საგამოძიებო კომისიაზე გამოუცხადებლობა სისხლის სამართლის კოდექსით დასჯადი ქმედებაა და ის ერთ წლამდე ვადით თავისუფლების აღკვეთას, ან ჯარიმას ითვალისწინებს. თბილისის პროკურატურამ „ლელოს“ ლიდერს, მამუკა ხაზარაძეს ბრალდება წარუდგინა. ხაზარაძეს ბრალი წარედგინა სისხლის სამართლის კოდექსის 349-ე მუხლით, რაც ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

პროკურატურამ მამუკა ხაზარაძის წინააღმდეგ აღკვეთის ღონისძიების გამოყენებაზე სასამართლოს უკვე მიმართა. თბილისის საქალაქო სასამართლოს მოსამართლემ არსენ კალატოზიშვილმა სხდომა დღეს, 2 აპრილს, 13:00 საათზე ჩანიშნა. პროკურატურაში დაიბარეს „ლელოს“ კიდევ ერთი ლიდერი ბადრი ჯაფარიძე, რომლის განცხადებით, მზად არის, მაგისტრატ მოსამართლესთან გამოცხადდეს.

„თბილისის პროკურატურიდან დამიკავშირდა გამომძიებელი მარტა ყიყინაშვილი. მოწმის სახით სურთ ჩემთან გასაუბრება. პირველ რიგში, მათ მიერ გამოგზავნილ წერილში არ არის მითითებული, თუ რომელი სისხლის სამართლის საქმესთან დაკავშირებით სურთ ჩემი მოწმის სახით გამოკითხვა. ეს ყველაფერი მხოლოდ ჩემი ადვოკატის განხორციელებული სატელეფონო ზარის შედეგად დაზუსტდა. რა თქმა უნდა, აღნიშნული გამოკითხვა უკავშირდება ე.წ. პარლამენტის დროებითი საგამოძიებო კომისიის მიმართვის საფუძველზე დაწყებულ უსაფუძვლო გამოძიებას“, - აცხადებს ბადრი ჯაფარიძე, რომელსაც, დიდი ალბათობით, პროკურატურა ბრალს 349-ე მუხლით წარუდგენს.

რაც შეეხება ხაზარაძეს, აცხადებს, რომ რა სასჯელიც არ უნდა იყოს, ეს ვერ შეაცვლევინებს იმ დამოკიდებულებას, რომ „ქვეყანა მიტაცებულია“, „არჩევნები მიტაცებულია“ და რომ „ქვეყანა გადასარჩენია“. მისი თქმით, კომისია არის ცირკი, რომელიც ქვეყნის ეროვნული ინტერესების, სამხედროებისა და დაღუპულ გმირების დისკრედიტაციას ახდენს.

„პროკურორმა ბრალი წამიყენა. გვეცოდინება სასამართლოზე თუ რას მოიცავს ეს ბრალეულობა. რა სასჯელიც არ უნდა იყოს განზრახული, ეს ვერ შემაცვლევინებს იმ დამოკიდებულებას, რომ ქვეყანა მიტაცებულია და ქვეყანა გადასარჩენია. ამიტომ ბრძოლა იქნება ბოლომდე. ჩვენი ქვეყანა სწრაფ გადატვირთვას საჭიროებს. მოთხოვნები ახალი არჩევნების დანიშვნისა და პოლიტპატიმრების გათავისუფლების შესახებ, კვლავ ძალაშია.

ეს პარლამენტი არის არალეგიტიმური, მთავრობა არალეგიტიმურია, კომისია დაკავებულია პოლიტიკური პარტიის, კერძოდ ჩემი, ბადრი ჯაფარიძისა და ჩვენი თანამებრძოლების დისკრედიტაციით. ნებისმიერ სასამართლოში, მიუხედავად იმისა, რომ სასამართლო და პროკურატურა ბიძინა ივანიშვილსა და მურუსიძის დაქვემდებარებაშია, მზად ვარ ნებისმიერ კითხვას პასუხი გავცე“, - განაცხადა მამუკა ხაზარაძემ.

„ლელოს“ ლიდერების გარდა კომისიაზე არ გამოცხადდნენ ირაკლი ოქრუაშვილი, გიორგი კანდელაკი, გიორგი თარგამაძე, რომელთა შესახებ პროკურატურა იმსჯელებს. საგამოძიებო კომისიასთან თანამშრომლობას არ აპირებს გივი თარგამაძე, რომელიც ხელმძღვანელობდა 2008 წლის აგვისტოს ომის მოვლენებს და მეტიც, იყო ერთ-ერთი ის სამოქალაქო პირი, რომელიც გასცემდა ბრძანებას სამხედრო მოქმედებებთან დაკავშირებით. თარგამაძემ კომისიის წევრებზე უკეთესად იცის მისი დანაშაულის შესახებ, შესაბამისად, აცხადებს, რომ კომისიაზე არ მივა.

„ეს კომისია რომ შექმენით, მაშინვე დავწერე, ჩემდა თავად მანდ მიმსვლელის დედაცო. ახლა დილაადრიან ფოსტას რომ მოსაწვევი მოატანინეთ, რა იფიქრეთ, საკუთარ დედას პატივს აღარ სცემსო? იმისი არ იყოს - ახლა ეს რომ მოიყვანეთ, ამ ქვევრს რა, შეეშინდებოდა და ყელი გაუგანიერდებოდაო? ამ რუსის ქალის პირადი წერილის საფუძველზე შექმნილ კომისიაზე მოვიდე? მაგ ინტერვიუს მერე რუსებმა ძებნაში რომ გამომაცხადეს, სობარ სუზარი საჯაროდ სწუხდა - რადგან, სამწუხაროდ, საქართველოს კონსტიტუციაში ჩანაწერი არ გვაძლევს გადაცემის უფლებას, ეგებ რუსეთის საგამოძიებო კომიტეტის ჯგუფი შემოვუშვათ და აქ, ადგილზე დაკითხონო.

ახლა უნდა, მაგათი შედგენილი კითხვარით თავად დამკითხოს? ხო, მართლა, ადამიანის უფლებები მე არ მებარა, მაგას ებარა, მანდ გიზით და რამე თუ გაინტერესებთ, მაგას ჰკითხეთ. უსაფრთხოება ებარა შრომის ინსპექციას, მე უშიშროება მებარა, გენიოსებო. ამაფეთქეთ. თქვენი ხელიდან მკვდარი ვარ. ხოდა, მაგ კომისიაზე თეფში დაატრიალეთ, ეგებ ჩემი სული გამოგეცხადოთ. თან თქვენს მთავარ ჩეჩმას უყვარს ეგეთი რაღაცები“, - წერს გივი თარგამაძე.

პოლიტიკური მოტივებით დევნაზე საუბრობენ რადიკალური ოპოზიციის წარმომადგენლები. მაგალითად, „ნაციონალური მოძრაობის“ წევრი გიორგი ვაშაძე თვლის, რომ რეჟიმი ცდილობს, ყველა დასაჯოს, ვინც მის სიცრუესა და უსამართლობას არ ეგუება, მაგრამ არ გაუვა.

„სრული სოლიდარობა მამუკა ხაზარაძეს. მამუკა ხაზარაძის წინააღმდეგ მიმდინარე პროცესი ცალსახად პოლიტიკური ანგარიშსწორებაა და არავითარი კავშირი არ აქვს სამართალთან. რეჟიმი ცდილობს, ყველა დასაჯოს, ვინც მის სიცრუეს და უსამართლობას არ ეგუება, მაგრამ ეს არ გაუვა. ივანიშვილი ამ ბრძოლას ვერ შეაჩერებს და ის აუცილებლად დამარცხდება“ - წერს გიორგი ვაშაძე.

უპირობო სოლიდარობას უცხადებს მამუკა ხაზარაძეს „ნაციონალური მოძრაობის“ წევრი თინა ბოკუჩავა, მაგრამ დარწმუნებულია, რომ მასაც ვერ შეაშინებს „ივანიშვილის რეჟიმი“, რადგან, მისი თქმით, სასწორზე დევს ქვეყნის სუვერენიტეტი, სახელმწიფოებრიობა და შვილების მომავალი.

„ნაციონალური მოძრაობის“ დამფუძნებელი, ამ ქვეყნის მესამე პრეზიდენტი, რომელმაც ჩვენს ქვეყანას გაუკვალა გზა ევროატლანტიკური სტრუქტურებისკენ, მეოთხე წელია პოლიტიკურ ტყვეობაში იმყოფება, ამიტომ პოლიტიკური ნიშნით პოლიტიკოსების დევნა ჩვენთვის უცხო არ არის. ჩვენ ვართ სრულად სოლიდარული აბსოლუტურად ყველა პოლიტიკური ლიდერების მიმართ, რომლებიც იდევნებიან პოლიტიკური ნიშნით, ასეთი პოლიტიკური ლიდერი არის მამუკა ხაზარაძე“, - განაცხადა თინა ბოკუჩავამ.

ანალიტიკოს დავით ჩიხელიძის განცხადებით, საპარლამენტო საგამოძიებო კომისიისთვის უნდობლის გამოცხადება საკუთარი დანაშაულის აღიარება არის. ოპოზიციის ნარატივი, რომ კომისია რუსულ საქმეს აკეთებს, ერთადერთ მიზანს, კომისიის რეპუტაციის დაზიანებას და მათი მუშაობის დისკრედიტაციას ემსახურება.

„ჭეშმარიტებას ეროვნება და კუთვნილება არ გააჩნია, სიმართლე ყველასთვის ერთნაირი მოცემულობაა, კომისია ფაქტებზე დაყრდნობით, ცდილობს პირუთვნელი სიმართლე დაადგინოს, სიმართლე რომელშიც ეჭვს ვერავინ შეიტანს! ადამიანთა ჯგუფი, რომლებიც საგამოძიებო კომისიაზე არ ცხადდებიან, ცალსახად დამნაშავენი არიან, მათ იციან, რომ კომისიის მიერ დასმულ შეკითხვებს ვერ უპასუხებენ და საზოგადოება თვალნათლივ დაინახავს მათ დანაშაულს, სწორედ საკუთარი დანაშაულის გამო არ მიდიან კომისიაზე!

მაგალითისთვის, ხაზარაძე და გიორგი თარგამაძე ავიღოთ, კომისიაზე გამოკითხული ადამიანების აბსოლუტური უმრავლესობა ამბობს, რომ მათი გაკოტრების, ქონების გადაფორმების თუ ბიზნესის წართმევის საქმეში ფიგურირებს „თიბისი ბანკი“, რომელიც, გარკვეულწილად, სახელმწიფოს დანამატს წარმოადგენდა და სახელმწიფოსთან ერთად უკანონო საქმიანობას ახორციელებდა, ცალსახად იკვეთება, რომ „თიბისი ბანკი“ სახელმწიფოს დანამატს წარმოადგენდა. აღნიშნულის ფონზე საზოგადოებაში უამრავი ლეგიტიმური კითხვა დაგროვდა, რომელზე პასუხიც გაცემაც მამუკა ხაზარაძეს დიდ პრობლემებს შეუქმნის, რადგან ეს დანაშაულის აღიარებას ნიშნავს“, - აცხადებს დავით ჩიხელიძე.

რაც შეეხება პროკურატურის პოზიციას, ანალიტიკოსის განცხადებით, სახეზე გვაქვს კანონის დარღვევა, რაზეც პროკურატურას შესაბამისი რეაგირება ჰქონდა.

„პროკურატურის პრეროგატივაა სასამართლოს, აღმკვეთი ღონისძიების სახით პატიმრობის გამოყენების შუამდგომლობით მიმართავს თუ ჯარიმით შემოიფარგლება. იგივე გიორგი თარგამაძის შემთხვევას რომ დავუბრუნდეთ, მან ხელი მოაწერა რეზოლუციას, რომლითაც აღიარებს, რომ ომი საქართველომ დაიწყო, კომისიაზე აღნიშნული ფაქტის შესახებ საუბარი, რა თქმა უნდა, მისთვის მიუღებელია, რადგან დანაშაულის აღიარება მოუწევს“, - აცხადებს for.ge-სთან საუბრისას დავით ჩიხელიძე.

უსაფრთხოების საკითხებში ექსპერტის დავით კუხალაშვილის განცხადებით, პირველ რიგში, ჩვენ აუცილებლად უნდა დავუბრუნდეთ ისტორიას, რომელიც უკავშირდება „ნაციონალური მოძრაობის“ ხელისუფლებას.

„რა მოხდებოდა იმ პირობებში „ნაცმოძრაობას“ რომ დაეწყო ასეთი პროცესები და იქ ვინმე არ მისულიყო? ძალადობის განსაკუთრებული აქტები იქნებოდა იმ ადამიანების მიმართ ჩადენილი, რომლებიც არ მივიდოდნენ. ის, რომ მმართველობებს შორის არის განსხვავება, ეს ძალიან კარგი არის. მეორე და მნიშვნელოვანი გახლავთ ის გარემოება, რომ ჩვენ ამ წუთში ვმოქმედებთ - სჯობს გვიან, ვიდრე არასდროს, რაც ვთვლი, რომ საკმაოდ დამაზიანებლად მოქმედებს ოპერატიულ ვითარებაზე. არგამოცხადება, ეს არის, პრაქტიკულად, დაუმორჩილებლობის გამოცხადება საქართველოს საკანონმდებლო ორგანოს მიმართ.

ადამიანებს, რომლებიც უარს ამბობენ ამ პროცესში მონაწილეობაზე, ალბათობის მაღალი ხარისხით, აქვთ ისეთი დანაშაული ჩადენილი, რომ შესაძლებელია საქართველოს გენერალურ პროკურატურაში ავტომატურ რეჟიმში დაიწყოს სამართლებრივი დევნა მათ მიმართ, თუ უკვე დაწყებული არ არის. სამოქალაქო პირების ჩართულობაში, პირველ რიგში, შეიძლება გამოიკვეთოს საკუთარი უფლებამოსილების გადამეტება. ამ ტიპის მოქმედება მათ მოქმედებებში აუცილებლად გამოიკვეთება.

ვფიქრობ, რომ კომისიაზე არგამოცხადება საბოტაჟს უწყობს ხელს, მაგრამ მე არ ვთვლი ამას ძალიან დიდ ტრაგედიად. ახალი არაფერი არ ხდება. საქართველოს გენერალურ პროკურატურას აქვს შესაძლებლობა, რომ იმ მოვლენებიდან და ფაქტებიდან გამომდინარე, რაც ღია წყაროებში გამოქვეყნდა და რაც ასევე დახურულ ინფორმაციას განეკუთვნება, დაიწყოს სამართლებრივი დევნა იმ პირების მიმართ, ვინც უარს აცხადებს საპარლამენტო კომისიაზე გამოცხადებაზე“, - აცხადებს for.ge-სთან საუბრისას დავით კუხალაშვილი.