთება, მაშინ როგორ მოვიქცეთო? ივანიშვილს უთქვამს სააკაშვილისთვის, სანამ რუსეთი ოფიციალურ საჯარო განცხადებას არ გააკეთებს, რომ მიესალმება საქართველოს ჯარების იქ შეყვანას და გაჰყავს თავისი სამშვიდობოები, მანამდე რასაც არ უნდა დაგპირდეთ მოსკოვი, იცოდეთ, ეს პროვოკაცია იქნება და არ წამოეგოთ პროვოკაციას, რადგან ყველაფერი კატასტროფით დამთავრდება. მაინტერესებს, საქართველოს პრეზიდენტს როგორ უნდა მოუვიდეს თავში ასეთი კითხვა - „რუსებმა თვითონ რომ შემოგვთავაზონ ცხინვალში შესვლა?!“ 2008 წლის 15 აგვისტოს ბათუ ქუთელიამ, თავდაცვის მინისტრის პირველმა მოადგილემ, ფრანგულ „ფიგაროს“ მისცა ინტერვიუ, სადაც სიტყვასიტყვით ამბობს, „ჩვენ მოვილაპარაკეთ კრემლთან, რომ ცხინვალში ჩვენს საჯარისო ნაწილებს შევიყვანდით, მივხედავდით იქაურ შეიარაღებულ ფორმირებებს და კრემლისგან მივიღეთ მწვანე შუქი. ჩვენ დავიწყეთ ამ ოპერაციის ჩატარება, არავინ ველოდით, რომ რუსეთი ასე მოიქცეოდა და ასე შორს წავიდოდა“. იმავე შინაარსის ინტერვიუს „ფაინეშელ თაიმსში“ ორ ხმაში აძლევენ ბათუ ქუთელია, რომელიც არავის დაუსჯია და ელჩად დაინიშნა შეერთებულ შტატებში, და დარჩიაშვილი. ისინი ადასტურებენ, რომ იყო შეთანხმება, ცხინვალში შევედით და ასეთი რამ მოხდა. იმავეს ამბობს კეზერაშვილი ლარისა ლატინინასთან ინტერვიუში, „ჩვენ გიჟები კი არ ვართ, ჩვენ რუსეთთან ომი კი არ გვინდოდა, ჩვენ ძალიან კარგად გვესმის, თქვენ ავიაცია რომ გამოიყენოთ, ბომბები კი არა, ტაშტები რომ დაგვაყაროთ, იმ ტაშტებით მთელი საქართველო დაიფარება“. ანუ სააკაშვილის მაღალჩინოსნები ხაზგასმით ამბობდნენ, ასე მოგვატყუა კრემლმაო. გახსოვთ სააკაშვილის საჯარო განცხადება, კრემლს საერთოდ არ აინტერესებს ცხინვალის რეგიონი, კრემლს ჩემთან ეს წამოსცდაო. მე კი ამაზე ვთქვი, რომ წამოცდენებს, ანუ დეზინფორმაციის გავრცელებას ჩეკისტებს, ალბათ, პირველ კურსზე ასწავლიდნენ.

მაშინ რას ნიშნავს გრიგოლ ვაშაძის მიერ გავრცელებული ინფორმაცია, რომ პუტინმა გააფრთხილა სააკაშვილი, მე დავსჯი ამერიკას კოსოვოს მაგალითით და ეს მოხდება საქართველოს წინააღმდეგ გალაშქრებითო?

- ეს ყველაფერი მართალია, სააკაშვილმა პუტინის ეს მიზნები უმაღლეს დონეზე განახორციელა. პუტინის სასარგებლო იდიოტად მოგვევლინა.

ზოგიერთებს შთაბეჭდილება რჩებათ, რომ საგამოძიებო კომისიაზე გენერლების შიში იგრძნობა თეა წულუკიანის მიმართ. ეს ადამიანები, ცდილობენ დანაშაული საკუთარ თავზე აიღონ. მათ შორის, ზაზა გოგავა თავის თავზე იღებს, რომ კოდორელები ვერ გააფრთხილა ევაკუაციის თაობაზე. ხომ არ ფიქრობთ, რომ სააკაშვილის ცოდვებს იმიტომ იბრალებენ, რომ წულუკიანმა გამოაცხადა, არ დასჯიდა სამხედროებს?

- აშკარად ჩანდა, რომ კომისიის წინაშე წარდგენილი ადამიანები ტყუილს ამბობდნენ, ეს ეტყობოდათ. მე ხომ შიგნიდან ვიცი, რაც ხდება. რაკი კომისიამ გამოაცხადა, რომ სამხედრო პირები არ დაისჯებოდნენ და, მართლაც, სამხედრო იმისთვისაა, შეასრულოს ბრძანება, ამის გამო „ნაცმოძრაობის“ პოლიტიკურმა ხელმძღვანელობამ მათ უბრძანა, ახლა თქვენ პარტიული სტრუქტურებიდან მოიხსენით თავი და თქვენს თავზე აიღეთ ყველაფერიო. მოგეხსენებათ, გოგავაც და ყურაშვილიც „ნაცმოძრაობაში“ იყვნენ. ძალიან სასაცილო იყო, სატირალი რომ არ ყოფილიყო, გოგავას ნათქვამი, რომ მან დაურეკა მერაბიშვილს და ბრძანებები მისცა. უკაცრავად, მაგრამ შიგნით ისეთი ხისტი იერარქია იყო, რომ გოგავა მერაბიშვილს ვერც დაელაპარაკებოდა. მერაბიშვილიც ისე მისცემდა ბრძანებას გოგავას, თვითონ კი არ დაურეკავდა, მოადგილეს დაარეკინებდა, ამიტომ ჩემთვის ეს იყო აბსურდი. გოგავა ხომ ამბობს, რა მნიშვნელობა აქვს, მე ყველას ვაძლევდი ბრძანებასო, მაშინ სააკაშვილისთვის ებრძანებინა, დაერეკა და ეთქვა, შენ უკვე მხედართმთავარი ხარ, ახლავე გაეცი ბრძანება, დაბომბონ ცხინვალი. რაც შეეხება ყურაშვილს, მან 2013 წელს ზაფხულში სკანდალური ინტერვიუ მისცა, უგულავა ერეოდა სამხედრო მოქმედებებშიო. ყურაშვილის მაშინდელ ინტერვიუში ყველაფერია ნათქვამი, რომ შეიძლებოდა ამ ომის აცილება, დიპლომატებს რომ ემუშავათ. ყურაშვილი მაშინ არ იყო „ნაცმოძრაობის“ წევრი და ამხელდა ამ ყველაფერს, ბოლოს მან თქვა, პროკურატურასთან ყველაფერს ვიტყვი, როცა დამიძახებენო, მაგრამ არ დაუძახა პროკურატურამ და აღმოჩნდა ისევ ნაცების შემადგენლობაში. ამ ორ ადამიანს უბრძანეს მერაბიშვილმა და სხვებმა, როგორც გენერლებმა, თქვით, რაც სათქმელია, რომ პოლიტიკური ხელმძღვანელობა მდგომარეობიდან გამოიყვანოთო.

როგორ ფიქრობთ, სამხედროებზეც უნდა გავრცელდეს დასჯა, რადგან ეს ადამიანები შეიძლება ტყუილებში აიხლართონ?

- სამხედროები არ უნდა დაისაჯონ, მაგრამ ტყუილის მთქმელი სამხედროები უნდა ვამხილოთ ტყუილში. სოზარ სუბარი რომ უკითხავდა ინტერვიუდან ფრაგმენტებს და ეკითხებოდა, ეს ხომ თქვენი სიტყვებიაო, რა დღეში ჩავარდა საწყალი მამუკა ყურაშვილი.

რუსეთისგან სააკაშვილის ხელისუფლებას მართლაც ჰქონდა გარანტიები, რასაც სააკაშვილი წამოეგო, თუ მაკკეინის ინტერესი იყო ამ ომის გაჩაღება, რომელმაც 2008 წლის საპრეზიდენტო კამპანია რუსეთ-საქართველოს ომის თემაზე ააგო?

- მე ჩავატარე ჩემი გამოძიება, როცა წიგნს ვწერდი და ორი „რუსი“ შემრჩა ხელში, ერთი რუსია კგბ-ს გენერალი თემურ ალასანია, რომელსაც ყოველთვის კგბ-ს გენერლად იხსენიებენ რუსები თავიანთ მასმედიაში, ასევე, კგბ-ს ეფრეიტორი, მისი დისშვილი - მიხეილ სააკაშვილი. კიდევ ერთი რუსი იყო - კულახმეტოვი, რომელიც პატიოსანი გენერალია თავისი ქვეყნის და ჯარის გაგებით. კულახმეტოვმა დარეკა ცენტრში და თქვა, ქართველები, მათი მთავრობა მთავაზობს 4 მილიონ დოლარს, რომ გავატარო და შიგნით შევიდნენ, ისინი ოპერაციას იწყებენ. ცენტრიდან უთხრეს - „деньги взять и пропустить“. კულახმეტოვმა ფული აიღო, რაც რუსეთის ხაზინას ჩაბარდა, ასწიეს შლაგბაუმი და გაატარეს ჩვენი დანაყოფები. ამ დროს სააკაშვილი და ბიძამისი ყველას ეუბნებოდნენ, კულახმეტოვმა ფული აიღო, შევდივართ ბოლომდე, როკის გვირაბს ვკეტავთო... კითხვა მაქვს, ბათუ ქუთელიას ინტერვიუების შემდეგ ერთხელ მაინც თუ დაუძახა პროკურატურამ ქუთელიას და ჰკითხა, შვილო, რომ ამბობ რუსეთს მოველაპარაკეთ, კრემლმა მწვანე შუქი აგვინთოო, ვინ არიან ეს რუსები, რა გარანტია მოგცეს? ანუ მართალია ცნობილი მეცნიერი, ერთ დროს საქართველოში მცხოვრები ლინკოლნ მიტჩელი, რომელიც წერს, რომ პუტინის პირადი აგენტი ისე მარჯვედ და ეფექტურად ვერ შეასრულებდა პუტინის დავალებებს იმ წლებში და ბოლოს აგვისტოს ომში, როგორც სააკაშვილმა თავისი ხელით შეასრულა. ისევ ღალატის თემას რომ მივუბრუნდეთ, რაზეც კომისიას ჯერ არ უსაუბრია, 9 აგვისტოს ვიწრო წრეში სააკაშვილმა ილაპარაკა, „რუსები რაც მეტს დახოცავენ ჩვენს ხალხს, მოსახლეობას, მით უკეთესი ჩვენთვის“. სააკაშვილის ამ ნათქვამის შესრულება დაიწყეს ნაცებმა ყველა დონეზე. გოკა გაბაშვილმა ეს იმდენად ხმამაღლა უთხრა კარბელაშვილს გორში 13 აგვისტოს, რომ გაჭედილ დარბაზში ბევრმა გაიგონა, „კაცო, ხომ გვითხრა მიშამ, რაც მეტს დახოცავენ, უკეთესია“. გოკა ეუბნებოდა ხალხს, „ყველანი დარჩით, აქ რუსი ვერ შემოვა“. ამ დროს სწორედ 13 აგვისტოს შევიდნენ რუსები. კარბელაშვილმა ყველას თანდასწრებით ხელი მაგრად ჰკრა გოკა გაბაშვილს, გამოგლიჯა მიკროფონი და მიმართა ხალხს, „მე არ ვიცი, რუსი ნახევარ საათში შემოვა, თუ ერთ საათში, მაგრამ ეს არაკაცი, (სალანძღავი სიტყვები თქვა გოკა გაბაშვილის მიმართ, არ მინდა გავიმეორო) აქედან რომ გაიქცევა, იცოდეთ, რომ ეს ნიშნავს, რუსი შემოდის“. ისე ახდა ეს ყველაფერი, რომ ოციოდე წუთში შავი ბოლი ავიდა გოკა გაბაშვილის საბურავებიდან და გავარდა გაბაშვილი გორიდან. კარბელაშვილს ვერ წავართმევთ, რომ ბოლომდე დარჩა ადგილზე და იქაურ ხეობებშიც დადიოდა. სოსო ვახტანგიშვილმა, ადგილობრივმა კაცმა, მერე პარლამენტის წევრი რომ გახდა „ოცნებიდან“, განცხადება გააკეთა იმ პერიოდში, გაბაშვილს ვეკითხებოდი, „კი მაგრამ, გოკა, ხომ დროა, გავაფრთხილოთ მოსახლეობა და გამოვიყვანოთ სახიფათო რეგიონიდან?“ გოკა კი პასუხობდა, „არავითარ შემთხვევაში“. 10 აგვისტოს, კვირა დღეს, პარლამენტის თავმჯდომარე ბაქრაძემ წაიკითხა მხედართმთავარ სააკაშვილის მოწოდება, „ყველა მხრიდან შემოდის მტერი, თქვენთვის ყველა მისაწვდომი საშუალებით წინ აღუდექით მტერს“. ცხადია, დანები და ჩანგლები იქ არ იყო ნახსენები, მაგრამ ხალხმა ასე აღიქვა, დანებით და ჩანგლებით უნდა აღვუდგეთ მტერს?! რას ნიშნავდა ეს მოწოდება? მხედართმთავარი ხარ, 10 აგვისტოს, როცა ბუნკერში იმალები და უწმინდესის ზარებს არ პასუხობ, ელაპარაკები ბაქრაძეს და უგზავნი ამ წერილს ბუნკერიდან, ამ დროს ძალიან კარგად იცი, ჯარი განცალკევებულია მტრისგან, ბრძოლა აღარ მიმდინარეობს. 9 აგვისტოს ეს გამოაცხადა თავდაცვის მდივანმა რობერტ გეითსმა, რომ საქართველოს ცას აკონტროლებს რუსეთის 55 სამხედრო თვითმფრინავი, ცაში კიდია ეს თვითმფრინავები და არავითარი ბრძოლა არ მიმდინარეობს, დამთავრებულია ყველაფერი. ამ დროს სააკაშვილმა, როგორც მხედართმთავარმა, იცის, რომ მისი ჯარი აღარ იბრძვის, მაგრამ მშვიდობიანი მოსახლეობისგან მოითხოვს ბრძოლას? რას ნიშნავს ეს? უნდა, რომ მტერს შეახოცოს საკუთარი ხალხი? სააკაშვილის მიზანი ზუსტად ეს იყო, ეგებ, ვინმე მაინც წამოეგოს ჩემს მოწოდებას და ყველა საშუალებით აღუდგეს მტერს, ცხელთავიანი ახალგაზრდობა, ვიღაცას ავტომატი აქვს, იქ რეზერვისტებს დაურიგა იარაღი, ვიღაცას საკუთარი თოფი აქვს, ეგებ, მოხდეს უბედურება და მაშინ ხომ რუსები გაჟუჟავენ სუყველას, მაშინ მთელი მსოფლიო ხომ დაინახავს, პირსისხლიანი და ჩექმასისხლიანი მონღოლები (ეს სააკაშვილის ტერმინია) რომ შემოვარდნენ? ეს უნდოდა სააკაშვილს, წაეშალა თავისი ღალატი რუსი ჯარის ბარბაროსობის ჩვენებით. მადლობა ღმერთს, საქართველოს მასშტაბით წინააღმდეგობის არცერთი შემთხვევა არ ყოფილა, არც გორში, არც ფოთში, არც სამეგრელოში, არც კოდორში. შესაბამისად, რუსებმა მასობრივი ხოცვა-ჟლეტა არ მოაწყეს. კი, ჩრდილოკავკასიელი მოროდიორები რომ შემოიყვანეს, მათ რამდენიმე ადამიანი მოკლეს, მაგრამ სააკაშვილის მოწოდება, ბაქრაძეს რომ წააკითხა, ჩაიშალა. არადა, ეს იყო პირდაპირი მოწოდება სისხლისღვრისთვის. ეს იყო ღალატის მთავარი კომპონენტი, როცა საკუთარ ხალხს მოსაკლავად გაიმეტებ. აღარაფერს ვამბობ, უგულავა რომ კამანდრობდა, 8 აგვისტოს ცხინვალისკენ როგორ მიჰქონდათ წითელი ფიანდაზები, გადასატანი ტრიბუნები, 2000-ზე მეტი დროშა და აღლუმისთვის ემზადებოდნენ ნაცები.