უძრავი ქონების თავბრუდამხვევი გაძვირების პერიოდი შედარებით ჩაცხრა, თუმცა ბაზარზე მაღალი ფასები კვლავ ნარჩუნდება. ამის მთავარი განმაპირობებელი ფაქტორი ბინის დაქირავების ღირებულებაა, რომელიც ჯერ კიდევ პიკურ ნიშნულზეა. სანამ საიჯარო ფასი არ დაკორექტირდება, გასაყიდი ბინების გაძვირება გაგრძელდება. ცვლილება მხოლოდ რამდენიმე თვის შემდეგ იქნება მოსალოდნელი.

„თიბისი კაპიტალის“ ასოცირებული მკვლევარის გიორგი მჟავანაძის თქმით, ოქტომბერი დადებითი ტენდენციებით გამოირჩეოდა და წინა წლის ანალოგურ პერიოდთან შედარებით, ტრანზაქციები 34%-ით არის გაზრდილი. რაც შეეხება გასაყიდ ფასს, მისი წლიური მაჩვენებელი 28%-ით არის გაზრდილი, ხოლო ბინების გაქირავების მაჩვენებელში 120%-იანი ზრდა შეინიშნება.

„ვვარაუდობთ, რომ ფასების ზრდა მომავალ წელსაც გაგრძელდება და ბოლოსთვის დასტაბილურება, ხოლო 2024 წლიდან ბაზარზე კლების მიმართულებით გარკვეული კორექცია იქნება, ამიტომ ნებისმიერი ინვესტორმა, რომელიც ინვესტიციებს ამ სექტორში ახორციელებს, ეს უნდა გაითვალისწინოს.

რაც შეეხება ზრდას, როგორც ქირა, ისე გაყიდვა, ერთმანეთთან მიბმულია, ჩვენ წელს ველოდებით, რომ ფასები წინა წელთან შედარებით საშუალოდ 15%-ით გაიზრდება და 2023 წელს კიდევ დამატებით 18%-იანი ზრდა გვექნება, თუმცა ქირის ფასში ბევრად უფრო მაღალი ზრდაა.

როდესაც ქირა ასე მნიშვნელოვნად არის გაზრდილი, სწორედ ეს იწვევს უძრავი ქონების მომგებიანობის ზრდას, ანუ ბინების შეძენა უფრო შემოსავლიანი ხდება, რაც გაყიდვის კუთხით ინტერესს ზრდის. სანამ გაქირავების ფასი არ დაკორექტირდება, გასაყიდი ბინების ფასის ზრდა გაგრძელდება“, - აღნიშნა გიორგი მჟავანაძემ.

ახლა ბინებზე ფასი ყველა უბანში იზრდება. რაც შეეხება გაქირავებას, ოქტომბერში გასაქირავებელი ბინის ფასი გაიზარდა ყველა უბანში, გარდა მთაწმინდისა.

„რაც შეეხება მეორად და ახალ აშენებულ ბინებს, დღეის მდგომარეობით, მოთხოვნა ბევრად უფრო მაღალია მეორად ფართებზე, ისტორიულად ბაზარზე მეორადი უძრავი ქონების წილი 70%-ია, ეს ტენდენცია წელსაც გაგრძელდა და კიდევ უფრო გამძაფრდა, რადგან ქირაზე მოთხოვნა ძალიან დიდია“, - აღნიშნა მჟავანაძემ „კომერსანტის“ ეთერში.

რაც შეეხება ახალაშენებული ბინების ფასებს, ამ კუთხით სამშენებლო მასალების ფასები საკმაოდ გაზრდილია და ეს ტენდენცია მხოლოდ ომის ეფექტი არ არის. მასალაზე ფასის ზრდა ჯერ კიდევ 2019 წლიდან დაიწყო და მას შემდეგ დაახლოებით 50%-ით არის გაძვირებული, რაც მთლიან ბაზარზე ახდენს ზეგავლენას.

„ვხედავთ, რომ ეს ტენდენცია და სამშენებლო მასალების ფასის ზრდა, არა მხოლოდ ახალ ბინებს, არამედ ძველ აშენებულ ბინებსაც ეხება. როდესაც ვაკვირდებით ფასების ცვლილებას, აქ დაახლოებით ერთნაირი ტენდენცია შეინიშნება, თუმცა გამომდინარე იქიდან, რომ მეორად ბინებზე წლიურ ჭრილში მოთხოვნა უფრო გაზრდილია, ფასებიც შესაბამისად სწორედ ამ ბინებზეა გაზრდილი“, - აღნიშნა მჟავანაძემ.

უძრავი ქონების ბაზარზე ჯერჯერობით ისევ აჟიოტაჟური მდგომარეობა ნარჩუნდება. არსებულ ტენდენციებზე საუბრობს საქართველოს უძრავი ქონების ეროვნული ასოციაციის წევრი, საბროკერო კომპანია „კედარო ჯგუფის“ დამფუძნებელი ეკატერინე ჭიღლაძეც. მისი აზრით, გაქირავების ფასის ზრდა მოსალოდნელი აღარ არის.

„იჯარასთან დაკავშირებით ფასები მეტ-ნაკლებად დასტაბილურდა და ტენდენცია კლებისკენ მიდის. რაც შეეხება უძრავი ქონების რეალიზაციას, თბილისის მასშტაბით მოთხოვნა კვლავ დიდია და ღირებულებაც შესაბამისად, მაღალ ნიშნულზეა შენარჩუნებული. ასევე, გაზრდილია მოთხოვნა თბილისის შემოგარენში მიწის ნაკვეთის ყიდვასთან დაკავშირებით და ამის შესაბამისად, შესამჩნევია ფასების ზრდის ტენდენცია.

ბოლო პეროდში ჩვენს კომპანიაში შემოსული შეკვეთების გათვალისწინებით, თბილისში, მოთხოვნა გაიზარდა ჩუღურეთისა და ისნის რაიონებში“, - აღნიშნა ეკატერინე ჭიღლაძემ.