დიმიტრი მედვედევმა ევროპელებს რუსოფობიის „საუკეთესო“ წამალი გამოუწერა - უახლესი რუსული რაკეტები. მისი აზრით, ევროპელ პოლიტიკოსთა დიდი ნაწილი რუსოფობიითაა დაავადებული. ასეთ შემთხვევაში, „საუკეთესო სამკურნალო ეფექტი“ აქვს ისეთ ძლიერ სედატიურ პრეპარატებს, როგორებიც არის „კალიბრი“, „ონიქსი“, „ისკანდერი“ და სხვა. მედვედევმა მანიაკალურ სტადიაში მყოფი პაციენტების მაგალითებიც დაასახელა - მაკრონი, სტარმერი, სტუბი და მრავალი სხვა ევროპელი პოლიტიკოსი.

პარალელურად, ბოლო დროს ხშირად ისმის, თითქოს ბრიუსელი რუსეთთან ომისთვის ემზადება. სულ ბოლოს ამის შესახებ უნგრეთის პრემიერმა აღნიშნა. ვიქტორ ორბანი ამბობს, რომ შემთხვევითი არაა, რომ ბრიუსელი ევროპულ ოჯახებს საკვების მომარაგებისკენ მოუწოდებს.

„ამ დროისთვის სასაცილოა, რომ ისინი აპირებენ ბრიუსელიდან გაუგზავნონ მესიჯი ყველა ევროპულ ოჯახს, რომ 72 საათის განმავლობაში საკმარისი საკვები მოიმარაგონ, მაგრამ თუ ამას უკნიდან შევხედავთ, საშინელებაა იმის დანახვა, თუ რა შეიძლება იყოს ამ ხალხის გონებაში, რაღაცას აპირებენ“, - ამბობს ორბანი და ჯერჯერობით ვერ ხედავს, ევროპას ომი ემუქრებოდეს. უბრალოდ, როგორც ჩანს, ბრიუსელს ომის გაგრძელება თავად სურს.

რას ნიშნავს 72-საათიანი საკვების მომარაგება? იმას, რომ ევროპელებს მხოლოდ სამდღიანი ომი ექნებათ რუსეთთან?

ანალიტიკოსი დავით ზარდიაშვილი მიიჩნევს, რომ ბრიუსელსა და რუსეთს შორის ომი ღრმად არასერიოზულია. ეს ყველაფერი არის ხმაური არაფრის გამო. შეუძლებელია ევროპას რუსეთთან ომი უნდოდეს, რადგან ამის რესურსი არ გააჩნია, ევროპას კი არა, ვის უნდა ახლა რუსეთთან ომი, გიჟი თუ არ არის?! უბრალოდ, ევროპელები კუნთებს ათამაშებენ და ისეთ პოზაში არიან, როგორმე თავიანთი რენომე შეინარჩუნონ და იქნებ, უკრაინის გარშემო მოლაპარაკებებში მონაწილეობა მიაღებინონ, რომ თავიანთი ინტერესები დაიცვან. თუ ეს არ გამოუვათ ევროპელებს, მერე თავს გაიმართლებენ, ჩვენ ყველაფერი ვიღონეთ, მაგრამ არ გამოვიდაო.

„სხვა რა შეუძლიათ ევროპელებს ასეთ ვითარებაში? პოლიტიკურ პროცესებზე გავლენა დაკარგეს და ახლა თამაშობენ, ვითომ რამის გადამწყვეტები არიან. ვნახავთ ახლა, რას მოიმოქმედებენ ჯამური ოდენობით - გერმანია, საფრანგეთი, ბრიტანეთი, დანარჩენები მხედველობაში მისაღები არც არიან, გარდა პოლონეთისა. პოლონეთს ჰყავს 300-ათასიანი არმია, მეტ-ნაკლებად გარკვეული სამხედრო ღირებულების მქონე. დანარჩენებს არც შეიარაღება, არც სამხედრო ძალა რუსეთთან საომრად მზად არ აქვთ. მათ არ ჰყავთ ჯარისკაცების საკმარისი რაოდენობა, რომლებიც სანგრებში რუსებს გააჩერებდნენ. ახლა ლაპარაკობენ მაქსიმუმ 20 ათასი კაცის მობილიზებაზე, 20 ათასი რა არის, როცა მარტო პოკროვსკთან რუსეთს უყენია დაახლოებით 200-300 ათასი ჯარისკაცი. 20 ათასი კაცი გინდა გაგიგზავნია, გინდა არა, აზრი არ აქვს. ამას წინათ მაკრონმა თქვა ნებაყოფლობითი მოხალისეთა კოალიციის შექმნის შესახებ, რომელიც დაეხმარება უკრაინას. მაკრონმა თქვა, თუ ამ სამშვიდობოების მობილიზება მოვახერხეთ, რასაკვირველია, ფრონტის ხაზზე არ დავდგებით, რუსეთთან ომში არ ჩავებმებით, არამედ განვლაგდებით ხაზისგან მოშორებითო. მაშინ რა აზრი აქვს ასეთ მობილიზებას?! - აცხადებს დავით ზარდიაშვილი ჩვენთან საუბრისას.

„მართვის სტრატეგიული ინსტიტუტის“ ხელმძღვანელი პეტრე მამრაძე For.ge-სთან საუბრისას აცხადებს, რომ, რა თქმა უნდა, ევროპელებმა კარგად იციან, რომ პუტინი ევროპასთან ომს ამ ეტაპზე არ აპირებს. სხვათა შორის, ეს ბრუნო კალმაც თქვა, გერმანიის დაზვერვის უფროსმა.

რაც შეეხება 72 საათის განმავლობაში საკვების მომარაგებას, პეტრე მამრაძის თქმით, ამას აცხადებენ იმისთვის, რომ სანამ საგანგებო ვითარებაში უკვე სახელმწიფო და მთავრობა შეძლებენ რაღაცის ორგანიზებას და დახმარებას, ოჯახებს უკვე ჰქონდეთ სამდღიანი მარაგი. თუმცა აქ მთავარია, ევროპელები რისთვის აკეთებენ ამას? საქმე ისაა, მათ გადაწყვეტილი აქვთ, გამოყონ დიდი თანხები, სავარაუდოდ, 800 მილიარდ ევროზე მეტი, თითქმის ტრილიონი ევრო, რომ შეუდგნენ მილიტარიზაციას, ანუ იარაღის წარმოებას. მით უმეტეს, ევროპა და ამერიკა უკრაინას შეჰპირდნენ ერთ წელიწადში 3 მილიონ საარტილერიო ჭურვს, მაგრამ ეს ვერ გააკეთეს, რადგან ევროპაში იარაღის მწარმოებელი ქარხნები გაუქმებულია. პერსონალი აღარ არის, არც მასალა აქვთ. უნდოდათ ამის გაკეთება და ვერ გააკეთეს. ამ დროს ჩრდილოეთ კორეა მეტ იარაღს აწარმოებს, ასევე, ირანი და აწვდის რუსეთს. ევროპელებმა ეს ყველაფერი გააუქმეს ცივი ომის დამთავრების შემდეგ.

„თავის დროზე 800 მილიარდი კოვიდთან საბრძოლველად რომ გამოიყო, იმაზე მეტი თანხაა ახლა გამოყოფილი მილიტარიზაციისთვის. ეს არ არის ადვილი საქმე. ევროპაში, განსაკუთრებით, დასავლეთ ევროპაში, გერმანია, საფრანგეთი, ჰოლანდია, ბელგია, სკანდინავიის ქვეყნები, თვითონ ბრიტანეთი, მოსახლეობას ამის გაგონებაც არ უნდა, მათ არ სურთ რუსეთთან იბრძოლონ. ამასთან, არც სჯერათ, რომ რუსეთი თავს დაესხმება. უკრაინის გამო ბრძოლაში ჩაბმის იდეა კი ევროპელებს არ მოსწონთ. ამიტომ საჭიროა ამ ქვეყნებში საზოგადოებრივი აზრის შექმნა, რისთვისაც ევროპული ქვეყნების მთავრობები ცდილობენ რადიკალური მეთოდების გამოყენებას, არიქა, ხალხო, დაგვიდგა ჟამი, მობილიზაცია, ყველაფერი თავდაცვისა და შესაძლო ომისთვის, ანუ აშინებენ საკუთარ ხალხს, რომ ჩანერგონ შიში და ნაწილობრივ მართლებიც არიან. მათი მესმის, ეს პოლიტიკის ანა-ბანაა. თუ გინდა პოლიტიკური გადაწყვეტილება მიიღო, მთავრობისა და ბიუჯეტის დონეზე უნდა მოამზადო საზოგადოებრივი აზრი იმ დონემდე, რომ ოპოზიციამ არ გაგიწიოს წინააღმდეგობა“, - აცხადებს პეტრე მამრაძე და

ამასთან, იხსენებს პუტინის ნათქვამს 2014 წლის ყირიმის ანექსიის შემდეგ, რომ დამჭირდეს, ვარშავას საათნახევარში ავიღებო. გარდა ამისა, პუტინმა სხვა დედაქალაქებიც ჩამოთვალა, რომელ ქალაქს რამდენ ხანში აიღებდა. ეს ჩამონათვალი იმიტომ გააკეთა, რომ იცოდა, ევროპელებს ჯარი არ ჰყავდათ. ახლაც ბრიტანეთში დარჩენილია დაახლოებით 50 ათასი სამხედრო მოსამსახურე, აქედან ბრძოლა ვისაც შეუძლია, მხოლოდ 10 ათასია,

„ამ რაოდენობით ვის უნდა შეებრძოლონ? საფრანგეთში არანაკლებ სავალალო მდგომარეობაა, წარმოებაც არ არის, ახლა ყველაფერს ნულიდან რომ იწყებენ, ამას წლები დასჭირდება. ამიტომ თქვა გერმანიის დაზვერვის პირველმა პირმა, თუ უკრაინაში ომი გასტანს 2029-30 წლამდე, მანამდე ძალიან დაბალია რისკი იმისა, რომ ევროპას თავს დაესხას რუსეთი. ეს ნიშნავს, რომ ევროპამ ყველაფერი უნდა გააკეთოს უკრაინაში ომის გასაგრძელებლად. რატომ უნდოდათ მეორე ფრონტი საქართველოში ასე მწარედ ყველა მხრიდან? იმიტომ, რომ საქართველოც ჩაბმულიყო ომში, ოღონდ ევროპა გადარჩენილიყო. ბალტიისპირეთი რატომაა ასე მოწადინებული, ოღონდ რაღაც მომხდარიყო საქართველოში?! პოდოლიაკმა მხოლოდ შარშან სექტემბერში ამოღერღა, არა, უნდა შევეგუოთ, რომ მეორე ფრონტი არ გაიხსნება. მანამდე იმედი ჰქონდათ, პრაქტიკულად, არჩევნებამდე იმედოვნებდნენ, რომ მაინც რაღაც მოხდებოდა, რასაც ჰპირდებოდა ჩვენი ოპოზიცია. ასე რომ, ომი არ იქნება ბრიუსელსა და რუსეთს შორის, მაგრამ აშინებენ ევროპის მოსახლეობას, რომ მოტივაცია აუმაღლონ“, - აცხადებს პეტრე მამრაძე.