საქართველოს მოქმედმა პრეზიდენტმა, მიხეილ სააკაშვილმა სახელმწიფოს განვითარებაში შეტანილი წვლილისთვის სხვადასხვა სფეროს წარმომადგენლები დააჯილდოვა. ინფორმაცია პრეზიდენტის Facebook-ის საშუალებით გავრცელდა. Ambebi.ge უცვლელად გთავაზობთ მიხეილ სააკაშვილი ოფიციალურ Facebook-ის გვერდზე გამოქვეყნებულ განცხადებას.

"საქართველოს პრეზიდენტმა მიხეილ სააკაშვილმა საპრეზიდენტო ვადის ბოლო დღე გამორჩეულ ადამიანებს დაუთმო, ადამიანებს, რომლებმაც საკუთარი პროფესიული საქმიანობით დიდი წვლილი შეიტანეს სახელმწიფოს ჩამოყალიბებასა და განვითარებაში და მნიშვნელოვან წარმატებებს მიაღწიეს თავიანთი მოღვაწეობის სფეროში, ასევე საქართველოს მეგობრებს, რომლებიც ჩვენს ქვეყანას დაეხმარნენ ტერიტორიული მთლიანობისთვის ბრძოლაში და საერთაშორისო ასპარეზზე ადგილის დამკვიდრებაში.
საქართველოს მეოთხე პრეზიდენტის ინაუგურაციამდე ერთი დღით ადრე, მადლიერებისა და პატივისცემის ნიშნად, ამ ადამიანებს, რომელთა შორის ცნობილი მეცნიერებიც არიან, მიხეილ სააკაშვილმა უმაღლესისახელმწიფო ჯილდოები გადასცა.

აჭარაში განხორციელებული უპრეცედენტო სამშენებლო პროექტებისთვის, ასლან აბაშიძის სეპარატისტული რეჟიმის მიერ გაპარტახებული აჭარის ქართულ სახელმწიფოში სრულად ინტეგრაციისა და ევროპის მასშტაბით ყველაზე სწრაფად განვითარებად რეგიონად ქცევისათვის, "აჭარული სასწაულის" შექმნაში შეტანილი უდიდესი წვლილისათვის, პრეზიდენტმა ლევან ვარშალომიძე დავით აღმაშენებლის ორდენით დააჯილდოვა.

იმის გათვალისწინებით, რომ ისტორიის ცალკე აღებულ იმავე მონაკვეთში თბილისი არასდროს გამხდარა ისეთი აღმშენებლობის მომსწრე, როგორიც დედაქალაქის ისტორიაში პირველად პირდაპირი წესით არჩეული მერის, გიგი უგულავას, დროს, რისი ნიმუშიცაა თბილისის აღდგენილი უბნები, ქალაქის შემოვლითი რკინიზა, ახალი კულტურის ცენტრები და გზები, საქართველოს პრეზიდენტმა დავით აღმაშენებლის ორდენით დააჯილდოვა თბილისის მერი გიორგი უგულავა.

წმინდა გიორგის სახელობის გამარჯვების ორდენი გადაეცა დავით ბაქრაძეს, რომლმაც უმნიშვნელოვანესი როლი შეასრულა ქართული პარლამენტარიზმის ისტორიაში. მისი თავმჯდომარეობის დროს ქუთაისი საპარლამენტო დედაქალაქად იქცა. უმნიშვნელოვანესია, აგრეთვე, ბაქრაძის მონაწილეობა საქართველოს საერთაშორისო პოზიციების განმტკიცებაში.

წმინდა გიორგის სახელობის გამარჯვების ორდენებით ასევე დაჯილდოვდნენ საქართველოს მასშტაბით სამშენებლო პროექტების კოორდინატორი და თბილისის ვიცე-მერი დავით ნინიძე; საქართველოს უზენაესი სასამართლოს თავმჯდომარე კონსტანტინე კუბლაშვილი, საკონსტიტუციო სასამართლოს თავმჯდომარე გიორგი პაპუაშვილი და მუსიკოსი ნიაზ დიასამიძე.

ვახტანგ გორგასლის I ხარისხის ორდენი გადაეცა სსიპ- სახელმწიფო სამხედრო სამეცნიერო-ტექნიკური ცენტრის "დელტა"-ს ყოფილ დირექტორს რევაზ ჭარბაძეს. ვახტანგ გორგასლის I ხარისხის ორდენებით დაჯილდოვდნენ, ასევე, ამერიკელი გენერალი დევიდ პეტრეუსი და ადმირალი ჯეიმს სტავრიდისი.

ღირსების ორდენებით დაჯილდოვდნენ იტალიის რესპუბლიკის ბირთვული ნაციონალური ენერგიის ცენტრის "სერნის" ექსპერიმენტატორი, ფიზიკოსი თეიმურაზ ლომთაძე, ასევე საზოგადოებრივი მაუწყებლის პირველი არხის საინფორმაციო სამსახურის უფროსი სოფიო მოსიძე და საზოგადოებრივი მაუწყებლის მეორე არხის გენერალური პროდიუსერი დონარა (დოდო) შონავა.

რუსთაველის პრემია სიკვდილის შემდეგ მიენიჭა ქართველ მომღერალს, პედაგოგსა და ქართველთა მიერ "საქართველოს ხმად" აღიარებულ ჰამლეტ გონაშვილს.

თამარ მეფის ორდენებით დაჯილდოვდნენ: ცნობილი პიანისტი ხატია ბუნიათიშვილი, ტელეკომპანიის TV3-ს ტოქშოუ "დიდი პოლიტიკის" ავტორი და წამყვანი ინგა გრიგოლია, ტელეკომპანია "რუსთავი 2"-ის ტოქშოუ "პოზიციის" ავტორი და წამყვანი ნინო შუბლაძე, ტელეკომპანია "რუსთავი 2"-ის ტოქშოუ "პროფილის" ავტორი და წამყვანი მაია ასათიანი, ტელეკომპანია "რუსთავი 2"-ის გასართობი ტოქშოუ "ნანუკა ჟორჟოლიანის შოუ" ავტორი და წამყვანი ნანა ჟორჟოლიანი.

წმინდა ნიკოლოზის ორდენები გადაეცათ "თი-ბი-სი" ბანკის სამეთვალყურეო საბჭოს თავმჯდომარეს მამუკა ხაზარაძეს და ჩაჩავას სახელობის პერინატალური მედიცინისა და მეანობა-გინეკოლოგიის სამეცნიერო-კვლევითი ინსტიტუტის დირექტორი ელგუჯა გოცირიძეს.

წმინდა ნიკოლოზის ორდენები გადაეცათ სასულიერო პირებს: დეკანოზ მიქაელს (მაჟარა ასათიანი); ბათუმის, ლაზეთისა და ჩრდილოეთ ამერიკის მიტროპოლიტს, მეუფე დიმიტრის; საქართველოს ბაპტისტურ-ევანგელისტური ეკლესიის მთავარეპისკოპოსს მალხაზ სონღულაშვილს; საქართველოს მართლმადიდებელი ეკლესიის დასავლეთ ევროპის ეპარქიის მიტროპოლიტს, მეუფე აბრამს (ამირან გარმელია).

ოქროს საწმისის ორდენით დაჯილდოვდა ამერიკის შეერთებული შტატების ყოფილი სახელმწიფო მდივანი ჰილარი კლინტონი.

ბრწყინვალების საპრეზიდენტო ორდენები გადაეცათ დსთ-ის სახელმწიფოთა ლიდერებს.

საქართველოს სახელმწიფო ჯილდოები სულ ათასზე მეტმა პირმა მიიღო".