ნიკოლ ფაშინიანს დაყოვნება არ სურს და ნახევრად ხუმრობით აცხადებს, რომ ევროკავშირში გაწევრიანებას წელსვე გეგმავს.

სომხეთმა შესაძლოა, ევროკავშირში გაწევრიანების შესახებ რეფერენდუმი დაჩქარებულად ჩაატაროს. სომხეთის ხელისუფლება აცხადებს, რომ სომეხი ხალხის სურვილი ევროკავშირში ყოფნაა. ამ რამდენიმე დღის წინ სომხეთის პარლამენტში მიმდინარეობდა დისკუსია ევროკავშირში წევრობის საკითხზე რეფერენდუმის ჩატარების შესახებ.

ცნობილია, რომ ოთხმა პოლიტიკურმა პარტიამ პრემიერ-მინისტრ ნიკოლ ფაშინიანს ქვეყანაში სახალხო რეფერენდუმის ჩატარების მოთხოვნით მიმართა, რომელიც ევროკავშირში გაწევრიანებას ეხება.

რა სიურპრიზს უმზადებს რუსეთზე გულაცრუებული ფაშინიანი პუტინს და საბოლოოდ კარგავს თუ არა პუტინი სამხრეთ კავკასიას?!

ანალიტიკოსი ნიკა ჩიტაძე მიიჩნევს, რომ ევროკავშირში სომხეთის გაწევრიანებამდე შორი გზა არის გასავლელი, გაწევრიანებასთან დაკავშირებით ჯერ ნაადრევია საუბარი, მაგრამ სავსებით შესაძლებელია, რომ სომხეთმა კანდიდატის სტატუსი მიიღოს.

„ევროკავშირში გაწევრიანებასთან დაკავშირებით რეფერენდუმის ჩატარება ჭკვიანური ნაბიჯია სომხეთის მხრიდან, რადგან უშუალოდ სომხეთის მოსახლეობამ უნდა დააფიქსიროს თავისი ნება, დღეს დიდი შესაძლებლობაა, სომხეთის მოსახლეობის უმრავლესობამ მხარი დაუჭიროს ქვეყნის ევროკავშირში გაწევრიანებას, რადგან მათ რუსეთის რეალური სახე დაინახეს. სომხეთის ეროვნული უშიშროების მდივანმაც განაცხადა, რომ ფაქტობრივად, რუსეთმა დაიკავა ყარაბაღი, ანუ რუსეთმა აუნთო მწვანე შუქი აზერბაიჯანს და ამიტომაც დაიწყო ომი. აქედან გამომდინარე, ვფიქრობ, ევროპულ სტრუქტურებში სომხეთის ინტეგრაციის მიმართულებით პროცესი დადებითად წარიმართება, თუმცა ამას წლები დასჭირდება, იგივე ეხება საქართველოს, უკრაინას და მოლდოვას“, - აღნიშნა ნიკა ჩიტაძემ ჩვენთან საუბრისას.

ანალიტიკოსი ფიქრობს, რომ რუსეთი ნელ-ნელა კარგავს სამხრეთ კავკასიას, კერძოდ, რუსეთი უკვე კარგავს სომხეთს, ამიტომაც შეიძლება კიდევ უფრო მეტად ჩაებღაუჭოს საქართველოს. რაც შეეხება აზერბაიჯანს, მიუხედავად იმისა, რომ აზერბაიჯანი ევროკავშირის წევრობის სურვილს არ ამჟღავნებს, ფაქტია, რომ აზერბაიჯანიც ბევრად დამოუკიდებელია რუსეთისგან, ვიდრე თუნდაც ყარაბაღის მეორე ომამდე იყო. ყარაბაღის მეორე ომამდე განიხილებოდა, რომ კონფლიქტის გადაწყვეტის გასაღები იყო რუსეთში და რუსეთს უნდა აენთო მწვანე შუქი. პლუს ამას, აზერბაიჯანმა გაწმინდა ის ტერიტორიები, რომელსაც აკონტროლებდნენ რუსეთის ე.წ. სამშვიდობო ძალები. ასე რომ, აზერბაიჯანი და სომხეთი დღეს რუსეთზე ნაკლებად არიან დამოკიდებულნი.

რაც შეეხება გიუმრის ბაზას, ნიკა ჩიტაძე ამბობს, რომ ეს პრობლემა ისევ არსებობს და თურქეთიდან სომხეთის საზღვრამდე რუსი მესაზღვრეები კვლავაც არიან განთავსებულნი. თუმცა გამორიცხული არ არის, სომხეთმა მოითხოვოს რუსული ბაზების გაყვანა.

ანალიტიკოსი იგორ კვესელავა for.ge-სთან საუბრისას აცხადებს, რომ, ერთი შეხედვით, სომხეთს არაფერი აქვს, მაგრამ საქართველოსგან განსხვავებით, უზარმაზარი დიასპორა მაინც ჰყავს ამერიკაში, საფრანგეთში და სხვაგან. ფაშინიანი კი განსწავლული, პოლიტიკისთვის დაბადებული კაცია.

„მე მას ცოტა სხვანაირად ვუყურებდი, მაგრამ თანდათან დავაკვირდი და სულ მალე ჩემი წიგნი გამოვა აღმოსავლეთისა და სამხრეთ კავკასიის შესახებ, ფაშინიანი შესანიშნავად თამაშობს პოლიტიკურად. გამორიცხული არ არის, სომხეთი ჩვენზე ადრეც შევიდეს ევროკავშირში სწორედ უზარმაზარი დიასპორის წყალობით. რა თქმა უნდა, აზერბაიჯანს ევროკავშირი არ აინტერესებს და დაკავშირებულია თურქეთთან, რომელსაც, თავის მხრივ, რამდენი ხანია, ევროკავშირში შესვლა სურს, მაგრამ არ შეჰყავთ. ფაშინიანმა თანდათანობით დაიწყო დასავლეთისკენ ყურება და, შესაბამისად, სამხრეთ კავკასიაში რუსეთმა დაკარგა თავისი გავლენა. ცხადია, რუსეთს აქვს მცირეოდენი გავლენა სომხეთზე, გარკვეულწილად, რუსეთს საქართველოზეც აქვს გავლენა, მაგრამ ეს ის გავლენა არ არის, რომელიც აბსოლუტურ ჩარევას ნიშნავს. რუსეთს გავლენა აქვს აზერბაიჯანზეც, მაგრამ ეს სრულებით არ ნიშნავს, აზერბაიჯანში რაიმეს განაგებდეს რუსეთი“, - აცხადებს იგორ კვესელავა და, შეკითხვის საპასუხოდ, სომხეთი რითი დააინტერესებს ევროკავშირს, განმარტავს, რომ პოლიტიკა ისეთი რამეა, შეიძლება 1-2 წელი საინტერესო ქვეყანა არ იყოს სომხეთი, მაგრამ შემდგომ გამოჩნდება მისი საჭიროება.

ანალიტიკოსის აზრით, ევროკავშირი სომხეთით დაინტერესებული იმიტომაცაა, რომ სამხრეთ კავკასიაში მას ეყოლება მხარდამჭერი სახელმწიფო. აქ მაინცდამაინც ფულზე კი არ არის საუბარი, აქ პოლიტიკურ გავლენაზეა საუბარი. ამ ყველაფერს აკეთებს საფრანგეთი. დიდი პოლიტიკური გავლენა აქვს სომხეთს საფრანგეთზე. ეს განპირობებულია იმ დიასპორით, რომელიც სომხეთს ჰყავს. პოლიტიკა დუმილის ხელოვნებაა, პოლიტიკა ზოგჯერ უკანდახევაცაა, რაც სომხეთს კარგად გამოსდის.

საგარეო საქმეთა ყოფილი მინისტრი ირაკლი მენაღარიშვილი მიიჩნევს, რომ, რა თქმა უნდა, რუსეთისთვის მიუღებელია სომხეთის ევროკავშირში გაწევრიანება, თუმცა სომხეთის გაწვრიანება ევროკავშირში წელს არარეალისტურია, სამომავლოდ ეს სავსებით რეალურია.

„გონივრულია ისიც, რომ რეფერენდუმზე სომეხ ხალხს უნდა გამოჰკითხონ, სურთ თუ არა ევროკავშირში გაწევრიანება, რადგან ხალხის გადაწყვეტილებით უნდა დაფიქსირდეს ეს სურვილი. ყარაბაღის მოვლენების განვითარებამ გვაჩვენა, რომ რუსეთისადმი სომხეთის ნდობა იყო უიმედო, უსაფუძვლო. იმედი მაქვს, სომეხ ხალხს კეთილგონიერება ეყოფა და ევროპულ გზას აირჩევს“, - გვითხრა ირაკლი მენაღარიშვილმა.