დიდმა ბრიტანეთმა მოსამართლეებს - ლევან მურუსიძესა და მიხეილ ჩინჩალაძეს სანქციები დაუწესა.
შურისძიება მოსამართლეებზე სასამართლო სისტემის ხელში ვერ ჩაგდების გამო - ასე შეფასდა დასანქცირების ფაქტი. იგივე პოზიცია აქვთ მმართველ გუნდში, სადაც ფიქრობენ, რომ „დიფ სთეითის“ დასაყრდენი ახლა დიდი ბრიტანეთია - საქართველოზე დაწყებული წნეხი უკვე ლონდონიდან გაგრძელდა.
სანქცირებულ პირთა სია საგარეო საქმეთა სამინისტრომ განაახლა. საუბარია ამ პირებისა და მათ საკუთრებაში არსებული კომპანიების აქტივების დაყადაღებაზე.
ყადაღა შეეხება ანგარიშებს, სხვა საშუალებებსა და ეკონომიკურ რესურსებს.
თბილისის სააპელაციო სასამართლოს თავმჯდომარის მიხეილ ჩინჩალაძის, ისევე როგორც თბილისის სააპელაციო სასამართლოს მოსამართლისა და იუსტიციის უმაღლესი საბჭოს წევრის, ლევან მურუსიძის შემთხვევაში, განმარტებულია, რომ არსებობს გონივრული ეჭვი, რომ ისინი გარეულნი იყვნენ ან არიან კორუფციულ გარიგებებში.
ლევან მურუსიძის განცხადებით, დიდი ბრიტანეთის მხრიდან კორუფციის ბრალდებით მისი დასანქცირება თითიდან გამოწოვილი თემაა. გარე ძალები ცდილობენ სასამართლო სისტემის დაშინებას და მისი დასანქცირება სხვა მოსამართლეებისთვის სიგნალია.
„კორუფციის თემა არის თითიდან გამოწოვილი. ყველასთვის ცხადია, რომ დიდი ბრიტანეთი ორი მოსამართლის კორუფციაზე არ შეწუხდებოდა. ზოგადად, გარედან ყოველთვის დიდი ზეწოლა იყო სასამართლო სისტემაზე, რათა სასამართლო სისტემას მიეღო ისეთი გადაწყვეტილება, რომლებიც მათთვის იყო მისაღები. ამის ნათელი მაგალითი არის არჩევნები, რომელიც რუმინეთში ჩატარდა და სასამართლოს მეშვეობით შედეგები გაუქმდა. ამ ძალებს სასამართლოს გამოყენება უნდოდათ ბერკეტად, რომ მიღებული ყოფილიყო ის გადაწყვეტილებები ქვეყანაში, რომლებიც მათთვის იყო მისაღები. არავითარი შემხებლობა ამ გადაწყვეტილებებს კანონთან არ ჰქონოდა და სურდათ ემართათ პოლიტიკური პროცესი საქართველოში. ეს არის სასამართლო სისტემის დაშინება, სიგნალია მოსამართლეებისთვის, რომ თუ არ მიიღებენ გადაწყვეტილებას, რომელიც არის მათთვის მისაღები და რომელიც მათი პოლიტიკისთვის არის მისაღები, მოიქცევიან ისე, როგორც ექცევიან ლევან მურუსიძეს. რაღაცაზე ხომ უნდა დაგასანქცირონ და კორუფცია არის ისეთი თემა, რომ ხალხს დაანახონ კორუმპირებულია და ვასანქცირებთ“, - განაცხადა ლევან მურუსიძემ.
„ხალხის ძალის“ წევრი და ანალიტიკოსი თამარ ჩიბურდანიძე for.ge-თან ამბობს, რომ დიდი ბრიტანეთის მიერ ორი მოსამართლის დასანქცირება მხოლოდ და მხოლოდ პოლიტიკური აქტია და არანაირი სხვა მიზეზი ამ სანქციების არ არსებობს.
„სამწუხაროდ, საქართველოსთვის სიტყვა ევროპა და ევროპული სამართალი გაუფასურდა. ევროპის არასწორ და არასამართლიან პოლიტიკას თავად ტრამპი და მისი ადმინისტრაციაც აკრიტიკებს. ევროპაში ისეთი რაღაცები ხდება, რომ უკვე ჩვენს მიმართ განხორციელებული მათი უსამართლობა აღარ გვიკვირს. დავინახეთ საფრანგეთის ერთ-ერთი ოპოზიციის ძალიან გავლენიან ლიდერს, მარი ლეპენს, არჩევნებში მონაწილეობა აუკრძალეს და ლამის, დააკავონ კიდეც. ამიტომ ევროპაში იმდენი და ისეთი წარმოუდგენელი უსამართლობა ხდება, რომ მათი მხრიდან უკვე ყველაფერი მოსალოდნელია. ახლა საქართველოს წინააღმდეგ ე.წ. მარათონში დიდი ბრიტანეთი ჩადგა და ის ცდილობს უკვე წინა პლანზე გადმოინაცვლოს. „დიფ სთეითის“ მთავარი შტაბი, ლონდონი გახდა. თუმცა ეს შეტევაც ისევე უშედეგოდ დასრულდება, როგორც აქამდე სრულდებოდა“, - ამბობს ჩიბურდანიძე.
რაც შეეხება მოსამართლეების დასანქცირების მიზანს, ჩიბურდანიძე ამბობს, რომ ეს არის შურისძიება იმის გამო, რომ „დიფ სთეითმა“ ქართული სასამართლო ხელში ვერ ჩაიგდო.
„საქართველოს სასამართლო, ყველა მცდელობის და ზეწოლის მიუხედავად, „დიფ სთეითმა“ ვერ გააკონტროლა და მასზე წვდომა არა აქვს. ამიტომ ეს არის შურისძიება და მოსამართლეების საჩვენებელი დასჯა. გვახსოვს ბაიდენის ადმინისტრაციამაც პირველი ვინც დაასანქცირა, ეს მოსამართლეები იყვნენ. პირველი შეტევა და იერიში მოსამართლეებზე მიაქვთ. წარმოიდგინეთ რამხელა ინტერესი აქვთ სასამართლოს მიმართ, რომ პირველი შეტევა დაიწყეს არა ბიძინა ივანიშვილზე, ან რომელიმე სახელისუფლებო გუნდის წარმომადგენელზე, არამედ მოსამართლეებზე. გვახსოვს რაღაცა შეთითხნილი პროექტებით, თითქოს რეფორმებით, თავსმოხვეული ბრჭყვიალა სიტყვებით და ვითომ დემოკრატიის სახელით, როგორ ცდილობდნენ სასამართლოზე კონტროლის დამყარებას.
ხელისუფლება დადგა ძალიან მყარად, მათ შორის სასამართლო სისტემა და ღიად უთხრეს „დიფ სთეითის“ ავტორებს, რომ სასამართლოს არ გააჩუქებდნენ სხვა ქვეყანაზე, არავის მისცემდნენ უფლებას, რომ ქვეყნის ყველაზე მნიშვნელოვანი ინსტიტუტი გარედან ყოფილიყო კონტროლირებადი. გააჩუქო სასამართლო სისტემა, ეს ნიშნავს სახელმწიფოზე კონტროლის დამყარებას. ჩვენ ვნახეთ რა ხდება უკრაინაში, მოლდოვაში, სადაც სასამართლო სხვა სახელმწიფომ წაიღო. საქართველოს ხელისუფლებამ ამ ზეწოლას გაუძლო. ასევე ძალიან მტკიცედ დადგნენ მოსამართლეები და სწორედ ამიტომ პირველი თავდასხმის მსხვერპლი „დიფ სთეითის“ მხრიდან ისინი არიან“, - ამბობს ჩიბურდანიძე.
მისივე თქმით, ეს ყველაფერი საქართველოსთვის უკვე გედის სიმღერასავით არის. ქვეყანამ ამ წლების განმავლობაში იმხელა ზეწოლას გაუძლო, მაგრამ მალე ყველაფერი დასრულდება და სამშვიდობოს გავა.
„ახალი გლობალური პოლიტიკა უკვე დაწყებულია, ამიტომ ძალიან მალე ბევრი რამ ძირეულად შეიცვლება. ლიბერალები ძალიან მალე წარსულს ჩაბარდებიან. ამიტომ ეს სანქციები საქართველოზე და ჩვენს მოსახლეობაზე ვერანაირ ზეგავლენას ვეღარ ახდენს. ლიბერალები ცდილობენ მსოფლიოს რომელიმე კონტინგენტზე კონტროლი მაინც როგორმე დაიტოვონ, აქედან გამომდინარე, ბრძოლა ჯერ კიდევ წინ არის, მაგრამ ამაზე დიდ ბრძოლას უკვე გავუძელით.
ნებისმიერი სანქცია მოსამართლეს შეეხება, პოლიტიკოსს თუ ეკონომიკას, ყველა ეს არის გაფრთხილება და დაშინება. ბუნებრივია, მოსამართლეების დასანქცირებაც დანარჩენი მოსამართლეების დაშინებისთვის კეთდება. ეს არის ზეწოლა სასამართლოზე, რათა ჩვენმა მოსამართლეებმა შეასრულონ და გააკეთონ ის, რაც ამ ძალებს სურთ. აშინებენ სხვა მოსამართლეებსაც, რომ თუ ისინიც ურჩები იქნებიან, იგივე ბედს გაიზიარებენ. თუმცა ეს ყველაფერი საქართველოს შიდა პოლიტიკაზე ვერანაირ გავლენას ვერ მოახდენს. ხალხი უკვე ძალიან დიდი ხანია მიხვდა, რატომ და რის გამო სჯიან ჩვენს ქვეყანას და ხელისუფლებას“, - ამბობს ჩიბურდანიძე.
