ტოჩინოშინმა ნაცუ ბაშოზე დადებითი ბალანსი გაინაღდა და რეიტინგში პროგრესი ექნება 

ტოჩინოშინმა ნაცუ ბაშოზე დადებითი ბალანსი გაინაღდა და რეიტინგში პროგრესი ექნება 

თამამად შეგვიძლია ვთქვათ, რომ ნაცუ ბაშო ლევან გორგაძისთვის წარმატებული გამოდგა, რადგან ქართველმა სუმოისტმა გაზაფხულის მეორე სუპერტურნირის დასრულებამდე 3 დღით ადრე, დადებითი ბალანსი გაინაღდა!

ტოჩინოშინი მე-12 საშეჯიბრო დღეს მე-12 მაეგაშირა მიოგირიუს შეხვდა და იორიკირის ილეთით აჯობა. ჩვენებურმა მეტოქისთვის მავაშში ხელის ჩავლება მოახერხა და დოჰიოდან გადაიყვანა. მან ორჯერ მოიპოვა მიჯრით მე-4 გამარჯვება. ეს წყვილის 31-ე დაპირისპირება იყო და ტოჩიმ ურთიერთშეხვედრებში მოგება-წაგების ბალანსი შეამცირა - 14:17.

გეტყვით, რომ ქართველ გოლიათს მიმდინარე ბაშოზე 8 მოგების წილ 4 მარცხი აქვს. მასზე უკეთესი შედეგით ჯერჯერობით მხოლოდ ტაკენოშო (10:2) და სიდანოუმი (9:3) გამოირჩევიან.

ჩვენებურს წინსვლა ელის, მისი მომდევნო მეტოქე კი მე-2 მაეგაშირა კირიბაიამა იქნება, რომელსაც აქამდე 7-ჯერ შეხვდა და უარყოფითი ბალანსი აქვს -3:4-ზე.